II. Korinito 9
9
1ECA ûnyi hnathu könya he ka sihnalimen köbun hwakecin huliwa ka wakap: 2anyin ae khanö nya hnyekubun ae beweny, wale oge me hobeluâ gabun hnyin ka at Makedonia, ka habe, adre hia but penapena hnyi Akaia ehac a khaca but huna; ke ame huliwan hnyekon tavat ae se hia hnen hnyekubun ae kahwa. 3Ke oge hia but kunâ je liamekeiny, wâ e nye unyi baû hnöhmun hna hobeluʼ öbun hnyi ûnyi eang; mʼ öbun e he ka penapena helâ me hnok hna ha: 4wâ oge nye o me keihen at Makedonia, me wâ a ga ca penapena ju öbun, me öhmun e he bi ka hmehma (ke ti e bi gabun) hnyi hna hobeluâ eling. 5Anyin a wale oge me ûnykûme ae ûnyi hnathu he ka khöû ka ta je liamekeiny he ka bodrin köbun me penapena ta je ûnyi hnyi anyibun ibetengiö, waleji öbun e ha bânâ ehac, mʼ öbun e he ka penapena e, helâ me ûnyi hnyi ibetengiö, ke ca helâ bi me hna behânâ.
6Ke wale minya eang, haba at ame tā ûhnyûkongoâ, me ûhnyûkong minya hnen hna meno; ke haba at ame tā gânâ, me gan minya hnen hna he ka meno. 7E so he ka ve ham hoton hna thamuâ eû hnyi hnyok; ca hnyi hnyok ae hmak, me hna muso minya: anyin a Khong ame hnyokâ at ame ham senyinâ. 8Ke e khana Khong he ka ogânâ thö köbun ibetengiö baû hia; mʼ öbun e he ka widrany gan hmâ bala hnyi ta je ûnyi hia, mʼ öbun e he ka si hnyi ta je huliwa hia ae so: 9helâ me hna sihnalimen, ka habe,
E ame ham bâûâ, me ham ka je theduoc;
Ke tethmâ nyiele balua hwakecin ae wisa gan.
10Ke haba at ame ham hatong ka at ame tā, me jeû hnân han, me e ame he ka ham me osehia wan hnobun hna tā, me ogânâ minya wan hwakecibun ae wisa: 11ame otreni öbun ge omjeû hnyi ta je ûnyi hia, mʼ öbun e hnyi ham gânâ but, wale hnân okûâ ole ka Khong ûnyi gahmun. 12Anyin a haba hna huliwan huliwa eang, me ca walang he ka ûcû ka wakap thibi, kʼ ame bi hanen minya ole ae gan hmâ ka Khong; 13anyin adre me ogânâ Khong hnyi haten huliwa eang, me hnyi hnobun hna long hoton uthumetu ae so anyin Keriso, wale öbun e hom, me hnyi ibetengiö ae gan hmâ kodra me tavat hia; 14ke adre me hnyok gan hmâ köbun ûnyi hnyi ibetengiö baû anyin Khong ae ti gan hmâ unyibun, ke adre me hic hobi köbun. 15Ole ka Khong ge anyin bwihlany ae ca khanʼ öta ha hia.
Valið núna:
II. Korinito 9: IAAI
Áherslumerki
Deildu
Afrita
Want to have your highlights saved across all your devices? Sign up or sign in
maintained by the British and Foreign Bible Society