Luuka 5
5
Yisu asooli bayihi ba nde baatsomi
Mty 4.18-22; Mlk 1.16-20; Yow 1.35-51; 21.1-11
1Ilumbu imosi, Yisu aba ŋa simu la dyanga la Ngenezareti, mu uyihasa mambu ma Nzambi. Konge a baatu yakavinyala Yisu mu usaha uyuha nde. 2Ŋa simu la dyanga, Yisu amoni maluungu moole ma balobi basutihi mu uswaha malihi ma bo. 3Yisu avati hutso a luungu limosi, li laaba la Simoni. Na nde aleeli Simoni, mu utahuha hole na simu. Buuna nde atsahili, na hutso a luungu, nde akayihasa makonge.
4Bu nde hamani uyihasa, nde aleeli huli Simoni: «Susaha hu idongi, na lihani malihi ma benu mu ulobo.» 5Simoni afutili: «Mulongisi, bisu limiisaala butsuhu bwosi, hwavele ubaha isiha. Ka bu we miileele, me tsa ndiiha malihi.»
6Ni mu buuna, Simoni na bakima baalihi malihi ma bo mu dyanga. Bo baabahi batswi ba banzuhisini, na malihi ma bo maakakana utudaha. 7Na bo baavesi bakaanga ba bo, baa mu luungu likima mu uyakumbasa bo. Bu bo baayidi, bo baaluusi maluungu mamoole mu batswi ba banzuhisini, natee bu mo maakakana udyama.
8Bu Simoni Peetelo hamoni buuna, nde atsokimi ŋa busu bwa Yisu na aleeli: «Pfumu, tahuha na me, ka me ni nga masumu.» 9Nde haleeli buuna mu tooni ati, nde na bakima baamoni tsisu, mu iteesi hi batswi ba bo baabahi. 10Yaki na Yowani, baana ba Zebede ba baaba itwadi na Simoni, bo kaka baamoni tsisu. Yisu aleeli huli Simoni: «A baa na boomo ve! Umata loloyi, we uba mulobi a baatu.» 11Titswene, Simoni na bakima baabehi maluungu ma bo hu simu, bo baasiisi byosi, na baaduukili Yisu.
Yisu abeelusi nga bwatsi
Mty 8.1-4; Mlk 1.40-45
12Ka bu Yisu hatoodi hu musyenge mumosi, bahala limosi nga bwatsi, aba huuna. Bu nde hamoni Yisu, nde atsokimi, hiinzi mu toto ŋa busu bwa Yisu, na nde asambili ti: «Pfumu, tso we tondi, we utwala utsyemese me.»
13Yisu alabi kaka la nde, abembi nde, na aleeli: «Me tondi buuna: baa watsyeme!» Mu taangu mo yiina, bwatsi bwamati mu nde. 14Na Yisu aviidi nde tumili mo yiniiyi: «A hayabisa musamu mo wunuuwu huli pasi muutu ve! Ka yene yamonehele huli ngaanga a Nzambi, na va bungodu bwa tsyemili bu Moose hatumi. Ni hyo hi umweese huli baatu boosi ti we miibeeloho.» 15Lidumu la Yisu laakafulala uyenelele, na makonge ma malahi maakakuukama mu uyuha nde, mana nde abeeloso babeedu. 16Ka nde asiisi bo, na ayeni hu mambuha ma busiha mu usambila Nzambi.
Yisu abeelusi ikata
Mty 9.1-8; Mlk 2.1-12
17Ilumbu imosi, Yisu bu hakayihasa baatu, Bafarisi na milongisi mi mikele baaba batsahala ŋa muvanga a nde mu uyuhala nde. Baatu mo baana baamati mu mala moosi ma Ngalili, na ma Yuda natee hu musyenge a Yeruselemi. Na matwala ma Pfumu maaba mu Yisu. Nzambi aviidi nde matwala mu ubeeloso babeedu. 18Hwayidi kaka baatu ba baakabita ikata ŋa yulu ipoyi. Bo baakasaha ukotese nde mu nzo, mu ususa nde ŋa busu bwa Yisu. 19Ka bo a baatwali ukotese nde ve, mu tooni a konge a baatu yi yaba yafulala. Na bo baavati hu yulu a nzo, baatubi mwanzi, na baakulimisi mubeedu na ipoyi hyoosi ŋa busu bwa Yisu, wu aba ŋa hati la baatu. 20Bu Yisu hamoni imiinu hya bo, nde aleeli: «Mbaahi a me, masumu ma we bamiinyahula.»
21Milongisi mi mikele na Bafarisi baatsimi na baakalelesene: «Ki pila a muutu wu ubaasumana Nzambi? Na utwala utsindula masumu tso a ni Nzambi nde mwakulu ve?» 22Ka Yisu ataasi matsimi ma bo, nde afutili bo: «Mu hima libaatsima buuna mu mitima mya benu? 23Hima hyafulala ulenge mu uleele: “Masumu ma we bamiitsindula”, buuve mu uleele: “teleme na takula”? 24Me tondi ti benu liyaba ti Mwana a muutu li na matwala ŋa toto mu utsindula masumu.» Nde aleeli huli ikata: «Me mindeele we, teleme! Volo ipoyi hya we, na yene hu nzo a we.»
25Mu mawasa, ŋa busu bwa baatu boosi, nde atelimi. Nde avoli ipoyi hi nde haba habwamina ŋa yulu a hyo, ayeni hu nzo a nde na ubaayusa Nzambi. 26Baatu boosi baakimuhi na baakayusa Nzambi. Bu baaluuli mu tsisu, bo baakaleele: «Loloyi bisu limiimono mambu ma kimuhili.»
Yisu miiteele Leevi
Mty 9.9-13; Mlk 2.13-17
27Humbisa a maana, Yisu apali na atalili mukaambi limandu, nduhi a nde Leevi, atsahala mu nzo isalu yi bakaambi ba limandu. Yisu ateeli nde na aleeli: « Duukala me.» 28Leevi asiisi byosi, atelimi na aduukili Yisu.
29Buuna, Leevi avangili Yisu mukungi wu udya wu munene hu nzo a nde. Konge yinene yi bakaambi ba limandu na baatu bakima, baakadya itwadi na bo. 30Bafarisi na milongisi mi mikele baakaŋono na baakaleele huli bayihi ba nde: «Mu hima benu lili mu udya na unywa na bakaambi ba limandu, na banga masumu?» 31Yisu afutili bo: «A ba bali polo bubaasaha mubuhi ve, ka ni babeedu. 32Me a hanza mu uteele babaakuha ve, ka banga masumu. Me anzateele bo mana bo basobo mbiili a bo, na uya huli Nzambi.»
Baakafuula Yisu mu ikaandi hi ukiinza Nzambi
Mty 9.14-17; Mlk 2.18-22
33Buuna baatu baaleeli Yisu: «Bayihi ba Yowani mu lisambulu, bubaadya ikaandi mu ukiinza Nzambi. Bayihi ba Bafarisi kaka bubaasa pila mosi. Ka ba we ndulu udya na unywa.» 34Yisu aleeli bo: «Benu utwala uliha byudya huli baatu ba benu laatsiha hu mukungi makweele, bu mulumi akini na bo? 35Ka taangu yi uto, yi bu umaasa bo mulumi. Mu taangu mo yiina, bo bu udya ikaandi.»
36Buuna Yisu abweta bo kuma mo yiniiyi: «A hu li na muutu wu ubaalondo ikutu hi ikulu mu ireende hya tsanda hi inyatihi ve. Kini, ireende hi inyatihi hyubwekasula tsanda yikulu. Buuna, vulu luubwefulala bunene. 37Ni bumosi kaka, muutu utwala usyeholo malamu ma tsohele mutso mirumbu mi mikulu ve, kini malamu ma tsohele muubula mirumbu. Buuna, na malamu, na mirumbu, byosi byunyambahana. Ka baafwana usyeholo malamu ma tsohele mutso mirumbu mi minyatihi! 38Ka baafwana usyeholo malamu ma manyatihi mutso mirumbu mi minyatihi. 39Na a huli na muutu wu amiinywa malamu ma maayele, na ubwetondo unywa myenge ve. Mu tooni ati, baatu bubaleele: “Malamu ma maayele maafulala bubwe.”»
Valið núna:
Luuka 5: TSA
Áherslumerki
Afrita
Bera saman
Deildu
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.