IIMU/UUNGW 29
29
Hardahamaá Yakobo amór Labani
1Yakobo ina kumiít aaiiwose, iri hardáh baraá yaamaá múk da/aáw. 2Didaádae hhalaangw guri baraá xatstá wa ár, daqooroó tám oo bee/aangw aa bihhaá hhalángwií qaát. Bee/aangw ku wahamiis ar ma'aá hhalangwdá' taa tuuntuúk ar tlaa/anoó úr. 3/Iskoorí daqooroó bee/aangw burkwa wahaasár áy, de'eemuuse tlaa/anoodá' gun gwangwará' gawaá afkú hhalángw wa alé, bee/aangw kuri wahaas. Aluuwo hhalaangw kuri male tuuntuuk ar tlaa/anoodá'.
4Yakobo de'eemuuse gari yaahaás, «Hhaee'eé', a dahhá'?»
Inooín tari oó', «A Haranír dahhaán.»
5Giri yaahaás, «Xáy, heeko ta babay Labani, garmoó Nahori u xuá'a?»
Tari oó', «U xuaán.»
6Iri kumiít yaahamisuuwo, «Xáy, i sayaumamíti?»
Inooín tari oó', «I sayauut, hanoos dasiirós Raheli i amoorí keér, i bee/ángw koón.»
7Yakobo giri báy, «Iimi i tlaatla/ángwí káhh, slám qoomár tlahhasa aa xeeriiká. Ala bee/aangw wahaasaak, ku de'éngw eerá'.»
8Ala inooín nguri bayé', «Adoosíng a tleehhanaaká ay dír daqooráy sleémeero i burumburiiti dír wák, ay dír tlaa/ano kway hingeesi gawaá afkú hhalaango, daqaní bee/aangw kway wahasaán.»
9Yakobo nee de'eemuuse tawa axweesantí kahhi, Raheli nina hardát, i bee/ángw baabuúwós koón, asma inós gun de'eén. 10Yakobo Raheli ngiwa ár, dasír Labani, hhiyoó aayírós, nee bee/ángw Labani maamáywós nguwa ár, ina tláy, tlaa/anooduú gawaá afkú hhalaangw guri gwangwaraá', daqtá maamáywós Labani gari wahaás. 11Yakobo Raheli gari ma'aás, iri /aá/ as qwala/. 12Aluuwo Yakobo Raheli gari xu'utís, adór inós tar mar'afmoó baabuúwós, slám a garmoó Rebeka.
Raheli iri ta'aaiín amór do', baabuúwós guri kángw beér. 13Labani kángw Yakobo oohho'oówós nguwa axaás, ina ta'aaín nguwa al'ay. Guri slaqwtósí óh, guri ma'aás, guri do'ós i dahi'ís. Yakobo kangwdá' sleémeero aa tleehharuut guri alki/iít. 14Labani iri oó', «Ar ló', kuúng a daa'awmooeé' oo nayshu.» Yakobo slahhángw wake iri doó Labaní wa hoót.
Duuxór Yakobo
15Labani Yakobo guri báy. «I hariindaaká án kuúng iwa tawo sagadiyus as tawa mar'afmooeé'. Bu'utuú kuúng ta sla' ooang.» 16Labani dasuú tsár gu kón, ar ur umuuwós a Lea, nee ar niina a Raheli. 17Lea i ila' wanaaná', ala Raheli ka hhoohhoo' slám ka tsataari hho'.
18Yakobo Raheli gari slaá', Labani guri báy, «Án kuúng kureeraá faanqwe u sagadiyuús, as Raheli, dasiirók tidá' niina ngiwa hanis.»
19Labani guri báy, «A tsiní kuúng Raheli bara dúx, ta heé hatlá' ngiwa duuxi. Kuúng kumiitáng niwa dir'eé' wa hot.» 20Yakobo Labani guri sagadiyuús kureeri faanqw as Raheli ngiwa slay, ala dirose a adór deelór niina as adoodá' Raheli ngira slaá'.
21Yakobo Labani guri báy, «Qoomar'eé' aa bó/, daxta harer'eé' haniisang.» 22Ala Labani muruú /ayma guri amohhe'eés, múk yaamuudá' guri ateét. 23Ala tsiindoowo Labani Lea dasiirós ar ur gari huúw amór Yakobo, Yakobo Lea gari duúx. 24(Labani Silpa sagadiyuso'oorós gari haniís dír Lea as ngiwa sagadiyus.) 25Matlaatleero Yakobo gari tsaáhh tawa Lea! Labani guri yaahaás, «Kaangwí naa aní tléhh a milá? Xáy, una sagadiyuúsiíke as Raheli? Bareemák daxta iga al/ák?»
26Labani iri oó', «Baraá yaamurene dakwsíng u tlehhaahhitanaaká oo dasír niina kawa geerií duuxi dír dasír ure. 27Lea deeloorós ar faanqw boo/eeseek, daqaní atén Raheli ngi hanisaán kawa dux, ar tawa malé gadiyus kureeraá hatlá' awa faanqwe.»
28Yakobo iri ya/án. Yakobo deeloodá' faanqw ar Lea ngiwa boo/eés, Labani Raheli dasiirós ar niina gari malé haniís dír Yakobo. 29(Labani Bilha sagadiyuso'oorós gari haniís tawa sagadiyuso'ór Raheli.) 30Yakobo Raheli gari duúx sleeme. Ala Yakobo Raheli gari ak slaá' ta Leawo. Labani guri sagadiyuús kureeraá hatlá' awa faanqwe.
Daaqoó Yakobo
31AAKOÓ MUNGÚ ngiwa ár Lea kawa slaiiká, gari na/ií haniís, ala Raheli na/ii gaa sleeriiká. 32Lea iri tsít, iri xwayluúr na/oó garma, guri beér Reubeni,#29:32 Reubeni: Gídaabárós a ga/aaweek, garma. iwa kat, «Asma AAKOÓ MUNGÚ slahh'amaayer'eé' gaa ár, dooqa daxta hhawaatuueé' i slaa'.» 33Lea iri malé tsít, na/oó garmaawo iri xwayluúr, gway beér Simeon, iwa kat, «AAKOÓ MUNGÚ na/oó hatlá' oo garma ngwaa haniís, gaa axaás adór aníng tira aáhh.» 34Tsiihoó hatlá' guri sleér, iri xwayluúr na/oó garma, guri beér Laáwi, iwa kat, «Dooqa daxta hhawaatuueé' ni amor'eé' waatl, asma ugwa daaqoó tám i laqwaál.» 35Lea iri malé tsít, na/oó garma guri xwayluúr, guri beér Yuda,#29:35 Yuda: Umuú Yuda aa slaqás nee /aymuú diidi'iisa. iwa kat, «Ki/imakae AAKOÓ MUNGÚ u diidi'iís.» Lea iri ala sihhít xwaylaro.
Valið núna:
IIMU/UUNGW 29: IRQW
Áherslumerki
Deildu
Afrita
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.