Luuka 12
12
Ukele na baatu banga mapfuta
Mty 10.26-27
1Mu taangu mo yiina, limya la baatu laakuukimi na baakadyata miilu mya bana. Yisu atswamini uleele huli bayihi ba nde: «Baakelaani mu iloho hi hibaadanisa paate a Bafarisi, hyo hibaamweese muwala a bo. 2Mambu moosi ma maasweme sa mamonehele; na mambu ma tswehi sa mayabaana. 3Ni mu buuna, mambu moosi ma benu luleele hutso a piipidi sa bayuha mo ŋa liyalala. Na mambu ma benu luleele wadi-wadi mu matswi ma bambaahi mu bitini bi manzo. Baatu sa bata mo ibila ŋa yulu bibaanga bi manzo.
4Me ndeele benu bambaahi ba me: A libata boomo bwa babaali mu uduba nyutu na uveletwala usa isiha ikima ŋa yulu ve. 5Me tsa mweese benu wu benu lafwana ubata boomo. Baataani boomo bwa Nzambi, nde wuna Humbisa uduba muutu, li na lituma li ubwaha nde hu mbeenge a mbaahu. Eeye, me ndeele benu, ni nde wuna benu lafwana ubata boomo. 6Masyehe mataanu bali mu usumbasa mu mwa makuta moole. Ka a huli na tso limosi mu mo li Nzambi havusaana mutima ve. 7Na paa naanga mitswe mya benu baayaba yoosi litangu. Ni mu buuna a liba na boomo ve. Talu a benu yafula yi masyehe moosi.
8Me ndi mu undeele benu: pasi muutu wu utiila me imbangi ŋa busu bwa baatu, Mwana a Muutu ka sa atiila nde imbangi ŋa busu bu bapofi ba Nzambi. 9Ka muutu wu utunala me ŋa busu bwa baatu, Mwana a Muutu sa atunala nde ka ŋa busu bu bapofi ba Nzambi. 10Na pasi muutu wu utoyo bubi mu Mwana a Muutu, sa ayaka kolo-kolo. Ka pasi muutu wu uyambila bubi mu Livupu la Ngidi, Nzambi a husa nde kolo-kolo ve. 11Sa baabita benu hu utsundasa hu manzo ma lisambulu li Bayudaayo, ŋa busu bu bakuutu na lituma la tsi. A litsima buni benu lukalila nyutu a benu ve, tso ki mambu benu lupalisa ve. 12Nyahaani hwa benu, Livupu la Ngidi sa lilongese benu mu taangu mo yiina mambu ma benu lafwana uleele.»
Sahu li isina hi itsuudu
13Muutu mumosi ŋa hati la konge aleeli Yisu: «Mulongisi, leele huli mwaana a ngu a me akaba na me mukobe wu taata hasiisa.» 14Yisu afutili nde: «Mbaahi a me, na asoolo me mu uba nzonzi a benu, buuve mu ukabila benu mukobe a benu?» 15Titswene Yisu aleeli huli baatu boosi: «Kebaani! Baabataani manzala moosi ma busina; tsoongo a idiingu hya muutu a hyakangama mu bisiha bya nde ve.»
16Yisu atiidi bo sahu moli: «Isina imosi hya bahala hyaba na bwadi bu bwabuti mbutu yindahi. 17Nde akabaatsima hutso mutima na ubaaleele: “Me ka buni utsa! Me a ndi na mbuha yinene mu uswehe mbutu a me yoosi ve.” 18Na nde abweleele mu nde mo: “Mono bu me utsa: me tsa tsala biswehili bya mbutu a me, me tsa mbwetunga biswehili bi byafulala bunene. Ni huuna me ukuukaha mbutu a me yoosi, na bisiiha bya me byosi. 19Titswene me tsa ndeele muvumu a me: ‘Mbaahi a me, we li na biloho bi bilahi bya ŋa muvanga bi byudiinga bilima bi bilahi. Vuma hwa we, dya, nywa na baa mu kinya.’” 20Ka Nzambi aleeli nde: “Iyahudi! Ndulu mu butsuhu mo bunuubu, me umaasa muvumu a we. Na bi we akuukaha biina byosi, na uvolo byo?”» 21Yisu abwesi: «Ni buuna ka huli muutu wu ubatsonzehe busina mu nde mo, na wu aveletsonzehe biloho bi byayelemene ŋa busu bwa Nzambi.»
Baani na hiitu mu Nzambi
22Titswene Yisu abweleele bayihi ba nde: «Ni mu buuna me ndi mu undeele benu: a liba na matsimi mu idiingu hya benu, mu bi benu luudya, buuve mu nyutu a benu, mu bi benu lu ulwata ve. 23Ka idiingu hyaluta byudya talu, na nyutu bele bikutu ve. 24Talaani mingongoyo, myo a mibaakuna ve, tso ukuukaha ve, myo a mili na iswehili hya mbutu ve, tso inzunihi ve, ka Nzambi ubaabuungala myo! Benu lalutala myo tsoongo! 25Na ŋa hati la benu mu tooni minyongo mya nde, utwala ubwese bilumbu bya idiingu hya nde? 26Ka tso benu a lili na matwala mu bisiha bya hole ve, mu hima benu libaaba na matsimi mu bisiha bi byafula tsoongo?
27Talaani buni bifulu bya bwadi bibaakula. Byo a bibaasala ve, tso utuunga bikutu ve. Ka me ndeele benu ti: tso mutumi Soolomo na busina bwa nde bwosi, a hali na bikutu bibibwe we imosi mu bifulu mo bi ve. 28Tso Nzambi ubaalwatisa himbu hya bwadi loloyi, na hi bubwaha hutso a mbaahu ngwali, tandisi a benu, nde sa alwatsisa benu ka! Benu baatu banga imiinu hi ikeehe. 29Benu, nyahaani matsimi mu bi benu luudya na bi benu lunywa, tso byukwana. 30Ka ni bangoyi baa tsi moyi ba baasaha taangu yoosi. Ka benu, benu lili na Taata wu ayaba ti benu lili na nzala a byo. 31Ma tswaminaani usaha Ipfumu hya Nzambi, na Nzambi sa ava benu bisiha byosi bi benu lili na byo nzala.
32A baa na boomo ve, we mwaana a konge biboodi! Mu tooni ati Taata a benu mimono bubwe mu uva benu Ipfumu hya nde. 33Sumbasaani bisiha bi benu lili na byo byosi, na vaani mbongo huli biyaha. Vaangaani bapaala baa mbongo ba baavelebiiya, kukahani busina bu bu uvelefwa hu yulu, hu bwo bu uveledimbala. Mu tooni ati, huuna biibi utwala uto ve, na batsyedidi utwala ubiyasa bwo ve. 34Ni mu buuna, ŋa huli busina bwa we, ni ŋana ka huli mutima a we.
Kinya huli basalili ba bali likanda
35Banaani balaavangama, lwataani bikutu bya benu bi isalu, na baangisaani minda mya benu. 36Banaani we basalili ba bali mu ukeele pfutihili a pfumu a bo wu ayene hu mukungi makweele. Mana bu nde hu uyato ŋa nzo a nde, na nde adoodo, bo badibula nde munywa a nzo. 37Kinya huli basalili moba baa pfumu hu uyabiisa musihi ŋa nde hu uyafutaha! Ni mbuli, mu pfutihili a nde, nde ni wu ulwata ikutu hya nde hi isalu, wu utsahisa bo ŋa metse, na usuhala bo byudya. 38Nde tso hayato hu hahati a busi, buuve ŋa ngwali, a dyaambu ve, kinya huli basalili, tso nde yabiisa bo musihi!
39Yaabaani lo bubwe, tso pfumu a nzo kini ubaayaba ki taangu muyibi hu uya, nde ukala nde mu ubula nzo a nde. 40Benu ka, baavangamaani, mu tooni ati Mwana a Muutu sa aya, mu taangu yi benu laaveletsima.»
Musalili wu asungama na wu avelesungama
41Na Peetelo afuuli: «Pfumu we sahu moli ndulu mu bisu we tiidi lo, vo mu baatu boosi?» 42Pfumu afutili: «Mukuutu basalili wu asungama na nga tsiki ni na? Ni muutu wu Pfumu hasuusala mutima a nde mu ubakeelese basalili, mana nde abaava pasi muutu mu taangu yi yafwana kabu la byudya. 43Kinya yili na mukuutu mo wunuuwu, tso pfumu mu pfutihili a nde, yabiisa nde mu ubaasa isalu hi nde hasiila nde! 44Me ndeele benu, ni mbuli: Mukuutu sa ava nde lituma ŋa yulu bisiha bya nde byosi. 45Ka tso musalili li mu uleele hutso mutima a nde ti: “Pfumu a me li mu utaamba mu uya.” Nde abwa mu ubeete basalili bana ba babahala na ba bakaasu, na udya, na unywa, na ukolo malamu. 46Buuna mukuutu sa ayafutaha mu ilumbu hi nde haveletsima, na mu taangu yi nde haveleyaba. Mukuutu sa asyembe musalili mo wunuuwu mu tsyembili yi nono, na uva nde musyendo mumosi na ba baavelesungama.
47Musalili wu ayaba litondo la pfumu a nde, ka velivangimasa lo, nde sa ayaka bikooti bibyafulala. 48Ka musalili wu aveleyaba ma pfumu a nde hatondo, na li mu uvanga mambu ma mabi, afwana uyaka tsyembili, na bikooti byatsiitsa. Huli muutu wu ayaka bi bilahi, sa bavondo bulahi. Na sa banono bibyafulala bulahi huli wu ubaasoombese bi bilahi.
Mu Yisu sa huba na kabwili
Mty 10.34-36
49Me miinza mu ubehe mbaahu ŋa toto, na me na nzala yindahi ti yo yiba yi yamibaangama! 50Me apfwana uyaka tondihili mapasi, na me na lehemene mu uyaka yo. 51Benu libaatsima ti me hyenze ambehe ŋa toto? Naana, me ndeele benu, ka kabwili ŋa hati la baatu. 52Umata bunuubu, nzo yi yili na baatu bataanu, bo sa bakabuha. Baatu batatu sa babelele baatu boole, na baatu boole sa babelele baatu batatu. 53Taata sa abelele mwaana a nde wa bahala, na mwaana wa bahala sa abelele taata a nde. Ngu sa abelele mwaana a nde wu mukaasu, na mwaana wu mukaasu sa abelele ngu a nde. Ngu a mwaana wa bahala sa abelele mukadi a mwaana a nde, na mukadi a mwaana nde sa abelele buko bwa nde bu mukaasu.»
Uyaba na utsikaha biliimbu bya taangu
Mty 16.2-3
54Yisu abweleele huli konge a baatu: «Ŋa benu lumono yidu mu upala hu Wesete, mu mawasa benu libaaleele ti: “Mvula sa anoho”, na nde ubaanoho. 55Na ŋa benu libaamono ifula hya Sude mu usa, benu libaaleele: “Nyangu sa abenge”, na bubaaba buuna. 56Benu baatu banga muwala! Benu libaayaba utsikaha biliimbu bya toto na bya yulu, buni benu laaveletsikaha mambu ma mali mu uvyoho mu taangu mo yiniiyi? 57Benu mwakulu a laatwala utsikaha mambu ma mbuli ve! 58Ni mu buuna, ŋa we li mu uyene hu utaanda na muboho a we ŋa busu bwa nzonzi, bu benu likini mu nzila, ma yuhasana na nde. Tso a buuna ve, nde sa abita we ŋa busu bwa nzonzi, na nde sa ayeholo we huli bapulusu baa buyatimba we mu kondaayi. 59Ka me ndeele we, we a upala huuna ve hwavele ufuta mukanu a we woosi te likuta laatsiitusu.»
Valið núna:
Luuka 12: TSA
Áherslumerki
Afrita
Bera saman
Deildu
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.