Roma 5
5
1ANYIN a wale, adre me haiwisʼ öta hnen labageju, ke so ate me ûsoköu me Khong a deny Tuhöta Iesu Keriso; 2a deny e adre hia but hnʼ öta ûnyi ge labageju ka hnyi ibetengiö baû eang ate me tot hnyin; ke so ate me senyin me gejon hmanenanginy Khong. 3Ke ca walang thibi, ke so ate me senyin minya hnyi anyita je vec: anyin ae khanʼ öta a gʼ ame okûâ hokhnyok ûnyi ge vec; 4ke haba hokhnyok ame okûâ wâhmakhmetoâ; ke haba wâhmakhmeto ame okûâ gejon: 5ke haba gejon ame ca ohmehma bi; anyin adre hia but hingâlâ ka hnyi je hnyekuta ibetengiö anyin Khong ûnyi ge Hanu Kap waleji adre ham köta. 6Ke hnyi ûen a öta tiga sënyin, me ame mokcu Keriso, hnyi ûen ae ûcû, hobi kâu tavat ae kong. 7Anyin a helâke e pason ka ke at he ka mok me hwaban at ae wisa hwakecin: ke so bi ame ne hu la ke at ae hwege he ka mok hnân hwaban at ae so. 8Ke Khong ame omanenâ kötâ anyin ibetengiö, anyin ame mok Keriso me hnân hwabʼ öta ke öta tiga monu. 9Ke walang ang adre me haiwisʼ öta ûnyi ge dreny, awe, adre me he ka ti omeli öta minya ûnyi gan hnyi hmonyin. 10Anyin a ne ûsoköu öta me Khong ûnyi ge mok anyin Nokon, waleji kʼ öta tiga iwahnaihmiony, me e gan hmâ hna he ka omeli öta hnen anyin möt, kʼ ate me ûsoköu më. 11Ke ca hake wale thibi ang, ke ate me senyin ka Khong ûnyi ge Tuhöta Iesu Keriso, wale ate me kap ûsoköu ûnyi gan.
12Anyin a wale, ame o but hulo ka hnyi hmeledrany ûnyi ge at a khaca, kʼ ame o mok can hulo; ke ame o but mok ka tavat hia, anyin ae monu hia:— 13anyin e hu hulo hnyi hmeledrany ke ne o but ame o hnanyibu: ke adre me ca he ka ha hulo, e ka ba hnanyibu. 14Ke so bi, ame dokhu mok hwân ga Adamu ke ne o but kö Mose, hon tavat ae ca monu helâ me hna hanyâûâ ga Adamu, waleji ame ûöhûco at ame he ka o. 15Ke ca tha ûcû bi hna hanyâûâ me hna ham bâûâ. Anyin ame ne mok ut tavat ae se hia ûnyi ge monu anyin at a khaca, awe, ame he ka ti si ibetengiö baû anyin Khong, me hna ham hnen ibetengiö baû anyin at a khaca, Iesu Keriso, ka tavat ae se hia. 16Ke ca tha ûcû bi hna ham bâûâ me at a khaca ame ânyâ hulo: anyin ame o but hna bi hwaban ûnyi ge monu a khaca ka hnyi hnaûhango, ânyin ame o but hna ham bâûâ ûnyi ge je monu ae se hia ka hnyi hna haiwisa. 17Anyin a ne ûnyi ge monu anyin at a khaca, ame dokhu mok ûnyi ge at a khaca; awe, e nua bi hnödra hna he ka dokhu hnyi möt ûnyi ge at a khaca, a Iesu Keriso, wale tavat ae hu gan hmâ kodra ibetengiö baû, me bwihlanyiny hwakecin ae wisa. 18Anyin adre me ohnaûhangoâ tavat ae se hia ûnyi ge monu a khaca; helâe minya ame o bwihlany ka tavat hia ame haiwisʼ ödra mʼ adre me möt ûnyi ge hwakecin ae wisa a khaca. 19Anyin ae kong ut tavat ae se hia ûnyi ge ca ûling anyin at a khaca, helâe minya adre me he ka haiwisa tavat ae se hia hnen ûling anyin at a khaca. 20Ke ame o but minya hnanyibu, me ame se hia but monu; ke haba dok ame gan monu hnyin, me wale gan hmâ but ibetengiö baû: 21ke haba hulo ame musi ka hnyi mok, me helâe ame he ibetengiö baû ka musi hnen hwakecin ae wisa ka hnyi möt ame ca ba balua, a deny Iesu Keriso a Tuhöta.
Valið núna:
Roma 5: IAAI
Áherslumerki
Deildu
Afrita
Want to have your highlights saved across all your devices? Sign up or sign in
maintained by the British and Foreign Bible Society