Marko 7
7
Nkitanapat e Nkai o lkerreti loo lmakui
(Matayo 15:1–9)
1Nepuonu Lparisayo o lbata laa laiteng'enak loo nkitanapat ooing'uaa Yerusalem aaiturrurrokino Yeso. 2Nedol lbata loo looiteng'eni lenyena enyeita ndaa taa nkaik torrok, aa taa nkaik nemeituko. 3Amu kore apa Lparisayo o Lyiaudi pooki naa menya ndaa eitu eng'as aaituk nkaik enche tankaraki naibung'uta lkerreti loo lmakui lenche. 4Naa kore ake ninche pee epuonu eing'uaa nemirichiereki, nemenya ndaa mara keitukote. Neatae sii lkulie kerreti kumo ootujung'oitie aaibung, atuwuana nkutukoto ee lkukompeni o noo motio e nkare o nee mpirikani e surutiai.
5Neipar ꞉lolo Parisayo o laiteng'enak loo nkitanapat Yeso aajoki, <<Aanyo pee meirukurukore looiteng'eni linono lkerreti loo lmakui, eji paa kenya ninche ndaa taa nkaik torrok.>>
6 #
Isa 29:13
Nejoki ninche, <<Keibonua apa loiboni le Nkai Isaya aitibiraki naipirita ntae looitaakino, ana /naigeroki aajo:
<Kaayanyit ꞉kulo tung'ana too nkutukie,
kake kaalakuaniki ꞉ltauja lenche,
7naasai nanu pecheu. Amu kore nkiteng'ena enche naa noo nkitanapat naaing'uaa ltung'ana.>
8<<Amu itung'aitie ntae nkitanapat e Nkai, nimbung'utata lkerreti loo ltung'ana.>>
9Neitoki ajoki, <<Iatata ntae nkoitiei supat e loseg nipaachierierie nkitanapat e Nkai, payie itumtum airukurukore lkerreti linchi. 10#Nai 20:12; Nkit 5:16, Nai 21:17; Lal 20:9Amu etiaka ntae Musa, <Iyanyita papa lino o ng'utunyi,> naa, <Kore pooki oiro ntoki torno te menye tanaa to ng'otonye naa meata ajo meri metua.>#7:10 Kore Kore pooki oiro ntoki torno te menye tanaa to ng'otonye keidimi sii aaibelekenya aatejo Kore pooki odek menye tanaa ng'otonye. 11Kake ijoijo ntae, <Kore tenejoki ltung'ani menye anaa ng'otonye, <<Kore reteto nikiret nindim ning'amaa ta nanu, naa kaitaka Nkai.>>> 12Naaku merekure inchocho ninye metaasaki menye o ng'otonye toki. Kore Korban naa nkichoroto naitayiaki tankaraki Nkai. 13Inia paa kore tee lkerreti linchi lintarasaa, nintaa rerei le Nkai meitoki. Nintokiki aas mbaa kumo naatiu nejia.>>
Ntoki naitarruo ltung'ani tekue Nkai
(Matayo 15:10–20)
14Neitoki ꞉Yeso aipotu ilo turrur nejoki, <<Kore ntae pooki, entining'ooki, nining'ung'u. 15Meatae ntoki natii oriong e ltung'ani naa kore tenejing atua ninye neidim aitarruoi, kake kore naitarruo ninye naa nenia naaing'uaa atua.>> 16Kore teneata ltung'ani nkiyiaa naning'ichere, nchoo ening!#7:16 Kore mbata ee mpala e apa naa keponiki lkereri le tomon o ile.
17Kore pee ejing ꞉Yeso nkaji aing'uaa ilo turrur, neipar looiteng'eni lenyena naipirita inia kitanyanyukoto. 18Nejoki ninche, <<Amaa, imadada sii ntae? Mining'ung'u aajo kore ntoki pooki e oriong najing atua ltung'ani naa meidim aitarruoi ninye? 19Amu mejing inia toki atua ltau lenye, kake atua nkocheke ejing, neipung te sesen tenelo aulo.>> Kore pee ejo Yeso ana, naaku eimie ndaki pooki ajo keisupati.
20Neitoki ajo, <<Kore naipung'u taatua ltung'ani, naa ninye taa naitarruo. 21Amu atua ltauja loo ltung'ana eing'uaa mparrunot torrok o loloito ee ltung'ana leitu eyema#7:21 Ketanya apa Nkai eboita lee o lipong ewuon eitu eyema. o mpurrore o arichoi e lkiye 22o loloito ee ltung'ana ooyema o luboi o ntorno o losegin le sapare o ꞉mparrunot nemeitaa loloito toki o lom o nkiroroto e ntorroni too lkulie o nkilacha o madai. 23Kore kuna torrok pooki naa atua ltung'ani eing'uaa, neitarruoo ninye.>>
Nkurukoto e nkitok e lorere lemeiruk Nkai e Isirael
(Matayo 15:21–28)
24Neinyuototo Yeso te inie nelo mbata e lkerenket le Tiro.#7:24 Kore Tiro naa kejo mpala kumo Tiro o Sidon. Kore etii ninye inie, neleliakino ajing nkaji nabo, naa keyieu nemeatae hoo ltung'ani oyielou, kake neyielouni ake eyia. 25Nchoo nkitok naata ntito naata ꞉lairirua, nening lomon lenyena, nelotu nabokata arriakino nkejek enyena. 26Kore inia kitok naa noo Lgirriki, netiiwuaki to nkop e Penisia natii Siria. Nelej Yeso metaarai lairirua meeipung'o te inia tito enye.
27Nejoki ꞉Yeso ninye, <<Nchoo nkera eng'as aanya ntoki pooki aaimu, amu mara supat tenerrapuni ndaa ee nkera neyai aanang'aki ldein.>>
28Kake neng'amaa ꞉ninye Yeso ajoki, <<Lokitok, kore abaki ldein etii taabori misa naa kenya lekunot ee nkera.>>
29Nejoki ꞉Yeso ninye, <<Kore tankaraki inia nitejo, chomo naa! Etung'ayie lairirua ntito ino.>>
30Nelo ninye nkang enye, neiniapu nkerai enye eilura to rruat, netung'ayie ꞉lairiruai.
Eichiunyie ꞉Yeso ltung'ani ming'ani lemeiro
31Neing'uaa aitoki Yeso inia bata e Tiro, neimaa atua lkerenket le Sidon nelo mpaso e Galilaya ana metabaki nkop e Dekapolis. 32Neyakini ninye ltung'ani ming'ani lemeyielo airoro aitibiraki, neomon ꞉ninche Yeso meiteleki nkaina.
33Kore pee eya ninye ilo tung'ani aiwuang'ie te ilo turrur, nepik Yeso lkumojik lenyena atua nkiyiaa enyena. Nenataki nkamlak, neiseyie lng'ejep lenye. 34Kore payie eimariri chumata, neitodoyio siwuo, nejoki, <<Epata!#7:34 Kore Epata naa Toboloi to nkutuk apa nairo Yeso ee Aramaik. >> aa kejo, <<Toboloi!>> 35Nebolo nkiyiaa enyena nabokata, nelaa sii enata e lng'ejep lenye, neng'asu airo aitibiraki.
36Neitaarriyian ꞉Yeso ninche pee meliki hoo ltung'ani obo inia bae. Kake kore nkata pooki naitanap ꞉Yeso ninche payie melikoo inia bae nataase, nepuo kue eitadaraa inia nataase oleng. 37Neing'asia ltung'ana katukul nejo, <<Kore pooki nataasa naa ketaasa aitibiraki, eichoo lming'anak metining'icho o lemeiro meiroro.>>
Valið núna:
Marko 7: saq
Áherslumerki
Deildu
Afrita
Want to have your highlights saved across all your devices? Sign up or sign in
© 2021, Bible Translation and Literacy