यूहन्ना 17
17
खौद्द चे वास्ते ईशु ची प्राथना
1ईशु ने ये बाता केहलीया, ते आपणीया आंखी आसमाना सनु चती कर प्राथना करली “हे पिताजी, वा घड़ी आती पुज़ली। आपणे पूता ची महिमा कर, कि पूत वी दुधी महिमा करो। 2कांकि तु ओनु सारे जींया उपर अधिकार ङिला छै, कि जानु तें ओनु ङिले वां सब नु ओ अनन्त जीवन ङियो। 3ते अनन्त जीवन हा छै, कि वे तनु हेक ही सच्चे नरीकारा नु, ते ईशु मसीह नु, जानु तु भेज़ले, जाणो। 4जको काम तु मनु करने वास्ते ङिले ते ओनु पुरे करती मैं धरती उपर दुधी महिमा करली। 5हमा, हे पिताजी, तु आपणे लारे माई महिमा वे महिमा लारे कर जको संसारा ची सृष्टि कनु पेहले माई दुधे लारे हुती।
आपणे चैला चे वास्ते ईशु ची प्राथना
6“मैं दुधी महिमा भरले नांवा नु यां इन्साना उपर उजागर करले जानु तु संसारा महु मनु ङिले। वे दुधे हुते, ते तु वानु मनु ङिले ते वाणे दुधे वचना नु मनती गेले। 7हमा वे जाणती गेले कि जको कहीं तु मनु ङिले ऊं सब दुधे तरफु छै। 8कांकि जको वचन तु मनु ङिले मैं वे वानु पुचाती ङिले ते वाणे ओनु ग्रहण करले। ते सच्च-सच्च जाणती गेले कि मैं दुधे तरफु आला, ते विश्वास करती गेला कि तु ही मनु भेज़ले।
9“मैं वांचे वास्ते प्राथना करे। संसारा वास्ते प्राथना ना करी, पर वांचे वास्ते जानु तु मनु ङिले, कांकि वे दुधे छी। 10जको जन माये छै ऊं सब जन दुधे छै, ते जको जन दुधे छै ऊं जन माये छै। ते यांचे कनु माई महिमा प्रकट हुली छै। 11मैं उग़ते संसारा मां नी रिही, पर ये संसारा मां रिहे, ते मैं दुधे गोढु आवे पला। हे पवित्र ब़ा, आपणे ओ नांवा ची ताकत लारे जको तु मनु ङिले, वांची रक्षा कर, कि वे अम्चे आलीकर हेक हुती जाओ। 12#यूह 13:18जब मैं वांचे लारे हुता, तां मैं दुधे ओ नांवा ची ताकत लारे जको तु मनु ङिले वांची रक्षा करली। मैं वांची चौकसी करली। वांचे महु ओ बन्दे नु छोड़ती कर जको नाश हुवणे आले मार्ग़ा नु चुणती गेहले हुते, नेरे कुई नाश कोनी हुले ऐवास्ते कि जको पवित्रशास्त्र मां केहले गेले ऊं पुरे हो।
13“हमा मैं दुधे गोढु आवे पला, ते ये बाता संसारा मां किहे, कि वे माया आनन्द आपणे मां पूरा गिहो। 14मैं दुधा वचन वाकनु पुज़ाती ङिला ते संसारा ने वांचे लारे बैर करला, कांकि जिंवे मैं संसारा चा कोनी यूंही वे वी संसारा चे कोनी। 15मैं हा प्राथना ना करी कि तु वानु संसारा महु चती गे पर ईं कि तु वानु ओ दुष्ट कनु बचाली राख। 16जिंवे मैं संसारा चा कोनी, यूंही वे वी संसारा चे कोनी। 17सच्चाई चे जरिये तु वानु सेवा चे कामा मां पवित्र कर। दुधा वचन सच्चा छै। 18जिंवे तु मनु संसारा मां भेज़ले, यूंही मैं वी वानु संसारा मां भेज़ले। 19वांचे वास्ते मैं आपणे आप नु पवित्र करती कर दुधी सेवा मां ङिये पला, कि वे वी सच्चाई लारे पवित्र हुती कर दुधी सेवा करो।
सारे विश्वास करने आला वास्ते ईशु ची प्राथना
20“मैं हेको यांचे वास्ते प्राथना ना करी, पर वांचे वास्ते वी जको वांचे वचना चे जरिये माये उपर विश्वास करे। 21हे ब़ा मैं प्राथना करे पला कि वे सब हेक हो, जिंवे तु माये मां छी ते मैं दुधे मां छै। यूंही वे वी अम्चे मां हो जाये कनु संसार विश्वास करो कि तु ही मनु भेज़ले। 22वा महिमा जको तु मनु ङिली मैं वानु ङिली, कि वे यूंही हेक हो जिंवे कि अम्ही हेक छिऊं। 23मैं वांचे मां ते तु माये मां जाये कनु वे सेद्ध हुती कर हेक हुती जाओ। बल्ति संसार ईं जाणो कि तु मनु भेज़ले ते जिसड़ा तु माये लारे प्रेम राखला उसड़ा ही वांचे लारे प्रेम राखला।
24“हे ब़ा, मैं चाहवे कि जानु तु मनु ङिले जिठे मैं छै ओठे वे वी माये लारे हो, कि वे माई वा महिमा ङेखो, जको तु मनु ङिली कांकि तु संसारा ची उत्पत्ति चे पेहले माये लारे प्रेम राखला।
25“हे धार्मिक ब़ा, संसारा ने तनु कोनी जाणले, पर मैं तनु जाणले, ते यां लौका ने वी जाणले कि तु ही मनु भेज़ले। 26मैं दुधे महिमा भरले नां, वानु बावड़ले, ते बावड़ता रिही कि जको प्रेम तनु माये लारे हुता ओ वांचे लारे रिहो ते मैं वांचे मां रिहे।”
Nke Ahọpụtara Ugbu A:
यूहन्ना 17: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0