Samuweli gɩkpa-nyɔɔfɛ 2
2
Bɛ sʋrʋ Dafidi bʋnɔ èè di bugyu tɛ Yuda
1Nyawʋ wʋʋ gama fɔ, Dafidi e lila Yahwe alan, <<N biri n bʋn n ma sara Yuda atele fɔ dɩkɩ daanɩ abɛɛ?>> Gɛ Yahwe e tiri wuunyun alan, <<Ɩɩn, san!>> Gɛ Dafidi e lila alan, <<Ganɩ gɛ n san?>> Gɛ Yahwe e tiri wuunyun alan, <<San Hebron ditele!>>
2Okoro Dafidi ma wɔsɔ ɛbɛ bɛnyɔɔ, gɛtɛ ɛbɛ n di Ahinoham gɛtɛ e ye Yesirele fɔ, ma Abigeli gɛtɛ nafɔ è di ekule Kameli-te Nabali wɔsɔ fɔ na bʋn na san. 3Dafidi ɛ nɩ ka wɔ bɛnɩ gɛtɛ bè si wakʋn fɔ, ɛkamasɛ ma wɔ dɩkpaara, gɛ bɛ ma sara Hebron ma watelebi yaanɩ. 4Ɛwʋ gɛ Yuda bete bɛ ba Hebron, gɛ bɛ sʋrʋ Dafidi bʋnɔ dʋkɔ bɛ sɩ̀ wɔ bugyu bɛ tɛ Yuda gɩfɩɩ.
Gɛtɛ Dafidi ɛ nʋn alɛ Yabesi-Gileyadi bɛnɩ na lò Sawulo fɔ, 5ɛ sa bɛnɩ Yabesi-Gileyadi bɛnɩ baakʋn, bɛ ma dɔ̀ bɛ alan, <<Yahwe e hira yɩ gɛtɛ i tiri gelen nyagɩ i wùlà yiifonte Sawulo, gɛ i lò wɔ lɛ. 6Yahwe e wula yii gutunkoro fɔ èè di nʋnkwarɩ tɛ yɩ, gɛ nmɩ mɔ, nan mɛ ade-kpara n tɛ yɩ, yema ade gɛtɛ ɩ mɛ lɛ yii koro. 7Gɛlɛ wuu koro ɩ sa koro ɔkɛma fɔ yàà wura oturu, yema yiifonte Sawulo e ku, gɛ Yuda gɩfɩɩ gɩ sʋrʋ mɩ bʋnɔ alɛ n di bugyu n tɛ bɛ.>> 8Fɔ, Neri wobi Abineri, gɛtɛ è di Sawulo bɩtà bʋʋ bɛtàlɛ bɔɔndɩrɛ fɔ ɛ ka Sawulo wobi Isi-Boseti ɛ kààrà Yodan getu ɛ mɔma Mahanayim. 9Gɛ Abineri ɛ sɩ̀ Isi-Boseti bugyu ɛ tɛ Gileyadi, ma Asuri ma Yesirele, ma Efrayim, ma Benyamin, ma Isareli bete powu. 10Ɔkʋna gɛtɛ Sawulo wobi Isi-Boseti e di bugyu fɔ ɛ̀ ba bɩkyan akpilin anyɔɔ (40), gɛ e di bugyu bɩkyan bʋnyɔɔ. Mɔ Yuda gɩfɩɩ gɩɩ bɛnɩ bɩrɛ, be yela gɛ Dafidi gama. 11Gɛtɛ Dafidi ɛ̀ sa Hebron fɔ, e di bugyu bɩkyan kwarankɩ ma bebon kooron ɛ tɛ Yuda gɩfɩɩ.
12Duwi dɩkɩ Neri wobi Abineri, fɩya ma Sawulo wobi Isi-Boseti bɛnɩ bɛ tɔ be ye Mahanayim bɛ sa Gibeyon. 13Gɛ Seruwa wobi Yowabi, ma Dafidi bɛnɩ bɛ ma tuma bɛ Gibeyon dɩbʋna dɩɩpɩ. Dikpen fɔ dɩkɩ dɩ sara dɩbʋna fɔ diifen wʋkɩ, gɛ dikpen do mɔ dɩ sara ofen-do.
14Ɛwʋ gɛ Abineri ɛ dɔ̀ Yowabi alan, <<Yɛ taà tiri tɩɩ bɛsaranyan fɔ baanɩ bɛkɩ ti ye ifen ɩnyɔɔ fɔ powu yaanɩ, bàà kpà ma bɛwɔlɔn fɔ tàà nya.>>
Gɛ Yowabi ɛ dɔ̀ alan, <<Na nʋn, yɛ bàà kpà.>>
15Okoro bɛnɩ fwo-bɛnyɔɔ gɛtɛ be yela bɛ tɛ Benyamin wofoli ma Sawulo wobi Isi-Boseti fɔ bɛ kpà ma bɛnɩ fwo-bɛnyɔɔ gɛtɛ be ye Dafidi bɛnɩ baanɩ fɔ. 16Gɛ baanɩ-kamasɛ e gye wɔwɔlɔn wayungu gɛ bɛ ka bɔɔ bɛtata be sere bɛwɔlɔn bɔɔ bɩlan baanɩ, gɛ ɛbɛ powu be ye bɛ nʋ̀n be ku. Gɛlɛ wuu koro bɛ sa Gibeyon ditele dɩɩkʋn wʋtɔkɔ diyere alɛ Helikati-Hasurim#2:16 Helikati-Hasurim wuu wùlà alɛ bɛtata ma ɔyɛ bɔɔ gɛtʋnkwaa.
17Duwi dɩtɔkɔ, akpa fɔ ɩ mɛ ɔkɛma gepepe, gɛ Dafidi bɩtà bʋʋ bɛtàlɛ fɔ be di Abineri ma Isareli bete fɔ boo koro. 18Fɔ, Seruya bebi besiyee gɛtɛ bee kpèlè alɛ Yowabi, ma Abisayi, ma Asaheli fɔ bɛ̀ sa dʋkɔbɛ. Gɛ Asaheli gɛtɛ ɛ̀ nyɩ̀ iti anlɛ ɛkwalan fɔ, 19ɛ kpà ɛ gyaga Abineri wo koro tɩɩn. 20Ɛwʋ gɛ Abineri e fi ɛ nya wɔ gama, gɛ e lila alan, <<Awɔ Asaheli n serenti à tɛrɛma mɩ lɛ?>> Gɛ e yera alan, <<Ɩɩn, nmɩ.>>
21Ɛwʋ gɛ Abineri ɛ dɔ̀ wɔ alan, <<Kere mɩ ya fɔ à fi san gɩlan ma gye bɛsaranyan fɔ baanɩ ɛkɩ, fɔ àà to wakpanyan.>> Mɔ Asaheli en kere geberema wɔ fɔ ɛ ya.
22Gɛ Abineri e biri ɛ dɔ̀ Asaheli alan, <<Kere mɩ geserenti berema ya! Anʋn yii koro gɛ aa mɛ mɩ ade gɛtɛ yaà yɛ nan wolo wɔ̀? Gengyi ǹ wolo wɔ̀ fɔ, lan gɛ nan talɩ n bʋma bʋnʋn n nya aanobi Yowabi?>>
23Mɔ Asaheli ɛn nʋn wakʋn. Gɛlɛ wuu koro Abineri e fi wɔ gama, gɛ ɛ ka wɔ giturunyan e sere Asaheli diboro, gɛ giturunyan fɔ gi duru gi ye ma wɔ gama. E ye ɛ nʋ̀n, gɛ e ku dʋkɔbɛ. Ɛnɩ-kamasɛ ɛ̀ nɩma ɔkʋn gɛtɛ Asaheli ɛ nʋ̀n, gɛ e ku fɔ ee ten e yela.
24Mɔ Yowabi ma Abisayi be berema Abineri, gɛ gɛtɛ ofila wʋ̀ bɛ nʋ̀n butu fɔ, bɛ ba Ama wodon gɛtɛ wʋ̀ gbɛma Giya gɛtɛ wʋ̀ sa osele gɛtɛ wʋ̀ dɔ san Gibeyon wotonkuma waanɩ wʋʋ gɩlan fɔ wʋʋpɩ.
25Gɛ Benyamin bɛnɩ bɛ bɛ fɩya ma Abineri. Gɛ bɛ kʋla akpen akpen gɛ bɛ pɩna be yela odon fɔ wuu duyu dii koro. 26Gɛ Abineri ɛ gbɛrɛ afala e kpèlè Yowabi, gɛ ɛ dɔ̀ wɔ alan, <<Okoro taà bɔ ti wolo bɛwɔlɔn gakpaakpa? An nyɩ̀ alɛ olòlò waanɩ gɛ ade nyayɩ yaà ma were? Ma sere ɔya-mɔmɔ waanɩ gɛ aà yɛ aa bɛnɩ bàà kere tiiko-tiiko geserenti-berema ya?>> 27Gɛ Yowabi e tiri wuunyun alan, <<Na nya Wurubwarɛ gɛtɛ ɛ̀ sa lɛ alɛ gengyi nafɔ an daà tabʋrʋ fɔ, nafɔ mɩɩn bɛnɩ bɛ̀ daa berema bɛ ma ye gagyɩgyan.> 28Ɛwʋ gɛ Yowabi ɛ fʋ̀n dɩkantan, gɛ bɛnɩ fɔ powu be ten be yela. Bɛn mɩnɩ berema Isareli bete fɔ, gɛ bɛn mɩnɩ kpà ma ɛnɩ ɛkɩ. 29Gɛ Abineri ma wɔ bɛnɩ bɛ san odente wʋtɔkɔ powu bɛ da ma Yodan dɩtagba daanɩ. Bɛ kààrà Yodan getu fɔ, gɛ bɛ kyaga ɩsan fɔ yaanɩ bɛ ma ye Bitron gɛ bɛ ka be be gyu Mahanayim ditele daanɩ. 30Ɛwʋ gɛ Yowabi e kere Abineri gɛtɛrɛma ya, gɛ ɛ kʋla wɔ bɛnɩ fɔ powu. Gɛtɛ bɛ kalan bɛnɩ fɔ, bɛnɩ fwo-yɛkɩ na ye baanɩ fɩya ma Asaheli. 31Mɔ Dafidi bɩtà bʋʋ bɛtàlɛ fɔ be wolo Benyamin bɛnɩ gɛkpɩn ma akpilin nɩyɛ (360) gɛtɛ bɛ̀ fɩya ma Abineri fɔ. 32Gɛ Yowabi bɛnɩ bɛ ka Asaheli bɛ ma lò wote gɩsàn gaanɩ Betelehem ditele daanɩ. Wʋʋ gama fɔ, Yowabi ma wɔ bɛnɩ bɛ san odente fɔ powu, gɛ bɛ ma gyu Hebron ditele kere-kpalɛ.
Nke Ahọpụtara Ugbu A:
Samuweli gɩkpa-nyɔɔfɛ 2: ADE
Mee ka ọ bụrụ isi
Kesaa
Lee anya n'etiti ihe abụọ
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
2025 Ghana Institute of Linguistics Literacy and Bible Translation