Jesu Tondiba Tuona 9
9
Soli n daani Jesu maama
(JTT 22.3-16; 26.9-20)
1Ama Soli pali go den baa ki fa o Diedo ŋoadikaaba po, hali ke o den bua ki kpa ba. O den gedi bi kopadicianba bado kani, 2ki mia o wan diani a tila li bali maama bangima diena yudanba yaaba n ye Damasi po, ke o yaa ban laa lipo, joa bi pua, ke bi ŋua laa sanu, wan loli ba ki cuani Jerusalemi.
3Soli n den ye u sanu nni ki nagidi Damasi, yaa yenma n ñuliti boncianla den ñani tanpoli po, ki jiidi ki lindi o yenma. 4O den baa tiipo ki gbadi ke u nialu maadi ki yedi o: «Soli, Soli, be yaa po ke a faligidi nni?» 5O den guani ki yedi: «N Daano, a tie ŋme?» O Diedo den yedi o: «N tie Jesu, ŋan faligidi yua.»#9.5 Bi tianba pugini yaa maama n tie ne: «Li baa yaa pa a po ŋan yiadi u danbu ki pua li bonmuukaala.» Ti jawaandi leni li pakili den cuo Soli ke o digibi ki yedi: «N Diedo, a bua min tieni be?» O Diedo den yedi o: 6«Fii ki kua u dogu nni, bi baa waani a ŋan baa tieni yaala.»
7Yaa jaba n den yegi leni Soli den se ki ŋmini suo, kelima ti jawaandi po. Bi den gba u nialu, ki naa nua oba kuli. 8Soli den fii ki sedi. Ba ke o nuni den ŋubidi, waa den nua liba. Bi den cuo o nuu ki dia o ki gedini Damasi. 9O den tieni danataa kaa nua, waa di, waa ñu mo.
10Li den sua ke Jesu ŋoadika ye Damasi, ke bi yi o Ananiasi. O Diedo den yedi o li bonlekaala nni: «Ananiasi,» o den guani ki yedi: «N Diedo, mini nna.» 11O Diedo den yedi o: «Fii ki gedi yaa sanu n yi u Sansiedu, ki pundi Judasi deni, ki lingi yaa nilo n yi Soli, Tarsi dogu yua, kelima o ye likani ki jaandi. 12Soli den laa li bonlekaala nni, ke Ananiasi kua wan ye naani ki maani o po o nii, ke o go noanli.»
13Ananiasi den guani ki yedi o: «N Diedo, bi niba boncianla waani nni, o joa yeni maama leni wan tieni a nigagidiŋanba yaaba n ye Jerusalemi yaa biadima kuli. 14Bi kopadicianba yudanba puni o li bali u naa dogu nni moko, ke wan cuo ki loli yaaba n jaandi, ki taagi a yeli kuli.» 15Ama o Diedo den guani ki yedi o: «Gedi, kelima n gandi laa joa, ke wan yaa tuuni n po ki gedini n yeli i nilanbuoli, ŋanduna badicianba leni Isidayeli yaaba kuli po. 16N baa waani o wan baa le yaa fala kuli kelima n yeli po.»
17Ananiasi den gedi. Wan den kua ku diegu yeni niinni, o den maani o nii Soli po, ki yedi o: «N kpiilo Soli, o Diedo Jesu, yua n den doagidi a kani, ŋan den ye u sanu po ki kpendi yaa yogunu yeni, n soani nni a kani ke ŋan go noanli, ki go gbie leni U Tienu Fuoma Yua.» 18Lanyogunu liga, yaala n naani leni a poaga den ñani Soli nuni nni ki baa, ke o go noanli. O den fii ki gaa mi batisima. 19Wan den dini, o go den baa u fidu.
Soli wangi o Laabaaliŋamo Damasi dogu nni
Soli go den tieni danaba leni bi ŋoadikaaba yaaba n ye Damasi. 20Lanyogunu, o den cili ki caa li bali maama bangima diena nni, ki wangi Jesu maama, ki tua ke o tie U Tienu Bijua.
21Li den lidini yaaba n gba o maama kuli, ke bi tua: «O naa joa ka den faligidi yaaba n ye Jerusalemi ki jaandi ki taagi Jesu yeli yeni? Waa den cua ne ki baa loli ba ki gedini Jerusalemi bi kopadicianba yudanba po ka?»
22Soli paalu o Diedo sanŋoadima nni den pugidi, ke o doagidi ke Jesu tie U Tienu n Gandi Yua hali ki maadi ki guli yaa Jufinba n ye Damasi kuli.
23Dana boncianla n den pendi, Jufinba den taani ki juogi ki baa kpa Soli. #2Kor 11.32-33. 24Ama o den bandi bi juogibiadu yeni. Bi den guu u dogu buliñoajala kani u yensiinu leni ku ñiagu kuli, ki bua ki kpa o. 25Ñiayengu bi ŋoadikaaba den kuani o ku baabuociangu nni, ki jiini o u dogu bilinciamu puoli po.
Soli guani Jerusalemi
26Soli n den pundi Jerusalemi, o den moandi ki baa taani leni Jesu ŋoadikaaba, ama bikuli den jie ki naa daani ke o tua Jesu ŋoadika. 27Lani, Barnabasi den gedini o Jesu tondiba kani, ki togidi ba Soli n den laa o Diedo u sanu po maama, o Diedo n den maadi leni o maama, Soli n den wangi Jesu maama leni li papaali Damasi dogu nni Jesu yeli po maama. 28Lanwani, Soli den taani leni Jesu tondiba, ki goadi Jerusalemi nni kuli, ki maadi o Diedo Jesu yeli nni leni li papaali. 29O den maadi leni yaa Jufinba n maadi Gireki maama moko, ki nia leni ba, ama bi den moandi ki bua ki kpa o. 30Bi kpiiba n den bandi lani, bi den ciani Soli hali Sesare, ki yuandi ki gedini o Tarsi dogu po.
31Lani, Kilisiti Nitaanli den ye leni mi yanduanma Jude, Galile leni Samari diema nni kuli. Kilisiti Nitaanli yeni den fandi ki pugidi o Diedo sanŋoadima nni, ki go fangi o boncianla. U Tienu Fuoma Yua den paagidi li niba pala, ke bi coali pugidi.
Pieli paagi Ene
32Pieli n den goadi ki lindi i kaani kuli, o den gedi ki ban fuondi bi nigagidiŋanba yaaba n ye Lida dogu nni. 33Lankani o den laa o joa ke bi yi o Ene. O gbanandi den kpe ke o dua ku kaagu po binanii. 34Pieli den yedi o: «Ene, Jesu Kilisiti paagi a. Fii ki fiini a kaagu.» Lanyogunu Ene den fii. 35Lida leni Saron yaaba kuli den laa o, ki lebidi ki ŋoadi o Diedo.
Pieli faadi Dorkasi
36O pua den ye Jope dogu nni ke bi yi o Tabita, yaali n soagini ki yedi Dorkasi, lani n tie o piañoago. O den tiendi a tuonŋama, ki puuni a luoda mi todima boncianla. 37Laa dana nni, o den yiagi ki kpe. Bi den wali o ki duoni o li dietuadili nni, ki duani o lienni. 38Li sua ke Lida kuu leni Jope. Jesu ŋoadikaaba yaaba n ye Jope, den gbadi ke Pieli ye Lida. Bi den soani jabilie ban ban mia o ki yedi: «Jaligi ki cua ti kani.» 39Pieli den fii ki yegi leni ba. Wan pundi likani, bi den ciani o li dietuadili yeni nni. A kpepuona kuli den nagini o kani ki buudi, ki waani o Dorkasi n den ye leni ba yaa yogunu, wan den hali bi po yaa tiayiekaadi leni yaa tialakaadi. 40Pieli den ñani bikuli lienni, ki gbaani ki jaandi. Lani, o den pegidi ki diidi o kpiemo ki yedi: «Tabita, fii!» O pua yeni den ŋubidi ki laa Pieli, ki fii ki kali. 41Pieli den cuo o nuu ki fiini o, ke o sedi. O den yini bi nigagidiŋanba leni a kpepuona, ki taa o ki teni ba ke o fo. 42Jope yaaba kuli n den gbadi laa laabaalo, bi siiga niba boncianla den daani o Diedo. 43Pieli go den tieni danaba Jope, ki ye o candiegu, o jabido Simon deni.
Valið núna:
Jesu Tondiba Tuona 9: BGP
Áherslumerki
Deildu
Bera saman
Afrita
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.