GENESIS 18
18
Abraham Tapa Piak Ding Chiamna
1Huan sun nisat laitak a puanin kongkhak bul a Abraham atut lai in, Mamre a tosaw kiang ah Toupa ahong kilak hi. 2Abraham dak in a-en a, ngai in, akiang ah mi thum ana dingh uhi. Amuhtak in puanin kongkhak a kipan amaute tuak ding in ava tai a, lei lam ah akunsuk hi. 3“Ka toupa na deihsakna ka tan theihleh hehpih in na sikha hon paikheng mahmah ke'n. 4Tui tawmchik bek hon la uhenla, na khete uh sil unla, sing nuai ah khawl tadih un. 5Tanghou tawmchik bek ka va la ding a, na lungtang uh halhsak un. Huai khit chiang in na pai zom zel na ding uh. Huai ding a na sikha kiang a hong pai na hi peuhmah ding uh,” achi hi. Amau, “Na chih bang in va hih in,” achi uhi.
6Puanin sung a Sarah kiang ah Abraham ava lut pah a, “Tangbuang nel mahmah tehna thum bawl in, mek inla, tanghou pei in bawl in,” achi hi. 7Ganhon lam ah Abraham atai a, bawngnou hoihtak ava man a, asikha kiang ah apia a, ama'n abawl mengmeng hi. 8Nawituidat, nawitui leh bawngnou sa kibawl ala a, ama uah ava luita hi. Amau anek sung teng uh, sing nuai ah akiang uah adingh nilouh hi.
9Amau akiang ah, “Na zi Sarah koi a om ahia?” achi ua, “Ama'n pam a puanin ah,” achi hi.
10Amaute'n, “Hun ahong chin nawn peuhpeuh chiang in na kiang ah ka hong nawn ngeingei ding uh. Ngai in, na zi Sarah in tapa anei ding,” achi hi. Anung a puanin kongkhak bul a kipan Sarah in ana za hi. 11Abraham leh Sarah upapi, tektak ahita ua; numei dan ngeina Sarah ah akam khin thamta hi. 12Sarah in tektak ka hih nung in nopsakna ka nei thei lai diam maw, ka toupa lah a-upata ngal a? chi in alungsim in anui hi.
13 Toupa'n Abraham kiang ah, “Bang achia Sarah in, kei pitek in ta ka nei thei lai diam maw, chi a nui ahia? 14Toupa a ding in thil himhim haksa lua a-om a hia? Hun seh ahong tun chiang in, na kiang ah ka hong nawn ding a, Sarah in tapa anei ding,” achi hi.
15Sarah in alauh ziak in, “Ka nui kei,” chi in anial hi. Ama'n, “Zuau ahi, na nui tawk ve,” achi hi.
Sodom A Ding In Abraham Athum
16Huai a kipan mite adingh ua, Sodom kholam a-en ua, amaute khakhe ding in akiang uah Abraham apai hi. 17Toupa'n, “Ka thilhih ding Abraham ka iim diam aw; 18Abraham lah chi thupi leh thilhihtheitak ahong hi ngei ding a, amah ah leitung a nam chih vualzawl a om ding ahihdante? 19Anung a atate leh a-inkuanpihte'n diktatna leh thudik a Toupa lampi zui a, vaihawmna ding thu apiaktheihna ding in amah ka septa a; huchi a atungthu genpa Toupa'n Abraham tung a atunsak theihna ding in,” achi hi.
20 Toupa'n, “Sodom leh Gomorrah kalh a kikou thawmging anasa a, agitlouh mahmah ziak un. 21Tu in ka hohsuk ding a, akikou ging uh ka kiang a hong tung bangbang in ahih uhia, hih lou, ka en ding a, ahih kei uleh ka thei mai ding,” achi hi.
22Huai a kipan mite akihei ua, Sodom kholam azuanta uhi. Abraham bel Toupa ma ah adingh lai hi. 23Abraham in ava naih a, “Mikhialte lak a midiktatte hihmangkhawm tel ding na hi maw? 24Khosung ah midiktat sawmnga bek a-om kha ding uh e. Asung a midiktat sawmnga omte ziak in akhua hawi lou in na hihmang ding maw? 25Nang hial in zaw migiloute bang a midiktatte a-om samna ding ua migiloute lak a midiktatte hihlup zaw na hih tel kei ding hi. Leitung pumpi Vaihawmpa in diktattak in ahih kei dia hia?” achi hi.
26 Toupa'n, “Sodom a midiktat sawmnga ka muhleh amau ziak in akho pumpi ka hawi ding,” achi hi.
27Abraham in, “Ngai in, kei leivui leh meivu lel in Toupa ka hon houpih thei hi. 28Midiktat nga in sawmnga chingzou lou ahi kha ding e; nga achin louh ziak in kho pumpi na hihmang ding maw? chi in adawng hi. Ama'n sawmli-le-nga ka muhleh ka hihmang kei ding,” achi hi.
29Ama'n amah ahoupih zel a, “Huai ah sawmli kia na mu ahi kha ding e,” achi hi. Ama'n, “Sawmli ziak in leng ka hihmang dah mai ding,” achi hi.
30Ama'n, “Toupa aw, heh ke'n, ka hon gen nawn lai ding. Huai ah sawmthum lel na mu ahi kha ding,” achi hi. Ama'n, “Huai a sawmthum leng ka muhleh ka hihmang kei ding,” achi hi.
31Ama'n, “Ngai in, Toupa ka hon houpih theita a, huai ah sawmnih kia na mu ahi kha ding,” achi hi. Ama'n, “Sawmnih ziak in leng ka hihmang kei ding,” achi hi.
32Ama'n, “Toupa aw, heh ke'n, khatvei kia ka hon gen lai ding. Huai ah sawm kia na mu ahi kha ding,” achi hi. Ama'n, “Sawm ziak in leng ka hihmang kei ding,” achi hi. 33Abraham toh akihou khit un Toupa apaita a; Abraham leng amun ah akik nawnta hi.
Valið núna:
GENESIS 18: PAITBSI
Áherslumerki
Deildu
Afrita
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.