Luuka 9
9
Yisu mitsindaha kuumi na biluumbi byole
Mty 10.1-9,11-14; Mlk 6.6-13
1Yisu bu hakungi kuumi na biluumbi byole, aviidi byo matwala na lituma mu ubingasa matengo moosi, na mu ubeeloso mabeedu. 2Nde atsindihi byo mu uyalongese mambu ma Ipfumu hya Nzambi, na ubeeloso babeedu. 3Nde aleeli byo: «A li volo pasi isiha mu tooni mudyenge ve: tso huli likaanda, tso huli koome, tso huli lipa, tso huli mbongo. Na a liba na bikutu byole ve. 4Mu pasi nzo yi benu lu ukoto, kwilalaani mu yo, natee bu benu lu upala mu musyenge mo wuuna. 5Tso baatu a bayaki benu ve, ŋa benu lu upala mu musyenge mo wuuna, kubalaani mufundu a miilu mya benu. Sa huba nzibusili huli bo.»
6Biluumbi byayeni, byo byakavyoho mutso a mala moosi, byakayabisa musamu wu mubwe na byakabeeloso babeedu.
Eloode li mu usaha uyaba Yisu na ali
Mty 14.1-2; Mlk 6.14-16
7Eloode mutumi a Ngalili akayuha mambu moosi ma Yisu hakavaanga, ni mu buuna nde haba tsika-tsikaa. Baatu baakaleele ti Yowani mu Tondihi asuuhi mu ba baakwa. 8Baatu bakima ti nde ni mumbihuli Eliya amiibweya, bakima ka ti nde ni mumosi ŋa hati li mimbihuli mya tsikulu miisuuha. 9Ka Eloode akaleele: «Me atumi ukese Yowani mutswe. Ka wu na, wu me ndi mu unzuha misamu momi?» Na Eloode akasaha mu umono nde.
Yisu abungili biveeve bitaanu bya baatu
Mty 14.13-21; Mlk 6.30-44
10Bu biluumbi byayafutaha, bo baayabisi Yisu moosi ma bo bavangi. Nde abiti bo, na avengimi na bo hu tsyelo musyenge wa nduhi Betesayida. 11Bu makonge maayabi buuna, mo maaduukili Yisu. Nde ayaki mo, na nde akayambila mu Ipfumu hya Nzambi. Yisu abeelusi ka boosi ba baaba na mabeedu. 12Bu busi bwakulimini, biluumbi kuumi na byole byayasusaha ŋa pedu a Yisu, na byaleeli nde: «Futala konge moyi, mana yo yiyene mu mala ma bebele na mu bitsaka mu uyasaha mbuha yi ubwamina na byudya. Mu tooni ati, bisu a benu ŋa ive na ive lili.»
13Yisu aleeli byo: «Vaani bo byudya benu mwakulu.» Ka bo baafutili: «Bisu lili ndulu na mapa mataanu na batswi boole. Ka bisu liyasumbala baatu moba boosi byudya?» 14Bo baaleeli buuna mu tooni ati, hwaba ŋana biveeve bitaanu (5 000) bi babahala. Yisu aleeli bayihi ba nde: «Tsahisaani bo mu mabuli ma maku mataanu ma baatu.»
15Biluumbi ni uvanga bu Yisu hatumi. Na bo baatsahisi bo boosi. 16Yisu avoli mapa mataanu na batswi boole. Asimbuli miisu hu yulu, na afutili matondo huli Nzambi mu byo. Titswene, nde akesi byo, na aviidi byo huli bayihi mu ukabila konge yoosi. 17Baatu bosi badiidi we bu hwafwana na baywati. Biluumbi baatsonzihi byebe kuumi na byole bi bitsudu bi byasaali.
Peetelo mileele ti Yisu ni Masiya
Mty 16.13-21; Mlk 8.27-31
18Yisu bu haba ŋa muvanga mu usambila, bayihi baaba itwadi na nde. Nde afuuli bayihi ba nde: «Mu uyuha bitoyili bya baatu, ti na me ndi?» 19Bo baafutili: «Bamosi bali mu uleele ti, we Yowani Mutondihi we li, bakima ti, we Eliya we li; bakima kaka ti, we mumosi mu mimbihuli we li.» 20Nde aleeli huli bo: «Ka benu, buni lileeli, ti me na me ndi?» Peetelo afutili: «We ni Masiya wu Nzambi hatsindaha.»
21Yisu atumi bo mu mifudi mu uveleyabisa musamu wu huli pasi muutu. 22Na nde abinduli ti: «Hwafwana ti Mwana a muutu amono pasi yindahi. Bapfumu, bakuutu ba bangaanga ba Nzambi na milongisi mi Mikele sa banyanza nde. Hwafwana ti baduba nde, na nde sa asuuha mu lipfu mu ilumbu hi bitatu.»
Buni mu udukala Yisu
Mty 16.24-28; Mlk 8.34–9.1
23Titswene, Yisu aleeli bo boosi: «Tso muutu tondi uduukala me, anyaha utsima ma nde mwakulu, nde abita kuruwa a nde pasi ilumbu, na aduukala me. 24Ni mu buuna, pasi nde wu atondo ufuuhasa muvumu a nde, sa anyambasana nde. Ka pasi nde wu unyambasana muvumu a nde mu tooni a me sa afuuhasa nde. 25Ki kaluha muutu hubaha tso nde bahi toto yoosi, na uvinda muvumu a nde? 26Pasi nde wu uba na tsonyi mu tooni a me, buuve mu tooni a mambu ma me, Mwana a muutu sa amonele nde ka tsonyi. Nde umoneele nde tsonyi. Nde umoneele nde tsonyi bu nde hu uya hutso muyusu a nde, na hutso muyusu a Taata na wu bapofi bangidi. 27Mu mbuli, me ndeele benu, mwaana kabu la baatu bakima babali ŋa, a bukwa ve, hwavele umono Ipfumu hya Nzambi.»
Muyusu a Mwana a Nzambi
Mty 17.1-8; Mlk 9.2-8
28Bu Yisu hamani utoyo, bilumbu poombo byavyohi. Yisu avoli Peetelo, Yowani na Yaki, na bavaati hu yulu isyelo mu uyasambila Nzambi. 29Bu Yisu hakasambila, hiinzi hya nde hyakimbuhi, na ikutu hya nde hyafuuki lifuuku li mifudi. 30Na babahala boole baakamoho na nde, aba Moose na Eliya. 31Bo bamonihili hutso muyusu a bo, na bo baakayambila mu tsukusu isalu hya Yisu mu mambu ma lipfu la nde hu musyenge a Yeruselemi.
32Peetelo na bambaahi ba nde ba boole baaba hutso a tolo li mifudi. Na bu bo baasuuhi, bo baamoni muyusu a Yisu na babahala boole ba baaba baateleme na nde. 33Mu taangu yi bakiikabuha na Yisu, Peetelo ni uyaleele nde: «Mulongisi, hu li bubwe ti bisu a benu libaani ŋaniiŋa. Bisu sa litelemese bitudu bitatu. Imosi hya we, imosi hya Moose na imosi hya Eliya.» Ka Peetelo a hakayaba ma nde hakaleele ve.
34Bu nde haba mu utoyo buuna, yidu layafuha bo. Na bayihi baabahi boomo, bu bo baakoti hutso a yidu. 35Na hutso a yidu, ndaha mosi yapali na yaleeli: «Nde wu ni Mwana a me wu me atsoolo, yuhalaani nde!» 36Bu ndaha yayuhini, Yisu asaali ndulu nde siha. Bayihi baaswehi musamu wuna, na mu taangu mo yiina, a baayabisi nde huli pasi muutu ve.
Yisu miibeeloso mwaana nga livupu lilibi
Mty 17.14-18; Mlk 9.14-27
37Ilumbu hi hyaduuki, Yisu na bayihi ba nde baakulimini hu tsina isyelo. Konge a baatu yinene yayabwana nde. 38Ŋa hati la konge, bahala limosi lafulihi: «Mulongisi, kolo-kolo a we, tala ati mwaana a me, me nde ni livingu. 39Livupu lilibi libaabwa mu nde, lo libaatuma nde mu ubaafulaha. Lo libanyingasa nde mu mifudi, na ubapalisa nde mafudi mu munywa. Lo ubaanyahula nde mu pasi, na lo libaakolese nde hu unzuhisini ŋa yulu unyongese nde. 40Me ambondili bayihi ba we mu ubinga lo, ka bo a batwali ve.»
41Yisu aleeli: «Benu, ki pila a baatu babavele na imiinu, baa libaavaanga bubi. Natee ki taangu me apfwana uba na benu na ukunda benu? Behe mwaana a we ŋa.» 42Bu mwaana hakayasusaha, tengo laabwisi nde ŋa toto, na lanyingisi nde mu mifudi. Ka Yisu afwengili tengo, abeelusi mwaana na afutili nde huli taata a nde. 43Na baatu boosi baamoni matwala ma Nzambi.
Yisu abweyabisa lipfu la nde
Mty 17.22-23; Mlk 9.30-32
Bo boosi baakimuhi. Bu baatu boosi baakakimuha mu moosi ma Yisu hakavaanga, Yisu aleeli bayihi ba nde: 44«Yuhaani bubwe ma me undeele benu: Mwana a muutu sa bayeholo nde ŋa myoho mi baambeene.» 45Ka ma Yisu hakayabisa bayihi, bo a baakatsikaha mo ve. Bo a baakatsikaha ve, mu tooni ati tsiki a mo yaba yasweme mana bo baveletsikaha. Bo baaba na boomo mu ufuula nde mu tooni a mambu mo maana.
Muutu wu afula bukuutu
Mty 18.1-5; Mlk 9.33-37
46Bayihi baakatsundana ŋa hati la bo mu wu afula bukuutu. 47Yisu bu hayabi matsimi ma bo, nde avoli ikenyi, na asuusi hyo ŋa pedu a nde. 48Na nde aleeli: «Pasi muutu wu uyaka ikenyi mohi mu nduhi a me, ni me nde ayaki. Na muutu wu miyaka me, miyaka ka wuna wu atsindaha me. Mu tooni ati, wu afula bungebe ŋa hati la benu boosi, ni nde wu afula bukuutu.»
Muutu wu avele muboho a benu, li mbaahi a benu
49Yowani aleeli: «Mulongisi, bisu lamono muutu wu ubaabinga matengo mu nduhi a we. Na bisu laasaha uliha nde mu ubwevelesa buuna. Mu tooni ati, nde a hali wa kabu la bisu ve.» 50Ka Yisu aleeli nde: «A liliha nde mu usa buuna ve. Mu tooni ati, wu avele muboho a benu, li mbaahi a benu.»
Yisu ka mu uyene hu Yeruselemi
51Ka bu bilumbu bya nzyenili a Yisu hu yulu byaba byaka bebele, nde ataasi uyene hu musyenge a Yeruselemi. 52Nde atehisi utsindaha biluumbi. Bu baaba mu nzila, bo baakoti mu bula bumosi bwa Samariya mu uvangila nde mbuha yi hubwamina. 53Ka bisu Samariya, baabisi uyaka nde. Bo baabisi uyaka nde, mu tooni ati, nde akayene hu Yeruselemi. 54Bo bamono buuna, boole mu bayihi ba nde, Yaki na Yowani baaleeli: «Pfumu, we tondi ti bisu lituma mbaahu a yulu yibwila baatu moba mana yo yinyengese bo?» 55Ka Yisu akinguha mu utala bo, ni usyembe bo. 56Na bo baayeni hu bula bukima.
Utimba byosi mu uduukala Yisu
Mty 8.19-22
57Bu bo baaba mu nzila, bahala limosi laaleeli Yisu: «Me tsa nduukala we pasi tsyelo yi we uyene.» 58Yisu afutili nde: «Mibahu na biswemili byabo, na banyunyi babaaba na byanza bya bo. Ka Mwana a muutu a hali na mbuha yi uvuma ve.» 59Yisu aleeli huli muutu mukima: «Ya duukala me.» Ka muutu mo wunuuwu aleeli nde: «Pfumu, va me muswa me maanzandiiha taata a me.» 60Yisu afutili nde: «Nyaha babaakwa badiiha babaakwa. Na we, yene ya yabisa baatu mambu ma Ipfumu hya Nzambi.» 61Mukima ka aleeli nde: «Me tsa nduukala we Pfumu. Ka, maava me muswa mu ufutaha hu uyalanisa ikuta hya me.» 62Yisu afutili nde: «Woosi wu ukaanga ikaanga mu usala ngundu, na ubaabwetala mbisa, a havangama mu Ipfumu hya Nzambi ve.»
Valið núna:
Luuka 9: TSA
Áherslumerki
Afrita
Bera saman
Deildu
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.