यूहन्ना 18
18
ईशु चे पकड़वाले जाणे
(मत्ती 26:47–56; मरकुस 14:43–50; लूका 22:47–53)
1ईशु प्राथना चे बाद, आपणे चैला लारे किद्रोन नाले चे पार गेला। ओठे हेक बाग हुता, जाये मां ओ ते ओचे चैले गेले। 2ओनु धोक्के लारे पकड़ावणे आला यहूदा वी हा जग़हा जाणता, कांकि ईशु आपणे चैला लारे ओठे जता रेहता। 3तब यहूदा, रोमी सिपाहीया ची हेक टोली नु ते प्रधान याजका ते फरीसिया चे तरफु भेज़ले आले मन्दरा चे पाहरेदारा नु गेहती कर, ङीवे ते मशाला ते हथियार चले हुले ओठे आला। 4तब ईशु, वां बाता नु जको ओचे उपर आणे आलीया हुतीया जाणती कर, निकड़ला ते वानु केहले, “कानु सोते फिरा?”
5वाणे ओनु उत्तर ङिला, “ईशु नासरी नु।”
ईशु ने केहले, “मैं छै।”
ओचा धोक्के लारे पकड़ावणे आला यहूदा वी वांचे लारे हुता। 6जिंवे ईशु ने ईं केहले हुते, “मैं छै,” वे भांसु हटती कर भोंये उपर ढेती पले।
7तब ओणे बल्ति वाकनु पूछले, “तम्ही कानु सोते फिरा?”
वे ब़ोले, “ईशु नासरी नु।”
8ईशु ने उत्तर ङिला, “मैं तम्हानु केहती चुकला कि मैं छै। अगर मनु सोते फिरा तां जा बन्दा नु जऊं ङिया।” 9ईं ऐवास्ते हुले कि ओ वचन पूरा हो जको ओणे केहले हुते, “जानु तु मनु ङिले वांचे महु मैं हेके नु वी कोनी गूंले।”
10तब शमौन पतरस ने तलवार, जको ओचे कनु हुती, छिकली ते महायाजक चे दासा उपर चलाती कर, ओचा सज़्ज़ा कान उङारती नाखला। ओ दास चे नां मलखुस हुते।
11 #
मत्ती 26:39; मरकु 14:36; लूक 22:42 तब ईशु ने पतरस नु केहले, “आपणी तलवार मियानी मां नाख! जको मुंगर ब़ा ने मनु ङिला, का मैं ओनु ना पीयें?”
हन्ना चे सामणे ईशु
12तब रोमी सिपाही, ते वांचे सूबेदार ते यहूदिया चे पाहरेदार ने ईशु नु पकड़ती कर ब़ांहती गेले। 13पेहले ओनु हन्ना चे गोढु गेहती गेले, जको ओही साल चे महायाजक कैफा चा सुसरा हुता। 14#यूह 11:49,50हा ओही काइफा हुता, जेह्णे यहूदिया नु सलाह ङिली हुती कि अम्चे लौका चे वास्ते हेक मर्दा चे मरणे आच्छे छै।
पतरस चा इन्कार
(मत्ती 26:69,70; मरकुस 14:66–68; लूका 22:55–57)
15शमौन पतरस ते हेक नेरा चैला वी ईशु चे भांसु हुती पले। हा चैला महायाजक ची जाण पिछाण चा हुता, ऐवास्ते ओ ईशु चे लारे महायाजक चे बेहड़े तक आला, 16पर पतरस दरवाजे उपर भिला रेहला। तब ओ ङुजा चैला जको महायाजक ची जाण पिछाण चा हुता, ब़ाहर निकड़ला, ते द्वारपालणी नु केहती कर, पतरस नु भीतर गेहती आला।
17वे दासी ने जको द्वारपालणी हुती, पतरस नु केहले, “किठी तु वी ऐ इन्साना चे चैला महु तां कोनी छी?”
ओणे केहले, “मैं कोनी छै।”
18दास ते पाहरेदार ठड्डी ची वजह कनु कौले भड़काती कर जाखते सेकी भिलते, ते पतरस वी वांचे लारे जाखते सेके भीलता।
महायाजक ची ईशु कनु पूछताछ
(मत्ती 26:59–66; मरकुस 14:55–64; लूका 22:66–71)
19तब महायाजक ने ईशु कनु ओचे चैला चे बारे ते ओचे उपदेशा चे बारे मां पूछताछ करली। 20ईशु ने ओनु उत्तर ङिला, “मैं संसारा लारे खुलती कर बाता करलीया, मैं प्राथनाघरा ते मन्दरा मां जिठे सारे यहूदी भेले हुवी गेहती सदा उपदेश करला। गुप्त मां कहीं कोनी केहले। 21तु माये कनु कां पूछी? सुणने आला कनु पूछ कि मैं वानु का केहले। ङेख, वे जाणी गेहती कि मैं का-का केहले।” 22जिसे बेले ईशु ईं केहले, तां पाहरेदार महु हेके ने जको गोढु भिला हुता ओनु थप्पड़ मारती केहले, “का तु महायाजक नु यूं करती उत्तर ङी?”
23ईशु ने ओनु उत्तर ङिला, “अगर मैं बुरे केहले, तां वे बुराई ची ग़वाही ङे। पर अगर भले केहले, तां मनु कां मारी?” 24बल्ति हन्ना ने ओनु ब़झले आले नु ही काइफा महायाजक चे गोढु भेज़ती ङिले।
पतरस चा बल्ति इन्कार
(मत्ती 26:71–75; मरकुस 14:69–72; लूका 22:58–62)
25शमौन पतरस भिले रेहती जाखते सेके पलता। तब वाणे ओनु केहले, “किठी तु वी ओचे चैला महु तां कोनी?”
ओणे इन्कार करती कर केहले, “मैं कोनी।”
26महायाजक चे दासा महु हेक, जको ओचे कुणम्बे महु हुता जाया कान पतरस ने बाढती नाखला हुता, ब़ोला, “का मैं तनु ओचे लारे बागा मां कोनी ङेखले हुते?” 27पतरस ने बल्ति इन्कार करला, ते तुरन्त कूकड़े ने बांग ङिली।
पिलातुस चे सामणे ईशु
(मत्ती 27:1,2,11–14; मरकुस 15:1–5; लूका 23:1–5)
28बल्ति यहूदी नेता ईशु नु काइफा चे गोढु किले सनु गेहती गेले, ते सवेले चा समय हुता, पर वे आप किले चे भीतर कोनी गेले कि अशुद्ध ना हुं पर फसह चा तेंहवार खा सग़ु। 29तब पिलातुस वांचे गोढु ब़ाहर निकलती आला ते केहले, “तम्ही ऐ बन्दे उपर किसी बाते चा अरोप लावा?”
30वाणे ओनु उत्तर ङिला, “अगर ओ कुकर्मी ना हुवीया, तां अम्ही ओनु दुधे हाथा मां ना सोंपुआ।”
31पिलातुस ने वानु केहले, “तम्ही ही ऐनू गेहली जावा आपणी व्यवस्था चे अनुसार ओचा न्यां करा।”
यहूदिया ने ओनु केहले, “अम्हानु अधिकार कोनी कि काई जान काढ़ु।” 32#यूह 3:14; 12:32ईं ऐवास्ते हुले कि ईशु ची वा बात पुरी हो जको ओणे केहली हुती कि ओची मौत किसड़ी हुवी।
33तब पिलातुस बल्ति किले चे भीतर गेला ते ईशु नु हकारती ओकनु पूछले, “का तु यहूदिया चा राजा छी?”
34ईशु ने उत्तर ङिला, “का तु हा बात आपणे तरफु किही, जा नेरा ने माये बारे मां तनु ईं केहले?”
35पिलातुस ने उत्तर ङिला, “का मैं यहूदी छै? दुधी ही जाति ते प्रधान याजका ने तनु माये हाथा मां सोंपला। तु का करले?”
36ईशु ने उत्तर ङिला, “माया राज़ ऐ संसारा चा कोनी। अगर माया राज़ ऐ संसारा चा हुवीया, तां माये सेवक भिड़ीया कि मैं यहूदिया चे हाथ मां सोंपला ना जईया। पर माया राज़ इठला कोनी।”
37पिलातुस ने ओनु केहले, “तां का तु राजा छी?”
ईशु ने उत्तर ङिला, “तु किही कि मैं राजा छै। मैं ऐवास्ते जनम गेहला ते ऐवास्ते संसारा मां आला छै कि सच्चाई ची ग़वाही ङिये। जको कुई सच्चाई चे छै, ऊं माये शब्द सुणे।”
38पिलातुस ने ओनु केहले, “सच्चाई का छै?”
ते ईं केहती कर ओ बल्ति यहूदिया चे गोढु निकलती गेला ते वानु केहले, “मनु तां ओचे मां कुई दोष कोनी मिड़ला।
मौत चे ङण्ड ची आज्ञा
(मत्ती 27:15–31; मरकुस 15:6–20; लूका 23:13–25)
39“पर तम्ची हा रीत छै कि मैं फसह मां तम्चे वास्ते हेक जणे नु छोड़ती ङिये। तां का तम्ही चाहवा कि मैं तम्चे वास्ते यहूदिया चे राजे नु छोड़ती ङिये?”
40तब वाणे बल्ति रौल मचाती कर केहले, “ऐनू ना! पर अम्चे वास्ते बरअब्बा नु छोड़ती ङे!” ते बरअब्बा ङाकु हुता।
Nke Ahọpụtara Ugbu A:
यूहन्ना 18: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0