Ta je huliwa 23
23
1HABA Paulo ame wâ hmâ ûhnenamö, me ha, ka habe, Hnyat me lakeiny lö, oge hia but laba me oûnykûmik ae so hia hnyi hnyimakan Khong ke ne o but hnyi bong ang. 2Haba at bihut ae nua ame ha ka tavat adre me tot unyin he ka khaû hnyimen. 3Haba Paulo ame ha kâu, ka habe, Ame he Khong ka khöû u, u hak veto adre ohawâ, anyin a u me laba he ka owisö nya helâ me hnanyibu, ke u me kûnâ he ka khöû nya a ûö bi ûnyi me hnanyibu? 4Ke haingen tavat adre me ûtitilen eling, ka habe, U me haikongoâ at bihut ae nua anyin Khong? 5Me haingö Paulo, ka habe, Hnyat me lakeiny lö, e ca khanö nya ae at bihut ae nua: anyin adre me sihnalimen, ka habe, U me ca he ka haikongo at ame muso em hnyei. 6Ke a wâhmakhmeto but Paulo a ta je Sadukaio keihen gadra, ke ta je Faresaio keihen, me e ame fuc hwege hnyi ûhnenamö, ka habe, Hnyat me lakeiny lö, iny Faresaio, nokon Faresaio: kʼ adre me hnei nya ge geju ka hnyi möt hmetu ûnyi hnyi hna mok. 7Kʼ ame ha helâe, me ame kû thö iwatretra ge at Faresaio me ta je Sadukaio: ke haba ûkhacaköu, me ame khekhe lo but. 8Anyin a haingen ta je Sadukaio, ka habe, E ba möt hmetu, ke ba angela, ke ba hanu: ke haba je Faresaio, me adre me tha kap li ûnyi e. 9Me ame kû thö imediököu ae gan, me ame todrö tavat sihnalimen lahien ta je Faresaio, me ha hwegiâ, ka habe, E ba monu ge at ang ohmun e wâ: ke ame ne ha kâu la hnen angela, kʼ ame ne hnen angela, ieû? 10Ke ame kû ivinö ae gan hmâ, me ame ot taben ae nua, wâ adre nye he ka ve kiö Paulo but, me e ame kunâ je soja he ka hûgûnâ but e gadra, me hom e ka hnyi hnabâ.
11Ke eâu hnyi lit, haba Than ame tot unyin me ha, ka habe, Hwege thö: anyin a u me he ka ohnathu nya hnyi Roma helâji me hnâm hna ohnathu nya hnyi Jerusalema.
12Ke a lany jut haba at Juda adre me ûkhacaköu me bi khöbi ka habe, Adre me ca he ka han me ic ke ne o but adre me hia but hlingö Paulo. 13Ke haba tavat adre me si hnân eling ödra se hia hon fâte. 14Ke adre me o but ka je taben tavat bihut, me wahingat, me ha, ka habe, Ohmun e hia but bi khöbi ae gan hmâ hwaban, a ohmun e ca he ka an ke ûnyi, ke ne o but ohmun e hia but hlingö Paulo. 15Anyin a wale, ha thʼ öbun me tavat ûhnenamö ka taben ae nua, me me he ka hom but e köbun, helâke öbun e he ka hnö wia ta je ûnyi gan: ke ohmun e he ka penapena ka hlingâ e, ke tiga sâkâû. 16Ke a long ut nakaûnyi Paulo, a gʼ adre me he ka mokut duöng gan, me e ame he but me didrö ka hnyi hnabâ, me haimemenâ kö Paulo. 17Haba Paulo ame hawâ ke keneturio me ha, ka habe, Hom dö hidröu ang ka taben ae nua: anyin ae hu hofuc gan he ka haimemenâ kâu. 18Me e ame hom e, me su e ka taben ae nua, me ha, ka habe, Ame hawo nya Paulo, waleji adre ca, me sumatö nya he ka hom hidröu ang köu, anyin ae hu hofuc gan he ka ha köu. 19Haba taben ae nua ame lelo hnyamen ka hnyi dok ae ba aten me hnö, ka habe, Ie ûnyi u me he ka ha könya? 20Haingen, ka habe, A hia but at Juda tha ha he ka sumatö u he ka hum Paulo nyi ka hnyi ûhnenamö, helâke u me he ka hnö wia ke ûnyi gan. 21E so u ma ca he ka ogâ hodra: anyin ae se hon fâte tavat gadra adre me mokut duöng, adre hia but bi khöbi a gʼ adre me ca he ka han me ic ke ne o but adre hia but hlingâ e: ke walang ang adre me laba penapena me halubahingen u me he ka ogâ hodra. 22Haba taben ae nua ame hna but hidröu me hûna, ka habe, Ca ha bi ka ke at mʼ u je mwi ang ka haimemenâ könya ta je ûnyi ang.
23Me e ame hawâ lo li keneturio, me ha, ka habe, Penapena thö ta je soja a tu haded, ke sevente tavat tabö hors, ke tu haded tavat hok ö, he ka he Kaisaria ai eâu hnyinghet, hnyi awa a kuniny: 24ke e ame hûna ködrin he ka penapena je meno mʼ adre me he ka ip Paulo hon, me hom wia e kö Filiki a gavena. 25Ke e ame set helâng tusi, ka habe,
26Inya Klaudio Lusia oge me italofa möu Filiki a gavena ae beönua. 27Haba at Juda me adre me kât at ang, ke adre me he but ka hlingâ e, ke oge me he but me deö soja me omelö e, anyin a oge me long a e at Roma. 28Ke oge me wek he ka wâ wia can adre me bifuco e gan, me oge me hom e ka hnyi anyidra ûhnenamö: 29me ame manen könya a gʼ adre bi fuco e hnyi bongon anyidra hnanyibu, ke ba ûnyi adre me ha ae ûcû kâu he ka mok hnyin, me ca bi. 30Ke adre me omanenâ könya a gʼ adre me he ka mokut duöng kâu, me oge me ie kunâ but e köu, me oge me hûna ka tavat adre me he ka bifuco e he ka hâiâ e hnyi hnyimâkâm.
31Haba ta je soja adre me hum Paulo, helâ me hna hûna ködrin, me hom e Anetipateri ai hnyi lit. 32Ke nyi adre me hna tavat tabö hors he ka hom e, ke adre me be hmetu ka hnyi hnabâ: 33ke adre me o but hnyi Kaisaria, me adre me ham tusi ka gavena, me hum Paulo kâu. 34Ke a hia but aû, me e ame hnö iny hnyei; ke e khana a at Silikia, 35me e ame ha, ka habe, Oge me he ka ling u e ka o tavat he ka bi fuci u: me e ame hûna he ka tuö e hnyi uma umo Heroda than.
Valið núna:
Ta je huliwa 23: IAAI
Áherslumerki
Deildu
Afrita
Want to have your highlights saved across all your devices? Sign up or sign in
maintained by the British and Foreign Bible Society