1 Samweli 30
30
Dafidi e muru Amaleki bete
1Duwi siyeefɛ fɔ, Dafidi ma wɔ bɛnɩ be ma gyu Sikilagi. Gɛ Amaleki bete bɛ ma kpila Negefi ma Sikilagi bete baanyan dɩkpatɩ daanɩ, gɛ bɛ sa Sikilagi ditele fɔ ɔtan. 2Gɛ be gye bɛnanɩ ma bɛnɩ powu gɛtɛ bè si ditele fɔ daanɩ. Be gye bebisorobi ma bɛndɩrɛ powu, mɔ ben wolo ɛnɩ ɛkɩ, be gye bɛ gɛ bɛ ka bɛ bɛ da.
3Gɛtɛ Dafidi ma wɔ bɛnɩ bɛ ma gyu Sikilagi fɔ, be we gɛtɛ bɛ sa dɩ ɔtan gɛ be gye bɔɔsɔ ɛbɛ ma boo bebi-teni ma bebi-nanɩ gɩdɩ bɛ da. 4Okoro Dafidi ma wɔ bɛnɩ be wula gepepe gɛtɛ bɛ mɩnɩ ma ɔkɛma bàà biri wula gba. 5Be gye Dafidi wɔsɔ ɛbɛ bɛnyɔɔ Ahinoham gɛtɛ e ye Yesereli fɔ ma Abigeli Nabali wɔkpɩnsɔ gɛtɛ e ye Kameli fɔ bɛ da. 6Dafidi e gyu gɛtʋrʋn-dɩrɛ gaanɩ yema wɔ bɛnɩ fɔ bee len bàà fʋn wɔ ataa. Wʋ taga baanɩ-kamasɛ yema boo bebi-teni ma boo bebi-nanɩ boo koro. Mɔ Dafidi ɛ sa koro ɔkɛma Wurubwarɛ Yahwe waanɩ. 7Gɛ Dafidi ɛ dɔ̀ Abiyatari, gedi gɩɩtɛlɛ gɛtɛ è di Ahimeleki wobi fɔ alan, <<Ka gɛgba tinlɛ diboro fɔ mɔma mɩ.>> Abiyatari ɛ ka gɩ ɛ mɔma wɔ, 8gɛ Dafidi e lila Yahwe alan, <<N kpa n gyaga bɛnɩ nyabɛ boo koro? Nan ta ma bɛ?>> Gɛ Yahwe e tiri wuunyun alan, <<Ɩɩn! Kpa gyaga boo koro, aà gye bɛ gɛ aà to gɩnyan-kamasɛ gɛtɛ bɛ ka bɛ da fɔ.>>
9Okoro Dafidi ma wɔ bɛnɩ nkpɩn bisiyee bɛ kya osele gɛ bɛ ma gyu Besori Gifobi, gɛ bɛkɩ bɛ wɔ dʋkɔ, 10bɛ ba bɛnɩ gɛkpɩn gɛtɛ bɛ wɔ yema bɛ fana gɛtɛ bàà kààrà getu fɔ. Mɔ Dafidi ma bɛnɩ nkpɩn bʋnyɔɔ gɛtɛ be kuruma fɔ, bɛ kààrà bɛ̀ tɛrɛma bɛnɩ fɔ.
11Dafidi bɛnɩ fɔ be we Egyipiti-te ɛkɩ oli waanɩ gɛ bɛ ka wɔ bɛ mɔma Dafidi. Bɛ tɛ wɔ butu ma anyan-dɩlɛ. 12Bɛ tɛ wɔ figi wo keki ma resin wo keki. E di gɛ e wura ɔkɛma yema awi asiyee powu fɔ, en di anyandilɛ ɩkɩ abɛɛ ɛ̀ɛ̀ nyʋn butu bʋkɩ.
13Dafidi e lila wɔ alan, <<Ɛ nyan n di aafonte gɛ gaanɩ gɛ a ye?>> Gɛ e tiri wuunyun alan, <<Ǹ di gɛ Egyipiti-te Amalaki-te ɛkɩ wɔdɩ. Awi asiyee ɩ lɛ gɛtɛ n te yeba wuu koro miinfonte e kere mɩ ɛ ya. 14Tɩ ka dɩkpatɩ ti ma kpila Kereti bete Negefi ma Yuda, ma Kalebi baanyan. Gɛ ti kuma Sikilagi ditele.>> 15Dafidi e lila wɔ alan, <<A talɩ a ka mɩ a waran a san gɛlɛ gɩɩ bɛnɩ bɛtɔkɔ baakʋn?>>
E tiri wuunyun alan, <<Gengyi aà nya Yahwe a tɛ mɩ alan an nan wolo mɩ abɛɛ an nan ka mɩ a sa miinfonte ɛbɛ bʋʋ gʋlɔ bɩrɛ fɔ nan ka wɔ n san baakʋn.>>
16Ɛ ka Dafidi ɛ waran ɛ san, gɛtɛ be gyu dʋkɔ fɔ be we gɛtɛ bɛ yasɩ bee di bee di gɛ bɛɛ nyʋn ɔkʋn-kamasɛ yema anyan gɛtɛ be gye bɩtà ye Filisiti bete ma Yuda bete baakʋn fɔ yii koro. 17Gɛtɛ Dafidi ma wɔ bɛnɩ bɛ ma tama bɛ fɔ, bɛ kpà ma ɛbɛ be ye ɔgyɔlɔ ka ma sere duwi nyɔɔfɛ dɩɩgyɔlɔ. Bɛ wolo bɛ powu wu kuruma gɛ bɛsaranyan-bi nkpɩn bʋnyɔɔ gɛtɛ be serenti ma akpɔŋɔ-tɩtɩɩ fɔ booko. 18Dafidi e biri e to anyan powu gɛtɛ Amaleki bete be gye bɛ da fɔ, fɩya ma wɔsɔ ɛbɛ bɛnyɔɔ fɔ. 19Gɩnyankɩ gin kuruma, bɛndɩrɛ, ma bebi, ma bɛsʋgʋgyan, ma bɛsaranyan, ma anyan powu gɛtɛ Amaleki bete be gye bɛ da fɔ powu. Dafidi e birima yɩ powu ɛ ba. 20E to bɛyɛran ma bɛkwɔ gɛ wɔ bɛnɩ fɔ bɛ ka bɛ ma gyegeye bɛnan-do fɔ bɔɔ bʋnʋn gɛ bɛɛ dɔ̀ alan, <<Anyan gɛtɛ Dafidi e gye e ye bɩtà baanɩ yɩ lɛ.>> 21Gɛ Dafidi ɛ san bɛnɩ gɛkpɩn gɛtɛ gɛ fɩna gɛ bɛn talɩ tɛrɛma bɛ san gɛ bɛ wɔ Besori getu fɔ gɩɩpɩ fɔ baakʋn. Be ye be be tuma Dafidi ma bɛnɩ fɔ, gɛ Dafidi ɛ ma sa bɛ onyun. 22Mɔ bɛnɩ-kpen ma ilolo yɩɩ bɛnɩ gɛtɛ bɛ̀ sa Dafidi bɛnɩ fɔ baanɩ bɛ dɔ̀ alan, <<Tɩ nan yo anyan gɛtɛ ti gye bɩtà baanɩ fɔ ma ɛbɛ, yema bɛn tɛrɛma tɩ san. Mɔ baanɩ-kamasɛ ɛ̀ɛ̀ talɩ e be to wɔsɔ ma wo bebi fɔ ɛ̀ɛ̀ san.>> 23Gɛ Dafidi e tiri wuunyun alan, <<Mɩɩn bɛnɩ, wʋn kɔlɔ gɛtɛ tàà mɛ anyan gɛtɛ Yahwe ɛ ka ɛ tɛ tɩ fɔ anlɛ. Ɛ dɩyɛ gɛ e to ti e ye ɩkɛma gɛtɛ ɩ tɔ i yela tii koro fɔ yaanɩ. 24Ɛnyan nan nʋn aakʋn? Anyan gɛtɛ ɛbɛ gɛtɛ bɛ sara bɛ nya atola fɔ baà wura fɔ, ɛyɩ ke gɛ ɛbɛ gɛtɛ bɛ san bɩtà fɔ mɔ baà wura. Ɛbɛ powu baà wura anyan kyɛkyɛ.>> 25Dafidi ɛ yɛ ade-mɛlɛ nyayɩ i biligi ose wʋ tɛ Isareli bete ye duwi dɩtɔkɔ be ye ma ǹdò.
26Gɛtɛ Dafidi e be gyu Sikilagi fɔ, ɛ sa bɛ ka anyan-gyelɛ akpa yaanɩ fɔ bɛ sama Yuda bɛndɩrɛ gɛtɛ bè di wɔwɔlɔn ɛbɛ fɔ gɛ ɛ dɔ̀ alan, <<I to anyan-tɛlɛ nyayɩ, ì di anyan gɛtɛ ti gye bɩtà baanɩ, ye Yahwe bɛkyʋnlɛ baakʋn.>> 27Ɛ ka anyan fɔ ɛ tɩyɛma bɛndɩrɛ gɛtɛ bɛ̀ sa Beteli, ma Ramoti, ma Negefi, ma Yatiri, 28ma ɛbɛ gɛtɛ bɛ̀ sa Sifomoti, ma Esitemowa, 29ma Rakali, ma ɛbɛ gɛtɛ bɛ̀ sa Yerameli atele yaanɩ, ma Keni bete, 30ma ɛbɛ gɛtɛ bɛ̀ sa Homa, ma Bori Asam, ma Ataki, 31fɩya ma Hebron, ma ɛbɛ powu gɛtɛ bɛ̀ sa ɩkʋn-kurumakyɛɛ gɛtɛ Dafidi ma wɔ bɛnɩ be gyu-gyu be ye fɔ.
Nke Ahọpụtara Ugbu A:
1 Samweli 30: ADE
Mee ka ọ bụrụ isi
Kesaa
Lee anya n'etiti ihe abụọ
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
2025 Ghana Institute of Linguistics Literacy and Bible Translation