مَتَّ 26
26
سَوَرِ نغَمْ نَنغُغٛ عِيسَى
(مَرْکُسْ 14:1-2؛ لُکَ 22:1-2؛ يُحَنَّ 11:45-53)
1ندٜ عِيسَى تِمِّنِ وٛلْوُغٛ بٛلّٜ طٜعٜ ڢُو، عٛوِعِ ݠُکَرَعٜنْ مَاکٛ: 2«عٛنْ عَنْدِ لُتِّ ࢩَلْطٜ طِطِ حَا جُولْدٜ ݠَسْکَ وَطَ؞ ࢡٜندٛکَّنْ ࢡِي-نٜطّٛ نغَمْ ࢡِلُغٛ مٛ دٛوْ لٜغَّلْ غَاڢَانغَلْ#غُرْتَاکِ 12:1-26؞؞»
3سَاعِ مَنْ مَوْࢡٜ لِمَنْعٜنْ عٜ ندٛتِّعٜنْ عُمَّاتٛورٜ کَوْتِ حَا سَارٜ کَيَڢَسْ، حٛورٜىٰجٛ لِمَنْعٜنْ؞ 4ࢡٜشَرْوٛوتِرِ حَا ࢡٜࢨٛيْرَ عِيسَى، ࢡٜنَنغَ مٛ، ࢡٜمبَرَ مٛ؞ 5عَمَّا ࢡٜمبِعِ: «تَا عٜنْ مبَطَ طُمْ وَکَّتِ جُولْدٜ، نغَمْ تَا طُمْ عُمِّنَ ڢِتِنَ شَکَ عُمَّاتٛورٜ؞»
دٜبّٛ رُڢِ نٜبَّمْ دٛوْ حٛورٜ عِيسَى
(مَرْکُسْ 14:3-9؛ يُحَنَّ 12:1-8)
6يَاکٜ عِيسَى طٛنّٛ حَا بَيْتَنِيَ ندٜرْ سَارٜ سِمٛنْ، کُتُرُوجٛ، 7دٜبّٛ ڢٜىٰرٜ ࢡَدِتِمٛ؞ عٛطٛنْ جٛغِ ڢَاندُ سَطْندُ حٜىٰوْندُ عُورْدِ مَرْندِ سَمَنْ مَسِنْ؞ عٛرُڢِ ندِ دٛوْ حٛورٜ عِيسَى سَاعِ عٛطٛنّٛ ࢩَامَ#لُکَ 7:37-38؞؞ 8ندٜ ݠُکَرَعٜنْ نغِعِ طُمْ، ࢡٜࢡٜرْنِ، ࢡٜمبِعِ: «وٛنُّرُ مٜىٰرٜ، کٛ طُمْ نَڢِ! 9تٛ ࢡٜشٛورِّنٛ عُورْدِ مَنْ، ࢡٜکٜࢡَنّٛ شٜىٰدٜ طُوطّٜ، حَا ࢡٜندٛکَّ طٜ تَلَکَعٜنْ؞» 10ندٜ عِيسَى عَنْدِ کٛ ࢡٜمبٛلْوَتَ، عٛوِعِ ࢡٜ: «کٛنِ عٛنْ طٛنْ ݠِتِنَ دٜبّٛ عٛو؟ عٛحُووَنِ يَمْ کُوغَلْ بٛوطْنغَلْ؞ 11نغَمْ تَلَکَعٜنْ نغٛنْدَنْ بٜى مٛوطٛنْ ڢٛرٛيْ، عَمَّا مِنْ، مِوٛنْدَتَا بٜى مٛوطٛنْ ڢٛرٛيْ#تٛوکْتَاکِ تَوْرٜىٰتَ 15:11؞؞ 12عٛرُڢِ عُورْدِ دٛوْ ࢡَنْدُ عَمْ نغَمْ عُوٜىٰکِ عَمْ؞ 13غٛونغَ مبِعَنْمِ عٛنْ: حَا ࢡٜنغَازٛتٛ لِنْجِيلَ کَعَ ندٜرْ دُنِيَارُ ڢُو، ࢡٜمبٛلْوَنْ کٛ دٜبّٛ عٛو وَطِ، نغَمْ سِڢْتٛرْغٛ مٛ؞»
يَحُودَ زَمْبِ عِيسَى
(مَرْکُسْ 14:10-11؛ لُکَ 22:3-6)
14ندٜنْ غٛوتٛ ندٜرْ ݠُکَرَعٜنْ سَݠّٛ عٜ طِطٛ مٛ عِنْدٜ مُوطُمْ يَحُودَ عِسْکَرِيٛتْ، يٜحِ حَا مَوْࢡٜ لِمَنْعٜنْ؞ 15عٛوِعِ ࢡٜ: «طُمٜ عٛنْ ندٛکَّتَمِّ تٛ مِحٛکِّ عٛنْ عِيسَى؟» ࢡٜلِمَنِمٛ شٜىٰدٜ شَرْدِ شَݠَّنْطٜ تَتِ؞ 16دِغَ سَاعِ مَنْ يَحُودَ ڢُطِّ تٜڢُغٛ سَاعِيرٜ ڢٛتَّنْدٜ حَا عٛحٛکَّ ࢡٜ عِيسَى؞
عِيسَى ࢩَامْدِ بٜى ݠُکَرَعٜنْ مُوطُمْ ࢩَامْدُ ݠَسْکَ
(مَرْکُسْ 14:12-21؛ لُکَ 22:7-14،21-23؛ يُحَنَّ 13:21-30)
17ندٜرْ ࢩَلَادٜ غٛعٛورٜ جُولْدٜ تَمْسٜىٰجٜ طٜ عُڢْنَاکَ، ݠُکَرَعٜنْ عِيسَى ࢡَدِتِ، ࢨَمِمٛ: «حَا تٛيْ عَيِطِ مِنْ مبَطَ تَاسْکَرَ کِيرْتَارِ ݠَسْکَ؟» 18ندٜنْ عِيسَى وِعِ ࢡٜ: «نجٜحٜ ندٜرْ بٜرْنِوٛلْ، حَا وَيْنٜ، مبِعٜ مٛ: مٛودِبّٛ وِعِ: وَکَّتِ عَمْ وَرِ، مِيِطِ وَطُغٛ جُولْدٜ ݠَسْکَ بٜى ݠُکَرَعٜنْ عَمْ حَا سَارٜ مَاطَ؞» 19ݠُکَرَعٜنْ مبَطِ کٛ عِيسَى عُمْرِ ࢡٜ، ࢡٜتَاسْکِتِنِ کِيرْتَارِ ݠَسْکَ؞
20ندٜ کِيکِيطٜ وَطِ، عِيسَى جٛوطٛدِ بٜى ݠُکَرَعٜنْ مُوطُمْ سَݠّٛ عٜ طِطٛ نغَمْ حَا ࢡٜࢩَامَ؞ 21ندٜ ࢡٜطٛنْ ࢩَامَ، عِيسَى وِعِ: غٛونغَ مبِعَنْمِ عٛنْ: «غٛوتٛ مٛوطٛنْ زَمْبٛتٛ يَمْ؞» 22طُمْ سُنِ ݠُکَرَعٜنْ مَسِنْ، کٛو مٛيْ مَࢡّٜ ڢُطِّ ࢨَمُغٛ مٛ: «نَا طُمْ مِنْ سِکَ، جَوْمِرَاوٛ؟» 23عِيسَى جَابِ: «مٛ طٛنْ سُووَ جُنغٛ مُمْ بٜى عَمْ ندٜرْ لٜعَلْ جٛنْتَ، کَنغْکٛ زَمْبٛتٛ يَمْ#جَبُورَ 41:10؞؞ 24غٛونغَ ࢡِي-نٜطّٛ مَايَنْ بَنَ کٛ وِنْدَ دٛوْ مَاکٛ؞ عَمَّا بٛنٜ لَاتَنْتٛ مٛ زَمْبٛتٛ ࢡِي-نٜطّٛ، تٛ عٛدَࢩَاکَنٛ، ࢡُرَنَنّٛ مٛ؞» 25يَحُودَ زَمْبٛتٛوطٛ مٛ ࢨَمِ: «نَا طُمْ مِنْ سِکَ، مٛودِبّٛ؟» عِيسَى جَابِمٛ: «بَنَ مبِعْطَ، طُمْ عَنْ!»
کِيرْتَارِ شٜنِيندِ
(مَرْکُسْ 14:22-26؛ لُکَ 22:15-20؛ 1 کٛرِنْتُعٜنْ 11:23-25)
26ندٜ ࢡٜطٛنْ ࢩَامَ، عِيسَى حٛوعِ تَمْسٜىٰرٜ، عٛيٜتِّ اَللَّه، عٛيٜوِ ندٜ، عٛحٛکِّ ݠُکَرَعٜنْ مَاکٛ، عٛوِعِ ࢡٜ: «کٛوعٜ طُمْ، ࢩَامٜ، طُمْ ࢡَنْدُ عَمْ؞» 27ندٜنْ عٛحٛوعِ جَرْدُغٜلْ، عٛيٜتِّ اَللَّه، عٛحٛکِّ ࢡٜ، عٛوِعِ: «نجَرٜ عٛنْ ڢُو، 28نغَمْ طُمْ ࢨِيࢨَمْ عَمْ، ندُڢَاطَمْ نغَمْ يَاڢُيٜ حَکّٜىٰجِ يِمْࢡٜ طُوطْࢡٜ، بٜى مَاجَمْ اَللَّه تَبِتِنِرِ عَلْکَوَلْ مُوطُمْ#غُرْتَاکِ 24:8؛ يٜرٜمِيَ 31:31-34؞؞ 29مِطٛنْ وِعَ عٛنْ: يٜىٰسٛ طٛ، مِمٜىٰتَتَا يَرُغٛ عِنَبٛوجَمْ طَعَمْ سَمْ، حَا ࢩَنْدٜ نجَرْدَنْمِ کٜسَمْ بٜى مٛوطٛنْ ندٜرْ لَامُ بَابِرَاوٛ عَمْ؞» 30ندٜنْ ࢡٜنغِمِ غِمٜ مَنغْتٛوجٜ، ࢡٜندِلِّ حَا حٛوسٜىٰرٜ جَيْتُنْجٜ؞
عِيسَى عٜ ݠِيٜرْ
(مَرْکُسْ 14:27-31؛ لُکَ 22:31-34؛ يُحَنَّ 13:36-38)
31دٛوْ لَاوٛلْ عِيسَى وِعِ ݠُکَرَعٜنْ مُوطُمْ: «جٜمَّارٜ ندٜعٜ عٛنْ عَشَّتَمْ عٛنْ ڢُو؞ نغَمْ دٜڢْتٜرٜ وِعِ: مِمبَرَنْ غَيْنَاکٛ، تٛکّٜرٜ بَالِ بٛو سَنغْکِتِتّٛ#جٜکَرِيَ 13:7؞؞ 32عَمَّا تٛ مِعُمِّتَکٜ، مِعَارْتَنْ عٛنْ يَحُغٛ لٜسْدِ غَلِيلِ#مَتَّ 28:16؞؞» 33ݠِيٜرْ وِعِمٛ: «کٛو تٛ يِمْࢡٜ ڢُو عَشِّ مَ، مِنْ کَمْ مِعَشَّتَا مَ سَمْ!» 34عِيسَى جَابِمٛ: «غٛونغَ مبِعَنْمَامِ: جٜمَّارٜ ندٜعٜ، حِدّٜکٛ عَسْغُمْرِ#26:34 عَسْغُمْرِ مَلَّ عَغُغُمْرِ؞ عُعَ، عَوِعَنْ ندٜ تَتِ عَعَنْدَا يَمْ؞» 35ݠِيٜرْ وِعِمٛ: «مِمٜىٰطَتَا وِعْغٛ مِعَنْدَا مَ کٛو تٛ دٛولٜ مِمَايْدَ بٜى مَاطَ؞» ݠُکَرَعٜنْ لُتُّࢡٜ ڢُو مبِعِ نٛنْ؞
عِيسَى حَا غٜشٜمَنٜ
(مَرْکُسْ 14:32-42؛ لُکَ 22:39-46)
36ندٜنْ عِيسَى وَرْدِ بٜى ݠُکَرَعٜنْ مُوطُمْ حَا نٛکُّورٜ وِعٜتٜىٰندٜ غٜشٜمَنٜ، عٛوِعِ ࢡٜ: «نجٛوطٜ حَا طٛ، حَا مِوَطٛيَ دٛعَ حَا تٛ؞» 37عٛيَحْدِ بٜى ݠِيٜرْ عٜ ࢡِࢡّٜ زٜبٜدٜ طِطٛ، عٛڢُطِّ سُنَاغٛ عٜ مَاتُغٛ تٛرَّ ندٜرْ ࢡٜرْندٜ مَاکٛ؞ 38ندٜنْ عٛوِعِ ࢡٜ: «تٛرَّ ࢡٜرْندٜ عَمْ يِطِ مبَرُغٛ يَمْ؞ تٛکّٜ جٛوطَاغٛ حَا طٛ، عَيْنٜ بٜى عَمْ؞» 39عٛيٜحِ يٜىٰسٛ سٜطَّ، عٛحِݠِّ يٜىٰسٛ مَاکٛ حَا لٜسْدِ، عٛوَطِ دٛعَ بَنَ نِعِ: «بَابِرَاوٛ عَمْ، تٛ طُمْ حٜࢡٛتٛ، دَايْنَنَمْ جَرْدُغٜلْ تٛرَّ نغٜعٜلْ؞ عَمَّا وَطْ کٛ نغِطَّ، نَا کٛ نغِطْمِ؞»
40عٛلٛرِ حَا ݠُکَرَعٜنْ تَتٛ غٛ، عٛتَوِ ࢡٜطَانَکٜ؞ عٛوِعِ ݠِيٜرْ: «عٛنْ مبَاوَايْ عَيْنُغٛ بٜى عَمْ کٛو سَاعَ نغٛوتَ! 41عَيْنٜ، تٛرٜ، نغَمْ تَا عٛنْ نَسْتَ جَرِّبٜىٰکِ؞ کٛ رُوحُ نٜطّٛ يِطِ، ࢡَنْدُ مُوطُمْ وَاوَتَا وَطُغٛ طُمْ، نغَمْ ندُ تَمْݠُندُ؞»
42عٛيٜحِ طِطَوْرٜ، عٛوَطِ دٛعَ بَنَ نِعِ: «بَابِرَاوٛ عَمْ، تٛ حٜࢡَتَاکٛ جَرْدُغٜلْ نغٜلْ دَايٛ، عَشَّمِّ، ندٜنْ کَمْ سٜيْ مِيَرَ نغٜلْ، مُويٛ مَاطَ لَاتٛ؞» 43عٛلٛرْتِ حَا ݠُکَرَعٜنْ مَاکٛ ڢَحِنْ، عٛتَوِ ࢡٜ ࢡٜ طٛنْ طَانِ، نغَمْ غِتٜ مَࢡّٜ تٜدِّ؞ 44عٛعَشِّ ࢡٜ، عٛيٜحِ ڢَحِنْ، عٛوَطِ دٛعَ کَلْ-کَلْ بَنَ نَانٜ؞ 45ندٜنْ عٛلٛرْتِ حَا ݠُکَرَعٜنْ مَاکٛ، عٛوِعِ ࢡٜ: «عٛنْ طٛنْ طَانِ حَا جٛنْتَ نَ؟ عٛنْ طٛنْ شِوْتٛ نَ؟ ندَا سَاعِ وَطِ حَا ࢡٜندٛکَّ ࢡِي-نٜطّٛ حَا جُوطٜ مَرْࢡٜ حَکّٜ؞ 46عُمّٜ، ندِلّٜنْ! ندَا زَمْبٛتٛوطٛ يَمْ ࢡَدِتَکٜ؞»
نَنغٜىٰکِ عِيسَى
(مَرْکُسْ 14:43-50؛ لُکَ 22:47-53؛ يُحَنَّ 18:3-12)
47دِغَ عِيسَى تِمِّنَايْ وٛلْوُغٛ تَوٛنْ، يَحُودَ، غٛوتٛ ندٜرْ ݠُکَرَعٜنْ سَݠّٛ عٜ طِطٛ وَرِ؞ يِمْࢡٜ طُوطْࢡٜ نغَرْدِ بٜى مَاکٛ، ࢡٜطٛنْ نجٛغِ کَاڢَاجٜ عٜ شَبِّ؞ مَوْࢡٜ لِمَنْعٜنْ عٜ ندٛتِّعٜنْ يَحُودُعٜنْ نٜلِ ࢡٜ؞ 48يَحُودَ، زَمْبٛتٛوطٛ عِيسَى، حٛکُّنٛ ࢡٜ عَلَامَ، وِعِ: «مٛ مِحٜبَّتَ، طُمْ کَنغْکٛ، نَنغٜ مٛ؞» 49لَوْ يَحُودَ ࢡَدِتِ عِيسَى، وِعِمٛ: «سَنُّ، مٛودِبّٛ!» ندٜنْ عٛحٜبِّمٛ؞ 50عِيسَى وِعِمٛ: «سٛوبَاجٛ، تِمِّنْ کٛ وَدُّ مَ حَا طٛ؞» ندٜنْ يِمْࢡٜ ࢡَدِتِ، عُکِّ دٛوْ عِيسَى، نَنغِ طُمْ؞ 51غٛوتٛ ندٜرْ وٛنْدُࢡٜ بٜى عِيسَى لٛسِ کَاڢَحِ مُوطُمْ، ڢٜعِّ سُکَ حٛورٜىٰجٛ لِمَنْعٜنْ، تَعِمٛ نٛڢْرُ؞ 52عَمَّا عِيسَى وِعِمٛ: «وَاتُ کَاڢَحِ مَاطَ حَا سُودُ مَاکِ! نغَمْ حٛوسَنْࢡٜ کَاڢَحِ کَلْکِرَنْ بٜى مَاکِ؞ 53مَلَّ عَعَنْدَا مِوَاوَنّٛ تٛرَاغٛ بَابِرَاوٛ عَمْ بَلَّلْ، کَنغْکٛ بٛو عٛنٜلْدَنّٛ يَمْ مٛوࢡٜ مَلَاعِکَعٜنْ مَوْطٜ سَݠّٛ عٜ طِطِ نَ؟ 54عَمَّا تٛ نٛنْ کَمْ، نٛيْ کٛ وِنْدَ ندٜرْ دٜڢْتٜ شٜنِيطٜ غٛونغْطِرْتَ؟ نغَمْ طٜ مبِعِ سٜيْ طُمْ لَاتٛ بَنَ نِي؞»
55سَاعِ مَنْ، عِيسَى وِعِ ࢡٜ: «عٛنْ نغَرِ نَنغُغٛ يَمْ بٜى کَاڢَاجٜ عٜ شَبِّ بَنَ مِ ݠَسٛووٛ! تُمْ مِ طٛنّٛ جٛوطِ ندٜرْ حَيْکَلِيرُ، مِ طٛنّٛ عٜکِّتِنَ يِمْࢡٜ، عٛنْ نَنغَايْ يَمْ#لُکَ 19:47؛ 21:37؞! 56عَمَّا طُمْ ڢُو طُمْ وَطِ نغَمْ حَا کٛ وِنْدَ ندٜرْ دٜڢْتٜ اَلنَّبِعٜنْ نغٛونغْطَ؞» ندٜنْ ݠُکَرَعٜنْ ڢُو عَشِّمٛ، ندٛغِّ؞
ندٛتِّعٜنْ کِيتِ عِيسَى
(مَرْکُسْ 14:53-65؛ لُکَ 22:54-55،63-71؛ يُحَنَّ 18:13-14،19-24)
57نَنغُࢡٜ عِيسَى نجَحْرِمٛ حَا سَارٜ کَيَڢَسْ، حٛورٜىٰجٛ لِمَنْعٜنْ؞ مٛودِࢡّٜ تَوْرٜىٰتَ عٜ ندٛتِّعٜنْ طٛنْ مٛوࢡِ تٛنْ؞ 58ݠِيٜرْ تٛکِّ عِيسَى حَا دَايِيطُمْ، حَا يٛتِّ دَلْدَلْ سَارٜ حٛورٜىٰجٛ لِمَنْعٜنْ؞ عٛنَسْتِ سَارٜ، عٛجٛوطٛدِ بٜى عَيْنٛوࢡٜ تٛنْ، حَا عٛلَارَ نٛ طُمْ تِمِّرْتَ؞
59مَوْࢡٜ لِمَنْعٜنْ عٜ حِيتٛوࢡٜ ندٜرْ دَوْرِيندٜ ڢُو طَࢡِّ وُلَّاندُ دٛوْ عِيسَى حَا ࢡٜندٛعَّ مٛ کِيتَ مَايْدٜ؞ 60عَمَّا ࢡٜکٜࢡَايْ، کٛو ندٜ سٜىٰدٛوࢡٜ ڢٜوٛوࢡٜ طُوطْࢡٜ نغَرِ؞ ࢡَاوٛطٛنْ يِمْࢡٜ طِطٛ نغَرِ، 61مبِعِ: «غٛطّٛ عٛو وِعْنٛ: مِوَاوَنْ يِبِّنْغٛ حَيْکَلِيرُ اَللَّه، مِمَحِتَ ندُ ندٜرْ ࢩَلْطٜ تَتِ#يُحَنَّ 2:19؞؞»
62حٛورٜىٰجٛ لِمَنْعٜنْ عُمِّ، وِعِ عِيسَى: «عَجَابَتَاکٛ کٛو طُمٜ نَ؟ کٛ مبِعْطَ دٛوْ غُلَّالِ وُلِّيࢡٜ مَ ࢡٜعٜ؟» 63عَمَّا عِيسَى جٜىٰطِ؞ ندٜنْ حٛورٜىٰجٛ لِمَنْعٜنْ وِعِمٛ: «مِطٛنْ حُنّٜ بٜى عِنْدٜ اَللَّه غٜىٰتٛ، وِعْ مِنْ: عَنْ وٛنِ اَلْمَسِيحُ، ࢡِطّٛ اَللَّه نَ؟» 64عِيسَى وِعِمٛ: «نٛنّٛنْ، بَنَ مبِعْطَ؞ عَمَّا مِطٛنْ وِعَ عٛنْ: يٜىٰسٛ طٛ، عٛنْ نغِعَنْ ࢡِي-نٜطّٛ طٛنْ جٛوطِ حَا ࢩَامٛ اَللَّه بَاوْطٛ؞ عٛنْ نغِعَنْ مٛ بٛو عٛطٛنْ وَرَ دٛوْ دُولٜ عَسَمَ#دَنِيٜلْ 7:13؞؞» 65ندٜنْ حٛورٜىٰجٛ لِمَنْعٜنْ سٜىٰکِ لِمْشٜ مُوطُمْ، وِعِ: «عٛوٛلْوِ کَلُّکَ دٛوْ اَللَّه! عٜنْ نغَلَا حَاجٜ سٜىٰدٛوࢡٜ ڢٜىٰرٜ، کَلُّکَ کَ عٛنْ نَنِ جٛنْتَ حٜعِ؞ 66کٛ مبِعْطٛنْ؟» ࢡٜنجَابِمٛ: «عٛحٜعِ مبَرٜىٰغٛ#ڢَرِلَّاجِ لٜوِعٜنْ 24:16؞؞»
67ندٜنْ ࢡٜتُوتِمٛ تُوطٜ حَا يٜىٰسٛ، ࢡٜلُکِّمٛ بٜى جُوطٜ، ࢡٜمَارِمٛ، 68ࢡٜمبِعِ: «عَنْ اَلْمَسِيحُ، حٜࢡْتُ مٛ ڢِيِ مَ، تٛ عَ اَلنَّبِيجٛ#عٜسَايَ 50:6؞!»
ݠِيٜرْ وِعِ عَنْدَا عِيسَى
(مَرْکُسْ 14:66-72؛ لُکَ 22:56-62؛ يُحَنَّ 18:15-18،25-27)
69ݠِيٜرْ طٛنّٛ جٛوطِ حَا دَلْدَلْ سَارٜ غٛ، ندٜنْ کٛرْطٛ حٛورٜىٰجٛ لِمَنْعٜنْ وَرِ حَا مَاکٛ، وِعِمٛ: «عَنْ بٛو عَطٛنّٛ وٛنْدِ بٜى عِيسَى مٛ غَلِيلِ؞» 70عَمَّا ݠِيٜرْ يٜدِّ طُمْ يٜىٰسٛ يِمْࢡٜ ڢُو، وِعِ: «مِعَنْدَا کٛ عَيِطِ وِعْغٛ؞»
71ندٜ عٛيٜحِ غَلْ دَمُّغَلْ زَوْلٜىٰرُ، دٜبّٛ ڢٜىٰرٜ يِعِمٛ، وِعِ يِمْࢡٜ وٛنْࢡٜ تٛنْ: «غٛطّٛ عٛو طٛنّٛ وٛنْدِ بٜى عِيسَى مٛ نَسَرَتُ؞» 72ݠِيٜرْ يٜدِّ ڢَحِنْ، وِعِ: «مِحُنَکٜ، غٛونغَ مِعَنْدَا مٛ؞» 73يٜىٰسٛ سٜطَّ، يِمْࢡٜ دَرِيࢡٜ تٛنْ نغَرِ حَا ݠِيٜرْ، ࢡٜمبِعِمٛ: «ڢَکَتْ عَ غٛوتٛ مَࢡّٜ، طٜمْنغَلْ مَاطَ طٛنْ وَنغِنَ طُمْ بٜى لَاࢡْطُمْ؞» 74ندٜنْ ݠِيٜرْ وِعِ: «اَللَّه حِيتٛ يَمْ تٛ مِڢٜوِ؞ مِحُنَکٜ، غٛونغَ مِعَنْدَا غٛرْکٛ عٛو!» سَاعِ مَنْ ندٜنْ، عَسْغُمْرِ#26:74 عَسْغُمْرِ مَلَّ عَغُغُمْرِ؞ عُعِ؞ 75ݠِيٜرْ سِڢْتٛرِ کٛ عِيسَى وِعْنٛ مٛ: «حِدّٜکٛ عَسْغُمْرِ عُعَ، عَوِعَنْ ندٜ تَتِ عَعَنْدَا يَمْ؞» عٛوُرْتِ حَا يَاسِ، عٛوٛيِ مَسِنْ؞
Valið núna:
مَتَّ 26: داَ
Áherslumerki
Deildu
Afrita
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.