Samuweli gɩkpa-nyɔɔfɛ 1
1
Dafidi ɛ nʋn Sawulo diku
1Sawulo diku dɩɩ gama fɔ, Dafidi e biri e ye akpa gɛtɛ ɛ ma kpà ma Amaleki bete gɛ e di boo koro fɔ yaanɩ ɛ ba, gɛ ɛ sara Sikilagi ditele daanɩ awi anyɔɔ. 2Duwi-siyeefɛ daanɩ fɔ, ɛsaranyan ɛkɩ e ye Sawulo gɛsarakʋn ɛ ba Sikilagi, ma wanyan fɛɛranlɛ, gɛ atɩn i gyu wɔ duyu. Gɛtɛ e gyu Dafidi wakʋn fɔ, e kura gɛtʋnkwaa ɛ tɛ wɔ gebù.
3Gɛ Dafidi e lila wɔ alan, <<Ganɩ gɛ a ye?>>
Gɛ ɛsaranyan fɔ e tiri wuunyun alan, <<Na serenti na ye Isareli bete bɔɔ gɛsarakʋn gaanɩ.>> 4Gɛ Dafidi e lila wɔ alan, <<Anʋn na ba? Dɔ̀ mɩ!>> Ɛwʋ gɛ ɛsaranyan fɔ ɛ dɔ̀ alan, <<Tɩɩ bɩtà bʋʋ bɛtàlɛ fɔ be serenti be ye bɩtà baanɩ. Gɛ baanɩ kpekpesi be ku. Gɛ Sawulo ma wobi Yonatan mɔ be ku.>> 5Ɛwʋ gɛ Dafidi e lila ɛsaranyan gɛtɛ ɛ bɛ dɔ̀ wɔ ade fɔ alan,<<Lan gɛ a mɛ gɛ a we alɛ Sawulo ma wobi Yonatan be ku?>> 6Gɛ ɛsaranyan fɔ ɛ dɔ̀ wɔ alan, <<Fɔ ǹ gyaga Gilibowa odon wuu koro. Dʋkɔ gɛ na we Sawulo ɛ kpasa ma wo giturunyan. Fɔ wɔ bɛkyʋnlɛ boo betiiramisan ma yɩɩ bɛsaralɛ bɛ gbɛma wɔ. 7Gɛtɛ e fi ɛ nya gɛ e we mɩ fɔ, e kpèlè mɩ, gɛ na yera wɔ alan, <<Miinfonte.>>
8Gɛ e lila mɩ alan, <<Ɛnyan gɛ à di?>> Gɛ na tiri wuunyun alan, <<Ǹ di gɛ Amaleki-te.>> 9Ɛwʋ gɛ ɛ dɔ̀ mɩ alan, <<Ba, fɔ àà be wolo mɩ! Ǹ tɛ kpà ma diku, mɔ min te ku.>> 10Okoro na san, gɛ na ma wolo wɔ. Yema na we gɛtɛ, wʋ̀ mɛ lann fɔ, ɛn nan wura nkpa. Gɛ na tiri digyu-koto gɛtɛ è tin fɔ, ma gʋlɔ gaagbarɩgbarɩ gɛtɛ ɛ̀ sa fɔ, gɛ na ka yɩ ntɛ mɔma awɔ miinfonte.>>
11Ɛwʋ gɛ Dafidi ma bɛnɩ gɛtɛ bɛ̀ sa wakʋn fɔ powu be gye bɔɔ ngba bɛ fɛɛran. 12Okoro bɛ yɩyɛ, gɛ be wula, gɛ bɛ ban onyun ma sere ɔgyɔlɔ, yema Sawulo ma wobi Yonatan ma Isareli bɛnɩ gɛtɛ bè di Yahwe woyo ɛbɛ, gɛ be ku akpa fɔ yaanɩ fɔ boo koro.
13Ɛwʋ gɛ Dafidi e lila ɛsaranyan gɛtɛ ɛ bɛ dɔ̀ wɔ ade fɔ alan, <<Ditele-mɔmɔ dɩɩnɩ gɛ à di?>> Gɛ e tiri wuunyun alan, <<Ǹ di gɛ esela Amaleki-te fɔ wobi.>>
14Ɛwʋ gɛ Dafidi e lila wɔ alan, <<Okoro wʋn mɛ wɔ̀ gɩsaa gɛtɛ àà wolo ɛnɩ gɛtɛ Yahwe ɛ sʋrʋ bʋnɔ?>>
15Dʋkɔ gɛ Dafidi e kpèlè wɔ bɛsaranyan baanɩ ɛkɩ, gɛ ɛ dɔ̀ wɔ alan, <<San ma wolo wɔ.>> Okoro ɛsaranyan fɔ ɛ e wolo wɔ ɛ fɩna. 16Pɛ Dafidi ɛ̀ɛ̀ bɛ yɛ bàà wolo wɔ fɔ, ɛ dɔ̀ wɔ alan, <<Awɔ na len aa diku. Aanyun gɛtɛ a ka a dɔ̀ alan, <Nmɩ na wolo Yahwe wɔnɩ gɛtɛ ɛ sʋrʋ wɔ bʋnɔ fɔ na tin wɔ̀ dɩpwɛ lɛ.> >>
Dafidi ɛ nʋma dɩkpʋkpʋ dɩɩnʋn Sawulo ma wobi Yonatan boo diku daanɩ
17Dafidi e tiri dɩkpʋkpʋ dɩɩnʋn Sawulo ma wobi Yonatan boo diku dii koro, 18gɛ ɛ tɛ ose alɛ be wùlà Yuda bete dɩkpʋkpʋ dɩɩnʋn nyawʋ. Bɛ ŋwara wʋ bɛ sa Yasa Gɩkpa gaanɩ alan,
19<<Oo Isareli, aa gingyebi gɩɩnɩ gbaa e ku idon yii koro!
Bɩtà bʋʋtàlɛ-dɩrɛ ɛ nʋ̀n bɩtà baanɩ!
20Ɩ kara san ɩ dɔ̀ ade nyayɩ Gati bete baanɩ,
ɩ kara san ɩ dɔ̀ yɩ Asikelon wo-isele yaanɩ,
nka gɛlɛ fɔ waà mɛ Filisiti bɛnanɩ ɔsɛ,
nka gɛlɛ fɔ bɛnɩ gɛtɛ bɛn nyɩ Wurubwarɛ bɔɔ bɛnanɩ baà di ɔsɛ.
21Oo, Gilibowa idon,
dɩya abɛɛ ɛsʋn ɛ kara nʋ̀n yii koro
gɛ dɩya abɛɛ ɛsʋn ɛ kara nʋ̀n yii-ili gɛtɛ ɩɩ tɛ yɩ oli waanyan fɔ yii koro.
Yema dʋkɔ gɛ ɛkpàlɛ-dɩrɛ wɔ gɩwɔrɔnyan panpasan-dɩyɛlɛ koro gɛtɛ è de ɛɛ dɩyɛ koro fɔ gɩ wɔ.
Bɛn mɩnɩ ka bʋnɔ sʋrʋ Sawulo gɩwɔrɔnyan panpasan-dɩyɛlɛ koto gɛtɛ è de ɛɛ dɩyɛ koro fɔ.
22Sawulo ma Yonatan be wolo-wolo bɔɔ bɛkyʋnlɛ-kɛmalɛ fɔ.
Ben ye akpa yaanɩ ba gɛtɛ nkalan ɛn kya boo bedon.
23<<Gelen ma ɔsɛ-mɔmɔ mɩnɩ sara Sawulo ma Yonatan boo getite?
Boo getite gɩn lanla kpa, bɔɔ dɩsarabi daanɩ, ma boo diku daanɩ powu, boo getite gɩn lanla kpa.
Bɛ̀ ba ɔsa da ɔkɔdɩyɛ ɛbɛ, gɛ bɛ̀ ba ɔkɛma da bɛdɩ̀rɛ̀.
24Oo Isareli bɛnanɩ,
i wula Sawulo,
ɛwɔ na tin yɩ ayan-sɩya ma ɔmɩrɩ,
gɛ ɛ sa yɩ sɩka-sɩya wanyan.
25Anʋn na yɛ gɛ bɩtà bʋʋ bɛtàlɛ dɩrɛ-dɩrɛ bɛ nʋ̀n bɩtà baanɩ.
Yonatan na ku ɛ̀ dɔ yii-idon yii koro lɛ.
26Mɩɩnwɔlɔn Yonatan,
aade ɩ taga mɩ.
A len maade gepepe.
Gɛ gelen gɛtɛ à ba tɛ mɩ fɔ,
gɩn ma dɩkʋsʋ.
Gɩ da gelen tɛ ɛnanɩ.
27Anʋn na yɛ gɛ bɩtà bʋʋ bɛtàlɛ dɩrɛ-dɩrɛ bɛ nʋ̀n bɩtà baanɩ,
baakpanyan i biligi tuntun.
Nke Ahọpụtara Ugbu A:
Samuweli gɩkpa-nyɔɔfɛ 1: ADE
Mee ka ọ bụrụ isi
Kesaa
Lee anya n'etiti ihe abụọ
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
2025 Ghana Institute of Linguistics Literacy and Bible Translation