Samuweli gɩkpa-nyɔɔfɛ 22
22
Dafidi ɛ nʋma ɔnʋn e sila Yahwe
1Gɛtɛ Yahwe e to Dafidi e ye Sawulo ma wɔ bɛkyʋnlɛ do baalɔ yaanɩ fɔ, Dafidi ɛ nʋma ɔnʋn nyawʋ ɛ tɛ Yahwe alan,
2Yahwe n di mɩɩn dɩtaa-dɩrɛ, ma miin gebukʋn, ma miintolɛ-yalɛ.
3Miin Wurubwarɛ n di mɩɩn dɩtaa-dɩrɛ,
wanɩ gɛ nte bu.
Ɛwɔ n di mɩɩn gɩwɔrɔnyan-dɩyɛlɛ koro, ma miin getoya gɩɩkɛma.
Yahwe n di mɩɩnkɛmakʋn, ma miin gebukʋn, ma miintolɛ-yalɛ.
Gɛ a tiri mɩ a ye dɩgangan dɩɩ bɛnɩ baalɔ yaanɩ.
4Na kpèlè Yahwe, ɛwɔ na kʋtʋma ma gesila.
E to mɩ e ye mɩɩn bɛkyʋnlɛ baalɔ yaanɩ.
5Diku di silin mɩ anlɛ butu bʋʋ gɛgbɛrɛ.
Butu walɩlɛ-mɩnalɛ-anyan milin mɩ.
6Gɩsàn gɩɩ-ɩŋʋʋ i milin mɩ.
Diku di ten ɔdʋ.
7Mɩɩn dɩfana daanɩ fɔ, na kpèlè Yahwe.
Na kpèlè Wurubwarɛ.
Ɛ nʋn mɩɩn gɩta ye wo dikwo-dɩrɛ daanɩ.
Gɛ miin gewula gi gyu waten yaanɩ.
8Gɛ gɛtʋnkwaa gi gyu gɩsaa, gɛ gi kpenti.
Gatala gii gesere-gyagakʋn gi kpenti.
Gɩsaa gi ton gatala gaanyan, yema ɛ ka owurufa.
9Iwe i ye waninfere yaanɩ.
Ɔtan meli-meli wu ye wonyun waanɩ.
Atanga-ŋɛŋɛ ii ye wonyun waanɩ.
10Ɛ wanla gatala, gɛ ɛ waran ɛ ba gatɩn,
ma dɩkpaba-diya wɔ bɩsɩrɩ bʋʋ gatɩn.
11Ɛ sara kerubi wo koro tɔ afiye yaanɩ.
Gɛ ɛ sara afiye yaabanban yii koro ɛ san-san.
12Ɛ yɛ dibilin di tin wɔ anlɛ dɩyan dii dikwo,
akpaba ma otin, ma butu bu silin wɔ.
13Wɔ bʋnʋn baanɩ buu gesiye fɔ gaanɩ gɛ ɔtan-meli-meli fɔ wuu ye.
14Yahwe fa e ye gatala,
gɛ bɛ nʋn Ɛkpatakpɩrɩ fɔ gɩta.
15Gɛ ɛ tà bɩsɩnta, gɛ ɛ yasɩ wɔ bɛkyʋnlɛ.
Ɛ sa gesiye gɛtɛ gi berema bɛ be serenti.
16Ɛpʋ gamɩ gba gɩ yɛ gii we,
Gɛtʋnkwaa gii gesere-gyagakʋn gɩ yɛ gɩ̀ dɔ.
Gɛtɛ Yahwe ɛ fa wɔ bɛkyʋnlɛ
gɛ e mugusi owurufa waanɩ fɔ.
17Ɛ tʋna gʋlɔ e ye gatala, gɛ e ton mɩ,
e tiira mɩ e ye butu ma alun baanɩ.
18E to mɩ e ye mɩɩn bɛkyʋnlɛ ma ɩkɛma baakʋn,
ma ɛbɛ gɛtɛ bɛn taa len maade, gɛ bɛ̀ ba ɔkɛma da mɩ fɔ.
19Bɛɛ tà mɩ bɩtà ɔkʋna gɛtɛ n sa dɩyɩyɛ daawi yaanɩ,
mɔ Yahwe n di mɩɩnkpàlɛ.
20Ɛ ka mɩ ɛ ba ɔkʋn gɛtɛ ade-kpen ɩn ma,
e to mɩ yema ee len maade.
21Yahwe ɛ tɩyɛla mɩ yema maade-kpara yii koro,
gɛtɛ maalɔ ɩn ma dɩdɩɩ wuu koro ɛ nʋn maakʋn.
22Yema na sa Yahwe wo-isele yii koro.
mɩɩn mɛ ade-kpen ɩkɩ mɩɩn Wurubwarɛ bʋnʋn.
23Ǹ te di wo-ise powu yii koro.
Min terema wade-wùlàlɛ fɔ.
24Ɛ̀ nyɩ gɛtɛ n ma dɩdɩɩ dɩkɩ wɔ bʋnʋn baanɩ,
gɛ na tiri miin koro na ye ade-kpen yaanɩ.
25Yahwe ɛ tɩyɛla mɩ anlɛ gɛtɛ maade-tʋnalɛ ɩ̀ dɔ̀,
anlɛ gɛtɛ n we fɩrɩnfɩrɩn wɔ bʋnʋn baanɩ fɔ,
26Oo! Yahwe, aa di nʋnkwarɩ a tɛ ɛbɛ gɛtɛ bɛ ba nʋnkwarɩ fɔ.
Ɛbɛ gɛtɛ boo koro gɩn ma ade-kpen ɩkɩ fɔ, aa yɛ bee we gɛtɛ a ma ade-kpen ɩkɩ.
27À we fɩrɩnfɩrɩn tɛ ɛbɛ gɛtɛ bè we fɩrɩnfɩrɩn fɔ,
gɛ ade-kpen yɩɩ bɛmɛlɛ fɔ, bee we wɔ̀ anlɛ diyu-kɛma diite.
28Aa to ɛbɛ gɛtɛ bɛɛ warama koro gatɩn fɔ nkpa,
mɔ aa warama ɛbɛ gɛtɛ bɛɛ bʋma koro gatala fɔ gatɩn.
29Oo! Yahwe, awɔ n di mɩɩn kandɩya.
a berema dibilin gɛtɛ dɩ̀ sa maanɩ fɔ.
30Aakɛma waanɩ fɔ ǹ talɩ ǹ di mɩɩn bɛkyʋnlɛ boo koro
aakɛma wuu koro n talɩ n firigi n kààrà bɔɔ-ɩpɔrɩ.
31Wurubwarɛ bɩrɛ wosele wʋ̀ tʋna,
Yahwe wanyun-gyebi ɩ̀ sa waanɩ,
È di gebukʋn
tɛ ɛbɛ powu gɛtɛ bɛɛ ma bu wakʋn fɔ.
32Ɛnyan n di Wurubwarɛ, Yahwe gama?
Gɛ ɛnyan n di dɩtaa-dɩrɛ fɩya ma tii Wurubwarɛ?
33Wurubwarɛ nyawɔ n di miin gebukʋn-dɩrɛ,
gɛ ɛ yɛ miinsele wʋ̀ tʋna.
34Ɛɛ sa mɩɩn bɩsɩrɩ ɔkɛma anlɛ ɛpɩtɩrɩkyɛ woyo,
ɛ yɛ mɩ n yela idon yii koro.
35E wùlà mɩ bɩtà buu gɛtà,
fɔ nan talɩ n tiira gɩwɔrɔnyan-sɩya gɩɩ gyangarɩ. 36Oo! Yahwe, a nya miin koro gɛ a to mɩ nkpa,
aa gɛkpa gɩ yɛ mɩ na mɛ ɛnɩ-dɩrɛ.
37An yɛ mɩɩn bɛkyʋnlɛ bàà gye mɩ bɩtà,
an yɛ mɩ nan nʋ̀n bɩtà baanɩ.
38Na kpà na gyaga mɩɩn bɛkyʋnlɛ boo koro, gɛ na di boo koro,
Min kere gɛkpà ma ɛbɛ ya ma sere gɛtɛ na muru bɛ.
39Na wolo bɛ na fɩna,
bɛ nʋ̀n mɩɩn bɩsɩrɩ baanɩ gɛ bɛn mɩnɩ talɩ tɔ.
40A sa mɩ ɔkɛma tɛ akpa.
A yɛ na di mɩɩn bɛkyʋnlɛ boo koro.
41A yɛ mɩɩn bɛkyʋnlɛ be serenti be biri bɔɔ gama,
na muru ɛbɛ gɛtɛ bɛɛ kyʋn mɩ fɔ.
42Bɛ gbɛrɛ afala be kpèlè etolɛ-yalɛ, mɔ ɛkɩ ɛn ma gɛtɛ èè to bɛ,
bɛ gbɛrɛ afala be kpèlè Yahwe, mɔ en yera bɛ. 43Na kpààrà bɛ na mɛ anlɛ itunbu,
na kyikya-kyikya boo koro anlɛ dɩdan daanɩ daatɩn.
44A tiri mɩ a ye mɩɩn bɛnɩ gɛtɛ bɛɛ tɔ be yela miin koro fɔ baalɔ yaanɩ,
a mɛ mɩ bɩfɩɩ buugyegeyelɛ.
Gɛ bɛnɩ gɛtɛ mɩn nyɩ̀ bɛ fɔ, bɛ sara mɩɩn gatɩn bɛ sʋma mɩ. 45Besela be be kura mɩ,
gengyi bɛ bɔ bɛ nʋn mɩɩn gɩta fɔ, bee bù mɩ.
46Gɩsaa gi gyu bɛ,
be ye baabukʋn bɛ ba ma koro gɩɩ gɛgbɛrɛ. 47Yahwe ɛ̀ sa. Baà sila miintolɛ-yalɛ.
Ɛwɔ n di dɩtaa-dɩrɛ gɛtɛ e to mɩ.
48Ɛwɔ na yɛ gɛ na di mɩɩn bɛkyʋnlɛ boo koro,
ɛ ka bɩfɩɩ ɛ sa mɩɩn gatɩn.
49ɛwɔ na tiri mɩ a ye mɩɩn bɛkyʋnlɛ baalɔ yaanɩ,
a bʋma mɩ gatala a da mɩɩn bɛkyʋnlɛ,
gɛ a tiri mɩ a ye dɩgangan dɩɩ bɛnɩ baalɔ yaanɩ. 50Oo! Yahwe, nyawʋ wuu koro gɛ n tɛ tɔ̀là wɔ̀ bɩfɩɩ powu baanɩ,
n nʋma gesila gɩɩnʋn n sila aa diyere.
51A yɛ aagyu e di bɩfɩɩ kpekpesi buu koro,
e tiri wo gelen gakpaakpa fɔ e wùlà wɔnɩ gɛtɛ ɛ sʋrʋ bʋnɔ,
Dafidi ma wɔ bɛnana gakpaakpa.>>
Nke Ahọpụtara Ugbu A:
Samuweli gɩkpa-nyɔɔfɛ 22: ADE
Mee ka ọ bụrụ isi
Kesaa
Lee anya n'etiti ihe abụọ
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
2025 Ghana Institute of Linguistics Literacy and Bible Translation