Mapookyony 27
27
Isaki Avikya Yakobo Mbora
1Naasa kyeeri Isaki ekkwa na miso akwe nalatiri finya yelola, kavaanga Esau, mwana wakwe mmbee, kammbia, “Mwana-kwa.” Nawe kammbia, “Nnyaa shikai mmbe.” 2Kammbia, “Lola, yeny mmbo shammikkwa, nta nshiishi nkonu wa ifwa lyakwa-fo. 3Kyasia nkuterevaany kwiipoo kisha kyafo mife na ura lwafo kweende kasa kundeshaasya. 4Kusheshisongosia shoonga irolaa yeyo shikunndye, kusheengye, naambo shilye; nkuvikye mbora shilandefwa.”
5Ate na Rebeka kaita, llya Isaki ekerera na mwana wakwe Esau. Naasa Esau keenda ngoroshony nandeasa ifisi, neende, 6Rebeka kavaanga Yakobo, kammbia, “Lola, shamiita ndoo ereraa na mwana-mau Esau, kammbia,” 7“Shaasya kushisongosye shoonga shisha shilye. Shikuvikye mbora mbee ya Nndumi Iruva kulaore shamfwa.” 8Naasany mwana-kwa, arannya shaasa shikuvavasyaa. 9“Enda ulaalu indi efo usirony kwandesheengye-fo ngurana ivii eti shisha, neeny nshesongosia-fo ndoo kishoonga kisha, ngata yeyo akunndye, neewe kunrwaaye, 10nalye, nawe nakuvikye mbora kulaore amfwa.”
11Yakobo kavia maye Rebeka, “Mwana-ma Esau ni nndu atiri fii efo mwiiliny, neeny shava mmamiri. 12Kulakooye nde asheshipaana-paana, neeny mmbo nshevaa nndu llembi mbee yakwe, lyoony nshekuwonisya kidengo na nta nshi mbora-fo.” 13Maye kammbia, “Kidengo kyafo kiwuye neeny mwanakwa, yewe arannya unyanga lwakwa naasa, enda sheengye ngurana ivii ta suvana” 14Keenda katiipoo, kaenngye maye, maye kasongosya kishoonga kisha, shaasa ndeye akundye. 15Naasa Rebeka kaipoo soori ta Esau we mwana wakwe mmbe, eto etitiri efo kyeny, kavika mwana yeto wakwe n-du we Yakobo. 16Na masara alya a mburu kamfingya efo maako na singony. 17Numa karambikya Yakobo kishoonga kilya na nkate emmbukora.
18Yakobo kasheya ndeeye kammbia, “Nde vakwa nkunde”, Isaki kairika kaamba, “Yee mwanakwa, a yewe mmbi ndesa?” 19Yakobo kavia ndeye, “Ni yeny Esau mwanaafo mbee, mmbo shantana shaasa kuleshivavasya. Shakutereva kwipoo kukae rembo, kulye efyo shalasa, naambo ngoo yafo ishivikye mbora.” 20Isaki kavesa mwana yeto wakwe, “A mmbo kyava inda uviny indi mwanakwa?” Kammbia, “Mashika Nndumi Iruva, Iruva wafo ashiwonisya uviny.” 21Isaki kavia Yakobo, “Osho kufii, shikupaani-paani mwana-kwa shilole kwakooya ni yewe Esau dede ao oode.” 22Yakobo kaserikya ndeye Isaki, nawe kamwaashara kaamba, “unyanga lo llwa Yakobo, kyeendi maako ni maako a Esau.” 23Nta nalammanyi, ni llya maako akwe ekee sha maako a Esau, we mwanamaye, etiri fii, naasa kammbikya mbora. 24Kammbesa, “Dede ni yewe mwanakwa Esau?” Kammbia, “Mbwe yeny,” 25kammbia, “Sheengye kufii naambo shiidimi ilya ekyo kwashiasia, naambo ngoo yakwa ikuvikye bora.” Kanserisya kufii, nawe kalya; numa kamwengye mfinyo, nawe kana. 26Ndeye Isaki kammbia, “Osho kufii ulaalu mwanakwa, kushimiminde.” 27Kasembeya kankushingilya kammiminda. Nawe kaita kifwaamu kya soori takwe, kammbikya mbora kaamba,
“Apaa kifwaamu kya mwana wakwa,
Kivakye nnda Nndumi Iruva ammbuvikya mbora.
28Iruva nakuniinge fya laura ya iruveeu,
na yefyo fivanri fya uruka.
Na nkuka wa fimu na mfinyo.
29Vandu vakufurukannyi,
na masanga ashekufiirya ndi.
Kuve nshillyi wa vana va mau
Na vana va mau vashekufiirya ndi.
Yeto mwikudenga nawe nadengwa
Neeto akuvikyaa mbora nawe navikyo mbora.”
Esau Avesa Isaki Mbora Yakwe
30Naasa Isaki ekimaa ivikya Yakobo mbora, na llyo kyeeri ekyo kyeni auka mbee ya ndeye Isaki, llya yeni na Esau mwana maye kasha ooka yaasa mafisi. 31Nawe-da kansongosia kashonga kesha, keengye ndeye kaamba, “Ndeyaakwa nakupoo, nalye shoonga ya mwanakwe, naambo ngoo yakwe imbikye mbora.” 32Ndeye Isaki kambesa, “Ni yewe vi?” Kammbia, “Ni yeny Esau, mwana wafo mmbee.” 33Isaki katirwa nkitetemu, kitetemu kininii nnu, kaamba, “a ni vi ndesa ulya asheengye shoonga? Neeny shammaa ilya kulaore yewe kwansha shammbikya mbora; yee nawe ammeevikywa mbora.”
34Esau ekiita marero a ndeye kaiya kiiyo kiniini nnu kivavaa nnu, nawe kavia ndeye, “Shivikya mbora, na yeny, woi ndeakwa.” 35Kammbia, “Mwana-mau mmbo asha na ulembi, kaipoo mbora yafo.” 36Kaamba, “A nshi alevaangwa Yakobo kya usumanu, mashika mmbo alekuvika ando akwa matorito avii? Mmbo aleipoo usumanu lwakwa lwa mwana mbee, na ulaalu-se ammbwarya mbora yakwa.” Kaamba, “A yeny kushisurummyi mbora-ndi?”
37Isaki karouwa Esau kammbia, “Lola, shammuvika nave ndumi wafo na vana va maye woose mmbo shiniingye vave mashinga akwe, mmbo shimmbikye mbora ya findo fya mareminy na mfinyo, ulaalu shakutannyany inda?” 38Esau kavia ndeye, “A mmbora imwi nsi nde-akwa kutiri?” Esau kaonisa unyanga, kaiya. 39Ndeye Isaki, kanrouwa kammbia,
Lola, ando kunuru urukeny nkushevaa kwafo-fo,
Na ando atiri laura ya iruveeu yuuka uwe,
kuve kwaasha neewe
40Yewe mmbo kushekuringaa na usu, kusherundya mwana-mau,
Na kyeeri kushekweetee kusheturushukaa-u,
llyo kushevaa lleke, kuuke ushilyiny lwakwe.
41Esau kasua Yakobo kimaruma kya mbora ilya ndeye alemmbikya. Esau kaamba efo nriminy, “Mikonu ya iiya nde ikammissya, na llyo kyeeri nshewaa mwaneru Yakobo.” 42Rebeka kavio mbony ta Esau, mwana eto wakwe mmbee. Karuma nndu nandevaanga Yakobo, mwaneeto wakwe n-du, kammbia, “Kwiishi, mbony ta mwana-mau Esau, mmbo akeekusara na ikudeesya ikuuta muu.” 43“Kyasia ulaalu, mwanakwa kwaarannyi unyanga lwakwa, kukwiipoo kurishye kwa Laban, mfyari wakwa kulya Haran. 44Kundekaa kwakwe, kutani unyafi lwa mana-mau lwasia, 45kive nkyo kyoota unyafi lwa mwana-mau, narekywa efyo kulentannya. Numa shirike vandu vashekonndwa-fo. Nkyiki shifiiywa nnyeni moose nkonu umwi?”
Isaki Aruma Yakobo kwa Laban
46Rebeka kavia Isaki, “Nrima wakwa mmbo ukeenrovye kimaruma kya vaka eva va Kihethi. Kwakoya Yakobo oora nka wa Kihethi sha vaka yewa wa Kihethi, mmbo kivaa mbusha-ki kwakwa?”
Valið núna:
Mapookyony 27: MAS2
Áherslumerki
Deildu
Afrita
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.