Mapookyony 39
39
Yosefu na Nka wa Potifa
1Naasa Yosefu kashefitwa Misri, nawe Potifa, nshilyi wa Farao, kaveva nniini wa itorito, akee nndu Mmisri, kamuura maakony a Vaismaili valya vemweende-fo. 2Nndumi Iruva ekee amwi na Yosefu, nawe kammbesya nnu, nawe kava mwikaa mmba kwa nndumi wakwe, we Mmisri eto. 3Nndumi wakwe kalollya sheelyi Nndumi Iruva ekee amwi na Yosefu, na Nndumi Iruva mmbwe akeevirisa findo fyoose kyuuka na woko lwakwe. 4Yosefu kawona yiirikywa mbee ya Potifa kamfurukannya. Nawe kammbika nave mwisalallya mmba yakwe, na fyoose fiifo kafivika maakony akwe. 5Nndumi Iruva kavikya mmba ya Mmisri ulya mbora kyeendwo ni Yosefu. Mbora ya Nndumi Iruva ikakaa na fyoose eetiri efo kyeny kwakwe na efo mareminy. 6Fyoose eetiri kafira maakony a Yosefu; nalamanyi mbony ta kindo kyoose eetiri, kuuta shoonga yeyo yeelya sheni.
Nawe Yosefu ekee nndu nsha, atiri kisangu kisennyi. 7Naasa numa ya mbony eto, nka wa Potifa kalanga Yosefu, kashemmbia, “Kaa neeny.” 8Kyeendi we kalema, kavia nka yeto wa nndumi wakwe, “Lola Nndumi wakwa nnyeeshi kindo kyikee kyivike mmba kwakwe-fo, na findo fyoose atiri, mmbo afivikkye maakony akwa. 9Nkwiifo nta nndu ashing'annyi yeny-fo, nta, nnyashiimyi nta kindo kyimwi-fo, kuuta yewe kumuni, ni elyi kukee nka wakwe. Niindaany shitanaa uravi elu uniini shilyamarye Iruva?” 10Nka yeto keengera ilelemba Yosefu nkonu, kwi nkonu kyeendi lyo nnyalemwaarannya nta nnyalekunda ikaa nawe tara-fo. 11Naasa, nkonu umwi kaanga efo mmba naambo narunde mashora akwe, na nkweeiyo nndu ungyi efo mmba nkonu eto-fo; 12Naasa nka yeto wa Potifa kantira soori tapu, kammbia, “Kaa neeny!” Kyaindi Yosefu kanreeya soori ilya yakwe efo wokony, karisha kasomuka poo;
13Naasa ekilollya ammureeya soori yakwe maakony akwe karishya poo, 14kavaanga vandu va mmba kwakwe, karera nawo kaamba, “Loleny-te, mmbo alelweenngye Mwebrania naambo nalutannyi fya kinyala.” Mmbo aanga kwakwa naambo nashaafinye, kyeendi shakooma na unyanga uniini. 15Naasa llya alollya shankooma nnu na ifua kashireeya soori yakwe, karisha kasomuka poo. 16Naasa kasuruma soori ilya kutani elyi mmi wakwe ashaa kyeny. 17Nawe kashemwongoya marero yoo, kaamba, “Ishinga elyo we Mwebrania ulya kulemweende kweru, mmbo aleanga kwakwa, naambo nashaafinye.” 18Naasa kyeeri shilekooma neefira neiya kara soori yakwe kwakwa karishya poo. 19Naasa llya nndumi wakwe aleeta marero a nka wakwe shaasa alemmbia, eshambaa ni indo Ishinga elyo lyafo lyileshitannya, katirwa ni unyafi. 20Mmi wakwe kaipoo Yosefu kamweera kifingyony, kundo vafungwa va mangyi vekee vafinngye, nawe kakaa-fo.
21Kyeendi Nndumi Iruva ekee na Yosefu, kallyillya, kanniinga yiirikyo efo misony a nniini wa kifingyony. 22Nniini wa kifingyo kavika vafungwa woose makony a Yosefu, na fyoose fyetanyikaa-fo kava mmbwe afisalallyaa. 23Nta nniini wa kifingyo nnyalelollya nta kindo nnang'ani ya filya fyekee maakony a Yosefu-fo, mashika elyi Nndumi Iruva ekee nawe. Nndumi Iruva kansongoya efo mashoreny moose eeketana.
Valið núna:
Mapookyony 39: MAS2
Áherslumerki
Deildu
Afrita
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.