Mapookyony 37
37
Yosefu na Vana va Maye
1Yakobo ka-kaa urukeny llwa ndeye enkaa, llo urukeny lwa Kanaani. 2Eti nto ngyufyari ta Yakobo, Yosefu kyeeri etiri myaaka ikumi na mfungare mmbo ekee mwiisa moonri ando amwi na vana va maye, nawe mmbo ekee nsoro ando amwi na vana va Bilha, na Silpa, vaka valya va ndeye. Yosefu kava asheenngyee ndeye-a-wo mbony ta ngaa shikasha ta vana va maye. 3Naasa Israeli kakunda Yosefu ngota vana vakwe woose, mashika mmwana wa ukuu lwakwe, kansongosia kansu shaasha. 4Vana va maye vakamanya ndeyaawo mmbo ankundye ngota vana va maye woose, vakanswa nta valaidimi irera nawe na ufoo.
5Kio kimwi Yosefu koorya yoorya, koongoya vana va maye, nawo vakeengera inswa. 6Kavavia, “Shamutereva arannyiny yoorya elyi shilelyoorya. 7Llate, yese mmbo lwekeefinga fikonde efo nreminy, ate, kikonde kilya kyakwa kikooka-u kikasalala, na ilya yaany ikaringyitya kilya kyakwa fikwiinyikkye.” 8Vana va maye vakammbia, “Ndesa dede yewe mmbo kushelushillyaa yese? Neelusalallya yese?” Vakeengera insua kimaruma kya yoorya lyakwe, na kya marero akwe.
9Kaorya yoorya lyingyi, koongoya vana va maye evaviaa, “Arannyiny-te, shammoorya yoorya lyingyi, ate vai nkyeende sa na mwiiri na nyinyiri ikumi na imwi tikashiinndya.” 10Kavia ndeye na vana va maye ndeye kankyeemya kammbia, “Ni yoorya-ki elyi kuleorya? A ndesa yeny na mau na vana va mau mmbo lushekufiiryaa yewe ndi?” 11Vana va maye vakansua; kyeendi ndeye kasuruma irero elyo.
Yosefu Akumbwa Neekamarwa Misri
12Nkonu umwi vana va maye vakandeesa moonri a ndeye efo Shekemu. 13Israeli kavia Yosefu, “Ekakawo vana va mau vekeesa moonri kulya Shekemu, osho shikurume kwawo.” Kammbia, “Ekau yeny mmbee.” 14Endaany kwandelola kwakooya vana va mau veefo nisha na ironda nalyo lyiiyo nisha, kusheengye mbony. Naasa kanruma auka imungony lya Hebron, kafika Shekemu.
15Nndu umwi kakwaanya nawe mmbo akeetivativa efo kasa, nndu ulya kammbesa, “Nkyokyi kukeeruya?” 16Kaamba, “Mmbo shikeeruya vana vama, shakutereva shivia ando vakeisa findo.” 17Nndu ulya kammbia, “Vammuka yaa, mashika mmbo sheeta veshaambaa, lweende Dotani.” Naasa Yosefu kasora vana va maye kandevakooya Dotani. 18Vakallollya akee kwaasha, na kulaore ansha kufii, vakavika kyama naambo vammbwae. 19Vakarera wo veni na veni vakaamba, “Ekakato ndamoorya ansha.” 20Kyasia ndeny lummbwae lundemweera kiroriny kimwi yaa, neese lwaambe, mmbo alelyiwa ni ifisi lulole mwoorya alya akwe mmbo ashevaa inda. 21Ruben keeta ekyo kakunda inkira efo maakony awo kaamba, “Lulammbwaa-fo.” 22Ruben kavavia, “Mulapusue samu-fo, lumwolote kiroriny yaa kasa, nta mulampaani-fo, naambo needimi inkira efo maakony awo, naambo naammbiire kwa ndeye.” 23Llya Yosefu alefika alya vana va maye vekai, vakauta Yosefu kansu, kansu ilya yakwe shaasha eiree. 24Vakamuipoo vakamweera kiroriny, na kirori ekyo kyekee ruu kilatiri mura. 25Nawo vaka-kaa rembo naambo valye shoonga, elyi vaipoo miso vakalollya Vaishmaeli veeshaa vauka urukeny lwa Gileadi verye ngamula tawo, tikurikkye ubani na seri na mane-mane. Veeshendaa Misri. 26Yuda kavia, vana va maye, “Mmbusha-ki iwaa mwane-ru, na ireta samu yakwe?” 27Kyasia, lunkummbye Vaishmaeli yeva, nta maako eru alammbavise-fo, mashika we nsamu yeeru na mmwana maye weeru. Vana va maye vakairikkya. 28Kyeeri Vamidiani veekapa mbusha valefika ando alya, vana va maye vakauta Yosefu kulya Kiroriny vakankumba kwa Vaishmaili, vakaonisa-u fiparwe makumi avii fya fesa; vakaipoo Yosefu vakanrwaa Misri.
29Kyeeri Ruben alewuya kulya kiroriny, ate Yosefu nnyefo-fo, karanndwa soori takwe, 30Kawuya kwa vana va maye, kaamba, “Mwana nnyeefo-fo, nkwi shillaa nafo?” 31Vakashisha mburu, vakaipoo kansu ya Yosefu vakayaaruva efo samuny. 32Vakeenda na kansu yeyo vakairwaaya ndeye, vakaamba, “Ekakai, kansu lwakooya kulle kwakooya ni ilya ya mwana wafu ao woode.” 33Kaimanya kaamba, “Yei nnyo sheni kivakkye ni, ifisi lyilellya; ni dede Yosefu aleratuwa-ratuwa.” 34Yakobo karanndwa soori takwe, kafinga ikunnya kyisiny, kayiiya mwana eto wakwe ando a mikonu miingyi. 35Vana vakwe va kyuumi na va kyika vakansheya immbiirya muu, kyikalema fushu, kaamba, shireny, sheengere yiiya kya mwana wakwa kutani shafika kwa vafu efo akai. Ni indo aleiya kya mwana wakwe. 36Nawo Vamidiani vakankumba Misri, kwa Potifa, akida wa Farao, evekee nshilyi wa vasikari;
Valið núna:
Mapookyony 37: MAS2
Áherslumerki
Deildu
Afrita
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.