Samuweli gɩkpa-nyɔɔfɛ 23
23
Dafidi wanyun-gyebi kurumakyɛɛ
1Dafidi anyun-gyebi-kurumakyɛɛ n tɛ ba lɛ.
<<Yese wobi Dafidi waade-dɔ̀lɛ,
ɛwɔ gɛtɛ Ɛkpatakpɩrɩ ɛ bʋma gatala fɔ wanyun-gyebi,
ɛwɔ gɛtɛ Yakobu wo Wurubwarɛ ɛ sʋrʋ bʋnɔ,
Isareli wɔ-ɩnʋn yɩɩnʋmalɛ.
2Yahwe Gifiye gɩ dama miin koro gɩ tabʋrʋ,
wanyun-gyebi ɩ̀ sa miinyun waanɩ.
3Isareli wo Wurubwarɛ ɛ tabʋrʋ,
Isareli Dɩtaa-dɩrɛ dɩ dɔ̀ mɩ alan,
<Gengyi ɛkɩ ɛ̀ ka osele kpara e di bugyu ɛ tɛ bɛnɩ,
gengyi ɛ̀ ka Wurubwarɛ geserenti e di bugyu ɛ tɛ bɛnɩ fɔ,
4è we anlɛ gagyɩgyan giifila
ntɛ ŋalagɩ gɛtɛ akpaba ɩn ma,
anlɛ gɛtɛ ɛsʋn ɛɛ nʋ̀n ɛ kpa gɛ wʋʋ ŋmaŋɩ,
gɛ wʋʋ yɛ dɩfa dɩɩ tara gɛtʋnkwaa gii koro fɔ.
5Gɛlɛ gɛ Wurubwarɛ ee hira mɩɩn dɩkpaara dɩɩ bɛnɩ,
yema ɛ tà dikola gakpaakpa ma nmɩ.
Dikola gɛtɛ dɩn nan furu dɩ nya,
gɛ ɛ dɔ̀ ɛ sɩ gɛtɛ dɩn nan foma dɩ nya.
Ɛwʋ gɛtɛ nte len powu wʋ lɛ.
Ɛ yɛ na di ade yii koro
gɛ Wurubwarɛ ɛɛ̀ nyɩ ɛ yɛ ɛwʋ powu wàà ba waanɩ.
6Mɔ ade-kpen yɩɩ bɛnɩ bè we anlɛ iwiya gɛtɛ be fun be lulu,
ɛkɩ ɛɛn talɩ ɛ ka alɔ-kwaa ɛ kʋla yɩ.
7Ɛkamasɛ gɛtɛ ee len ɛ̀ɛ̀ kʋla iwiya fɔ
wù di gɛtɛ ɛ̀ɛ̀ ka gɩwɔrɔnyan abɛɛ oyon ɛ kʋla yɩ,
pɛ gɛ ɛɛ̀ talɩ e kuma yɩ yɩɩ gɛdʋrɔkʋn dʋkɔ.
Dafidi bɩtà bʋʋ bɛtàlɛ bɛkɛmalɛ
1 Ɩya-Ɩya 11:10-341
8Dafidi bɩtà bʋʋ bɛtàlɛ ma ɔkɛma fɔ baayere n tɛ ba lɛ.
Takemon-te Yosebi-Basebeti è di bɛnɩ besiyee fɔ boo gyegeyelɛ. E wolo bɛnɩ nkpɩn bɩnaa (800) akpa-kɩlɩn yaanɩ.
9Bɛkɛmalɛ besiyee fɔ baanɩ ɛnyɔɔfɛ n di Dodo wobi Eleyasa gɛtɛ è di Ahohi-te fɔ. Ɛ̀ fɩya ma Dafidi gɛ bɛ sʋpa Filisiti bete ɔkʋna gɛtɛ be tuma Pasi-Damim bàà kpà, gɛ Isareli bɛ kɔkɔ iti fɔ. 10Mɔ ɛ tɔ e yela, gɛ e wolo Filisiti bete ma ye ɔkʋna gɛtɛ wɔ gʋlɔ gi ku wɔ, gɛ edon fɔ ɛ wɔ wɔ gʋlɔ gaanɩ, gɛ Yahwe ɛ yɛ be di boo koro duwi dɩtɔkɔ. Gɛ bɛnɩ fɔ powu be biri bɛ ba Eleyasa wakʋn, gɛ bɛ bɛ ka bekulɛ fɔ baanyan.
11Bɩtà bʋʋ bɛtàlɛ ma ɔkɛma besiyee fɔ baanɩ esiyeefɛ fɔ n di Harari-te Agee wobi Sama. Ɔkʋna gɛtɛ Filisiti bete be tuma Lehi gɛtʋnkwaa gɛtɛ akyɛɛ ɩ yɔn gaanɩ fɔ, Isareli bɩtà bʋʋ bɛtàlɛ fɔ be serenti be ye Filisiti bete baakʋn. 12Mɔ Sama ɛ ma yela gɛtʋnkwaa fɔ gii getite, gɛ ɛ kpà e to gɛtʋnkwaa ma gaakyɛɛ fɔ, gɛ e wolo Filisiti bete, gɛ Yahwe ɛ yɛ be di boo koro gepepe.
13Gɛtɛ wʋ nɩma anyan yɩɩ gɛya yɩɩya fɔ, bɛndɩrɛ-bi dikpilin ma fwo (30) fɔ baanɩ besiyee bɛ ba Adulam dɩtaa-fwe, ɔkʋn gɛtɛ Dafidi è bu fɔ. Fɔ Filisiti bete bɔɔ bɩtà bʋʋ bɛtàlɛ fɔ mɔ be tuma Refayim dɩtagba daanɩ. 14Ɔkʋna wʋtɔkɔ fɔ, Dafidi ɛ̀ sa gebukʋn dʋkɔ, gɛ Filisiti bɩtà bʋʋ bɛtàlɛ fɔ bɛkɩ bɛ̀ sa Betelehem ditele daanɩ. 15Duwi dɩkɩ otinbili wu ton Dafidi, gɛ ɛ dɔ̀ alan, <<Ɛnyan n ma kpà butu e ye ɔlɔkɔ gɛtɛ wʋ̀ sa Betelehem wotunu fɔ ɛ mɔma mɩ nan nyʋn!>> 16Gɛlɛ wuu koro bɩtà bʋʋ bɛtàlɛ ma ɔkɛma besiyee fɔ be gyu Filisiti bete fɔ baanɩ be ye, gɛ bɛ ma kpà butu be ye Betelehem ɔlɔkɔ fɔ yaanɩ bɛ mɔma Dafidi. Mɔ ɛn nyʋn bʋ fɔ, ɛ da bʋ e lù anlɛ gedi gɩɩ gɛtɛ̀ ɛ tɛ Yahwe. 17Gɛ ɛ dɔ̀ alan, <<Oo Yahwe, wʋ san ɔfɔ gɛtɛ nan nyʋn butu nyabʋ. Nka gɛlɛ fɔ waà mɛ anlɛ ntɛ nyʋn bɛnɩ gɛtɛ bɛ ka bɔɔ nkpa bɛ sɩ̀ lɛ bɔɔ nkalan>> Okoro Dafidi ɛn nyʋn bʋ.
Bɩtà bʋʋ bɛtàlɛ ma ɔkɛma besiyee fɔ baakɛmade fɔ ɩkɩ ɩ lɛ.
18Seruya wobi Yowabi wonobi Abisayi n di bɛndɩrɛ-bi dikpilin ma fwo (30) fɔ boogyegeyelɛ. Ɛ ka wɔ gɩtʋrʋnyan e wolo bɛnɩ gɛkpɩn ma akpilin ton (300), gɛ ɛwɔ mɔ e di diyere-dɩrɛ anlɛ bɩtà bʋʋ bɛtàlɛ ma ɔkɛma besiyee fɔ ke. 19Wo diyere di ye bɛndɩrɛ-bi dikpilin ma fwo fɔ powu baanɩ, gɛ e bè biligi boogyegeyelɛ mɔ bɛn kalan wɔ fɩya ma bɩtà bʋʋ bɛtàlɛ ma ɔkɛma besiyee.
20Yehoyada wobi Benaya gɛtɛ e ye Kabisele fɔ mɔ è di bɩtà bʋʋtàlɛ-dɩrɛ. Ɛ mɛ ade-dɩrɛ-dɩrɛ, gɛ e wolo Mowabi bɩtà bʋʋ bɛtàlɛ-dɩrɛ-dɩrɛ bɛnyɔɔ. Nkele mɔ, e gyu difwe daanɩ ɛ ma wolo ɛdɩ̀rɛ̀ duwi dɩkɩ gɛtɛ wù di olili-dɩrɛ wuu duwi daanɩ. 21Gɛ e wolo Egyipiti bɩtà bɩtàlɛ gagaraga ɛkɩ. Ma gɛtɛ Egyipiti-te fɔ è de gɩtʋrʋnyan gba fɔ, Benaya ɛ ma tama wɔ ma woyon-tonlɛ, gɛ ɛ labɩrɩ gɩtʋrʋnyan fɔ e ye Egyipiti-te fɔ gʋlɔ gaanɩ, gɛ ɛ ka gɩ e sere wɔ e wolo. 22Ade-dɩrɛ-dɩrɛ gɛtɛ Yehoyada wobi Benaya ɛ mɛ fɔ ɩkɩ ɩ lɛ. Ɛwɔ mɔ e di diyere anlɛ bɛndɩrɛ-bi dikpilin ma fwo fɔ. 23Wo diyere di dɩ da bɛndɩrɛ-bi dikpilin ma fwo fɔ. Mɔ ɛn nɩma bɩtà bʋʋ bɛtàlɛ ma ɔkɛma besiyee fɔ. Gɛ Dafidi ɛ mɛ wɔ bɛdɩyɛlɛ fɔ bɔɔndɩrɛ.
24Bɛnɩ dikpilin ma fwo fɔ n di:
Yowabi wonobi Asaheli,
ma Betelehem-te Dodo wobi Elanan,
25ma Harodi-te Sama,
ma Harodi-te Elika,
26ma Paliti-te Helesi,
Tekowa-te Ikesi wobi Ira,
27ma Anatoti-te Abiyese,
ma Husafa-te Mebunayi,
28ma Ahohi-te Salimon,
Netofati-te Maharayi
29ma Netofati-te Baana wobi Heledi, Ribayi gɛtɛ e ye Gibeya gɛtɛ wʋ̀ sa Benyamin gɛtʋnkwaa gaanɩ fɔ wobi Itayi,
30Piraton-te Benaya,
ma Gasa-getu-te Hidayi,
31Aribati-te Abi-Alibon,
ma Bahumi-te Asimaweti,
32Salibon-te Elihaba,
ma Yasihen bebi-teni,
ma Yonatan 33Harari-te Sama wobi-teni,
ma Harari-te Sarari wobi Ahiyam,
34Maaka-te Asabayi wobi Elifeleti,
ma Giloni-te Ahitofeli wobi Eliyam,
35Kameli-te Hesiro,
ma Abi-te Paarayi,
36Natan wobi Igali gɛtɛ e ye Soba fɔ,
ma Hagri wobi
37Amon-te Seleki,
ma Bereto-te Naharayi, gɛtɛ è di Seruya wobi Yowabi wakpa-nyan yiitolalɛ fɔ,
38Itri-te Ira
ma Itri-te Garebi,
39ma Hiti-te Uriya.
Ɛbɛ powu bɛ̀ bà bɛnɩ dikpilin ma fwo-kwarankɩ.
Nke Ahọpụtara Ugbu A:
Samuweli gɩkpa-nyɔɔfɛ 23: ADE
Mee ka ọ bụrụ isi
Kesaa
Lee anya n'etiti ihe abụọ
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
2025 Ghana Institute of Linguistics Literacy and Bible Translation