Mapookyony 46
46
Yakobo na Vammba Yakwe Veenda Misri
1Israeli kaipoo kyaaro ando amwi na fyoose eetiri, kafika Beer-sheba, kashishya Iruva wa Isaki kiraso. 2Iruva karera na Israeli efo yooryeny elyi kio, kammbaanga, “Yakobo, Yakobo, kammbia, Ekau yeny mbee,” 3kammbia, “Yeny ni Iruva wa ndoo Isaki kulairyee-fo, isoka na Misri; mashika nshefumbutyaa-fo ufyari lwafo.” 4Mmbo nshesokaa neewe fika Misri neeny nshekuviira lyingyi, dede, na Yosefu mmbo ashevikaa-u woko lwakwe yoo misony afo. 5Yakobo kooka Beer-sheba, vana va Israeli vaka-kamara ndeye waawo, na vana vawo vadu, na vaka vawo vakasaama mitikeny ilya Farao alevarikkya naambo ashewoonndwa. 6Vakaipoo na findo fyawo fyevikkya, na masaa awo yoo veetiri kulya Kanaani, vefika Misri, ni Yakobo na vandu va ufyari lwakwe woose. 7Vana vakwe, na vana va vana vakwe, vefu vakwe na vefu va vana vakwe, ufyari lwakwe loose, keenda nawo fika Misri.
8Na ya nng'u marina a vana va Israeli valeanga Misri, Yakobo na vana valya vakwe, Ruben mwana mmbee wa Yakobo, 9Na vana va Ruben; Hanoki na Palu, na Hesroni na Karmi. 10Na vana va Simeoni; Yemueli, na Yamini, na Ohadi, na Yakini, na Sohari, na Shauli, mwana wa nka Nkanaani. 11Na vana va Levi, Kershoni na Kohathi na Merari. 12Na vana va Yuda, Erii na Onani na Shela na Peresi, na Hesroni na Haamuli. 13Na vana va Isakari, Tola na Puva, na Yashubu, na Shamroni (Indi Eri na Onani venfiiya kulya Kanaani). 14Na vana va Sabulon: Seredi na Eloni na Yeleeli, 15Yewo mmbo vana va Lea, aleirya Yakobo kulya Padan-Aramu na Dina mfu wakwe. Vandu woose na vana vawo ni makumi araru na vararu. 16Na vana va Kati Sefoni ni Hakyi, na Shuni na Esboni, na Eri na Arodi, na Areli. 17Na vana va Asheri, Imna, na Ishva, na Beria na Sera, na mfwa-maye waawo, Na vana va Beria ni Heberi na Milkieli. 18Yewo mmbo vana va Silpa, yeto Laban aleniinngya Lea, we mfu wakwe, nawe keerya Yakobo yewo, vandu ikumi na varindaru. 19Vana va nka wa Yakobo Reeli, ni Yosefu na Benyamen. 20Valeonika kwa Yosefu eeke Misri ni Manase na Efraimu, yewo Asinati mfu wa Potifa alemwirya, yeto ekee nkohani wa Oni. 21Na vana va Benyamen ni Bela na Bekeri na Ashbeli na Kera na Naamani, na Ehi na Roshi na Mupimu na Hupimu na Ardi. 22Yewo mmbo vana Reeli aleirya Yakobo, woose mmbo vekee ikumi na vaana. 23Na vana va Dani Hushimu. 24Na vana va Naftali ni Yeseebi, na Kuni, na Yeseri, na Shilemu, 25Yewo mmbo vana va Bilha ulya Laban enninngya Raheli mfu wakwe, nawe kaveerya Yakobo woose ni vandu mfungare.
26Vandu woose yewo valeuka Kanaani vakasha Misri varyani na Yakobo ni vandu makumi arindaru na varindaru kuuta-fo vaka vawo. 27Na vana va Yosefu alevawonnya Misri ni vavii. Wandu woose va mmba ya Yakobo waleenda Misri veeke makumi mfungare.
Yakobo na Vammba Yakwe Kulya Misri
28Yakobo keeta Yuda mbee yeenda kwa Yosefu, naambo namoore shia ya yenda Gorsheni. Vakafika urukeny lwa Gorsheni. 29Yosefu kaala ikari lyakwe, neende iwarya ndeye Israeli efo Gosheni. Kakoora kwakwe, kankulyingillya singony kaiya yoo singony yakwe kyeeri kyaasha. 30Israeli kavia Yosefu, “Na shakufiiyany ulaalu mashika elyi shankulollya kisangu kyafo, kwikee na muu”. 31Yosefu kavia vana va maye na vandu va mmba ya ndeye, “Mmbo shikeenda shindevia Farao, Shindemmbia indi, Vana va ma, na vandu va mmba ya nde, veeke kulya urukeny lwa Kanaani vanshisheya. 32Na vandu yewo ni veesa findo mashika mmbo vakee veesa findo, nawo mmbo vasha na moonri awo na ng'umbe tawo, na masaa awo moose.” 33Naasa kyeeri Farao ashemuvangaa na imuvesa mashora any ng'u-ki, 34mbieny, Yese mashinga afo mmbo lukee veesa findo uka udu lweru, na fika inu, yese na vande veru, naambo mukae kulya urukeny lwa Gosheni; mashika nndu moose mwiisa findo mmbo asuuywa kunu Misri.”
Valið núna:
Mapookyony 46: MAS2
Áherslumerki
Deildu
Afrita
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.