Roma 1
1
1INYA Paulo athnyabai Iesu Keriso, adre me hawâ hnân aposetolo, kʼ adre ûca hobi kâu ûthumetu ae so anyin Khong, 2waleji e ame ha bânâ a deny anyin ta je perofeta hnyi je hna sihnalimen ae kap, 3ge Nokon, waleji adre hnokoâ ûnyi hnyi mâtrâni Davita hnyi unyin, 4ke adre me haimemenâ e thibi Nokon Khong tha e me man ûnyi ge hanon hwakecin ae kap, hnen nnöt hmetu ûnyi hnyi hna mok; wale Iesu Keriso a Tuhöta, 5öhmun e kap betenge baû a deny e, me hanymen aposetolo, mʼ adre me he ka long hoton hna labageju hnyi ta je hnyei hia ûnyi ge ien: 6e unyidra minya bi öbun adre hawʼ öbun hobi kö Iesu Keriso: 7e so e he ka ê unyibun betenge baû me hnahic ûnyi ge Khong a Kamöta me Than Iesu Keriso; ka tavat hia e Roma, je oûnykûmen Khong, me hna hawâ hnân tavat ae kap.
8Inya oge me bök ka oleâ ka Khonguk, a deny Iesu Keriso, gabun hia, anyin ame lung anyibun labageju hnyi hmeledrany hia. 9Kʼ ame ohnathu nya Khong, at oge me athnyabainy hnyi hanuk hnyi ûthumetu ae so anyin Nokon, a oge me ca menâ bi hai öbun hnyi hijik je hic hia, 10kʼ oge me sumâtâ he ka ie he but köbun, a ne hu dek, ke a ne weny Khong he ka ohnahicâ ûhek. 11Anyin ae gan hmâ wek he ka iouny möbun, mʼ inye he ka ham köbun ke bwihlany ûnyi hnyi hanu, me hnân otethmʼ öbun; 12wale me me tha kawkahwa hnyekuk mʼ öbun, hnyi anyitin tha labageju. 13Hnyat me lakeiny lö, e wek e me hnyi khanʼ öbun, a iny osehia ûnykûme he ka he köbun, (ke hu hna ovheli nya ke ne o but walang ang), me me hu gak ke je wan ûnyi gabun, helâ me hnyi ke keihen Aten ta je hnyei. 14E hu hanymök ka at Heleni, me Aten ta je hnyei, ka tavat ae metâ, me tavat ae ca metâ bi. 15Anyin a wale, inya oge me penapena a ne khanö nya, he ka khetâ minya köbun ûthumetu ae so hnyi Roma. 16Anyin a inya oge me ca hmehma ge ûthumetu ae so: anyin a wale man maniny Khong hnân omelö tavat hia thithö adre me labageju; ka at Juda a bân, me ka at Heleni minya ju. 17Anyin ame manen dut hnyin e hwakecin ae wisa anyin Khong ûnyi ge labageju, mʼ adre me he ka labageju: helâ me hna sihnalimen, ka habe, Ame he ka möt tavat ae wisa hwakecidra ûnyi ge labageju.
18Anyin adre me omanenâ ûnyi hnyi drany hmonyin anyin Khong ka ta je hwakecin hia ae ca ûcû ka Khong, me je hwakecin ae ca wisa bi anyin tavat, adre me ovhelâ hnathu ge hwakecidra ae ca wisa bi; 19anyin ae manen dut eû hnyidra, ta je ûnyi ae khanʼ ödra he ka omanenâ ge Khong; anyin a Khong ame omanenâ ling kodra. 20Anyin a haba anyin ta je ûnyi ae iyong, hwân hnyi hna op hmeledrany, me, himanen hmonyin dut, adre me wâhmakhmetoâ hnen ta je ûüyi a op, wale maniny man ae ca ba balua, me bongon Khong; wale me me he ka ba hmetu hnân thu gadra: 21anyin a khanʼ ödra but Khong, ke adre me ca ogânâ bi, e me ûcû me Khong, ke adre me ca oleâ minya bi; ke adre me omonoâ je ûnykûmenödra, me ölidrâ je hnyekudra ae kong. 22Adre me ka ohobeluâ anyidra bi metâ, me adre me monu but, 23ke adre me wia thö hmanenanginy Khong ae möt balua, me ûcûcûbongoâ e me at ame he ka mok, me je meno ame gâ, me je meno a vak can, me je ûnyi ame iyâû.
24Anyin a wale Khong ame hnʼ ödra ka hnyi je weny hnyekudra ae kong, me hwakecin ae ikiki, mʼ adre me he ka ûokong-oâköuâ je unyidra: 25anyin a adre me wia thö hnathu anyin Khong me me thoi bi, me khudrung me huliwa ka ke ûnyi adre op, kʼ at hna bi At a Up ödra, wale a hnân haisoâ nyiele balua. Amen.
26Waleling me me hnʼ ödra Khong ka hnyi ta je wedra ae ikiki; anyin a haba je momo gadrin adre me wia hwakecin ae ûcû ka hnyi hwakecin ae ca ûcû: 27ke helâe minya obaga adre me hna degecâ hwakecin ae ûcû omomo, kʼ ödrin e ûökahwaköuâ wedra ae kong, obaga unyin obaga adre me ânyâ ûnyi ae ikiki, me ame hwâdâ kodra hwaban ae ûcû me anyidra monu.
28Ke ca wedra he ka wâhmakhmetoâ Khong, me haba Khong ame hnʼ ödra but he ka hwali hnyi je hnyekudra, mʼ adre me he ka ânyâ ta je ûnyi ae ca ûcû; 29ke ödra unöngötö ge je hwakecin ae ca wisa bi, me hulo, me behnyekon, me beokongo; kʼ ödra unöngötö ge ibunyinköu, me ûhlingö, me iwatretra, me iyawo, me hnyok ae ti kong; 30ödra hnyat ûhaiö, me bi fuco, me ûkötiâ Khong, me hwege hnyimödra, me bi gan, me hobelöu, me bihihwakecin ae kong, me ca long lakamödra me lahinyödra, 31me tavat ae monu, me tavat adre me hanyâûâ hna ûhihinyköu, me tavat adre me ca hnyokâ je liamekeiny mödra, me tavat adre me ca betenge: 32ke khanʼ ödra hna hûna hnen Khong, a e ûcû kodra he ka mok, ödra ka ânyâ ta je ûnyi e, ke adre me mâdrâ ta je ûnyi eling, kʼ adre me ogʼ ödra minya bi tavat adre me ânyâ.
Valið núna:
Roma 1: IAAI
Áherslumerki
Deildu
Afrita
Want to have your highlights saved across all your devices? Sign up or sign in
maintained by the British and Foreign Bible Society