کارَلِ رسولَل 5
5
حَنانیا وِ سَفیرَه
1وِ امّا مِردی وَ نومِ حَنانیا بِی زَنِش سَفیرَه مِلکی نَه فِرُتِن، 2یِچِی وَ پیلِشَه که زنش هَم وَش خَوَر داشت وَگِرُت وِ تِنا یِه بَهر وَ وِه نَه آوُرد، نَها وَرِ پِی رسولَل. 3امّا پطرس وَش گُت: «ای حنانیا، سیچِه لِشتی شیطون طوری دِلِتَه پُر کِنِه که وَ روحالقدس دِرو کِنی وِ یِچِی وَ پیلِ زمینَه وَگِری سی خُوت؟ 4مَه نِهِی فِرُتَنِش این خُوت نَبی؟ وِ نِی بعدَ فِرُتَنِش هَم اختیارِ پیلِش مِنِه دَسِ خُوت نَبی؟ سیچِه مِنِه دِلت قَصتِ ای کارَ کِردی؟ تِ نَه وَ انسان، بلکم وَ خدا دِرو کِردی!»
5وختی حنانیا ای گَپَلَه اِشنُفت، اُفتا وَ زمین وِ جون دا! تَمومِ اونگَل که یِنَه اِشنُفتِن زَلَهتَرَک وابییِن. 6اوسِه یِهپارهای وَ جَوونَل اومَن جلو وُ وِّ نَه مِنِه کفن پیچَنان وِ بُردِن وَدَر، کِردِن زِرِ گِل.
7نِزِنگِ سه ساعت دِنداش، زنِش بیخَوَر وَ ای جریان اومَه داخل. 8پطرس وَش پُرسی: «وَم بِگِ بینُم مَه زمینَه وَ هَمی قیمت فِرُتیت؟»
سَفیرَه جواب دا: «بَلِه، وَ هَمی قیمت.»
9پطرس وَش گُت: «سیچِه بِی یَک، دَس وَ یکی کِردیت تا روحِ خدا نَه امتحان کِنیت؟ یِنَه بِیون، اونگَل که میرَتَه کِردِن زِرِ گِل هَمیسِه پاشون دَمِ دَرِه وِ تِنَه هَم ایبَرِن وَدَر.»
10دَرجا، سَفیرَه هَم اُفتا وَرِ پایَلِ پطرس وِ جون دا. وختی جَوونَل اومَن داخل، دییِن وِّ هَم مُردِه. پَ بُردِنِش وَدَر، طِی میرَش کِردِنِش زِرِ گِل. 11اوسِه ترسِ سختی اُفتا وَ جونِ تمومِ اونگَلی که مِنِه کلیسا بییِن وِ تَمومِ اونگَلی که یِنَه اِشنُفتِن.
نِشونهیَل وِ معجزهیَلِ رسولَل
12نشونهیَل وِ معجزهیَلِ زیادی وَ دَسِ رسولَل مِلِی مَردم ایابی وِ ایموندارَل هَمَشون یِهدل مِنِه اِیوونِ سِلِیمون دورِ یَک جَم ایابییِن. 13امّا وَ باقیِ مَردم کسی زَلَه نیکِه وَشون نِزِنگ وابو، هَرچَن تَمومِ مَردم مَهلی وَشون حُرمَت ایکِردِن. 14مِردَل وِ زَنَل دَسَه دَسَه ایمون ایاوُردِن وِ ری ایکِردِن وَ خداوند، 15تا جِیئی که حتی مَریضَلَه ایاوُردِن وَ مِیدونَلِ شهر وِ اونگَلَه ایخُونان وَ ری رَختِخوُیَل وِ تَختَل تا وختی پطرس وَ وُچِه رَی ایابو، لااَقَل سایَش بییُفتِه وَ ری یِهپارهایشون. 16وِ هَم مردم دَسَه دَسَه وَ شهرَلِ دورِبالِ اورشلیم اییومَن وِ مریضَل وِ اونگَلی نَه که گِرفتارِ روحَلِ ناپاک بییِن ایاوُردِن، وِ هَمَشون شفا ایگِرُتِن.
گیر اُفتایَنِ رسولَل
17امّا کاهنِ اعظم وِ تَمومِ هُمکارَلِش که وَ فرقۀ صَدّوقی بییِن، وَ زورِ حَسودی دَس وَ کار وابییِن 18وِ رسولَلَ گِرُتِن، وِردان مِنِه زندانِ شهر. 19امّا موقِی شُو، فرشتۀ خداوند دَرَلِ زِندانَه واز کِه وِ آوُردِشون وَدَر 20وِ گُت: «بِرِیت وِ مِنِه معبدِ خدا وِیسیت وِ پِیومِ ای حیاتِ تازَه نَه، تمام وُ کمال وَ مردم بِگِیت.»
21پَ گَکون بَنا وَ اوچیئی که وَشون گُتَه وابییَه بی، رَتِن وَ معبد وِ شروع کِردِن وَ تعلیم دایَنِ مردم.
وختی کاهن اعظم وِ هُمکارَلِش اومَن، اهلِ شورا وِ تمومِ شیخَلِ اسرائیلَ صیا کِردِن وِ عِدِهای نَه بِسی کِردِن تا رسولَلَ وَ زندان بیارِن. 22امّا وختی مأمورَل رَتِن مِنِه زندان، رسولَلَ نَجُسِن. پَ وَرگَشتِن، خَوَر دان که 23«دَرَلِ زندان سِفت بَسَه بی وِ ناتورَل هَم جلو دَرَل وِیسایَه بییِن. امّا وختی دَرَلَه واز کِردیم، هیشکَه نَه مِنِه زندان نَجُسیم.» 24بِی اِشنُفتَنِ ای خَوَر، فَرمُندۀ ناتورَلِ معبد وِ کاهنلِ گَپو حیرون وابییِن، وِ رَتِن مِنِه فکر که «عاقبتِ ای کار چه ایابو؟»
25مِنِه ای موقَع، یکی اومَه وَشون خَوَر دا، گُت: «اونگَلی که وِرِشون دایَه بیئیت مِنِه زندان، ایسِه مِنِه معبد وِیسانِه وِ مردمَه تعلیم اییِن.» 26پَ فَرمُندۀ ناتورَلِ معبد بِی مأمورَل رَتِن وِ رسولَلَ آوُردِن، امّا نَه بِی زور، سییِکِه زَلَشون ایرَت که مردم سنگسارِشون کِنِن.
27وختی رسولَلَ آوُردِن، اونگَلَه در برابرِ شورا سرِ پا واداشتِن. اوسِه کاهن اعظم وَشون پُرسی: 28«مَه وَ ایشا قَدَقَن نَکِردیم که دَ وَ ای نوم تعلیم نَئیت؟ وا ای حال ایشا اورشلیمَه بِی تعلیمَلِتون پُر کِردیتِه وِ ایخِیت خینِ ای مِردَ بِنیت وَ نامون.»
29پطرس وِ رسولَلِ دَ جواب دان: «ایما بایِس وَ جِی انسان خدا نَه اطاعت کِنیم. 30خِدِی بُویَل ایما، هَمو عیسی نَه که ایشا کَشیئیت وَ صلیب وِ کُشتیتِش، وَ مُردِهیَل زِندَه کِه 31وُ وِّ نَه وَ دَسِ راسِ خُوش بُرد بالا، سروَر وِ نجات دَهَندَه کِه، تا وَ قومِ اسرائیل مِجالِ توبَه وِ آمرزشِ گِنایَلَه بییِه. 32وِ ایما شاهِدَلِ ای کارَلیم، هَموطو که روحالقدس هَم هِسی، که خدا وِّ نَه دا وَ اونگَلی که وَش اطاعت ایکِنِن.»
33اونگَل وختی ای گَپَلَه اِشنُفتِن طوری تَش گِرُتِن که خواسِن اونگَلَه بِکِشِن. 34امّا مِردی وَ فرقۀ فَریسی، وَ نومِ گامالائیل، که معلمِ شریعت بی وِ هَمَه حُرمَتَش ایکِردِن، مِنِه مجلس وَریسا سَرِپا وِ دستور دا رسولَلَ چَن دَقَه بُویَرِن وَدَر. 35اوسِه وَ حاضرین گُت: «ای مِردَلِ اسرائیلی، حَواستون بو ایخِیت بِی ای مِردَل چه کِنیت. 36سییِکِه نِهِی ای روزَل، مِردی وَ نومِ تِئوداس وَریسا که اِدعا ایکِه کَسی یَه، وِ حدودِ چارصد نفر هَم مُریدِش وابییِن. امّا وِّ کُشتَه وابی وِ مُریدَلِش هَم همَشون پَخشِپَلا وابییِن. 37بعدَ وُّ، یهودایِ جلیلی مِنِه زمونِ سرشماری قیام کِه وِ یِهپارهای نَه وَ دینِ خُوش کَشی. وِّ هَم کُشتَه وابی وِ مُریدَلِش هَم پَخشِپَلا وابییِن. 38ایسِه وَ ای بابت هَم وَتون سفارش ایکِنُم که دَس وَ ای مِردَل وَگِریت وِ اونگَلَه بِلیت وَ حالِ خِشون. سییِکِه اَر نیت وِ کارَلِشون وَ انسان بو، بیگَمون رَه وَ جِیئی نیبَرِن. 39امّا اَر وَ خدا بو، نیتَریت اونگَلَه وَ بِین بُویَریت، وِ بَسا وَ ضدِ خدا هَم وَریسایَه بِیت!»
40پَ اونگَل قانع وابییِن، وِ رسولَلَ صیا کِردِن، شلاقِشون زَن وِ قَدَقَن کِردِن که دَ وَ نومِ عیسی چیئی نَگُن، اوسِه وَشون اجازَه دان که بِرَن.
41رسولَل بِی شایی وَ حضورِ اهلِ شورا رَتِن وَدَر، سییِکِه خِشونَه قابل دییِن که وَ خاطرِ او نوم بیحُرمت وابون. 42وِ هیچ روزی، چه مِنِه معبد وِ چه مِنِه حونهیَل، وَ تعلیم وِ بشارَت درموردِ یِکِه عیسی هَمو مسیحِ موعودِه، دَس نَکَشییِن.
Valið núna:
کارَلِ رسولَل 5: SLB
Áherslumerki
Deildu
Afrita
Want to have your highlights saved across all your devices? Sign up or sign in
@ 2024 Korpu Company