यूहन्ना 14
14
नरीकारा तक पुज़णे चा जरिया ईशु
1ईशु ने बल्ति चैला नु केहले, “तम्चे मन उदास ना हो। नरीकारा उपर विश्वास करा, ते माये उपर वी विश्वास करा। 2माये ब़ा चे घरा मां ब़ोहत सारी रेहणे ची जग़हा छै, अगर ना हुवीया तां, मैं तम्हानु केहती ङिया। कांकि मैं तम्चे वास्ते जग़हा तियार करने वास्ते जाये पला। 3अगर मैं जती तम्चे वास्ते जग़हा तियार करे, ते बल्ति आती तम्हानु गेहती जाये कि जिठे मैं रिहे उठे तम्ही वी रिहा। 4जिठे मैं जाये तम्ही ऊठला मार्ग़ जाणा।”
5थोमा ने ओनु केहले, “हे प्रभु, अम्ही ना जाणु कि तु किठे जई पला। तां मार्ग़ चा किवें पता लाग़ी?”
6ईशु ने वानु केहले, “मार्ग़, सच्चाई ते जीन्दगी मैं ही छै। बिना माये जरिये कुई नरीकार ब़ा गोढु पोज़ ना सग़ी। 7अगर तम्ही मनु जाणले हुवीया, तां माये ब़ा नु वी जाणा हा। ते हमा ओनु जाणा, ते ओनु ङेखले वी छै।”
8फिलिप्पुस ने ईशु नु केहले, “हे प्रभु, ब़ा नु अम्हानु ङिखाण ईं अम्चे वास्ते घणे छै।”
9ईशु ने ओनु केहले, “हे फिलिप्पुस, मैं इतने ङिहां तक तम्चे लारे छै, का तु मनु ना जाणी? जेह्णे मनु ङेखले ओणे ब़ा नु ङेखले। बल्ति तु कां किही, ‘ब़ा नु अम्हानु ङिखाण’? 10का तु विश्वास ना करी कि मैं ब़ा छै, ते ब़ा माये मां छै? ये बाता जको मैं तनु किहे आपणे तरफु कोनी किहे पला। पर ब़ा माये मां रेहती कर आपणे काम करे। 11माया ही विश्वास करा जब मैं किहे कि मैं ब़ा नरीकारा मां छै ते ब़ा माये मां छै, कम से कम माये कामा ची वजह कनु माया विश्वास करा। 12मैं तम्हानु सच्च-सच्च किहे कि जको माये उपर विश्वास राखे, ये कामे जको मैं करे, ऊं वी करी, यानि याकनु वी बङे काम करी, कांकि मैं ब़ा चे गोढु जाये पला। 13जको कोच्छ तम्ही माये नांवा लारे मांगा ऊंही मैं ङिही, कि पूता चे जरिये ब़ा ची महिमा हो। 14अगर तम्ही माये नांवा लारे मांगा, तां मैं ओनु ङिही।
पवित्र आत्मा चा वायदा
15“अगर तम्ही माया लारे प्रेम करा, तां माये आज्ञा नु मना। 16मैं ब़ा कनु बिनती करी, ते ओह तम्हानु हेक सहायक ङिही ओह हमेशा तम्चे लारे रिही। 17हा सच्चाई चा आत्मा छै जानु संसार मन ना सग़ी, कांकि ओह ओनु ना ङेख सग़ी ते ना ही ओनु जाणे। पर तम्ही ओनु जाणा, कांकि ओह तम्चे लारे रिहे ते ओह तम्चे मां हुवी।
18“मैं तम्हानु अनाथ कोनी छोड़ी, मैं तम्चे गोढु आवी। 19थोड़ी देर रेहती गेली कि बल्ति संसार मनु नी ङेखी, पर तम्ही मनु ङेखा, ऐवास्ते कि मैं जीता छै, तम्ही वी जीते रिहा। 20ओह ङिओ तम्हानु पता लाग़ी कि मैं आपणे ब़ा मां छै, ते तम्ही माये मां, ते मैं तम्चे मां।
21“जाये कनु माया आज्ञा छी, ते ओ वानु मने, ओही माये लारे प्रेम राखे। ते जको माये लारे प्रेम राखे ओचे लारे माया ब़ा प्रेम राखी, ते मैं ओचे लारे प्रेम राखी ते आपणे आप नु ओचे उपर प्रकट करी।”
22ओह यहूदा जको इस्करियोती कोनी हुता, ओनु केहले, “हे प्रभु, का हुले कि तु आपणे आप नु अम्चे उपर प्रकट करने चाहवी ते संसारा उपर ना?”
23ईशु ने केहले, “अगर कुई माये लारे प्रेम राखी, तां ऊं माये वचना नु मनी। ते माया ब़ा ओचे लारे प्रेम राखी, ते अम्ही ओचे गोढु आऊं ते ओचे लारे रिहुं। 24जको माये लारे प्रेम ना करी ओह माये वचन ना मनी। जको वचन तम्ही सुणा ओ माया कोनी यानि ब़ा चा छै जेह्णे मनु भेज़ले।
25“ये बाता मैं तम्चे लारे रेहते हुले तम्हानु केहलीया। 26पर सहायक, यानिकि पवित्र आत्मा, जानु ब़ा माये नांवा कनु भेज़ी, ओह तम्हानु सारीया बाता सिखावी ते जको कोच्छ मैं तम्हानु केहले ओ सब तम्हानु याद करावी।
27“मैं तम्हानु शान्ति ङिये पला, आपणी शान्ति तम्हानु ङिये पला। जिंवे संसार ङिये यूं मैं तम्हानु ना ङिही। तम्चे देल उदास ना हो, ते ना ङरो। 28तम्ही मनु केहते हुले सुणले, ‘मैं जाये पला ते तम्चे गोढु बल्ति आवी।’ अगर तम्ही माये प्रेम राखते, तां यां बाता कनु खौश हुवा हा कि मैं ब़ा चे गोढु जाये पला, कांकि ब़ा माये कनु बङा छै। 29मैं हमा ऐचे हुवणे कनु पेहले तम्हानु केहती ङिले, कि जिसे बेले ऊं हुती जाये तम्ही विश्वास करा।
30“मैं हमा तम्चे लारे घणीया बाता नी करी, कांकि ऐ संसारा चा सरदार शैतान आवे पला। माये उपर ओचा कुई अधिकार कोनी, 31पर ईं ऐवास्ते हुवे कि संसारा नु पता लाग़ो कि मैं ब़ा लारे प्रेम करे ते जिंवे ब़ा ने मनु आज्ञा ङिली मैं यूंही ही करे।
“ऊठा इठु चालु।
Nke Ahọpụtara Ugbu A:
यूहन्ना 14: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0