Vinsæl biblíuvers úr SANTIAGO 1

Deildu

ꞌWan taꞌa msñian chaꞌ ꞌin Krixtu, si lye ꞌa ndaꞌan chaꞌ tiye wan chunꞌ nchga nu tiꞌí nu ndijin wan, ja nꞌni chaꞌ ka xiꞌin ꞌa tiꞌ wan bra kanꞌ; ka suꞌwe ꞌa ka tiye wan bra kanꞌ, chaꞌ xa nu wa ndalo wan nu tiꞌí kanꞌ chunꞌ nu wa msñi suꞌwe wan chaꞌ ꞌin Jesús, bra kanꞌ ka jlyo tiꞌ wan chaꞌ wa nchka la ꞌwan talo wan lo chalyuu.

Si ndiya yaꞌ nu ja jlyo tiꞌ wan siyaꞌ ti sa ñaꞌan kuꞌni wan, bra kanꞌ jñan wan xuꞌwe ꞌin Ndiose, chaꞌ ta Ni ska chaꞌ tiya nu kiꞌya ke wan sa ñaꞌan kuꞌni wan bra kanꞌ. Suꞌwe ꞌa chaꞌ xuꞌwe ti nda Ni nchga chaꞌ ꞌin nten, loꞌo ja ngiꞌni tlá Ni ꞌñaan xa nu nda Ni ska chaꞌ suꞌwe ꞌñaan.

ꞌWan taꞌa msñian chaꞌ ꞌin Ndiose, chaꞌ suꞌwe ꞌa nka tiyeěn ñaꞌaǎn ꞌwan, nꞌni chaꞌ kiꞌya wan kwenta ꞌin chaꞌ nu chkwiǐnꞌ re. Taꞌaan ndiꞌin chaꞌ ndla ti kunaan chaꞌ nu chkwiꞌ nten loꞌoan, ni siya tiyaꞌ ti xkwean ꞌin neꞌ, tiyaꞌ ꞌa kasinꞌ tianꞌ ꞌin neꞌ.

Kuꞌni wan chaꞌ talo wan tyukwi tyempu nu ndiꞌin wan lo chalyuu, sa ñaꞌan bra nu tyii nu tiꞌi ꞌwan, chaꞌ ka wan nten nu tyukwi ti tiye, nten nu ja ska nan lyiji ꞌin chunꞌ msñi wan chaꞌ ꞌin Jesús.

Sa kanꞌ ti chaꞌ, ndiꞌin chaꞌ tukwaan nchga chaꞌ nu nduꞌu Ni ꞌñaan, siꞌi nan kunan tian chaꞌ kanꞌ; ti ykwiinꞌ tian nñi lyoꞌoan ꞌñaan, si xkwiꞌ nan nnan tian chaꞌ kanꞌ, loꞌo ja ngiꞌnian kasu ꞌin chaꞌ kanꞌ.

Ka suꞌwe ka tiye nten nu ti nsñi chaꞌ ꞌin Jesús, ni siya tyijin neꞌ kaꞌan ꞌa nu tiꞌí. Suꞌwe si chan talo neꞌ, xa wa mdyii chaꞌ tiꞌí kanꞌ ꞌin neꞌ, chaꞌ kaja chalyuu ꞌin neꞌ nu ja tsaa tii ꞌa bra kanꞌ; kanꞌ lka chaꞌ suꞌwe nu wa ndukwin Ndiose chaꞌ ta Ni ꞌin nten nu suꞌwe ꞌa nka tiye ñaꞌan ꞌin Ni.

Nchga chaꞌ suꞌwe nu ndyiji ꞌñaan ni, nchga chaꞌ nu chañi chaꞌ xkwiꞌ suꞌwe ran, nde seꞌen ndiꞌin Ndiose siyaꞌ ti ndyoꞌo chaꞌ kanꞌ, ti kwiꞌ Ndiose nu mñan nchga xaa tnun nu nsuꞌwi niꞌ kwan. Ska ti chaꞌ nka tiye Ni ñaꞌan Ni ꞌñaan; ja ndla ꞌa ti ka xaꞌan chaꞌ nu nka tiye Ni, chunꞌ ja nꞌni chaꞌ xiꞌin chunꞌ Ni ꞌin ska chaꞌ nu wa ykwiꞌ Ni loꞌo nten.

Nchga nten nu nchka tiꞌ kunan chaꞌ nu nchkwiꞌ Ni loꞌoan, loꞌo bra kanꞌ ja xlyaa neꞌ kuꞌni neꞌ kasu ꞌin chaꞌ kanꞌ, lka nten kanꞌ ñaꞌan tiꞌ nten nu nduun ñaꞌan kwiꞌya ꞌin neꞌ, ti ykwiꞌ ti neꞌ lo ska kunan; ndla ndsaa ti ñaꞌan kwiꞌya neꞌ ꞌin neꞌ, loꞌo bra wa ndyaa neꞌ, bra ti kjlyaa tiꞌ neꞌ sa ñaꞌan ñaꞌan neꞌ bra kanꞌ.

Bra nu tyukwi ti tiyean siyaꞌ ti kuꞌnian chaꞌ kti ꞌin Ndiose Stian, loꞌo siꞌi tukwa chaꞌ nsuꞌwi tiyean, nde ndiya chaꞌ kti nu nchka la tiꞌ Ndiose Stian chaꞌ kuꞌnian bra kanꞌ. Ndiꞌin chaꞌ tayaanꞌ ꞌin nu xuwe tiꞌi, kwiꞌ ngwañaꞌan ndiꞌin chaꞌ tayaanꞌ ꞌin nu kunaꞌan nu nganun ska ti, bra nu ndijin ꞌa neꞌ nu tiꞌí lo chalyuu; ti kwiꞌ ti chaꞌ, ja suꞌwe sten yuꞌwian loꞌo ya ñaꞌan ti chaꞌ kuxi nu nsuꞌwi lo chalyuu.

Bra nu jwakii ska chaꞌ kuxi ꞌñaan, ja suꞌwe chaꞌ chkwianꞌ: “Ndiose yꞌni chaꞌ nñi lyoꞌo chaꞌ kuxi re ꞌñaǎn.” Ja nñi lyoꞌo Ni ꞌin nten chaꞌ kuꞌni ska chaꞌ kuxi; kwiꞌ ngwañaꞌan, ja ndiya ꞌa chaꞌ kuxi nu ka kwiñi lyoꞌo ꞌin Ni. Bra nu jwakii chaꞌ kuxi ꞌñaan, kanꞌ lka tyempu nu ja ndukwaan ska chaꞌ ꞌin Ndiose; bra kanꞌ ti kwiꞌ chaꞌ kuxi nu nsuꞌwi niꞌ kasiya ꞌñaan, ti ykwiinꞌ tian, kanꞌ lka nu ndatsaa ꞌñaan chaꞌ ti kuꞌniin laan chaꞌ kuxi.

Ka suꞌwe ka tiye neꞌ tiꞌí taꞌa msñian chaꞌ ꞌin Ndiose; tayaꞌ Ni ꞌin neꞌ kanꞌ, chaꞌ suꞌwe la tyiꞌin neꞌ nde loo la, ni siya ndijin ꞌa neꞌ nu tiꞌí seꞌen ndiꞌin neꞌ ni.