ယူဝ်းၼႃႉ 3
3
ယူဝ်းၼႃႉထွမ်ႇဢဝ်ၵႂၢမ်းထႃႇဝရႃႉၽြႃး
1ၼုၵ်ႈၵပၢတ်ႈ ထႃႇဝရႃႉၽြႃး ဢၼ်ႁွတ်ႈမႃးတီႈယူဝ်းၼႃႉ ပွၵ်ႈတူႉတီႉယႃႉၸမ်ႉ၊- 2မႂ်းလုၵ်ႉလႄႈ ၵႂႃႇၸူးၵႃႈတီႈဝဵင်းၼီႉၼေႇဝူၺ်ႇဝဵင်းလူင်ၼၼ်ႉ သေလႄႈ ႁွင်ႉပၢဝ်ႇႁွင်ႉသေႃႇ ၸွမ်းၵႃႈၼင်ႇဢၼ် ၵဝ်သင်ႇလၢတ်ႈဝႆႉၼၼ်ႉတႃႉ၊ ဝႃႈၼင်ႇၼႆဢေႃႈ။- 3မိူဝ်ႈၼၼ်ႉ ယူဝ်းၼႃႉလုၵ်ႉလႄႈ ၵႂႃႇၸူးၵႃႈတီႈဝဵင်းၼီႉၼေႇဝူၺ်ႇၼၼ်ႉ ၸွမ်းၵႃႈၼင်ႇဢၼ် ဢမိင်ႉထႃႇဝရႃႉၽြႃး မီးၼၼ်ႉဢေႃႈ။ ဝဵင်းၼီႉၼေႇဝူၺ်ႇၼၼ်ႉ ပဵၼ်ဝဵင်းဢၼ်ယႂ်ႇၼႃႇ ၵႃႈတီႈၽၢႆႇၼႃႈ ၽြႃးပဵၼ်ၸဝ်ႈလႄႈ ပဵၼ်ဝဵင်းဢၼ်ၵႂၢင်ႈ ၸူဝ်ႈတႃႇၶၢဝ်းတၢင်းသၢမ်ဝၼ်းဢေႃႈ။- 4ယူဝ်းၼႃႉၼၼ်ႉ ၸင်ႇၸႃႉႁဵတ်းတၢင်းဢၼ် ၶဝ်ႈၵႂႃႇၵႃႈၼႂ်းဝဵင်း ၸူဝ်ႈတႃႇၶၢဝ်းတၢင်း ဝၼ်းၼိုင်ႈလႄႈ ႁွင်ႉပၢဝ်ႇႁွင်ႉလၢတ်ႈလႄႈဝႃႈ၊ ပေႃးပူၼ်ႉသေ သီႇသိပ်းဝၼ်းယဝ်ႉၸိုင် ဝဵင်းၼီႉၼေႇဝူၺ်ႇၼႆႉ တၵ်းႁွတ်ႈထိုင် တၢင်းလူႉတၢင်းလႅဝ်ဢေႃႈ၊ ဝႃႈၼင်ႇၼႆဢေႃႈ။- 5မိူဝ်ႈၼၼ်ႉ ၵူၼ်းဝဵင်းၼီႉၼေႇဝူၺ်ႇၸိူဝ်းၼၼ်ႉ ယုမ်ႇဢမိင်ႉ ၽြႃးပဵၼ်ၸဝ်ႈ လႄႈ ၸႃႉၸဵမ်ၵေႃႉယႂ်ႇ တေႃႇထိုင်ႁွတ်ႈၵေႃႉလဵၵ်ႉ ႁွင်ႉပၢဝ်ႇႁွင်ႉသေႃႇ ၶိင်ႇမိူဝ်ႈဢၼ်ၵမ်တၢင်းၵိၼ်လႄႈ ၼုင်ႈၼင်ပေႃဢေႃႈ။- 6သတၢင်းသဵင်ၶၢဝ်ႇၼၼ်ႉ ႁွတ်ႈထိုင်ၵႃႈတီႈ ၶုၼ်လူင်ၼီႉၼေႇဝူၺ်ႇလႄႈ မၼ်းၼၼ်ႉ လူင်းသေၵႃႈၼိူဝ် ပလၢင်ႇမၼ်းလႄႈ ထွတ်ႇၶူဝ်းၼုင်ႈၶုၼ်သေယဝ်ႉ၊ ၼုင်ႈၶူဝ်းၼုင်ႈ ၼင်ပေႃသေလႄႈ ၼင်ႈယူႇၵႃႈၼႂ်းတဝ်ႈ ဢေႃႈ။- 7မၼ်းဢဝ်တင်း ဢႃႇၼႃႇၶုၼ်လူင် ဢႃႇၼႃႇမူးမၢတ်ႈၽွင်းမိူင်းတင်းလၢႆ မွၵ်ႇလၢတ်ႈသတၢင်းသဵင်ၶၢဝ်ႇ ၵႃႈၼႂ်းဝဵင်းၼီႉၼေႇဝူၺ်ႇ တင်းဝဵင်းလႄႈ ႁႂ်ႈပၢဝ်ႇႁႂ်ႈသေႃႇ လႄႈဝႃႈ၊ ယႃႇပေႁႂ်ႈ ၵူၼ်းသတ်ႉတဝႃႇ၊ တရိၵ်ႈသၢၼ်ႇ ၽုင်သူဝ်းၽုင်ဝူဝ်းတင်းလၢႆ ၸိမ်းတူၺ်းသေၸိူဝ်ႉသေပိူင်လႃးလႃး။ ယႃႇပေႁႂ်ႈၵိၼ်တၢင်းၵိၼ်တၢင်းၶူပ်း။ ယႃႇပေႁႂ်ႈၵိၼ်ၼမ်ႉၵိၼ်ၼၢႆး။- 8ႁႂ်ႈၵူၼ်းသတ်ႉတဝႃႇ ဢိၵ်ႇတင်းတရိၵ်ႈသၢၼ်ႇ ဢွၼ်ၵၼ်ၼုင်ႈၶူဝ်းၼုင်ႈ ၼင်ပေႃသေ။ ႁႂ်ႈဢွၼ်ၵၼ် သူးတွင်းတီႈ ၽြႃးပဵၼ်ၸဝ်ႈ ၼႃႇၼႃႇသေ။ ႁႂ်ႈဢွၼ်ၵၼ် ဝႄႈပႅတ်ႈသဵၼ်ႈတၢင်းဢၼ်ႁၢႆႉမိူၵ်ႈ ဢၼ်ၶဝ်ၸွမ်း ဢိၵ်ႇတင်း ဢမူႉဢႃႉထမ်ႇမႃႉ ဢၼ်ၶဝ်ႁဵတ်းၼၼ်ႉ ႁင်းၽႂ်ႁင်းမၼ်းသေ။- 9လွင်ႈၼင်ႇႁိုဝ် ႁဝ်းတၵ်းၵၢင်းလွတ်ႈတင်းတၢင်းဢၼ်လူႉ ဢၼ်လႅဝ်ၸိုင် ၽူႈလႂ်တၵ်းႁူႉလွင်ႈဢၼ် ၽြႃးပဵၼ်ၸဝ်ႈ တၵ်းၶၢႆႉပုတ်ႈသေလႄႈ ၶုၵ်းၸႂ်လႆႈမႆႈၸႂ်ၵွပ်ႈလႄႈ ဝႄႈပိူင်ႈၵႂႃႇသေၵႃႈတီႈ ဢၢႆႁႅင်းတၢင်းၸႂ်မႆႈၶႆႈၸႃႉ မၼ်းၸဝ်ႈၼၼ်ႉႁိုဝ် ဢမ်ႇဝႄႈပိူင်ႈႁိုဝ်ၼၼ်ႉလႆႈ၊ ဝႃႈၼင်ႇၼႆဢေႃႈ။- 10မိူဝ်ႈၼၼ်ႉ ၽြႃးပဵၼ်ၸဝ်ႈ ႁၼ်တၢင်းၵမ်တၢင်းၵျၢင်ႉ ဢၼ်ၶဝ်ဝႄႈပႅတ်ႈ သဵၼ်ႈတၢင်းဢၼ်ႁၢႆႉမိူၵ်ႈ ဢၼ်ၶဝ်ၸွမ်းၼၼ်ႉသေယဝ်ႉ၊ ၽြႃးပဵၼ်ၸဝ်ႈ ၶုၵ်းၸႂ်လႆႈမႆႈၸႂ် လူၺ်ႈလွင်ႈၽေးတၢမ်ႇ ဢၼ်မၼ်းၸဝ်ႈဝႃႈ တၵ်းႁဵတ်းတီႈၶဝ်ၼၼ်ႉလႄႈ ယင်းဢမ်ႇပၼ်ၽေး ပၼ်တၢမ်ႇၼၼ်ႉလႄႈ ယူႇဢေႃႈ။
Valið núna:
ယူဝ်းၼႃႉ 3: CBMS
Áherslumerki
Deildu
Afrita
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship