Exodus 10
10
Pigliġayuich Atautchikuaqpaktuat
1Tavra Atanġum uqallautigaa Moses, “Aullaġutin tautugiaġuŋ Pharaoh. Uqayunaiḷipkaŋagiga atanauraŋiḷḷu, apqusaaquvlugich aliuġnaqtuat savaatka 2iḷisamapkaquvlugiḷḷu miqłiqtusi tutaaluusiḷu qanutun kipagiŋatilaaŋich Egypt-miuguruat savakkama aliuġnaqtuanik. Iluqavsi iḷisimaniaqtusi uvaŋa Atanġutilaamnik.”
3Tavra Moses-lu Aaron-lu Pharaoh-muŋaruk aasii uqallautivlugu, “Ataniq, God-iŋat Hebrew-guruat, innaqtuq, ‘Qanutuaglaan imña kamaksrisiqaġniaŋitpich uvamnun? Aullaqtitkich iñugiratka, nanġautiqaġumaut uvamnun. 4Kamaksrisuŋitkuvich-suli, qaipkaiñiaqtuŋa pigliġayugnik nunagnun uvlaaku. 5Iñugiakpaiḷḷutiŋ matuniaġaat iluqaan nuna. Niġiñiaġaat sunapayaaq maqunŋaisaŋat natatquġnat, napaaqtut-unnii kisiŋŋuqtauŋaruat. 6Immiġñiaġaich igluqpasiḷu igluŋiḷḷu atanaurapayaaqpich iñupayauratillu. Piaġiił̣haaġniaqtut supayaaniñ kiŋuniivsi tautuŋaraŋiññiñ.’” Tavra Moses tunułłuni aullaŋaruq.
7Pharaoh-m atanauraŋisa uqallautigaat, “Qanutun imña sivisutigiruami uuma iñuum isumaaluutiqaqtinniaqpatigut? Aullaqtillich apkua Israel-gum kiŋuvaaŋich, nanġautiqaġumaut Ataniġmun God-igiramignun. Sivuniqsiŋaitpich imña Egypt suksraunġiqsautilaaŋanik?”
8Tavraasii Moses-lu Aaron-lu qaipkatqiŋagaik Pharaoh-mun, aasii uqallautivlugik, “Ki, aullaġumiñaqtusi nanġaġiaġlugu Ataniq God-iksi. Aglaan uvva kitkupiaq aullaġniaqpat?”
9Moses-gum kiugaa, “Iluqata aullaġniaqtugut, piqatigilugich miqłiqtuvut utuqqanaavullu. Aullautiniaġivut iġñiġiravut, paniutivullu, imnaivut, nagrulivullu, pamiqsaavullu, qanukkii niqinaqiruksraurugut qutchiksiḷiġlugu Ataniq.”
10Pharaoh uqallałłaktuq, “Naumi! Aullautipkaġumiñaitkitka aġnasiḷu miqłiqtusiḷu! Nalunaitchuq uvva sivunniŋarusi utiġumaŋił̣ł̣usi. 11Naumi! Kisimiŋ aŋutit aullaġumiñaqtut nanġaġiaġlugu Ataniq tainna pisukkuvsi.” Uqallaanipqaqami, Moses-lu Aaron-lu anitinŋaruk.
12Tavraasii Atanġum uqallautigaa Moses, “Isaaġuttuuŋ argaiñ qulaagun nunaŋata Egypt qaipkaqsaġlugich pigliġayuich. Qaiḷutiŋ niġiñiaġaat sunapayauraq nauruaq, sunapayaaġlu maquliŋaisaŋa natatquġnat.” 13Tavra Moses-gum isaaġutiŋagaa ayauppiani, aasii Atanġum anuqłiġuqtinŋagaa nigiġmiñ aasii anuqłiŋaruq uvluqtutilaatun unnuaqtutilaatullu. Uvlaaġmagu anuġim qaipkaŋamagaich piqliġayuich. 14#Rev 9.2, 3.Qaiñiqsut iñugiaguttaqhutiŋ aasii inillakhutiŋ iluqaanun nunamun. Iñugiakpaił̣ł̣utiŋ pigliġayuich qaŋaunnii tainnatun qiñiġataŋaitchut sivuani naaggaunnii qiñitqikkumiñaitchut tainnatun iñugiaktigiruanik. 15Matuŋagaat nuna maŋaqsiḷġataqługu; niġiŋagaat sunapayaaq natatquġnat kisiŋŋuqtaŋat, iḷagivlugich iluqaisa siiġñat napaaqtuniittuat. Iḷakuŋaitchut sumik nauruamik napaaqtuni naakka nauruat nunapayaaŋani Egypt-gum.
16Tavraasii Pharaoh qilamiqsruqhuni ququaġniġaik Moses-lu Aaron-lu aasii uqallakłuni, “Piḷuusiqiŋaruŋa paaqłakługu Ataniq God-iksi paaqłakłusiḷu ilivsi. 17Suliqutigiŋaiqsiuŋ piḷuutiga atausivsaami aasii aŋaiyyulusik Ataniġmun God-ivsiññun piiqulugu uvamniñ una tatavsaun tuqqutauniaqtuaq.” 18Moses-gum unił̣ł̣ugu Pharaoh aŋaiyyuŋaruq Ataniġmun. 19Aasii Atanġum mumiŋagaa nigiqpagmiñ anuġi suaŋaruamun uŋalaġmun, aasii tiŋitiłługich pigliġayuich Iḷuliaŋanun Suez-gum. Atausiuraq unnii pigliġayuk kisiŋŋuqtauŋaitchuq Egypt-mi. 20Aglaan Atanġum uqayuġnaisinŋalgitkaa Pharaoh, aasii aullaqtinŋaitkaich Israel-gum kiŋuvaaŋich.
Taaqtuaq
21Tavraasii Atanġum uqallautigaa Moses, “Isaaġuttuuŋ argaiñ qiḷaum tuŋaanun, aasii taaqpaktuam matuniaġaa nunaŋa Egypt, taaqsivaił̣ł̣uni tammaanaqtuq-unnii.” 22#Ps 105.28; Rev 16.10.Moses-gum isaaġutigaa argani tuŋaanun qiḷaum, aasii taaqsiqpagniqsuq piŋasuni uvluni sumipayaaq Egypt-mi. 23Egypt-miut tautuutillaiŋarut avanmun, suli atausiuraq unnii iñuk aniŋaiñŋaruq iglumiñiñ tavrani. Aglaan Israel-gum kiŋuvaaŋich qaummaaġigñiqsuq iñuuniaġviat.
24Pharaoh-m ququaġaa Moses aasii uqallakhuni, “Ki, aullaġumiñaqtusi aasii nanġaġlugu Ataniq, aġnasiḷu miqłiqtusiḷu kaluġumiñaġisi. Aglaan imnaisi, nagrulisi, pamiqsaasiḷu maaniittuksraurut.”
25Moses-gum kiugaa, “Tavra niġrutiqaqtittuksrauniaġivsigut ikipkaiḷuta aitchuutiksraptignik Ataniġmun God-iptinnun. 26Naumi, niġrutivut kaluġniaġivut; atausiq unnii uniktauniaŋitchuq. Uvaptignik naliġaktuksraurugut niġrutinik nanġautiksraptignik Ataniġmun God-iptinnun. Suli tikiñŋaunnata taamuŋa, naluniaqtugut kisunik niġrutinik aitchuutiqaġniaqtilaaptinnik ikipkaigupta ilaanun.”
27Atanġum uqayuġnaiqsiłługu Pharaoh, aullaqtitchuŋiḷgitkaich. 28Ilaan uqallautigaa Moses, “Uumaa, maaŋŋa piiġiñ! Taututqiguŋitkikpiñ qakuguunnii! Taututqituaġupkiñ, tuquniaqtutin!”
29Moses-gum kiugaa, “Iluakkuaqtutin, taututqigñiaŋitkigma.”
Valið núna:
Exodus 10: INUPIAQ
Áherslumerki
Deildu
Afrita
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)