Mapookyony 42
42
Vana va Maaye va Yosefu Veenda Misri Yuura Shoonga
1Naasa Yakobo keeta kulya Misri kwiifo shoonga, Yakobo kavia vana vakwe, “Niinda elyi mwakulola muveni na veni?” 2Kaamba, “Llate shammita kulya Misri kwiifo shoonga, sokeny nafo mundeluurya-fo shoonga lulye lukkye lulasheefwa.” 3Vana va maye ikumi va Yosefu vakasoka Misri naambo vandeura-fo shoonga. 4Kyeendi Benyaminy, mwanawo wa Yosefu, Yakobo nnyalekunda naende na vana vamaye-fo, kaamba naambo aleshekooywa nkindo kyikasha.
5Vana va Israeli vakaenda vandeura shoonga, mashika kulya urukeny lwa Kanaani kweefo shaa. 6Na Yosefu mmbo ekee ngari ya uruka loose, mmbwe yeto eekumbyaa uruka loose shoonga. Na vana va maye va Yosefu vakasha vakawa si kifulu-fulu mbee yakwe. 7Yosefu kalollya vana va maye kavamanya, kyeendi kava sha muny deny kwawo. Kavarerya na marero manyaasi, kavavia, “Yeni nkwi mwauka?” Vakaamba, “Mmbo looka urukeny lwa Kanaani naambo lusheura shoonga.” 8Yosefu kamanya vana va maye, lyo wo valammanye. 9Yosefu kakummbwa moorya eeshoorya kyawo woose. Kavavia, “Yeni mmbo mwasha ilusuma mushelola unana lwa uruka.” 10Vakammbia, “Oode mmbe, mashinga afo mmbo asha asheura shoonga. 11Yese loose mmbo lukee vana va nndu umwi mmbo lukee vandu va dede yese, mashinga afo yese llukee nsaa-fo.” 12Kavavia, “Mmbongo, mmbo mwasha mushelola unana lwa uruka elu.” 13Vakammbia, “Yese mashinga afo mmbo lukee vana ikumi na vavii vana va nndu umwi kulya urukeny lwa Kanaani, mwaneru umwi mmbo asaa na nde-weeru inu, na umwi we nnyeefo-fo.”
14Yosefu kavavia, lyingyi, “Shammaamba, yeni mmbo mukee saa. 15Mushaaramwaa ulaalu, Farao eefo na muu, mmushukaa yaa-fo, kutani asha mwanany yeto n-du.” 16Rumeny umwi waany nandemweende neeni mufingwa, kutani marero any avikywa ukureekyi, kwakooya mukee va dede, kilammba indo, Farao akee na muu, yeni nsaa. 17Kavavika woose kifingyony ando a mikonu iraru. 18Nkonu wa kararu Yosefu kavavia, “Taniny indo mukae na muu, mashika lyo yeny mmbo shikee nndu wa Iruva. 19Kwakooya yeni mukee vandu va dede, umwi waany nakae kifingyony, neeni mweende mundeipoo shoonga kimaruma kya kyeny kwany,” 20mundeende mwanany yeto n-du yaa kwakwa; naambo marero any alollywa ni a dede, naambo mulafwe. Nawo vakatana indo. 21Vakaumburana vakaamba, “Dede lyo yese lulelyamarya mwana-maye weeru, mashika llya lulalelollya ngatara ya nrima wakwe, kyeeri elutereva, yese lulamwarannye, nkyo ngatara yei ikeelukooya ulaalu.” 22Ruben karouwa kavavia, “Shemuvia-se llya shaamba mulatannye mwana kyikasha? Neeni nta mulashiite, naasany samu yakwe mmbo ikeeruuya.” 23Nawo nta valamanye Yosefu aveetye, mashika kweiyo ntapita ekee nawo. 24Yosefu keenda mbai kaiya. Numa kavawuiya, karera nawo kauta Simeon yoo vakai, kammbika kifingyony velollye.
Vana va Maaye va Yosefu Vawuya Kaanani
25Yosefu kavavasya mikusha yaawo yiishurwa shoonga, na wo umwi waawo naviiryo fesa takwe efo nkusheny wakwe, vaniingwa na kisha-u kya shia. 26Vakatannywa indo vakarika mishungu yaawo shoonga eto, vakauka-fo. 27Ummwi waawo llya aleporommwa nkusha wakwe naambo naniinge nshungu shoonga, kakooya-fo fesa, ate nyoo uwe nkusheny ikai. 28Kavia vana va maye, “Fesa yakwa mmbo yaviirwa, lola akai kunu nkusheny wakwa. Vakaawukwa mmuu, vakaindukyana veereremaa, vakaamba, ‘A nkyokyi ekyi Iruva alutannya?’”
29Vakafika kwa ndeye-awo Yakobo, kulya Kanaani, vakammbia mbony toose shaasa kileva, vakaamba, 30“Nndu yeto akee mmbwe nniini wa uruka mmbo alerera neese na unyaasi kalwaallwa vandu va nsaa.” 31Lukammbia, “Yese mmbandu va dede, nta nshi nsaa-fo. 32Yese mmbo lukee vana ikumi na vavii va nde weeru. Umwi nnyaiyo-fo, na yeto n-du weeru mmbo akee na nde weeru kulya Kanaani.” 33Nndu yeto akee nniini wa uruka, kaluvia, “Ulaalu shimanyaa kwakooya mukee vandu va dede mwana maye umwi waany nreny kunu kwakwa, mundeipoo shoonga ta kyeny kwany, mukweenngye. 34Mundesheenngye mwanany yeto n-du; llyo nshemanyaa dede yeni nshi nsaa-fo, ni vandu va dede, naasa nshemuviirya mwanamaye waany, lyony mushevaa vekapa mbusha kunu urukeny elu.” 35Naasa llya valepusua mikusha yaawo, ate kikushu kya fesa mmbo kyikee mikusheny myoose, Nawo llya valelollya fesa tilya efo mikusheny yaawo, wo na nde-yaawo vakaereya nnu. 36Yakobo we nde-yaawo kavavia, “Mmbo mwanshisoka vana vakwa, Yosefu nnyaiyo-fo, nta Simion nnyaiyo-fo, na Benyaminy nawe mmbo murye imwiipo, eto ni mbony tishikooye yeny.”
37Ruben kavia ndeye, kaamba, “Waa vana vakwa vavii shanra shilaviira Benyaminy, shinrambikya, neeny shimmbiire-se kwafo.” 38Kaamba, “Mwana-kwa yeu nnyasokaa neeni-fo, mashika vavae mmbo afiiyye, nawe kasaa-u muni, findo fikasha fikankooya efo shieny yaany, llyo myaasa yakwa ishefumbukaa kutani shafwa.”
Valið núna:
Mapookyony 42: MAS2
Áherslumerki
Deildu
Afrita
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.