प्रेरीत् 7
7
1ओहाङःसैको “लौ ओउः नाङ्कायः तुम्ती तोओ कुरा दोङ्सीया आह्रे तोओया” त दाय्ह्ती ओउः प्रधान् पुरोहीत्इ स्तीफन्कायः व्हत्आथै। एत व्हत्आक्तीको स्तीफन्इ त्याङ्ती तोसाकायः चीङ्आ। 2“लौ हौचोङ् आपाचोङ्य सायःनाङ्स दा। उय्ह्लेहाङः ङीकोः तोकानः आब्राहाम् त तोओ मेसोपोताम्या देस्हाङः याक्ती मुओ। ओहाङः याक्ती मुतोक्हाङः ओउः सबैसै पेओमा ताङ्ह्ओमा परमेस्वर् आब्राहाम्कःताङ् थाआ। ओउः बेलाहाङः आब्राहाम्पाय् हारान् सहर्हाङः याक्धाङ्मालो खेःतो। 3ओहाङःसैको परमेस्वर् थातोक्हाङः ‘लौ नाङ्कोः देस् फेती नाङ्कोः लयःमयःकःसै भेती ङाइ दोक्ती छ्यानःओ देस्ताङ् आल्न दा’ त परमेस्वर्इ आब्राहाम्कायः दाय्ह्ती तोआथै। 4एत तोओ कुरा सायःआक्तीको आब्राहाम् खाल्दीया मान्ताकोः मेसोपोताम्या देस् फेती हारान् सहर्ताङ् आल्ती ओहाङः याक्ओ खेःतो। हारान् सहर्हाङः याक्इतो ओहाङःसैको ओउःकोः लयःकोः आपा सीआक्तीको आब्राहाम्कायः परमेस्वर्इ इ नीङ् यहुदीलम् तेन्छ्याङ् याक्ओ देस्ताङ् वानःआथै। 5इ देस्ताङ् आब्राहाम्कायः वानःथातो दोम् गोदे झ्योलाङ्कायः राङ्मा परमेस्वर्इ दोह्मा दोःताक्थाल। ओहाङःसैको आब्राहाम्कोः गोय्चोःचोः नाःधाङ्माखाहाङः ‘लौ नाङ्कोः प्लोमःदाने मोमःदानेकायः ङाइ इ देस् बयःआनाङःसु’ त दाय्ह्ती परमेस्वर्इ तोती गम्आथै। 6‘फेरी लोन्दोहाङः नाङ्कोः प्लोमःदाने मोमःदाने अरु थे देस्ताङ् आल्ती याक्नै। ओहाङः याक्तोक् बेलाहाङः ओउः थे देस्कोः मान्तालम्इ नाङ्कोः प्लोमःदानेकायः ह्र्यात् प्रवः गम्नाःथास ओउःमयःकायः आन लीह्ताक्आथास। 7चार्सै बर्सच्युक्कायः ओउःमयःकायः लीह्ताक्नाःथास। ओहाङःसैको चार्सै बर्स पुत्आक्तीको ओउः थे देस्कोः मान्तालम्कायः ङाइ न्युम्ह्ताक्नाङःसु। ओउः देस्कोः मान्तालम्कायः न्युम्ह्ताक्आक्तीको नीङ्कोः प्लोमःदाने मोमःदानेलम् इ देस्ताङ् द्यान्ह्ती वाङ्ती ङाकः झाह्ती याक्नै’ त दाय्ह्ती परमेस्वर्इ आब्राहाम्कायः तोआथै। 8ओउः कुरा तोती गम्ओ बेलाहाङः परमेस्वर्इ आब्राहाम्कायः पुन् तात्ओ चीन्ह जाङ्ह्साकायः बयःआथै। ओहाङःसैको आब्राहाम् लयःकोः गोय्चोःचोः इसाक् त तोआ दोःआ। दोःओहाङःसै आत्दीन् पुत्आक्तीको आब्राहाम्इ ओउः गोय्चोःचोःकायः परमेस्वर्इ बयःओ चीन्ह जाङ्ह्आथै। लोन्ह्ते इसाक्कोः गोय्चोःचोः याकुब् त तोओ खेःतो ओउःकोः अरु मय्ङ् इस्राएल्। याकुब् त तोओकोः गोय्चोःचोःलम् यात् हाले खेःइतो ओउः गोय्चोःलम् ङी इस्राएल् मान्तालम्कोः बारजन तोकानःलम् खेःइतो।
9-10ओहाङःसैको ओउः बारजन पुःचोङ्लम् लयःकोः युसेफ् त तोओ हौकः चोरःती झ्यान्ते ओउःकायः मीस्रा त तोओ देस्ताङ् वीनःती ल्होक्आथै। नोकरी काम् जाङ्ह्ताक्साकायः वीनःलाङ् ल्होक्थातो युसेफ्कायः परमेस्वर्इ ओम्पायःती गम्ती ओउःकायः लीह्ओसै दल्ताक्आथै। आने परमेस्वर्कःसै पेओ व्हाय्ओ ल्हुङ् दोःती झ्यान्ते युसेफ्इ ओउः मीस्रा देस्कोः फारोह् राजाकायः आन म्रोताक्आथै। फारोह् राजापाय् एत म्रोतो स्याव्ती ओउःइ युसेफ्कायः मीस्रा देस्कोः प्रधान् मन्तरीमा गम्माआकान् लयःकोः दर्बाल् कीम्कोः मालीक्मा गम्माआकान्। 11युसेफ्कायः ओउःच्युक् ताङ्ह्ओ मान्तापाय् गम्ओ खेःतो ओहाङःसैको ओउः मीस्रा देस्हाङःमा कनान् त तोओ देस्हाङःमा आन लीह्सीःओ अनीकाल् स्याव्ती ङीकोः तोकानः याकुब् आपाचोङ्लम् कनान् देस्हाङः जेःगा दोःइली। 12ओहाङःसैको ‘मीस्रा देस्हाङः चुय् मुनाः’ त सायःती याकुब्इ ओउःकोः चोःलम्कायः मीस्रा देस्ताङ् चुय् लेःलाङ् ल्होक्आथास। 13ल्होक्आक्तीको चुय् लेःती पाय्ह्आक्तीको ओउः ङ्हा वानःओ चुय् द्योक्आक्तीको फेरीलेः लेःलाङ् द्यान्ह्सा खेःतो। ओउः लोने वाङ्तोक् बेलाहाङः युसेफ्इ पुःचोङ्कायः तय्ह्ताक्आकास। लयः तय्ह्ताक्आक्तीको युसेफ्इ लयःकोः पुःचोङ्लम् फारोह् राजाकायः छ्यानःलाङ् वानःआकान्। 14छ्यानःलाङ् वानःआक्तीको युसेफ्इ पुःचोङ्लम्कायः लयःमयःकोः आपाचोङ् गोत्लाङ् ल्होक्आथास। गोत्आक्तीको याकुब्पाय् लयःकोः मान्तालम्कुस् मीस्रा देस्ताङ् वाङ्आकाय् ओउःमयः वाङ्ओ मान्तालम्पाय् सबै पचहत्रजन खेःइतो। 15-16ओहाङःसैको याकुब्पाय् मीस्रा देस्ताङ् दाह्ती वाङ्आक्तीको लोन्ते सीलेःआ। ओउःमा ओउःकोः चोःलम्मा ङीकोः तोकानः त तोओलम् सीआक्तीको ओउःमयःकोः म्हाङ्लम् अरुइ कनान् देस्कोः सेकेम् सहर्ताङ् लात्ती आलःती आब्राहाम्इ ङ्हा लेःओ राङ्हाङः तेस् द्यावःती तोङ्क तोङ्क पाम्ह्आकानी। इ राङ्लेः आब्राहाम्इ चान्दी बयःती सेकेम् सहर्कोः हामोर्कोः चोःलम्कःसै लेःओ खेःतो।
17ओहाङःसैको याकुब्कोः प्लोमःदाने मोमःदाने मीस्रा देस्हाङः याक्ती ओहाङः आन ब्याव्आकाय् ओउःत झ्यान्ते परमेस्वर्इ आब्राहाम्कायः तोती गम्ओ कुराकोः ताप्सा बेला स्याव्आ। 18ओउः बेलाहाङः यात्चाक् नया मीस्रा देस्कोः राजा दाङ्आ। ओउःखेइ युसेफ्कायः तय्ह्आक्उलु। 19ओउःत झ्यान्ते इ राजाइ ल्हुङ्हाङः चोरःती ङीकोः आय्कानः तोकानःलम्कायः आन लीह्सीःओ बयःती ओउःमयःकोः लयःकोः तोहा दोःओ चोःलम्कायः राङ्खा ताती वाय्ताक्आथास। 20इ बेलाहाङःपाय् ङीकोः तोकानः मोसा त तोओ दोःआ। ओउःकः परमेस्वर् आन म्रोओ खेःतो। ओहाङःसैको तोहा दोःआक्तीको मोसाकोः आमा आपाइ ओउःकायः तीन् महीनाच्युक्कायः लयःकोः कीम्हाङः नुस्ती स्यास्आथै। 21ओहाङःसैको लोन्ते जुगाङ् नुस्सा खाय्माःत झ्यान्ते ओउः नीस् आमा आपाइ चोःकायः बाहीरताङ् गम्थातो ओउःकायःपाय् फारोह् राजाकोः चोःद्याङ्इ च्यवःती रोत्ती लयःकोः चोःलो लेखालेः धेःती स्यास्आथै। 22स्यास्तोक् बेलाहाङः ओउः मोसा त तोओकायः सबै मीस्रा देस्कोः कुरालेः स्यान्आकानी। ओउःतलेः स्यान्ती मोसाइ नोःसामा जाङ्ह्सामा आन व्हाय्ती चीःओ खेःतो।
23ओहाङःसैको मोसापाय् चालीस् बर्स स्याव्ओहाङः लयःकोः इस्राएल् त तोओ जात्कोः लयःमयःचोङ् ‘क्रुस्चाङः’ त म्हर्ती ओउःमयःकःताङ् आल्आ। 24ओउःमयःकःताङ् आल्ती क्रुस्तोक्हाङः यात्चाक् लयःमयःचोङ् मान्ताकोःकायः मीस्रा देस्कोः मान्ताइ राव्तो खह्र्तो जाङ्ह्ओ च्यवःती ओउः मीस्रा देस्कोः मान्ताकायः पाराङ्ती मोसाइ घान्ती सात्आकान्। 25ओउःत हायःतोक् बेलाहाङः ‘ “लौ इ मीस्रा देस्कोः पेमालो मान्तालम्कःसै दल्ताक्साकायः परमेस्वर्इ मोसालेः ल्होक्आताङी” ओउःत ङाकोः लयःमयःचोङ्इ चीःनानी’ त दाय्ह्ती मोसा ताःतीलेः म्हर्तो ओउःमयःइ इ कुरापाय् चीःआक्धाङ्नीली। 26ओहाङःसैको ओउःनम्कोः स्याङ्ह्लोहाङः मोसाइ नीस्चाक् इस्राएल् मान्तालम् लयःनीस् काय्काय्ओ च्यवःआकान्। एत च्यवःती मोसा तारःपाङःलाङ् वाङ्ती ‘लौ नीङ्जी लयःमयःचोङ्तेः खेःतेःनाःज दोह् हायःतीतेः एतलेः काय्तेःनाःज। काय्काय्लाम्’ त दाय्ह्तीताङः मोसाइ तोथाचतो 27ओउः ङ्हा रेव्तो जाङ्ह्ओ मान्ताखेइ मोसाकायः न्हेङःती ल्होक्सा बोङःआकान् ‘एत नीची काय्काय्ओकायः रेक्लाङ् वाङ्सा सु ताङ्ह्ओ मान्ताइ हुकुम्तेः बयःतेःआ। 28योह् ओउः मीस्रा मान्ताकायः लेखा नाङ्इ ङाकायःमा सात्सा बोङःतेःनाःची यादो’ त दाय्ह्ती ओउः मान्ता त्यानःती त्याङ्आ। 29ओउः पेमालो हायःओ मान्ताखे एत त्यानःती तोओ कुरा सायःती मोसा रैती मीस्रा देस्सै क्रव्ती मीद्यान् देस्हाङः याक्लाङ् आल्आ। ओहाङः याक्तोक् बेलाहाङः नीस्ज्योः गोय्चोःचोः दोःआ।
30मीद्यान् देस्ताङ् मोसा नीस् गोय्चोःचोः दोःताङःआ ओहाङःसैको अरु चालीस् बर्स पुत्आक्तीको मोसा सीनाय् त तोओ बुम्कोः याक्गार्सीःमालो बेलाङ्हाङः मुओ खेःतो। ओहाङः मुतोक्हाङः यात्ज्योः म्हेः ल्युङ्ओ झ्युर्हाङः यात्चाक् लाङ्काकोः ल्होक्ओमयः थाओ च्यवःआकान्। 31एत च्यवःआक्तीको मोसा ग्याङ्ह्ती द्याङ्तो लाय्ती योलाङ् वाङ्आ। 32द्याङ्तो वाङ्ती योतोक्हाङः ‘लौ नाङ्कोः आय्कानः तोकानः आब्राहाम्मा इसाक्मा याकुब्मा ओउःमयःकोः परमेस्वर् लेःआः ङ’ त दाय्ह्ओ मोसाइ परमेस्वर्कोः हाव्नयः सायःआकान्। एत सायःती मोसा आन रैतीमा रीङ्ह्तीमा परमेस्वर्कःताङ् योसा ग्याल। 33‘लौ नाङ्कोः जुत्तापाय् ल्ह्युन्स। इ नाङ् झोती मुओ थाव्पाय् गुच्युक् जय्कुमःतो मुओ त झ्यान्ते नाङ्कोः जुत्ता ल्ह्युन्सा परनाः’ त दाय्ह्ती परमेस्वर्इ तोआथै। 34‘मीस्रा देस्कोः मान्तालम्इ ङाइ लयः छ्युङ्ह्ओ इस्राएल्कोः मान्तालम्कायः गुच्युक् खह्र्ओ जाङ्ह्नाःथास गुच्युक् लीह्सीःओ बयःनाःथास त ङाइ चीःआलाङः बा। ओउःमयः काय्ह्ल्ह्याव्ती र्याःओमा सायःआलाङः ओउःत झ्यान्ते ओउःमयःकायः इ लीह्सीःओसै ल्हेस्ताक्लाङ् वाङ्आलाङः। लौ एत हायःसाकायः ङाइ द्याह् मीस्रा देस्ताङ् द्यान्ह्ती ल्होक्नेःनाङ्’ त दाय्ह्ती परमेस्वर्इ तोआथै।
35ओउः मोसाकायःपाय् ओउःकोः लयःकोः मान्तालम्इ ‘लौ ङीसै ताङ्ह्ओ हुकुम् बयःओ सुइतेः बयःतेःआ’ त त्यानःती दाय्ह्ती मोसाइ तोओ कुरा सायःसा ग्यामाःत तोथातो ओउःमयःकायः हुकुम् बयःसाकायःमा लीह्सीःओसै ल्हेस्ती दल्ताक्साकायःमा परमेस्वर्इ ओउः मोसालेः छ्युङ्ह्आकान् बा। छ्युङ्ह्आक्तीको इ काम् जाङ्ह्साकायः परमेस्वर्इ ओउः ल्युङ्ओ झ्युर्हाङः थाओ लाङ्कामयः मोसाकायः ल्होक्आथै। 36ओहाङःसैको ल्होक्आक्तीको मीस्रा देस्हाङःमा लाल् समुन्द्र त तोओहाङःमा मोसाइ ग्याङ्ह्राय्लम् जाङ्ह्ती लयःकोः इस्राएल् त तोओ मान्तालम्कायः मीस्रा देस्सै फेताक्ती याक्गार्सीःमालो देस्ताङ् चालीस् बर्सच्युक्कायः ब्याह्लाङ् आलःआथास। 37फेरी ब्याह्ती वाह्तोक् बेलाहाङः इस्राएल्कोः मान्तालम्कायः ‘लौ लोन्ह्तेसै नीङ्कोः प्लोमःदाने मोमःदानेकःसै परमेस्वर्इ अरु यात्चाक् ङालो लेखा परमेस्वर्कोः कुरा छ्यानःओ मान्ताकायः छ्युङ्ह्आनौ’ त दाय्ह्ती इ मोसालेः तोआथास। 38इ मोसामा ङीकोः आय्कानः तोकानःकुस् याक्गार्सीःमालोहाङः मुती सीनाय् त तोओ बुम्हाङः दाह्तोक् बेलाहाङःपाय् ओउःकायःलेः यात्चाक् परमेस्वर्कोः लाङ्कामयःइ जीङःकोः कुरा स्यान्ती तोआथै।
39ओहाङःसैको मोसाइमा ङीकायः बयःसा हुकुम्कोः ऐन् परमेस्वर्कःसै त्याक्उतो ओउःकायःपाय् ङीकोः आय्कानः तोकानःलम्इ सायःसा ग्याइली। मोसाकायः फेती ‘मीस्रा देस्ताङ्लेः द्यान्ह्इ’ त दाय्ह्ती ओउःमयः ल्हुङ् क्लोत्ती म्हर्नै। 40ओउःत म्हर्तोक्हाङः मोसाकोः हारन् त तोओ पुःकःताङ् आल्ती ‘लौ “ङीकायः मीस्रा देस्सै वानःओ मोसा गाःहाङः गाःहाङः मुनाः” त चीःङुसुलु ओउःत झ्यान्ते ङीकायः स्यालःती लात्सा खाल्कोः द्यव्तालम् जाङ्ह्नाङ्स’ त दाय्ह्ती ओउःकायः तेती तोआकानी। 41ओहाङःसैको ओउःत नोःआक्तीको ओउःमयःइ स्याःकोः चोःकोः रुप्लो लेखा मुर्ती जाङ्ह्ती ओउः मुर्तीकायः पुजामा भोस् जाङ्ह्आकानी। लयःकोः क्रुत्इ जाङ्ह्ओ थोक्कायः झाह्ती योती ओउःमयः आन म्रोआकायःइसी। 42ओउःमयःमा ‘लौ फेल्बाङ्कोः न्याम् लाह् कार्लम्कायः झाह्पानी’ त म्हर्ती झ्यान्ते ओउःमयःकायः परमेस्वर्इ फेआथास। इ कुरा उय्ह्लेहाङःसै परमेस्वर्कोः आखरःहाङः लेखती मुनाः। ‘लौ नीङ् इस्राएल्कोः मान्तालम्य नीङ्कोः याक्गार्सीःमालो देस्हाङः चालीस् बर्सकायः ब्याह्ती वाह्तोक् बेलाहाङः नीङ्लम्इ अरु द्यव्तालम्खेकायः स्याः मेत्छ्याः सात्ती बयःतेःआकानी रैस ङाखेकायःपाय् खेःबाय्ल। 43ओउः मोलोक् त तोओ द्यव्ताकायः नीङ्इतेः लात्सा खाय्ओ मन्दीर् जाङ्ह्ती लात्तेःआकानी। रीफन् त तोओकायःमा फेल्बाङ्कोः कार्लो लेखा जाङ्ह्ओ मुर्ती नीङ्इ लयःकुस् लात्ती आलःतेःआकानी। इ लयःकोः क्रुत्इ जाङ्ह्ओ थोक्लम्कायः नीङ्इ झाह्तेःआकानी ओउःत झ्यान्ते ङाइ नीङ्कायः न्युम्ह्ताक्साकायः बाबीलोन् त तोओ देस्ताङ् आल्ताक्नेःनाङ्स’ त परमेस्वर् दाय्ह्ती तोओ आखरःहाङः लेखती मुनाः।
44ओहाङःसैको याक्गार्सीःमालो देस्हाङः ब्याह्ती वाह्तोक् बेलाहाङः ङीकोः आय्कानः तोकानःलम्इ परमेस्वर्कायः झाह्ती तोसाकायः मोसाइ लात्सा खाय्ओ मन्दीर् जाङ्ह्ताक्आकान्। गतलो परमेस्वर्इ मोसाकायः रुप् छ्यानःती स्यान्थातो ओउःतलेः मोसाइ जाङ्ह्ताक्आकान्। 45ओहाङःसैको लोन्ह्ते यहोस्युआ त तोओकोः बेलाहाङः ङीकोः आय्कानः तोकानःलम्इ ओउः मन्दीर्पाय् लात्ती इ ङीकोः देस्ताङ् वानःआकानी। ओउः लात्ती वानःतोक् बेलाहाङः इ देस्हाङः मुओ ङीकोः तोकानःलम्कोः दुस्मान्कायः परमेस्वर्इ क्लीमःताक्ती रुनःआथास। दुस्मान्लम् क्रव्आक्तीको ङीकोः आय्कानः तोकानःलम् इहाङः याक्सा दोःआकाय्। फेरी ओउः परमेस्वर्कायः झाह्ती तोसा मन्दीर्पाय् दावुद् राजाकोः बेलाहाङः च्युक्कायः मुतो। 46-47ओहाङःसैको ओउः दावुद् त तोओ राजाकः परमेस्वर् आन म्रोओ खेःतो। दावुद् राजाइ इस्राएल्कोः परमेस्वर्कायः पेओ मन्दीर् जाङ्ह्सा तेती बोङःउतो ओउःकायःलेः परमेस्वर्इ जाङ्ह्सा ताक्उलु दावुद्कोः लयःकोः सुलेमान् त तोओ चोःइ लोन्ह्ते ओउः मन्दीर् जाङ्ह्आकान्। 48ओउःइ मन्दीर् कीम् जाङ्ह्सापाय् जाङ्ह्उतो दोङ्सीलेः मान्ताइ जाङ्ह्ओ मन्दीर् कीम्लम्हाङः ओउः सबैसै ताङ्ह्ओ परमेस्वर् गलमा याक्ल। 49‘लौ ङाकोः च्युङःओ थाव् फेल्बाङ्हाङःलेः मुनाः ङाकोः दोम् तेक्ओ थाव्पाय् इ ल्हाव्ह्दैबाङ्हाङःलेः मुनाः। ङाकायःतेः गत खेःओ कीम्तेः जाङ्ह्तेःचानाङ्स र। गत हायःती ङाकायः नीङ्इ न्यास्ती मुसा थाव् जाङ्ह्सा खाय्तेःचानाङ्स। ङा यातै थाव्हाङः याक्ती मुओ खेःङल बा। 50ङापाय् फेल्बाङ् ल्हाव्ह्दैबाङ् दोह् दोह् सबै जाङ्ह्ओ लेःआः ङ बा’ त दाय्ह्ती परमेस्वर् नोःओ कुरा उय्ह्लेकोः आखरःहाङः लेखती मुनाः।
51ओउःत खेःओ नीङ्लम्इ गुच्युक् तोतीमा चीःतेःनीली ङ्हाम्तेःनीली। ओउःत हायःती झ्यान्ते नीङ्लम् परमेस्वर्कायः जुगाङ् चीःमालो मान्तालम्लो लेखा मुतेःनै बा। लयःकोः आय्कानः तोकानःलम्लो लेखालेः नीङ्इ परमेस्वर्कोः ग्वालामःइ तोओ कुरा सायःसा ग्यातेःइली। 52परमेस्वर्कोः कुरा छ्यानःती तोओ मान्तालम्पाय् सुकायःमा नीङ्कोः आय्कानः तोकानःलम्इ आन रेव्तो जाङ्ह्ती गम्आथास। सुसुइलो ‘लौ लोन्ह्ते परमेस्वर्कोः कुरा पेओ जय्कुमःतो जाङ्ह्ओ ख्रीस् त तोसा वाङ्नाः’ त थोल्ह्ती तोआकानी ओउःकायःलेःमा नीङ्कोः आय्कानः तोकानःलम्इ सात्आकानी रैस। ओउःमयःलो लेखालेः नीङ्लम्इमा ओउः ख्रीस्कायः अरुलम्कःताङ् दाक्ती सात्ताक्तेःआकानी बा। 53नीङ् मान्तालम्खेकायः परमेस्वर्कोः लाङ्कासै ल्होक्ओमयःइ ओउःकोः ऐन् बयःतेःइतो नीङ्इ एत बयःती ऐन्कोः कुरा जाङ्ह्सा ग्यातेःइली” त दाय्ह्ती स्तीफन्इ सभाहाङः मुओ मान्तालम्कायः तोआथास।
54एत तोओ सायःआक्तीको ओउः हुम्ती मुओलम् ल्हुङ् आन मल्ह्ती च्योय्त सय्क् ङ्हीक्ती रीस् वाङ्आकाय्। 55स्तीफन्खे परमेस्वर्कोः ग्वालामः दोःती लाङ्काताङः त्याव्ती योउतो योतोक् बेलाहाङः परमेस्वर्पाय् आन पेतो अङ्ग थङ्गत थोङ्ओमा च्यवःआकान् परमेस्वर्कोः ङोय्दोसै येसु चीङ्ती मुओमा च्यवःआकान्। 56“लौ दा फेल्बाङ्लेः ओङ्ह्ती मुती परमेस्वर्कोः ङोय्दोहाङः ओउः मान्ताकोः गोय्चोः त मुओ च्यवःआनाङः बा” त दाय्ह्ती स्तीफन्इ तोआथास। 57ओउःत तोआक्तीको ओउःमयः सायःती मुओलम् सोतो हीह्ती लःलयःकायः नोलम् ल्होप्ती स्तीफन्कायः हुमःती चुम्लाङ् वाङ्आकाय्। 58चुम्आक्तीको सहर् बाहीरताङ् क्लाःती ओउःकायः बाङ्इ आप्ती सात्आकानी। फेरी सात्तोक्हाङः ओउः बाङ् च्योमःती आप्ओलम्इ लयःकोः क्रमःनाय्लम् फान्ती यात्चाक् सावुल् त तोओ लाव्मयः मान्ताकायः ल्हाती गम्आकानी। 59ओहाङःसैको बाङ् आप्तोक् बेलाहाङः “लौ प्रभु येसुय ङाकोः नामे रुआङ् लयःकःताङ् त्याक्ची दा” त दाय्ह्ती परमेस्वर्कायः स्तीफन्इ तोआकान्। 60फेरी लोने क्र्योङःइ घ्रुस्ती “लौ प्रभुय इ मान्तालम्कोः रेव्तो हायःझ्याङ्कोः क्युम्ह्ताक्पाःथास” त सोतो दाय्ह्ती सीआ। स्तीफन्कायः सात्सा ओउः सावुल् त तोओमा त्योम्ती नोःओ खेःतो।
Valið núna:
प्रेरीत् 7: CDM93
Áherslumerki
Afrita
Bera saman
Deildu
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.