မီႉၶႃႇ 7
7
တၢင်းၵမ်ၵျၢင်ႉၵူၼ်းမဵဝ်းဢီႉသရေႇလႃႉတူၵ်းတႅမ်ႇ
1ၵဝ်မီးဢႃႉမင်ႇၵလႃႇဢေႃႈ။ ၵဝ်ပဵၼ်မိူၼ်ၸိူဝ်ႉၼင်ႇ မၢၵ်ႇလိူဝ်ႇသၢင်းၽေႃး ဢၼ်ဝိတ်းဢဝ် ၼႂ်းၶိင်ႇမိူဝ်ႈဢၼ်မႆႈ ဢၼ်ႁွၼ်ႉၼၼ်ႉ ဢိၵ်ႇတင်းၸိူဝ်ႉၼင်ႇ မၢၵ်ႇၸပိတ်ႈ ဢၼ်ၵိုတ်းဢၼ်ၵျၢၼ်ႇ ဢၼ်ၸွမ်းၵဵပ်းဢဝ် ၼၼ်ႉဢေႃႈ။ ဢမ်ႇမီးပုၵ်ႉမၢၵ်ႇၸပိတ်ႈ ဢၼ်လီၵိၼ်လီၶူပ်း။ ဢမ်ႇမီးမၢၵ်ႇလိူဝ်ႇသၢင်းၽေႃး ဢၼ်သုၵ်းဢွၼ်တၢင်း ဢၼ်ၸႂ်ၵဝ် တူၵ်းဢၢင်ႈယူႇၼၼ်ႉ။- 2ၵူၼ်းဢၼ်လီဢၼ်ငၢမ်းၼၼ်ႉ လပ်ႉႁၢႆၵႂႃႇသေ ၵႃႈၼိူဝ်လိၼ်မိူင်းယဝ်ႉယဝ်ႉ။ ၼႂ်းၵူၼ်းတင်းလၢႆ ဢမ်ႇမီးၵေႃႉဢၼ်သိုဝ်ႈတေႃႇ သေၵေႃႉသေၵူၼ်း။ ၶဝ်တင်းသဵင်ႈတင်းလူင် ၸၢင်ႈဢွၼ်ၵၼ် လွမ်ပႂ်ႉယူႇ ႁႂ်ႈလႆႈထွၵ်ႇလိူတ်ႈ ၵူၼ်းပႅတ်ႈဢေႃႈ။ ၶဝ်ၼင်ႇၵၼ်ၵၼ် ၵေႃႉၼိုင်ႈလႄႈၵေႃႉၼိုင်ႈ ၸၢင်ႈဢဝ်တူင်ႇႁႅဝ်ႉ တူင်ႇၶိုမ်းၵၢင်ဢဝ် တီႉဢဝ်ဢေႃႈ။- 3မိုဝ်းၶဝ်ၼၼ်ႉ မႄးႁႅၼ်းဝႆႉ ႁႂ်ႈလႆႈၵျူဝ်းၸႃးႁဵတ်းတူႉၸရိူၵ်ႈယဝ်ႉ။ ၵေႃႉဢၼ်ပဵၼ်ၶုၼ် ၸၢင်ႈယွၼ်းဢဝ် လၢၵ်ႈသွင်ႇလႄႈ ၵူၼ်းလူင် ဢၼ်ၸီႇယၢင်ႇတြႃး ၸၢင်ႈၵိၼ်သူးၵိၼ်လၢပ်ႈဢေႃႈ။ ၵေႃႉဢၼ်ပဵၼ်ၵူၼ်းယႂ်ႇၵူၼ်းလူင်ၼၼ်ႉ ၸၢင်ႈႁႂ်ႈလေႃးၽႃႉ ႁူဝ်ၸႂ်မၼ်းလႆႈထၢင်ႇသႃးဢေႃႈ။ ၼင်ႇၼၼ်လႄႈ ၶဝ်ၸၢင်ႈၽွမ်ႉၵၼ်ႁဵတ်းႁႂ်ႈဢမူႉ ပဵၼ်ဢၼ်ယုင်ႈဢၼ်ယွင်ႇဢေႃႈ။- 4ၵေႃႉဢၼ်လီၼႃႇသေပိူၼ်ႈၼၼ်ႉ ပဵၼ်ၸိူဝ်ႉၼင်ႇတူၼ်ႈၼၢမ်လႄႈ ၵေႃႉဢၼ် သိုဝ်ႈတေႃႇၼႃႇသေပိူၼ်ႈၼၼ်ႉ ပဵၼ်ဢၼ်ယၢပ်ႇဢၼ်ယဵၼ်း လိူဝ်တွၼ်းၼႃႇသေႁူဝ်ၼမ်ႉဢေႃႈ။ မိုဝ်ႉဝၼ်းဢၼ် ၵူၼ်းပႂ်ႉၵၢင်မႂ်းၸိူဝ်းၼၼ်ႉ ပၼ်သတီႉ၊ မိုဝ်ႉဝၼ်းဢၼ်လႆႈၶၢမ်ႇတၢင်းဢၼ် ၸႅတ်ႈထၢမ်ၼၼ်ႉ ႁွတ်ႈမႃးယဝ်ႉ။ ပဵၼ်ၶိင်ႇမိူဝ်ႈဢၼ်မႂ်း မီးတၢင်းဢၼ် ယုင်ႈၸႂ်ၵႂင်ၸႂ်ဢေႃႈ။- 5ယႃႇပေယုမ်ႇၵေႃႉဢၼ်ပဵၼ်ၵေႃႉ ပဵၼ်သေႈၼၼ်ႉ။ ယႃႇပေႁဵတ်းတၢင်းဢၼ် ၼႄပျႃးသဵၼ်ႈတၢင်းၼၼ်ႉ။ ယင်းဢမ်ႇယုမ်ႇမေးဢၼ်ၼွၼ်း ၵႃႈၼႂ်းဝၢင်ႈႁူဝ်ဢူၵ်းမႂ်းလႄႈ ဢိုတ်းႁပ်းၽၵ်းတူသူပ်းမႂ်း ဝႆႉတႃႉ။- 6လွင်ႈမၼ်းၸမ်ႉ လုၵ်ႈၸၢႆးတၵ်းယႃႉသရေႇ ပေႃႈမၼ်းလႄႈ လုၵ်ႈယိင်းတၵ်းၸုၵ်းယူႇၽၢႆႇၼိုင်ႈတင်းမႄႈမၼ်း၊ လုၵ်ႈပႂ်ႉတၵ်းလုၵ်ႉယူႇၽၢႆႇၼိုင်ႈတင်းမႄႈၸဝ်ႈမၼ်းဢေႃႈ။ ရၢၼ်ႇသူႇတူဝ်ၸဝ်ႈၵဝ်ႇ တၵ်းပဵၼ်ၵူၼ်းႁိူၼ်း ၵူၼ်းယေးတူဝ်ၸဝ်ႈၵဝ်ႇဢေႃႈ။- 7ၵဝ်ၸမ်ႉ၊ တၵ်းမုင်ႈမွင်းထႃႇဝရႃႉၽြႃး ယူႇလႄႈ သွၼ်ႈပိုင်ႈၽြႃးပဵၼ်ၸဝ်ႈ ဢၼ်ၵႄႇသႄႇ ၶျွတ်ႈဢဝ်ၵဝ်ၼၼ်ႉဢေႃႈ။ ၽြႃးပဵၼ်ၸဝ်ႈၵဝ် တၵ်းထွမ်ႇဢဝ်ၵႂၢမ်းၵဝ်ဢေႃႈ။
ထႃႇဝရႃႉၽြႃးဢဝ်တၢင်းၵႄႇၶျွတ်ႈမႃးပၼ်
8ရၢၼ်ႇသူႇၵဝ်ဢိူၺ်း၊ ယႃႇပေမီးတၢင်းဢၼ်ဢုပ်ႇဢၢတ်ႇၸူမ်းသိူဝ်းယူႇၵႃႈၼိူဝ်ၵဝ်။ ပိၵ်ႉသမ်ႉၵဝ်လူမ်ႉသေၵေႃႈ ၵဝ်တၵ်းၶိုၼ်းလုၵ်ႉဢေႃႈ။ ပိၵ်ႉသမ်ႉၵဝ်လႆႈၼင်ႈယူႇ ၵႃႈၼႂ်းလပ်းသိင်ႇသေၵေႃႈ ထႃႇဝရႃႉၽြႃးတၵ်းပဵၼ်ဢၼ်လႅင်းၵဝ်ဢေႃႈ။- 9ၵဝ်တၵ်းၶၢမ်ႇတၢင်းၸႂ်မႆႈၶႆႈၸႃႉထႃႇဝရႃႉၽြႃး ၵွပ်ႈပိူဝ်ႈဢၼ်ၵဝ်ၽိတ်းပိူင်ႈမၼ်းၸဝ်ႈၼၼ်ႉ ယူႇတေႃႇထိုင်ႁွတ်ႈမၼ်းၸဝ်ႈၸႅတ်ႈတူၺ်းဢမူႉၵဝ်လႄႈ တႅပ်းတတ်းတြႃးၵဝ်ၼၼ်ႉဢေႃႈ။ မၼ်းၸဝ်ႈတၵ်းဢဝ်ၵဝ်ဢွၵ်ႇၸူးဢၼ်လႅင်းလႄႈ ၵဝ်တၵ်းလႆႈႁၼ်ပႃႇရမီႇတၢင်းဢၼ်သိုဝ်ႈတေႃႇမၼ်းၸဝ်ႈဢေႃႈ။- 10မိူဝ်ႈၼၼ်ႉ ရၢၼ်ႇသူႇၵဝ်ဢၼ်ထၢမ်တီႈၵဝ်လႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈမႂ်းၸမ်ႉ၊ မီးၵႃႈလႂ်၊ ဝႃႈၼင်ႇၼႆၼၼ်ႉ တၵ်းႁၼ်လွင်ႈတၢင်းၼၼ်ႉလႄႈ တၢင်းဢၼ်ဢူၵ်းဢၼ်ဢၢႆ တၵ်းႁူမ်ႇသုမ်ႇမၼ်းဝႆႉဢေႃႈ။ မၢၵ်ႇတႃၵဝ်တၵ်းႁၼ်မၼ်းလႄႈ မၼ်းတၵ်းလႆႈၶၢမ်ႇတၢင်းဢၼ်ယဵပ်ႇဢၼ်ယမ်ႈ မိူၼ်ၸိူဝ်ႉၼင်ႇၵူမ်ႇၵႃႈၼႂ်းသဵၼ်ႈတၢင်းၼၼ်ႉဢေႃႈ။- 11ၶိင်ႇမိုဝ်ႉဝၼ်းဢၼ်တႄႇႁဵတ်းလမ်းဝဵင်းမႂ်းၼၼ်ႉ တၵ်းႁွတ်ႈမႃးဢေႃႈ။ ၼႂ်းၶိင်ႇမိုဝ်ႉဝၼ်းၼၼ်ႉ ဢၢႆႁႅင်းဢမိင်ႉၸဝ်ႈတၵ်းသဵင်ႈဢေႃႈ။- 12ၼႂ်းၶိင်ႇမိုဝ်ႉဝၼ်းၼၼ်ႉ ၶဝ်တၵ်းဢွၼ်ၵၼ်လုၵ်ႉသေၵႃႈတီႈၸႃႉၸဵမ်မိူင်းဢႃႇသူႉရီႉ တေႃႇထိုင်ႁွတ်ႈ မိူင်းဢေႇၵိပ်ႉတူႉ၊ ဢိၵ်ႇတင်းၵႃႈတီႈၸႃႉၸဵမ်မိူင်းဢေႇၵိပ်ႉတူႉ၊ တေႃႇထိုင်ႁွတ်ႈၼမ်ႉႁွင်ႈလူင် တင်းၵႃႈတီႈ ၸႃႉၸဵမ်ပၢင်ႇလၢႆႇၼိုင်ႈ တေႃႇထိုင်ႁွတ်ႈပၢင်ႇလၢႆႇၼိုင်ႈ တင်းၵႃႈတီႈၸႃႉၸဵမ်လွႆလူင်ၼိုင်ႈ တေႃႇထိုင်ႁွတ်ႈလွႆလူင်ၼိုင်ႈလႄႈ မႃးၸူးၵႃႈတီႈမႂ်းဢေႃႈ။- 13ၸူဝ်ႈဢၼ်ဢမ်ႇပႆႇပဵၼ်ၸိူဝ်ႉၼင်ႇၼၼ်ၸိုင်၊ ၵွပ်ႈပိူဝ်ႈတူႉၸရိူၵ်ႈဢပႅတ်ႈ ဢၼ်ၵူၼ်းဝၢၼ်ႈၵူၼ်းမိူင်းႁဵတ်းၸိူဝ်းၼၼ်ႉလႄႈ မိူင်းၸဝ်ႈၼၼ်ႉ တၵ်းလႆႈမီးတၢင်းဢၼ်သဵတ်ႇၵူၼ်းယဵၼ်ၵူၼ်းယူႇဢေႃႈ။
ၽြႃးပဵၼ်ၸဝ်ႈဢဵတ်းလူၵူၼ်းမဵဝ်းဢီႉသရေႇလႃႉ
14ၶႅၼ်းတေႃႈ ဢဝ်ၶွၼ်ႉၵွမ်းၶွၼ်ႉႁေႃႈ ၸဝ်ႈႁဝ်း ဢၼ်လဵင်ႉထိင်းသူဝ်းၼၼ်ႉ လဵင်ႉထိင်းၽုင်သူဝ်းဢမူၺ်ႇၸဝ်ႈ၊ ၸဝ်ႈႁဝ်းဢၼ်ယင်းဢမ်ႇမီးဢၼ်ႁူမ်ႈဢၼ်ပွင်းလႄႈ လႆႈယူႇၼႂ်းထိူၼ်ႇၼႂ်းၶိူဝ်း ၵႃႈၼိူဝ်လွႆၵရမေႇလႃႉ ဢၼ်ဝႃႈၵူၼ်းၸဝ်ႈႁဝ်းတင်းလၢႆ ၼၼ်ႉသေၵမ်းတီႈၶႃႈ၊ ၶႅၼ်းတေႃႈပၼ်ဢၶႂၢင်ႉ ဢၼ်ၶဝ်လႆႈၵိၼ်ယူႇၵႃႈၼႂ်းမိူင်းပႃႇသၢၼ်ႇတင်းမိူင်းၵီႉလတ်ႉ မိူၼ်ၸိူဝ်ႉၼင်ႇ မိူဝ်ႈၵွၼ်ႇဢွၼ်ၼႆႉၼၼ်ႉ သေၵမ်းတီႈၶႃႈ၊- 15ၸွမ်းၵႃႈၼင်ႇဢၼ် ပဵၼ်ၼႂ်းမိုဝ်ႉဝၼ်း ဢၼ်မႂ်းဢွၵ်ႇသေၵႃႈၼႂ်းမိူင်းဢေႇၵိပ်ႉတူႉမႃးၼၼ်ႉလႄႈ၊ ၵဝ်တၵ်းၼႄပျႃးလွင်ႈတၢင်းဢၼ်လီဢၢမ်းၼႃႇတင်းလၢႆ တီႈၶဝ်ဢေႃႈ။- 16ၵူၼ်းၵူႈၸိူဝ်ႉၵူႈမဵဝ်းတၵ်းႁၼ်လႄႈ ၵႂင်ၸႂ်ယုင်ႈၸႂ်ၵွပ်ႈပိူဝ်ႈ တၼ်းၶူဝ်းၵႃႈဢၼ်မီးတီႈၶဝ်ၼၼ်ႉလႄႈ ဢဝ်မိုဝ်းၶဝ်တူမ်းသူပ်းၶဝ် ယူႇသေလႄႈ ႁူၼူၵ်ႇယူႇဢေႃႈ။- 17ၶဝ်ၼၼ်ႉ တၵ်းလေးၵိၼ်လိၼ် မိူၼ်ၸိူဝ်ႉၼင်ႇငူးလႄႈ သၼ်ႇသၼ်ႇသၢႆသၢႆယူႇသေလႄႈ ဢွၵ်ႇသေ ၵႃႈၼႂ်းလုၵ်းၼႂ်းၶုမ် ၶဝ်မႃး မိူၼ်ၸိူဝ်ႉၼင်ႇတိူၵ်ႇလိူၼ်ဢေႃႈ။ ၶဝ်တၵ်းဢွၼ်ၵၼ်ရူဝ်ႇသေႇၵူဝ်ယမ် ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းလႄႈ တူၵ်းၸႂ်ၵူဝ်ႁႄ ၵွပ်ႈပိူဝ်ႈမႂ်းဢေႃႈ။- 18ၽြႃးဢၼ်မိူၼ်ၸိူဝ်ႉၼင်ႇၸဝ်ႈႁဝ်း ဢၼ်ၸၢင်ႈပွႆႇလွတ်ႈဢပႅတ်ႈ၊ ဢၼ်ယိူၼ်ႉၶၢမ်ႇ တၢင်းဢၼ်ၵူၼ်းဢမူၺ်ႇမၼ်းၸဝ်ႈ ဢၼ်ယင်းၵိုတ်းယင်းၵျၢၼ်ႇ ၸိူဝ်းၼၼ်ႉ ၽိတ်းပိူင်ႈပူၼ်ႉလိူဝ်၊ ဢၼ်ဢမ်ႇၸၢင်ႈမီး တၢင်းၸႂ်မႆႈၶႆႈၸႃႉယူႇသေႇသေႇ ၵွပ်ႈပိူဝ်ႈဢၼ်မူၼ်ႈပျေႃႇယူႇ ၵႃႈၼႂ်းၵရူႉၼႃႇၼၼ်ႉၼႆႉ ယင်းမီးၽြႃးသူႇလႂ်ပႃးလႂ် လူးၵွၼ်ႇတီႈၶႃႈ၊- 19မၼ်းၸဝ်ႈတၵ်းသမ်ႉဝၢႆႇၶိုၼ်းသေလႄႈ ဢဵတ်းလူႁဝ်းလႄႈ ယဵပ်ႇယမ်ႈတူႉၸရိူၵ်ႈႁဝ်း ၵႃႈမီးၼၼ်ႉ ပႅတ်ႈတႂ်ႈတိၼ်မၼ်းၸဝ်ႈဢေႃႈ။ ၸဝ်ႈႁဝ်းတၵ်းဢဝ်ဢပႅတ်ႈၶဝ် ၵူႈၸိူဝ်ႉၵူႈပိူင်ၼၼ်ႉ ၶျႃးတူၵ်းပႅတ်ႈၵႃႈၼႂ်းပၢင်ႇလၢႆႇ ဢၼ်လိုၵ်ႉဢၼ်လမ်ႇၼၼ်ႉ တီႈၶႃႈဢေႃႈ။- 20ၸဝ်ႈႁဝ်းတၵ်းၸီႇယၢင်ႇ တၢင်းဢၼ်ပႂ်ႉသဵတ်ႈၸႃႇတီႈယႃႇၵုပ်ႈ၊ တၢင်းဢၼ်ႁဵတ်းၵျေးၸူးတီႈ ဢႃႇပြႃႇႁၢမ်ႇ ၸွမ်းၵႃႈၼင်ႇဢၼ် ၸဝ်ႈႁဝ်းတိူင်ႇဝႃႈဝႆႉ တီႈပူႇမွၼ်ႇၶႃႈၸဝ်ႈႁဝ်းၶဝ် ၸႃႉၸဵမ်မိူဝ်ႈၵွၼ်ႇဢွၼ်ၼႆႉၼၼ်ႉၼၼ်ႉဢေႃႈ။
ၵျၢမ်းဢၼႃႇၵၢတ်ႈတီႉမီႉၶႃႇယဝ်ႉယဝ်ႉဢေႃႈ။
Valið núna:
မီႉၶႃႇ 7: CBMS
Áherslumerki
Deildu
Afrita
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship