ၸႃႇၶရီႉ 14
14
ဝဵင်းယေႇရူႉသလႅမ်ႇလႄႈၵူၼ်းၵူႈၸိူဝ်ႉၵူႈမဵဝ်း
1တူၺ်းလူး။ မိုဝ်ႉဝၼ်း ထႃႇဝရႃႉၽြႃး ဢၼ်ဢုၵ်ႉၸႃႇမႂ်း တၵ်းလႆႈၶၢမ်ႇ တၢင်းဢၼ်ႁိမ်ႁူင်ႇဢဝ် သေလႄႈ ၽႄမႅင်ႇၵၼ် ၵႃႈၼႂ်းၵၢင်မႂ်းၼၼ်ႉ တၵ်းႁွတ်ႈထိုင်ဢေႃႈ။- 2လွင်ႈမၼ်းၸမ်ႉ ၵဝ်တၵ်းႁႂ်ႈ ၵူၼ်းၵူႈၸိူဝ်ႉၵူႈမဵဝ်း ၸူႉၵၼ်တုမ်ၵၼ် ယူႇၽၢႆႇၼိုင်ႈတင်း ဝဵင်းယေႇရူႉသလႅမ်ႇ ႁႂ်ႈလႆႈ တိုၵ်းတေႃးဝဵင်းၼၼ်ႉဢေႃႈ။ တိုၵ်းဢဝ်ဝဵင်းသေယဝ်ႉ၊ တၵ်းဢွၼ်ၵၼ် ႁိမ်ႁူင်ႇႁိူၼ်း တင်းလၢႆလႄႈ ႁဵတ်းဢႃႉထမ်ႇမႃႉ တီႈမႄႈယိင်းတင်းလၢႆဢေႃႈ။ ၵူၼ်းဝဵင်းၶိုင်ႈၼိုင်ႈ တၵ်းလႆႈၶၢမ်ႇ တၢင်းဢၼ်သိမ်းဢဝ်ၵႂႃႇလႄႈ ၶိုင်ႈၼိုင်ႈ ဢၼ်ၵိုတ်းဢၼ်ၵျၢၼ်ႇဝႆႉၼၼ်ႉ တၵ်းဢမ်ႇလႆႈၶၢမ်ႇ တၢင်းဢၼ်ပႄႇၽဵဝ်ႈပႅတ်ႈ သေၵႃႈၼႂ်းဝဵင်းၼၼ်ႉ။- 3မိူဝ်ႈၼၼ်ႉ ထႃႇဝရႃႉၽြႃးတၵ်းဢွၵ်ႇလႄႈ တိုၵ်းတေႃးၵူၼ်း ၵူႈၸိူဝ်ႉၵူႈမဵဝ်းၼၼ်ႉ မိူၼ်ၸိူဝ်ႉၼင်ႇဢၼ် မၼ်းၸဝ်ႈတိုၵ်း ၼႂ်းမိုဝ်ႉဝၼ်း ဢၼ်တိုၵ်းသိုၵ်းၼၼ်ႉဢေႃႈ။- 4ၼႂ်းမိုဝ်ႉဝၼ်းၼၼ်ႉ တိၼ်မၼ်းၸဝ်ႈ တၵ်းၸုၵ်းယူႇ ၵႃႈၼိူဝ်လွႆသၢၼ်ႇလုၼ်ႇ ဢၼ်မီး ၵႃႈတီႈၽၢႆႇၼႃႈ ဝဵင်းယေႇရူႉသလႅမ်ႇ ၽၢႆႇဝၼ်းဢွၵ်ႇ ၼၼ်ႉလႄႈ လွႆသၢၼ်ႇလုၼ်ႇၼၼ်ႉ တၵ်းတႅၵ်ႇဢႃႈ ၵႃႈတီႈၶိုင်ႈၵၢင်မၼ်း ဢဝ်ၵႃႈတီႈၸႃႉၸဵမ် ၽၢႆႇဝၼ်းဢွၵ်ႇ တေႃႇထိုင်ႁွတ်ႈ ၽၢႆႇဝၼ်းတူၵ်းလႄႈ ပဵၼ်ၶူင်ႈႁူၺ်ႈလူင် ဢၼ်ယႂ်ႇၼႃႇဝႆႉဢေႃႈ။ လွႆၶိုင်ႈၼိုင်ႈၼၼ်ႉ တၵ်းလႆႈၶၢႆႉတီႈၵႂႃႇ ၽၢႆႇတၢင်းႁွင်ႇ၊ ၶိုင်ႈၼိုင်ႈၼၼ်ႉ တၵ်းလႆႈၶၢႆႉတီႈၵႂႃႇ ၽၢႆႇတၢင်းၸၢၼ်းဢေႃႈ။- 5သူတၵ်းဢွၼ်ၵၼ် ဢွၵ်ႇပၢႆႈ ၸွမ်းသဵၼ်ႈတၢင်းၶူင်ႈႁူၺ်ႈၵႄႈလွႆၵဝ်ၼၼ်ႉ ၵႂႃႇလႄႈ ၶူင်ႈႁူၺ်ႈၼၼ်ႉ တၵ်းၶိုတ်းထိုင် ၵႃႈတီႈဝဵင်းဢႃႇၸလႃႉပုၼ်ႉဢေႃႈ။ သူတၵ်းဢွၼ်ၵၼ် ဢွၵ်ႇပၢႆႈ မိူၼ်ၸိူဝ်ႉၼင်ႇဢၼ် သူဢွၵ်ႇပၢႆႈ ဢိင်ႇသၼ်ႇလူင် ၼႂ်းၸူဝ်ႈပၢၼ် ၶုၼ်ဢူဝ်းၸီႉယႃႉ ၶုၼ်ႁေႃၶမ်းယူႉတႃႉၼၼ်ႉဢေႃႈ။ ထႃႇဝရႃႉၽြႃး ၽြႃးပဵၼ်ၸဝ်ႈၵဝ် တၵ်းမႃးလႄႈ ၵူၼ်းဢၼ်မူတ်းၸၢင်ႇမၼ်းၸဝ်ႈ တင်းသဵင်ႈတင်းလူင် တၵ်းဢွၼ်ၵၼ် ပႃးမႃးဢေႃႈ။- 6ၼႂ်းမိုဝ်ႉဝၼ်းၼၼ်ႉ တၵ်းဢမ်ႇမီးဢၼ်လႅင်း။ လွင်ႈတၢင်းဢၼ် ႁိူဝ်ႈလႅင်းတင်းလၢႆ တၵ်းသုတ်ႈၵႂႃႇ ယွမ်းၵႂႃႇဢေႃႈ။- 7ဢမ်ႇၸႂ်ႈၵႃဝၼ်း၊ ဢမ်ႇၸႂ်ႈၵႃၶိုၼ်း၊ တၵ်းပဵၼ်ဝၼ်း ဢၼ်ထႃႇဝရႃႉၽြႃးႁူႉၼၼ်ႉ ဝၼ်းၼိုင်ႈ လႄႈ ႁွတ်ႈထိုင်ၶိင်ႇႁူဝ်ၶမ်ႈ သေယဝ်ႉ ၸင်ႇတၵ်းမီး ဢၼ်လႅင်းဢေႃႈ။- 8ၼႂ်းမိုဝ်ႉဝၼ်းၼၼ်ႉ ၼမ်ႉဢသၢၵ်ႈ တၵ်းလႆဢွၵ်ႇသေ ၵႃႈၼႂ်းဝဵင်းယေႇရူႉသလႅမ်ႇလႄႈ ပဵၼ်ၶိင်ႇမႆႈ သေဢမ်ႇဝႃႈ၊ ပဵၼ်ၶိင်ႇၵတ်းသေဢမ်ႇဝႃႈ၊ ၶိုင်ႈၼိုင်ႈ တၵ်းလႆၵႂႃႇၵႃႈတီႈပၢင်ႇလၢႆႇ တၢင်းဝၼ်းတူၵ်းယူႇဢေႃႈ။- 9ထႃႇဝရႃႉၽြႃး တၵ်းပဵၼ်ၶုၼ်ႁေႃၶမ်း လိၼ်မိူင်း တင်းသဵင်ႈတင်းမူတ်းဢေႃႈ။ ၼႂ်းမိုဝ်ႉဝၼ်းၼၼ်ႉ တၵ်းပဵၼ်ထႃႇဝရႃႉၽြႃး ပႃးလဵဝ်ၵူၺ်း၊ ၼႃႇမႃႉၸိုဝ်ႈသဵင်ၸဝ်ႈ ပႃးလဵဝ်ၵူၺ်းဢေႃႈ။- 10မိူင်းၸဝ်ႈတင်းမိူင်း တၵ်းလႆႈပဵၼ် ဢၼ်ၽဵၼ်ႈလီ ပဵင်းလီ မိူၼ်ၸိူဝ်ႉၼင်ႇပၢင်ႇဢႃႇရၽႃႉ ဢဝ်ၵႃႈတီႈ ၸႃႉၸဵမ်ဝဵင်းၵေႇပႃႉ တေႃႇထိုင်ႁွတ်ႈဝဵင်းရိမ်ႇမုၼ်ႇ ၽၢႆႇတၢင်းၸၢၼ်း ဝဵင်းယေႇရူႉသလႅမ်ႇၼၼ်ႉဢေႃႈ။ ဝဵင်းၵေႃႈ တၵ်းလႆႈၶၢမ်ႇ တၢင်းဢၼ်ယုၵ်ႉယွင်ႈလႄႈ သမ်ႉၶိုၼ်းတႄႇပဵၼ် ၼႂ်းတီႈဝဵင်းၵဝ်ႇၵဝ်ႇၼၼ်ႉ ဢဝ်ၵႃႈတီႈ ၸႃႉၸဵမ်ၽၵ်းတူ ပိၼ်ႇယႃႇမိၼ်ႇတေႃႇထိုင်ႁွတ်ႈ ၽၵ်းတူ မိူဝ်ႈဢွၼ်တၢင်းၼၼ်ႉ၊ တင်းၽၵ်းတူ ၸဵင်ႇဝဵင်းၼၼ်ႉ ဢိၵ်ႇတင်း ဢဝ်ၵႃႈတီႈ ၸႃႉၸဵမ်တိူၵ်ႈတီႈတိုၵ်းသိုၵ်း ႁႃႇၼၼေႇလႃႉ တေႃႇထိုင်ႁွတ်ႈ ၶိူင်ႈၼူတ်ႈ မၢၵ်ႇၸပိတ်ႈ ၶုၼ်ႁေႃၶမ်းၼၼ်ႉ ၸိူဝ်းၼၼ်ႉဢေႃႈ။- 11ၵမ်းလိုၼ်း ၵူၼ်းတၵ်း တူၵ်းတီႈတူၵ်းလႅၼ် ယူႇၵႃႈၼႂ်းမၼ်းလႄႈ မၼ်းယင်းဢမ်ႇလႆႈၶၢမ်ႇၽေး တၢင်းဢၼ်ၵိၼ်ႇဢၼ်ဝႃႈလႄႈ ဝဵင်းယေႇရူႉသလႅမ်ႇ တၵ်းလႆႈယူႇ လူင်ႉလီ လွတ်ႈလီဢေႃႈ။- 12ၽေးတၢမ်ႇဢၼ်ထႃႇဝရႃႉၽြႃး ပၼ်တီႈမဵဝ်းၵူၼ်း တင်းသဵင်ႈတင်းလူင် ဢၼ်မႃးတိုၵ်းတေႃး ဝဵင်းယေႇရူႉသလႅမ်ႇၸိူဝ်းၼၼ်ႉၸမ်ႉ၊ ၼိူဝ်ႉၶဝ်ၼင်ၶဝ် တၵ်းသုတ်ႈယွမ်း လူႉလႅဝ်ၵႂႃႇ ၼႂ်းမိူဝ်ႈဢၼ်ၶဝ် ဢဝ်တိၼ်ၶဝ် ၸုၵ်းယူႇၼၼ်ႉဢေႃႈ။ မၢၵ်ႇတႃၶဝ် တၵ်းသုတ်ႈယွမ်း လူႉလႅဝ်ၵႂႃႇ ၵႃႈၼႂ်းလွၵ်းတႃၶဝ်လႄႈ လိၼ်ႉၶဝ်ၵေႃႈ တၵ်းသုတ်ႈယွမ်း လူႉလႅဝ်ၵႂႃႇ ၵႃႈၼႂ်းသူပ်းၶဝ်ဢေႃႈ။- 13ၼႂ်းမိုဝ်ႉဝၼ်းၼၼ်ႉ တၢင်းဢၼ်ၶဝ် ႁဵတ်းတၢင်းဢၼ်ႁုၼ်ႉႁၼ်ႉ ဢူၼ်ဢဵၼ်မေႃးမႄး ၼၼ်ႉ တၵ်းဢွၵ်ႇပဵၼ်မႃး တီႈထႃႇဝရႃႉၽြႃးလႄႈ ၶဝ်ၵေႃႉၼိုင်ႈလႄႈ ၵေႃႉၼိုင်ႈ ၵူၼ်းႁိူၼ်းၸမ်ၵၼ် ၼင်ႇၵၼ်ၵၼ် တၵ်းယိပ်းၵမ်မိုဝ်းၵၼ် သေလႄႈ ၵေႃႉၼိုင်ႈလႄႈၵေႃႉၼိုင်ႈ ၵူၼ်းႁိူၼ်းၸမ်ၵၼ် ၼင်ႇၵၼ်ၵၼ် တၵ်းယဵတ်ႇမိုဝ်းၸူးၵၼ် ဢေႃႈ။- 14မဵဝ်းယူႉတႃႉၵေႃႈ တၵ်းတိုၵ်းတေႃး ၵႃႈၼႂ်းဝဵင်းယေႇရူႉသလႅမ်ႇလႄႈ ဢုၵ်ႉၸႃႇၸေးၸိမ်ႇ ၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ယူႇၵႃႈတီႈ ႁိမ်းႁွမ်းလဵပ်ႈႁွပ်ႈ ၸိူဝ်းၼၼ်ႉ ဢၼ်ဝႃႈ ငိုၼ်း ၶမ်း ၶူဝ်းၼုင်ႈတၢင်းမႆ တၵ်းမီးတၢင်းဢၼ်ၸူႉၵွင်ဝႆႉ ၼမ်ၼႃႇဢေႃႈ။- 15ၽေးတၢမ်ႇဢၼ် ပၼ်တီႈမႃႉ၊ လေႃႈလႃး၊ ၵလႃးဢုၵ်ႉ၊ လီႈ၊ တရိၵ်ႈသၢၼ်ႇ ၵႃႈဢၼ်မီးၵႃႈၼႂ်းတပ်ႉရၢၼ်ႇသူႇ ၸိူဝ်းၼၼ်ႉ ၼၼ်ႉၵေႃႈ တၵ်းမိူၼ်ၸိူဝ်ႉၼင်ႇ ၽေးတၢမ်ႇ ဢၼ်ဝႃႈမႃးယဝ်ႉၼၼ်ႉဢေႃႈ။- 16ၶဝ်ၵႃႈဢၼ်ၵိုတ်း ဢၼ်ၵျၢၼ်ႇ ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်း ဢၼ်မႃးတိုၵ်းတေႃးဝဵင်းယေႇရူႉသလႅမ်ႇၸိူဝ်းၼၼ်ႉ တၵ်းဢွၼ်ၵၼ်ၶိုၼ်ႈၸူး ၵႃႈတီႈဝဵင်းၸဝ်ႈ ၵူႈပီႊတႃႇသေႇဢမ်ႇထၢတ်ႇ ႁႂ်ႈလႆႈၵူဝ်းၵႂၢႆႇ ၶုၼ်ႁေႃၶမ်းဢၼ်ဝႃႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၼၼ်ႉလႄႈ ၶၢမ်ႇပွႆးႁဵတ်းသုမ်ႉထဵင် ၼၼ်ႉဢေႃႈ။- 17ၵႃႈၼိူဝ်မဵဝ်း ၸိူဝ်ႉၶိူဝ်းၵူၼ်း လိၼ်မိူင်းၵႃႈမီး ဢၼ်ဢမ်ႇၶိုၼ်ႈၸူး ၵႃႈတီႈဝဵင်းယေႇရူႉသလႅမ်ႇ ႁႂ်ႈလႆႈၵူဝ်းၵႂၢႆႇ ၶုၼ်ႁေႃၶမ်း ဢၼ်ဝႃႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးၼၼ်ႉ၊ ၽူၼ်ဢမ်ႇလႆႈတူၵ်းသႂ်ႇ။- 18ပေႃးမဵဝ်း ၸိူဝ်ႉၶိူဝ်း ၵူၼ်းမိူင်း ဢေႇၵိပ်ႉတူႉၼၼ်ႉ ဢမ်ႇၶိုၼ်ႈၸူး ဢမ်ႇမႃးၸိုင် ၽူၼ်ယင်းဢမ်ႇတူၵ်းသႂ်ႇၵႃႈၼိူဝ်ၶဝ်လႄႈ ၶဝ်တၵ်းလႆႈၶၢမ်ႇ ၽေးတၢမ်ႇ ဢၼ်ထႃႇဝရႃႉၽြႃး ပၼ်တီႈၵူၼ်း ၵူႈၸိူဝ်ႉၵူႈမဵဝ်း ဢၼ်ဢမ်ႇၶိုၼ်ႈၸူး ႁႂ်ႈလႆႈၶၢမ်ႇပွႆး ႁဵတ်းသုမ်ႉထဵင်ၼၼ်ႉဢေႃႈ။- 19ဢၼ်ၼႆႉၸမ်ႉ၊ ပဵၼ်တၢမ်ႇဢပႅတ်ႈ ဢၼ်ၵူၼ်းမိူင်းဢေႇၵိပ်ႉတူႉလႆႈၶၢမ်ႇ ဢိၵ်ႇတင်းတၢမ်ႇဢပႅတ်ႈ ဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ဢမ်ႇၶိုၼ်ႈၸူးႁႂ်ႈလႆႈၶၢမ်ႇပွႆး ႁဵတ်းသုမ်ႉထဵင် ၸိူဝ်းၼၼ်ႉ လႆႈၶၢမ်ႇဢေႃႈ။- 20ၼႂ်းမိုဝ်ႉဝၼ်းၼၼ်ႉ တၵ်းလႆႈဢဝ် တူဝ်လိၵ်ႈဢႅၵ်ႉၶရႃႇ တႅမ်ႈတၢင်ႇသႂ်ႇဝႆႉ ၵႃႈၼိူဝ်ႁိင်ႇ ဢၼ်ႁွႆႈ ၵႃႈတီႈမႃႉတင်းလၢႆၼၼ်ႉ လႄႈဝႃႈ၊ တၢင်းဢၼ် မူတ်းၸၢင်ႇတီႈ ထႃႇဝရႃႉၽြႃးဢေႃႈ၊ ဝႃႈၼင်ႇၼႆဢေႃႈ။ မေႃႈၵႃႈတီႈ ႁိူၼ်းထႃႇဝရႃႉၽြႃး ၸိူဝ်းၼၼ်ႉ တၵ်းပဵၼ်ၸိူဝ်ႉၼင်ႇ ဝၢၼ်ႇဢၼ်မီးၵႃႈတီႈ ၽၢႆႇၼႃႈယိတ်ႈပလၢင်ႇ ၸိူဝ်းၼၼ်ႉဢေႃႈ။- 21လိူဝ်သေၼၼ်ႉ ဢမ်ႇၵႃး၊ မေႃႈၵႃႈဢၼ်မီးၵႃႈၼႂ်း ဝဵင်းယေႇရူႉသလႅမ်ႇ တင်းမိူင်းယူႉတႃႉၸိူဝ်းၼၼ်ႉ တၵ်းမူတ်းၸၢင်ႇ တီႈၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၼၼ်ႉဢေႃႈ။ ၶဝ်ၵႃႈဢၼ် ပုၵ်ႈၸေႃႇယိတ်ႈၸိူဝ်းၼၼ်ႉ တၵ်းမႃးလႄႈ ဢဝ်မေႃႈၸိူဝ်းၼၼ်ႉ သေလႄႈ ဢွၼ်ၵၼ်တူမ်ႈႁုင်ဢေႃႈ။ ဢဝ်ၸႃႉၸဵမ် မိုဝ်ႉဝၼ်းၼၼ်ႉၵႂႃႇလႄႈ ၵူၼ်းၶႃႇၼၼီႉ ဢမ်ႇလႆႈမီး ၵႃႈၼႂ်းႁိူၼ်းၸဝ်ႈ ပူဝ်ႇပႃႇၵၢင်ႁၢဝ် ထႃႇဝရႃႉၽြႃးၼၼ်ႉ။
ၵျၢမ်းဢၼႃႇၵၢတ်ႈတီႉၸႃႇၶရီႉ ယဝ်ႉယဝ်ႉဢေႃႈ။
Valið núna:
ၸႃႇၶရီႉ 14: CBMS
Áherslumerki
Deildu
Afrita
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship