प्रकास 5
5
थुमाको दर्सन
1कालाउ का सिङहासनता बिराजमान हिकाको दाम्पाहा खुरता इङको न्हेपाहाङ लेखेका एनोङ किताप तिङघा, जेदोङ न्हि लोङ मोहोर तुअ्पातेङ ताअ्का हिघाहि। 2कालाउ एमि बल्लियाका स्वर्गदुतहेङ बार्का गालाहोइ एसा दोअ्तेङ हिका का तिङघा, “इदोइ मोहोर थुरलि कालाउ किताप खोलेलि खाबारा हासुहेङ हि?” 3कालाउ स्वर्गता माकुनु प्रिथिबिता कालाउ प्रिथिबि लिता इदोइ कितापता लेखेका खोलेलि कालाउ खाङलि हासु बुङ योग्यको मान्थुघाहि। 4इदोइ किताप खाइका माकुनु इङको लिता खाङलि योग्यको मानिङनाङ का ओसारापा खारघा। 5कालाउ आगुवा मध्ये एमि कासेहेङ दोअ्हि, “माखार! खाङसु, जाइहेङ यहुदाको कुलको खुवाँ दोअ्खे, राजा दाउदको माहान हारागुटिया, वा साइतानहेङ जितिका हि। कालाउ वा कितापको न्हि लोङ मोहोर थुरलि कालाउ खोलिलि योग्यको हि।”
6जेलाउ का सिङहासनको भेर्पा एनोङ थुमाहेङ द्यालोङ हुसि हिका प्रानिगेलाइ कालाउ ए कुरि द्यामि आगुवागेलाइको माझाता जाअ्तेङ हिका तिङघा। थुमाको जिउता भोगको चिन्हागेलाइ हिघाहि। वाको न्हि लोङ दाङगेलाइ कालाउ न्हि लोङ मिसियाँगेलाइ हिघाहि, जेदोङ परमेस्वरको न्हि लोङ आत्मागेलाइ हि, जाइहेङ गोताङ प्रिथिबिता पिगिल्का हिघाहि। 7थुमा आगाता लोतेङ सिङहासनता बिराजमान हिकाको दाम्पाहा खुरसो इङको किताप ह्रुहि। 8जेलाउ वा इङको किताप ह्रुहि, कालाउ इङको द्यालोङ हुसि हिका प्रानिगेलाइ कालाउ ए कुरि द्यामि आगुवागेलाइ थुमाको आगाता तुघुरहि। गोताङ आगुवागेलाइ उर्नि कालाउ सोनाको जाम बात्ति चाहि। जाम बात्ति धुमानाहोइ पोङघाका हिघाहि जाइ जाम बात्ति खुरता चुम्हि इङको चाहि परमेस्वरको सेवा पाका द्याङगेलाइको प्रार्थानाहेङ तिङपाखे। 9इम्बालाइ एसा दोअ्काताङ एनोङ नावा ले लेहि:
“नाअ् मोहोरगेलाइ थुरलि कालाउ किताप खोलेलि योग्य हिना,
हाइपालिपानु द्याङगेलाइ नासेहेङ सेअ्हि कालाउ नाङको सिकाको हितिहोइ
नाअ् परमेस्वरको भाअ्सिङ
गोताङ कुल, भासा, रास्ट कालाउ जाति-जातिसो झाराङ
द्याङगेलाइहेङ चोल्न्हा।
10कालाउ नाअ् ओबालाइहेङ राजागेलाइ कालाउ पुजारिगेलाइ बानाइन्हा,
जाइ केलाइको प्रभु परमेस्वरको सेवाको काम पाखे,
कालाउ इम्बालाइ प्रिथिबिता राजागेलाइ भाइपा सासन पावा।”
11का आरोङ खाङघा, कालाउ सिङहासनको कोरपाहाङ जाअ्कालाइको हेन्जाङ-हेन्जाङ स्वर्गदुतगेलाइको गाला हिङघा, इङको द्यामि हुसि हिका प्रानिगेलाइ कालाउ आगुवागेलाइ हि। 12इम्बालाइ बारका चेराका गालाहोइ ले लेहि,
“सेअ्न्हाका थुमा बाखिनको योग्य हि वाको खाबारा माहान हि,
वाको ग्यान वाङखाराका हि, वा हेन्जा सरबुङसाइका हि,
वा बास्ताबता धनि हि, लोसु केलाइ वासेहेङ आदर, महिमा कालाउ बाखानाइ पाइने।”
13कालाउ स्वर्गता, प्रिथिबिता, प्रिथिबि लिता, समुन्द्र कालाउ इन्ता हिका गोताङ प्रानिगेलाइ एसा दोअ्काताङ पाका का हिङघा,
“केलाइ सिङहासनता योम्तेङ हिका द्याङको बाखिन पाइने।
लोसु, थुमाको बाखानाइ पाइने केलाइ वासेहेङ जेलाउ बुङ आदार तिङपाइने,
वासेहेङ जेलाउलाउ बुङ महिमा पि,
हाइपालिपानु वा झाराङ खान्तेङ सरबुङसाइका हि।”
14कालाउ इङको द्यालोङ हुसि हिका प्रानिगेलाइ दोअ्हि। “आमेन।” कालाउ उङको आगुवाहगेलाइ तुघुरतेङ कालाउ आराधाना पाहि।
Valið núna:
प्रकास 5: DHINT
Áherslumerki
Afrita
Bera saman
Deildu
Viltu vista áherslurnar þínar í öllum tækjunum þínum? Skráðu þig eða skráðu þig inn
Dhimal New Testament, by The Love Fellowship is licensed under Creative Commons Attribution-ShareAlike 4.0 License.