प्रकास 8
8
न्हि लोङ मोहर कालाउ सोनाको धुपुरि
1जेलाउ थुमा बुङ न्हितेङ मोहर भोइहि कालाउ इङको सोमोइ, आधा घान्टा थेकापा स्वर्गता चाका-मान्दा जेङहि। 2कालाउ परमेस्वरको आगाता जाअ्का न्हिमि स्वर्गदुतगेलाइहेङ का तिङघा। इम्बालाइहेङ न्हि लोङ सानाइ पिहि। 3इन्तासो भेनेङ स्वर्गदुत लोहि कालाउ स्वर्गको बेदिको भेरपा जाअ्हि। उङको स्वर्गदुत दोफा धुमाना जोलाइलि एनोङ सोनाको चेरादानि हिघाहि। वासेहेङ हेन्जा धुमाना पिहि कालाउकि परमेस्वरको गोताङ द्याङगेलाइ प्रार्थाना दोफाङ मिसालाइलि द्वावा। वा धुमाना कालाउ प्रार्थानागेलाइहोइ परमेस्वरको सिङहासनको आगाता सोनाको बेदि ह्रुता धोअ्हि। 4जेलाउ स्वर्गदुत एन्सा पाहि, कालाउ धुमानाको धुवा परमेस्वरको जनगेलाइको प्रार्थाना सुधाङ ह्रुता परमेस्वरको आगाता हानिहि। 5कालाउ स्वर्गदुत स्वर्गको बेदिको ह्रुतासो तितेङ हिका आङग्रो चेरा दानिता पोङघा पापिहि, कालाउ प्रिथिबि ह्रुता थाइगिल्पिहि। कालाउ इङको सोमोइ बिजुलिगेलाइ चिलकातेङ हिघाहि, कालाउ बादेलसो गड्याङ-गुडुङको गालागेलाइ ओल्लेतेङ लोघाहि, कालाउ भुइचाल बुङ लोहि।
न्हि लोङ सानाइगेलाइ
6कालाउ न्हि लोङ सानाइ सुधाङ उङको न्हिमि स्वर्गदुतगेलाइ ताइको सानाइगेलाइ बाजाइलि तियार जेङहि। 7लाङ स्वर्गदुत ताइको सानाइ म्होहि, कालाउ एन्सालाउ दोङ हेन्जा झोसे कालाउ हिति दोफाङ मिसालाइन्हाका मे प्रिथिबि ह्रुता हुल्हि। ओदोङ भाअ्सिङ प्रिथिबिको ए तिहाइ-भाग, कालाउ सिङगेलाइको ए तिहाइ भाग कालाउ गोताङ सिङजाल जाल्का घासिगेलाइ ओहि।
8न्हेतेङ स्वर्गदुत ताइको सानाइ म्होहि, इङको सोमोइ एनोङ बारका ओतेङ हिका रा भाइका तिङका आमेने समुन्द्रता हुल्हि। ओदोङ भाअ्सिङ ए तिहाइ भाग समुन्द्रको चि हितिता भाङगाइन्हाहि। 9समुन्द्रता हिका ए तिहाइ भाग गुपुसगेलाइ सिहि। एसापा समुन्द्रता हिका ए तिहाइ भाग जाहाजगेलाइ बुङ नासा हि।
10सुमतेङ स्वर्गदुत ताइको सानाइ म्होहि, कालाउ आकाससो एनोङ बारका फुरु जाइ रा:को भाइपा जोल्घाहि इङको आकाससो हुल्हि। इङको फुरु चिको कालाउ झारनागेलाइको ए तिहाइ भाग ह्रुता हुल्हि। 11इदोइ कारान, इङको फुरु जेता हुल्हि इन्ताको गोताङ चि ए तिहाइ भाग खाहि कालाउ बिस जेङहि। हेन्जा द्याङगेलाइ जाइ इङको चि आम्हि वा सिहि। इङको फुरुको मिङ “ऐरेलु”#8:11 “ऐरेलु” या सिङको मिङ हि इदोइ म्हुइका सिङ हिखे। कालाउ इदोइ सिङ खाखे, ऐरेलु मिङ इदोइ सिङसो लोहि। हि।
12द्यातेङ स्वर्गदुत ताइको सानाइ म्होहि, कालाउ सान्हेको ए तिहाइ भाग कालाउ तालिको ए तिहाइ भाग ह्रुता बिपति लोहि। जाइको कारान दिनाको ए तिहाइ भागता सान्हे मालोहि, कालाउ न्हिसिनको ए तिहाइ भागता फुरु कालाउ तालि बुङ माथासाइहि।
13जेलाउ का आरोङ खाङघा, एनोङ बाजा मध्ये आकासता हेन्जा ह्रुता उराइतेङ हिका कालाउ तिराराइका गालाहोइ एसा दोअ्काताङ पाका का हिङघा, “सुमिङता हिका मारेम्का द्याङगेलाइको भाअ्सिङ या हेथे थिलि गोइका हि, हाइपालिपानु जेलाउ आम्तिम सुमि स्वर्गदुत ताइको सानाइ म्होतावा, कालाउ सुमलोङ आरु बिपतिगेलाइ इम्बालाइ ह्रुता ल्वावा।”
Valið núna:
प्रकास 8: DHINT
Áherslumerki
Afrita
Bera saman
Deildu
Viltu vista áherslurnar þínar í öllum tækjunum þínum? Skráðu þig eða skráðu þig inn
Dhimal New Testament, by The Love Fellowship is licensed under Creative Commons Attribution-ShareAlike 4.0 License.