Matthew 10
10
1အဲနော့ ကိုယ်တော်ယေရှုဟ ဗြိတော်ဆယ့်နှေ့ပါးဝိုခေါ်ပီး ကောဆိုးဝါးဒွေဝို နှံထုဝို့န နာရောဂါဂူလုံးဝို ကုသစေနိုင်ဝို့ ခွမ့်အာဏာဝို ပေးတော်မူခဲ့လေရယ်။ 2ဗြိတော်ဆယ့်နှေ့ပါးရဲ့နော်မယ်ဒွေဟ ပေတရုဆိုပီးခေါ်ဝို ရှိမုန် န သူ့ညီအန္ဒြေ၊ ဇေဗေဒဲရဲ့သား ယာကုပ် န သူ့ညီယောဟန် 3ဖိလိပ္ပု န ဗာသောလမဲ၊ သောမ န ခွန်ကော့ခံသူမဿဲ၊ အာလဖဲရဲ့သား ယာကုပ် န သဒ္ဒဲ၊ 4မျိုးချစ်ပုဂ္ဂိုလ်ဆိုပီးခေါ်ဝို ရှိမုန် န ကိုယ်တော်ဝိုသစ္စာဖော့ဝိုလူ ယုဒရှကာရုတ်ဒို့ ဖြစ်ဂေ့ရယ်။ 5ကိုယ်တော်ယေရှုဟ ဗြိတော်ဆယ့်နှေ့ပါးဝို စေလွှတ်ပြီး မိတော်မူဇာဟ "လူမျိုးခြားဒွေရှေ့ဝို လမ်းဝိုသွားဂေ့န ရှမာရိနယ်သားဒွေရဲ့ ဗြို့ဝိုလဲဝမ်ဂေ့န။ 6အဲမိုစား ပျော့ဆုံးနေဝို သိုးဒွေမျိုးဖြစ်နေဝို အစ္စရေးလူမျိုးဒွေဆီဝို သွားဂေ့ပါ။ 7လမ်းခရီးမှာ 'ရွှေဗြို့တော်ရဲ့သာသနာတော်ဟ ပေါ်ထွန်းဝို့ လက်တစ်ကမ်းအလိုမှာ ရှေ့နေပြီဖြစ်ရယ်' ဆိုပီး ဟောပြောဂေ့လော့။ 8နာမကျန်းဖြစ်သူဒွေဝို ကုသပေးဂေ့ပြီး သေဝိုသူဒွေဝိုလဲ သက်ပလန်ရှင်စေလော့။ နာဂီးရောဂါသည်ဒွေဝိုလဲ စင်ကြယ်စေပြီး ကောဆိုးဝါးပူးကပ်ခံနေရသူဒွေဆီဟ ကောဆိုးဝါးဒွေဝိုလဲ နှံထုဂေ့လော့။ နန်းနို့ဟ အယ်မိုစွမ်းဒွေ ခမဲ့ရဝိုမျိုး ခြားလူဒွေဝိုလဲ ခမဲ့ကူညီဂေ့လော့။ 9နန်းနို့ရဲ့အိထဲမှာ ရွှေ၊ ငွေ၊ ကြေးဒန်းဂါးဒွေဝို ထည့်ရားဂေ့န။ 10လမ်းခရီးတွက် လွယ်အိ၊ အန်းဂီပို အဲမျိုးမုဘဲနေဆိုဝါ ခေနပ်ပို န တော်ဝှေးဒွေဝိုလဲ ယူဝါးဂေ့န။ ဟဲဖြစ်ရိနူးဆိုဝါ လုပ်လုပ်ဝိုသူတွက် ထိုက်တန်ဝို ဖိုးခဝို ရရှေ့လာလိမယ်ဖြစ်ရယ်။ 11ဟဲရာဗြို့ဝါဝိုမဆို နန်းနို့ဝမ်ဝိုခါမှာ အဲမိုဗြို့ဝါမှာ နန်းနို့ဝို လိုလိုလားလား ကြိုဆိုဝိုလူဝို ရှာဖွီပြီး အဲမိုဗြို့ဝါဟနေ မထွက်ခံထိ အဲမိုလူရဲ့အီမှာ တည်းခိုနေထိုင်ပါ။ 12အဲမိုလူအီဝိုဝမ်ဝိုခါမှာလဲ နှုဆစ်ဂေ့ပါ။ 13အဲမိုမိသားဇုဟ ကောချီးမြင်ဂလာပေးဇာန ထိုက်တန်ရယ်ဆိုဝါ အဲမိုမိသားဇုဟ ဘုရားရှင်ဆီဟ ကောကျိုးချမ်းသာဒွေဝို ရရှေ့ပါလိမယ်။ အယ်ဘေမဲ့ အဲမိုမိသားဇုဟ ထိုက်တန်ဘဲနေရယ်ဆိုဝါ ကောကျိုးချမ်းသာဒွေဟ သူ့နို့ပေါ်သက်ရော့မှာမုဝ။ 14ဇုံတယော့ဟ နန်းနို့ရဲ့ ဂါးဒွေဝိုနားထော်ဝို့ လက်မခံဘဲနေရယ်ဆိုဝါ အဲအီဟနေဖြစ်ဖြစ် အဲမိုဗြို့ဟနေဖြစ်ဖြစ် ထွက်ခွာလာဝိုခီမှာ နန်းနို့ရဲ့ခေဖဝါးမှာရှေ့ဝို ဖူမှုဒွေဝို ခါခလရစ်ဂေ့လော့။ 15နန်းနို့ဝို ငါမှန်ဇာဝိုပြောရမယ်ဆိုဝါ ရားစီရင်ဝိုနေ့မှာ ဘုရားရှင်ဟ အဲမိုဗြို့ဟလူဒွေထက် သောဒုံဗြို့န ဂေါမောရဗြို့မှာရှေ့ဝို လူဒွေဝို ပိုပီးသက်သက်ညှာညှာ စီရင်လိမယ်။ 16နားထော်ဂေ့လော့။ ငါဟ နန်းနို့ဝို ဝံပုလွေအုပ်ထဲဝို သိုးဒွေဝိုစေလွှတ်ဝိုမျိုး စေလွှတ်ဇာဖြစ်ရယ်။ အဲဂျော့ ဗွီဒွေဝိုမျိုး လီမာပါးနပ်ပြီး ချိုးငှက်ဒွေဝိုမျိုး ရိုးသားဖြူစင်ဂေ့လော့။ 17လူဒွေဝို ဒိထားဂေ့လော့။ ဟဲဖြစ်ရိနူးဆိုဝါ သူ့နို့ဟ နန်းနို့ဝို ရားရုံးဒွေဆီအပ်နှံဂေ့လိမယ်ဖြစ်ပြီး သူ့နို့ရဲ့ဓမ္မာရုံဒွေမှာလဲ နန်းနို့ဝို ရိုက်နှက်ဂေ့လိမယ်ဖြစ်ရိတွက်ဂျော့ဖြစ်ရယ်။ 18အဲနော့ နန်းနို့ဟ ငါ့တွက်ဂျော့ ဘုရင်ခံန ရှင်ဘုရင်ဒွေရဲ့ ရှေ့ဝို ခေါ်ဆော်ဝါးဇာခံဂေ့ရမယ်ဖြစ်ရယ်။ အဲမိုနည်းန နန်းနို့ဟ အဲမိုသူဒွေန လူမျိုးခြားဒွေဝို ဒန်းဂေါဝို ပြောဂေ့ရလိမယ်ဖြစ်ရယ်။ 19သူ့နို့ဟ နန်းနို့ဝို အဲမျိုးအပ်နှံဂေ့ဝိုခါမှာ နန်းနို့ဟ ဟဲရာဝိုပြောရမယ်ဆိုဇာဝို စိုးရီပူပန်ဂေ့န။ ဟဲဖြစ်ရိနူးဆိုဝါ နန်းနို့ဟဲရာဝို ပြောရမယ်ဆိုဇာဝို အဲမိုခီမှာ နန်းနို့ရဂေ့လိမယ်ဖြစ်ရယ်။ 20အယ်ဘေမဲ့ နန်းနို့ပြောနေဝိုဂါးဒွေဟ နန်းနို့ရဲ့ဂါးဒွေမုဘဲန ဉာဏ်လင်းတော်ဟ နန်းနို့ဆီဟနေတဆင့် ပြောဆိုဝိုဂါးဒွေဖြစ်ရယ်။ 21ညီကိုချင်းချင်း ယော့ဟနေယော့၊ မိဘဟလဲ သားမီးဒွေဝို သေစေဝို့လုပ်ဂေ့လိမယ်။ သားမီးဒွေဟလဲ မိဖဒွေဝို ဆန့်ကျင်ပူကန်ပီး သေစေဝို့ပြုဂေ့လိမယ်။ 22ငါ့ရဲ့မည်နာမတော်ဂျော့ နန်းနို့ဝို လူဒွေဟ မူးတီးဂေ့လိမယ်ဖြစ်ရယ်။ အယ်ဘေမဲ့ နော့ဆုံးထွက်သက်ထိ ငါ့ဝိုယုံကြည်ဝိုသူဒွေဟ ကယ်တံဇာဝို ခံရလိမယ်ဖြစ်ရယ်။ 23ဗြို့တဗြို့ဟ လူဒွေဟ နန်းနို့ဝို နှိဆစ်ညှင်းပန်းဂေ့ရယ်ဆိုဝါ ခြားဗြို့တဗြို့ဝို ထွက်ပလေးဂေ့လော့။ နန်းနို့ဝို ငါမှန်တိုင်းပြောရမယ်ဆိုဝါ အစ္စရေးပြည်မှာရှေ့ဝို ဗြို့ဒွေဆီဝို နန်းနို့မသွားရော့နိုင်ခီမှာဘဲ့ ဘုရားရှင် စေလွှတ်လိုက်ဝို လူ့သားတော်ဟ ကြွလာလိမယ်ဖြစ်ရယ်။ 24ဟယ်ဗြိမှ ဆရာထက်ပိုပီး ကြီးကျယ်မြင့်မြတ်နိုင်မှာမုဝမျိုး ဟယ်စေခံဟလဲ သူ့ရှင်သခင်ထက်မှာ ရှေ့နေနိုင်မှာမုဝ။ 25ဗြိဟ သူ့ဆရာမျိုးဖြစ်လာပြီး စေခံဟလည်း သူ့ရှင်သခင်မျိုးဖြစ်လာမယ်ဆိုဝါ လုံလော့လေပြီ။ အီထော်ဦးစီးဂိုမှ 'ကောဆိုးဝါး ဗေလဇေဗုလ' ဆိုပီး ခေါ်နေဂေ့ရယ်ဆိုဝါ မိသားဇုဝမ်ဒွေဝို ပိုပီးဆိုးဝါးဝို နော်မယ်ဒွေန ခေါ်ဂေ့လိမယ်။ 26အဲဂျော့ အဲမိုလူဒွေဝို ကြော့ဂေ့န။ ဟဲဖြစ်ရိနူးဆိုဝါ မဗြင်နိုင်အော် ဖုံးကွယ်ထားနိုင်ဝိုအရာမျိုး မှေ့ဘဲမျိုး လျှို့ဝှက်ထားရိမရဘဲဝိုဇာဆိုဇာလဲမှေ့ရ။ 27နန်းနို့ဝို ငါ သီးသန့်ပြောဆိုဝိုဂါးဒွေဝို လူဒွေဝို ပြောပြကေ့ပီး နန်းနို့နားမှာတီးတိုးကြားဝိုဂါးဒွေဝိုလဲ လူဒိုင်းကြားနိုင်အော် ကျယ်လော်စွာပြောဂေ့လော့။ 28ကိုယ်ခန္ဓာဝိုဘဲ့သတ်နိုင်ပြီး စိဝိဉာဉ်ဝို သတ်နိုင်ဘဲဝိုလူဒွေဝို ကြော့ဂေ့န။ အဲမိုစား ကိုယ်ခန္ဓာ န စိဝိဉာဉ်နှေ့ခုလုံးဝို ငရဲမှာဖျစ်ဆီးနိုင်ဝို ဘုရားရှင်ဘားဒဲဝိုဘဲ့ ကြော့ဂေ့လော့။ 29တန်ဖိုးနဲဝို ငွေဒန်းဂါးပြားရားတွက် စာကလေးငှက်နှေ့ကော်ဝို ရောဂေ့ရလော။ အယ်ဘေမဲ့ အဖဘုရားရှင်ရဲ့လိုတော်ပါပဲန အဲမိုငှက်နှေ့ကော်ထဲဟ ဂေါ်ဂိုမှ မလေပေါ်ဝို ပြုကလနိုင်အော် လုပ်နိုင်မှာမုဝ။ 30ဘုရားရှင်ဟ နန့်ရဲ့ခေါပေါ်မှာ ဆန်းဘံဟယ်မျှဘံ ရှေ့ရယ်ဆိုဇာဝို ရေတွက်ရားပြီးဖြစ်ရယ်။ 31အဲဂျော့ ကြော့ဂေ့န။ နန်းနို့ဟ စာရားငှက်ဒွေထက် များဂီးပိုတန်ဖိုးရှေ့ရယ်။ 32အဲဂျော့ ဟယ်သူမဆိုလူဒွေရှေ့မှာ ငါ့ဝိုလက်ခံကြောပြောဆိုမယ်ဆိုဝါ ငါဟလဲ ရွှေဗြို့တော်မှာရှေ့ဝို ငါ့ရဲ့အဖဘုရားရှင်ရှေ့ မှော့မှာ အဲမိုလူဒွေဝို လက်ခံကြောပြောဆိုမယ်ဖြစ်ရယ်။ 33အယ်ဘေမဲ့ လူဒွေရှေ့မှာ ငါ့ဝိုငြင်းဆိုဝိုလူဟ ရွှေဗြို့တော်မှာရှေ့တော်မူဝို ငါ့ရဲ့အဖဘုရားရှင်ရဲ့ ရှေ့တော်မှာ သူ့နို့ဝို ငါငြင်းပယ်မယ်ဖြစ်ရယ်။ 34ငါဟ အယ်မိုဘာမလေပေါ်ဝို ငြီးချမ်းခြင်းဝိုဘဲ့ ယူဆော်ပြီးလာဇာဖြစ်ရယ်ဆိုပီး တွီးဂေ့န။ ငါဟငြီးချမ်းခြင်းဝို ယူဆော်လာဇာမုဘဲန ထားဝိုယူဆော်လာဇာဖြစ်ရယ်။ 35သားဟ ဖခင်ဝိုဆန့်ကျင်ပြီး မီးဟလဲ မိခင်ဝိုဆန့်ကျင်ဝို့န ချွေးမဟ သူရဲ့ယော့ခမဝို ဆန့်ကျင်စေဝို့တွက် ငါလာဇာဖြစ်ရယ်။ 36လူတယော့ရဲ့ရန်သူဟ အဲမိုလူရဲ့ မိသားဇုထဲဟ ဖြစ်လိမယ်။ 37ငါ့ထက်ပိုပီး ဖနမိဝို ရှစ်မြတ်နိုးသူဟ ငါ့နထိုက်တန်ဘဲမျိုး ငါ့ထက်ပိုပီး သားနမီးဝို ရှစ်မြတ်နိုးဝိုသူဟလဲ ငါ့နထိုက်တန်ရ။ 38ကိုယ့်လက်ဝါးကပ်တိုင်ဝိုထမ်းပီး ငါ့နော့ဝိုလိုက်ပါရှင်စိမှေ့ဘဲဝို လူဟလဲ ငါ့နထိုက်တန်ရ။ 39ကိုယ့်သက်ဝို ထီးသီးစော့ရှော့နေဝိုသူဟ အဲမိုသက်ဝို ဆုံးရှုံးရလိမယ်ဖြစ်ပြီး ငါတွက်န ကိုယ့်သက်ဝို ဆုံးရှုံးခံနိုင်ဝိုသူဟ ထာဝရသက်ဝို ရရှေ့လိမယ်ဖြစ်ရယ်။ 40နန်းနို့ဝို ကြိုဆိုလက်ခံဝိုသူဟ ငါ့ဝို ကြိုဆိုလက်ခံသူဖြစ်ပြီး ငါ့ဝို ကြိုဆိုလက်ခံဝိုသူဟလဲ ငါ့ဝို စေလွှတ်လိုက်ဝို အဖဘုရားရှင်ဝို ကြိုဆိုလက်ခံသူဘဲ့ဖြစ်ရယ်။ 41ပရောဖက်ရဲ့မည်နာမန ပရောဖက်ဝို ကြိုဆိုလက်ခံဝိုသူဟ အဲမို ပရောဖက်ရရှေ့ခံစားရဝို ကျိုးကျေးဇူးဒိုင်း ရရှေ့ခံစားရလိမယ်ဖြစ်ပြီး ဖြော့မတ်မှန်ကန်ဝိုသူဖြစ်ရိတွက်ဂျော့ အဲသူဝို လက်ခံကြိုဆိုသူဟလည်း အဲမိုဖြော့မတ်မှန်ကန်ဝိုသူ ရရှေ့ခံစားရဝို ကျိုးကျေးဇူးဒိုင်းဝို ရရှေ့ခံစားရလိမယ်ဖြစ်ရယ်။ 42သာမာန်လူဒွေထဲဟယော့ဝို ငါ့ဗြိဖြစ်ရယ်ဆိုရိတွက်ဂျော့ ဇုံတယော့ဟ ရေအေးတစ်ခွက်တိုက်ရယ်ဆိုဝါ အဲမိုသူရရှေ့ခံစားရဝို ဆုလာဒ်ဒွေဝို သေချာပေါ့ရရှေ့လိမယ်ဖြစ်ရယ်။" ဆိုပီး မိမှာပီး စေလွှတ်တော်မူလေရယ်။
Valið núna:
Matthew 10: ttpv-rv
Áherslumerki
Deildu
Afrita
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.