مَتَّ 14
14
مَايْدٜ يُحَنَّ بَطٛووٛ بَݠْتِسْمَ
(مَرْکُسْ 6:14-29؛ لُکَ 3:19-20؛ 9:7-9)
1سَاعِ مَنْ حِرُدُسْ عَنْتِݠَسْ نَنِ حَبَرُ عِيسَى؞ 2عٛوِعِ سُکَاࢡٜ مَاکٛ: «کَنغْکٛ وٛنِ يُحَنَّ بَطٛووٛ بَݠْتِسْمَ، عٛعُمِّتَکٜ دِغَ مَايْدٜ، نغَمْ مَاجُمْ عٛوٛودِ بَاوْطٜ وَطُغٛ کَايٜىٰڢِيجِ؞»
3نَانٜ حِرُدُسْ عُمْرِنٛ، ࢡٜنَنغَ يُحَنَّ، ࢡٜکَࢡَّ مٛ، ࢡٜنَسْتِنَ مٛ ڢُرْسِنَ#14:3 ڢُرْسِنَ مَلَّ يَنغَدَ؞ دَلِيلَ حِرُدِيَ، دٜبّٛ ڢِلِݠْ دٜىٰرْطُمْ، 4نغَمْ يُحَنَّ وِعْنٛ مٛ: «حَانَايْ عَتٜعَ حِرُدِيَ#لُکَ 3:19-20؞ #ڢَرِلَّاجِ لٜوِعٜنْ 18:16؛ 20:21؞؞» 5حِرُدُسْ يِطِنٛ مبَرُغٛ يُحَنَّ، عَمَّا عٛحُلِ مٛوࢡْرٜ، نغَمْ ࢡٜطٛنْ ندَارَ يُحَنَّ بَنَ عٛ اَلنَّبِيجٛ؞
6ࢩَنْدٜ سِڢْتِنٛرْدٜ دَࢩٜىٰکِ حِرُدُسْ، ࢡِطّٛ حِرُدِيَ دٜبّٛ وَمِ يٜىٰسٛ عٜوْنَاࢡٜ، طُمْ ڢٛتَّنِ حِرُدُسْ؞ 7عٛحُنَنِمٛ عٛحٛکَّنْ مٛ کٛ عٛࢨَمِ ڢُو؞ 8دَادَ مَاکٛ لٛووِمٛ بٛلّٜ، ندٜنْ عٛوِعِ: «حٛکَّمْ حٛورٜ يُحَنَّ بَطٛووٛ بَݠْتِسْمَ ندٜرْ لٜعَلْ؞» 9طُمْ سُنِ لَامِيطٛ، عَمَّا دَلِيلَ حُنَيٜىٰرٜ ندٜ عٛحُنَنِنٛ مٛ يٜىٰسٛ عٜوْنَاࢡٜ، عٛعُمْرِ ࢡٜندٛکَّ مٛ کٛ عٛࢨَمِ؞ 10حِرُدُسْ نٜلِ غٛطّٛ حَا سُودُ ڢُرْسِنَ، عٛيٜحِ، عٛتَعِ حٛورٜ يُحَنَّ؞ 11عٛوَدِّ ندٜ ندٜرْ لٜعَلْ، عٛحٛکِّ ندٜ ࢡِطّٛ دٜبّٛ غٛ، يَحْرَنِ ندٜ دَادَ مُوطُمْ؞ 12ݠُکَرَعٜنْ يُحَنَّ نغَرِ، ࢡٜکٛوسِ ࢡَنْدُ مَاکٛ، ࢡٜعُوِ ندُ؞ ندٜنْ ࢡٜنجٜحِ، ࢡٜنغٜشِّ عِيسَى کٛ لَاتِ؞
عِيسَى ࢩَامْنِ يِمْࢡٜ عُجِنٜ نجٛوٛ
(مَرْکُسْ 6:30-44؛ لُکَ 9:10-17؛ يُحَنَّ 6:1-14)
13ندٜ عِيسَى نَنِ حَبَرُ مَنْ، عٛعُمِّ نٛکُّورٜ مَنْ، عٛنَسْتِ کٛومْبٛوَلْ، عٛيٜحِ لَدّٜ ڢٜىٰرٜ مَاکٛ؞ مٛوࢡٜ نَنِ طُمْ، طٜ نغُرْتِ بٜرْنِيجِ مَاجٜ، طٜ تٛکِّمٛ بٜى کٛسْطٜ؞ 14ندٜ عِيسَى وُرْتِ کٛومْبٛوَلْ، عٛيِعِ مٛوࢡْرٜ طُوطْندٜ، عٛيُرْمِنِ ندٜ، عٛيَمْطِتِنِ ࢩَوْࢡٜ مَارٜ؞
15ندٜ کِيکِيطٜ وَطِ، ݠُکَرَعٜنْ عِيسَى نغَرِ حَا مَاکٛ، مبِعِمٛ: «نَانغٜ حِيرِ، نٛکُّورٜ ندٜعٜ بٛو ندٜ ڢٜرٜوْندٜ؞ ندِکَّ عَجَࢡِّتٛ يِمْࢡٜ، ࢡٜندِلَّ حَا کَوْيٜىٰجِ، ࢡٜشٛودَنَ کٛعٜ مَࢡّٜ ࢩَامْدُ؞» 16عِيسَى جَابِ: «حَانَايْ ࢡٜندِلَّ، ندٛکّٜ ࢡٜ ࢩَامْدُ، عٛنٛنْ؞» 17عَمَّا ࢡٜمبِعِمٛ: «مِنْ نغَلَا کٛو طُمٜ، سٜيْ تَمْسٜىٰجٜ جٛوِ عٜ لِطِّ طِطِ تَنْ؞» 18عِيسَى وِعِ ࢡٜ: «نغَدَّنٜىٰطَمْ طُمْ حَا طٛ؞» 19ندٜنْ عٛعُمْرِ مٛوࢡٜ نجٛوطٛ دٛوْ حُطٛ؞ عٛحٛوسِ تَمْسٜىٰجٜ جٛوِ عٜ لِطِّ طِطِ غٛ، عٛتِجِّ عَسَمَ، عٛيٜتِّ اَللَّه؞ عٛيٜوِ تَمْسٜىٰجٜ مَنْ، عٛحٛکِّ ݠُکَرَعٜنْ، ࢡٜندٛکَّ مٛوࢡٜ؞ 20ࢡٜ ڢُو ࢡٜࢩَامِ، ࢡٜکَارِ؞ ݠُکَرَعٜنْ مٛوࢡْتِ لُتُّطُمْ مَنْ، طُمْ حٜبِّنِ شِلَاجٜ سَݠّٛ عٜ طِطِ؞ 21لِمْغَلْ ࢩَامْࢡٜ تَمْسٜىٰجٜ دِلَّنِ بَاکِنْ وٛرْࢡٜ عُجِنٜ نجٛوٛ، رٜوْࢡٜ عٜ ࢡِکّٛيْ لِمَاکَ؞
عِيسَى يٜحِ دٛوْ ندِيَمْ بٜى کٛسْطٜ
(مَرْکُسْ 6:45-52؛ يُحَنَّ 6:15-21)
22ندٜنْ لَوْ عِيسَى دٛولِ ݠُکَرَعٜنْ مُوطُمْ ࢡٜنَسْتَ کٛومْبٛوَلْ، ࢡٜعَارْتَ مٛ يَحُغٛ ڢٛمٛوندٜ غَطَارٜ، سَاعِ عٛطٛنْ جَࢡِّتٛ يِمْࢡٜ؞ 23عٛجَࢡِّتِ ࢡٜ، عٛوَعِّ دٛوْ حٛوسٜىٰرٜ نغَمْ وَطُغٛ دٛعَ؞ حَا جٜمَّ وَطِ، عٛطٛنْ تٛنْ ڢٜىٰرٜ مَاکٛ؞ 24ندٜ کٛومْبٛوَلْ دَايِ مَسِنْ بٜى ڢٛمٛوندٜ، حٜنْدُ ڢُطِّ ࢡِلُّغٛ نغَلْ، نغَمْ نغَلْ طٛنْ ڢٛتَّ بٜى مَارُ؞ 25غَلْ سُبَحَ، عِيسَى وَرِ حَا ݠُکَرَعٜنْ مُوطُمْ، عٛطٛنْ يَحَ دٛوْ ندِيَمْ بٜى کٛسْطٜ؞ 26ندٜ ݠُکَرَعٜنْ نغِعِمٛ عٛطٛنْ يَحَ دٛوْ ندِيَمْ، ࢡٜشَکْلِ، ࢡٜمبِعِ: «طُمْ غِنَّوٛلْ!» ࢡٜنغٛوکِ نغَمْ کُلٛلْ؞ 27لَوْ عِيسَى وٛلْوَنِ ࢡٜ، وِعِ: «تِطِّنٜ ࢡٜرْطٜ مٛوطٛنْ، تَا کُلْتٛرٜ، طُمْ مِنْ؞» 28ݠِيٜرْ وِعِمٛ: «يَا جَوْمِرَاوٛ، تٛ طُمْ عَنْ کَمْ، عُمْرُ مِيَحَ حَا مَاطَ دٛوْ ندِيَمْ؞» 29عِيسَى وِعِمٛ: «وَرْ؞»
ݠِيٜرْ وُرْتِ کٛومْبٛوَلْ، ڢُطِّ يَحُغٛ دٛوْ ندِيَمْ، نغَمْ حَا عٛيٛتّٛ حَا عِيسَى؞ 30عَمَّا ندٜ عٛيِعِ حٜنْدُ، عٛحُلْتٛرِ، عٛڢُطِّ مُتُغٛ، عٛوٛوکِ: «يَا جَوْمِرَاوٛ، حِسْنَمْ!» 31لَوْ عِيسَى ڢٛرْتِ جُنغٛ مُوطُمْ، نَنغِمٛ، وِعِمٛ: «حٜيْ عَنْ، ڢَمْطَ-نُطِّنْکِيجٛ، نغَمْ طُمٜ عَسٜکِ؟»
32ندٜ ࢡٜنَسْتِ کٛومْبٛوَلْ ࢡٜ طِطٛ ڢُو، حٜنْدُ دٜعِّتِ؞ 33ندٜنْ ݠُکَرَعٜنْ وٛنْࢡٜ ندٜرْ کٛومْبٛوَلْ شُجِدَنِ عِيسَى، مبِعِ: «ڢَکَتْ عَ ࢡِطّٛ اَللَّه؞»
عِيسَى يَمْطِتِنِ ࢩَوْࢡٜ حَا غٜنٜسَرٜتْ
(مَرْکُسْ 6:53-56)
34ࢡٜعٜىٰرِ وٜىٰندُ، ࢡٜنجٛتِّ لٜسْدِ غٜنٜسَرٜتْ؞ 35ندٜ يِمْࢡٜ لٜسْدِ مَنْ عَنْدِتِ عِيسَى، ࢡٜنغٜىٰيْنِ حَبَرُ مَاکٛ کٛو تٛيْ ندٜرْ لٜسْدِ مَࢡّٜ، ࢡٜنغَدَّنِمٛ ࢩَوْࢡٜ ڢُو؞ 36ࢡٜتٛرِمٛ عٛعَشَّ ࢩَوْࢡٜ مَنْ مٜىٰمَ غَوَرْغَلْ لِمْشٜ مَاکٛ تَنْ، مٜىٰمْࢡٜ نغَلْ ڢُو نجَمْطِتِ؞
Valið núna:
مَتَّ 14: داَ
Áherslumerki
Deildu
Afrita
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.