Ndandililo 32
32
Che Yakubu akuliŵika chile kusimana ni che Esau
1Che Yakubu ŵajendelechele ni ulendo wao. Nipele achikatumetume ŵa kwinani ŵa Akunnungu ŵasimene nawo. 2Che Yakubu paŵaweni achikatumetume ŵa kwinani ŵala, ŵatite, “Awuwu uli mpingo wa ŵangondo ŵa Akunnungu!” Kweyele pachigono pala ŵapaŵilasile Mahanaimu.
3Che Yakubu ŵaatumile ŵandu ku Seili mu chilambo cha Edomu, kuti ajaule ku che Esau achimwene jwao kukupeleka utenga. 4Ŵaasalile ŵandu ŵala, “Nkaasalile che Esau ambuje ŵangu kuti, une che Yakubu jwakutumichila jwenu nguti, natamaga ku che Labani, nalonjele kweleko mpaka sambano. 5Ngwete ng'ombe, ni mbunda, ni mipingo ja ngondolo, ni ŵakutumichila achalume ni achakongwe. Ngumpelechela utenga wu alakwe ambuje ŵangu, kuti ngundikwe pameso penu.”
6Wandu ŵala ŵajawile ni utenga ula, nipele ŵausile ni kwasalila che Yakubu, “Twaiche kwa che Esau achimwene jwenu, nombejo ali mwitala pamo ni ŵandu mia nne kukunchingamila.” 7Nipele, che Yakubu ŵajogwepe nnope ni kukola lipamba. Ŵandu ŵaŵaliji pamo nawo ŵala pamo ni ngondolo ni ilango ine ni ngamia ŵaagaŵenye maunjili gaŵili, 8achiganisyaga mu ntima, “Naga chaiche che Esau ni kuulaga mpingo umo, nipele mpingo uchiusigalile chiutile ni kulama.”
9Pelepo che Yakubu ŵatandite kupopela achitiji, “Akunnungu jwa ambuje ŵangu che Ibulahimu, sooni Akunnungu jwa atati ŵangu che Isaka! Ambuje Akunnungu jumuusalile muje ku chilambo changu kwa achalongo achinjangu, mwambele chilanga kuti chimundendele indu yambone, 10nganguŵajilwa namose kanandi indu yambone yo imumbele une jwakutumichila jwenu jwakukulupilichika. Panajombweche lusulo lwa Yolodani, naliji jwangali chindu ikaŵe lubokola pe mmakono, nambo sambano ngwete mipingo jiŵiliji. 11Ngunchondelela mungulupusye kutyochela kwa achimwene jwangu che Esau, pakuŵa ngwete lipamba lyakuti chatujimilile ŵanawose, ni achakongwe pamo ni ŵanache. 12Nambo mwalanjile kumbanganyichisya indu yambone ni kuutenda achaŵelesi wangu aŵe achajinji nnope mpela nsanga wa kumbwani.”
13Nipele, che Yakubu ŵagonile pelepo chele chilo cho. Nipele ŵajigele liunjili lya indu iŵakwete, iŵe ntulilo kwa che Esau nnung'unagwe: 14Mikolo ja mbusi mia mbili ni mikambaku ishilini, mikolo ja ngondolo mia mbili ni mikambaku ishilini, 15ngamia selasini syasikonjesya pamo ni ŵanache ŵao, mikolo ja ng'ombe alobaini ni mikambaku kumi, ni mikolo ja mbunda ishilini ni mikambaku kumi. 16Ŵaapele ŵakutumichila ŵakwe, kila mundu ni mpingo wakwe, ŵaasalile, “Munongolele ni kusigasya lipesa pasikati ja mpingo ni mpingo.” 17Ŵanlajisye juŵalongolele jula, “Mwasimanaga nao achimwene ŵangu che Esau nombejo ammusyaga, ‘Mmwe ndi jwakutumichila jwa ncheni? Nkwaula kwapi? Ni inyama yose yi ili ya acheni?’ 18Mwasalile, ‘Yose yi ili i che Yakubu jwakutumichila jwenu, yeleyi ili ntulilo wenu alakwe achimwene jwangu che Esau. Asyene che Yakubu akukuya panyuma.’ ” 19Ŵaalajisye ilaila kwa jwakutumichila jwa mpingo waaŵili ni waatatu ni ŵane wose ŵakukuya achasalilaga, “Chimwasalile che Esau gagogo pachinsimane nao. 20Kupunda yeleyo chimwasalile, ‘Jwakutumichila jwenu che Yakubu akukuya panyuma.’ ” Che Yakubu ŵaatumile ajanje yele pakuŵa ŵaganisyaga, “Panepa chinaatondoye pakwapa ntulilo unongwesye mmbujo, ni pachisimane nawo pane chanechelele.” 21Nipele ŵalongwesye mitulilo jawo, nambo asyene chilo cho ŵagonile palapala pachigono.
Che Yakubu akulimbana nchinjo ni mundu
22Chilo chilachila che Yakubu ŵajimwiche ni kwajigala achiŵankwakwe ŵaŵili, pamo ni ŵakutumichila ŵakwe ŵaŵili ni ŵanache ŵakwe likumi ni jumo, ŵajombweche lusulo lwa Yaboki. 23Paŵamasile kwajombosya peesi kasulo aŵala uŵaliji pamo nao ni indu yao yose iŵakwete, 24Che Yakubu ŵasigalile jika. Nipele mundu jumo jwaiche ni kulimbana nao nchinjo mpaka kwachele. 25Mundu jula paŵaiweni kuti ngakukombola kwapunda che Yakubu, ŵankwaiye che Yakubu pa mauli, nipele ŵatiningwiche pa mauli po paŵaliji nkumenyana nchiinjo. 26Mundu jula ni ŵatite, “Muuneche nyaule pakuŵa kutandite kucha.” Nambo che Yakubu ŵajanjile “Ngangunneka njaule mpaka mmwejo muumbe upile.”
27Mundu jula ŵausisye, “Liina lyenu ŵani?” Ŵajanjile, “Liina lyangu che Yakubu.” 28Mundu jula ni ŵatite, “Liina lyenu ngaliŵa sooni che Yakubu nambo Isilaeli, pakuŵa nlimbene nchinjo ni Akunnungu ni ŵandu, nomwe mwapundile.” 29Che Yakubu ŵausisye achitiji, “Choonde muusalile liina lyenu.” Nambo jwelejo ŵajanjile, “Kwachichi nkuusya liina lyangu?” Nipele ŵampele upile che Yakubu. 30Nipele che Yakubu ŵapaŵilasile peuto pala Penueli achitiji, “Monegene ni Akunnungu meeso ni meeso nambo nganimwa.” 31Lyuŵa lyaliji likopweche che Yakubu paŵatyosile Penueli, nombejo ŵaliji nkutimbajila ligongo ŵatiningwiche mauli. 32Kwayele mpaka lelo jino Ŵaisilaeli ngakulya ntasi wa mauli pakuŵa mundu jula ŵankwaiye che Yakubu pa ntasi wa pamauli.
Valið núna:
Ndandililo 32: YBV
Áherslumerki
Deildu
Afrita
Want to have your highlights saved across all your devices? Sign up or sign in
Yao New Testament © The Word for the World Southern Africa and Pioneer Bible Translators, 2018.