यूहन्ना 13
13
ईशु ने चैला चे पग़्ग़ धोले
1फसह चे तेंहवार चे पेहले, ईशु नु पता लाग़ला कि ओची वा घड़ी आती गेली कि संसार छोड़ती कर नरीकारा ब़ा चे गोढु जाये। तां आपणे लौका लारे जको संसारा मां हुते, जिंवे प्रेम ओ राखता आखरी तक उसड़ा ही प्रेम करता रेहला। 2आथणे खाणे बेले, शैतान ने, शमौन चे पूत, यहूदा इस्करियोती चे मना मां ईं नाखती चुकला हुता कि ईशु नु धोक्के लारे पकड़वाओ। 3ईशु ने ईं जाणती कर कि नरीकारा ब़ा ने सब कोच्छ ओचे हाथा मां करती ङिले, ते ओ नरीकारा कनु आला ते नरीकारा चे गोढु जाये पला, 4ऐवास्ते ओ खाणे कनु उठती कर, आपणा घग्गा उतारती ङिला, ते रुमाल चती आपणी कमर ब़ांधली। 5बल्ति ठांवा मां पाणी भरती चैला चे पग़्ग़ धोऊं ते जिसे रुमाला लारे ओणे कमर ब़ांधली हुती ओचे लारे लुंह लाग़ला।
6जिसे बेले ओ शमौन पतरस चे गोढु आला, बल्ति पतरस ने ओनु केहले, “हे प्रभु, का तु माये पग़्ग़ धोवे?”
7ईशु ने ओनु केहले, “जको मैं करे तु ओनु हमा ना जाणी, पर ऐचे बाद समझे।”
8पतरस ने ओनु केहले, “तु माये पग़्ग़ कङी वी नी धो सग़े।” ईं सुणती ईशु ने ओनु केहले, “अगर मैं ना धोवे, तां माये लारे दुधा कुई वी साझा कोनी।” 9शमौन पतरस ने ओनु केहले, “हे प्रभु, तां माये पग़्ग़ ही ना, बल्कि हाथ ते ठोङ वी धोती ङे!” 10ईशु ने ओनु केहले, “जको झूलती चुकला ओनु पग़्ग़ा चे अलावा होर कोच्छ धोवणे ची जरुरत कोनी, पर ओह बेलकोल शोद्ध छै। ते तम्ही शोद्ध छिवा, पर सारे चे सारे कोनी।” 11ओ तां आपणे पकड़ावणे आले नु जाणता, ऐवास्ते ओणे केहले, “तम्ही सारे चे सारे शोद्ध कोनी।”
12 #
लूक 22:27
जिसे बेले वांचे पग़्ग़ धोती चुकला, ते आपणा घग्गा घालती कर बल्ति ब़ेसती रेहला। तां वानु किहुं लाग़ला, “का तम्ही समझले कि मैं तम्चे लारे का करले? 13तम्ही मनु गुरु ते प्रभु किहा, ते ठीक ही किहा, कांकि मैं ओही छै। 14अगर मैं प्रभु ते गुरु हुती कर, तम्चे पग़्ग़ धोले, तां तम्हानु वी हेके ङुजे चे पग़्ग़ धोवणे चाही छै। 15कांकि मैं तम्हानु नमुना ङिखाणती ङिला कि जिंवे मैं तम्चे लारे करले तम्ही वी यूंही करले करा। 16#मत्ती 10:24; लूक 6:40; यूह 15:20मैं तम्हानु सच्च-सच्च किहे पला, दास आपणे मालिक कनु बङा ना हुवी, ते ना भेज़ला आला, आपणे भेज़णे आले कनु। 17तम्ही ये बाता जाणा, ते अगर वांचे उपर चला तां धन्न छिवा।
18“मैं तम्चे सब चे बारे मां ना किही, जानु मैं चुणले वानु मैं जाणे। पर ईं ऐवास्ते छै कि पवित्रशास्त्र चा हा वचन पूरा हो, ‘जको माई रोटी खाये ओणे माये उपर लत चली।’
19“हमा मैं ऊं हुवणे कनु पेहले तम्हानु चितावें पला, कि जिसे बेले हुती जाये तां तम्ही विश्वास करा कि मैं ओही छै 20#मत्ती 10:40; मरकु 9:37; लूक 9:48; 10:16मैं तम्हानु सच्च-सच्च किहे पला कि जको माये भेज़ले आले नु स्वीकार करे, ओ मनु स्वीकार करे, ते जको मनु स्वीकार करे, ओ माये भेज़णे आले नु स्वीकार करे।”
धोक्के बाजा सनु इशारा
(मत्ती 26:20–25; मरकुस 14:17–21; लूका 22:21–23)
21ये बाता केहती कर ईशु आत्मा मां उदास हुला ते हा ग़वाही ङिली, “मैं तम्हानु सच्च-सच्च किहे पला कि तम्चे महु हेक मनु धोक्के लारे पकड़वावी।” 22चैले हा शक्क करते हुले कि ओ काये बारे मां किहे पला हेके-ङुजे सनु ङेखु लाग़ले। 23ओचे चैला महु हेक, जको लाङका किहवाता, ओ ईशु ची छात्ती सनु झुकला आला ब़ेहला हुता। 24शमौन पतरस ने ओची तरफ इशारा करती कर ओकनु पूछले, “बावेड़ तां, ओ काये बारे मां किहे पला।”
25तब ओणे वेही तरह ईशु ची छात्ती ची तरफ झुकती कर ओकनु पूछले, “हे प्रभु, ओ कूण छै?” 26ईशु ने उत्तर ङिला, “जानु मैं ईं रोटी चे टुकड़े ब़ोड़ती कर ङिही ओही छै।” ते ओणे टुकड़े ब़ोड़ती कर, शमौन इस्करियोती चे पूत यहूदा नु ङिले। 27ते टुकड़े गेहते ही शैतान ओचे मां समाती गेला।
बल्ति ईशु ने ओनु केहले, “जको तु करी, तुरन्त कर।” 28पर खाणे उपर ब़ेसणे आला महु किह्णी कोनी जाणले कि ओणे हा बात ओचे लारे के वास्ते केहली 29यहूदा चे गोढु ग़ुथली रेहती, ऐवास्ते कईयां ने समझले कि ईशु ओनु किहे पला कि जको कोच्छ अम्हानु तेंहवारा वास्ते चाही छै ऊं मोल गेहती गे, यां ईं कि गरीबा नु कोच्छ ङे जती। 30तां ओ रोटी चे टुकड़े चती कर ब़ाहर चाह्ला गेला। ते हा राती चा ब़ेहला हुता।
नवीं आज्ञा
31जिसे बेले यहूदा इस्करियोती ब़ाहर चाह्ला गेला, ईशु ने केहले, “हमा मैं इन्साना चे पूता ची महिमा हुली ते नरीकारा ची महिमा माये मां हुली। 32अगर माये मां नरीकारा ची महिमा हुली, तां नरीकार वी मैं पूत छै ची महिमा करी, ते तुरन्त करी। 33#यूह 7:34हे ब़ाले, मैं थोड़ी देर तम्चे गोढु छै। बल्ति तम्ही मनु सोधा, ते जिंवे मैं यहूदिया नु केहले कि, ‘जिठे मैं जाये पला, ओठे तम्ही ना आ सग़ा।’ यूंही मैं हमा तम्हानु वी किहे पला, 34#यूह 15:12,17; 1 यूह 3:23; 2 यूह 1:5मैं तम्हानु हेक नवीं आज्ञा ङिये पला कि हेके ङुजे लारे प्रेम करा। जिंवे मैं तम्चे लारे प्रेम करला, तम्ही वी हेके ङुजे लारे प्रेम राखा। 35अगर आपस मां प्रेम राखा, तां ऐचे कनु सब जाणे कि तम्ही माये चैले छिवा।”
पतरस चे मुकरने चा इशारा
(मत्ती 26:31–35; मरकुस 14:27–31; लूका 22:31–34)
36शमौन पतरस ने ओनु केहले, “हे प्रभु, तु किठे जई पला?”
ईशु ने केहले, “जिठे मैं जाये पला, उठे तु हालि माये भांसु आ ना सग़ी, पर ऐचे बाद माये भांसु आवे।”
37पतरस ने ओनु केहले, “हे प्रभु, हमा मैं दुधे भांसु कां ना आ सग़ी? मैं तां दुधे वास्ते आपणी जान वी ङिती ङिही।”
38ईशु ने उत्तर ङिला, “का तु माये वास्ते आपणी जान ङिये? मैं तनु सच्च-सच्च किहे पला कि कूकड़ा बांग ङिही जब तक तु तीन वारी माया इन्कार नी करती गिहे।”
Nke Ahọpụtara Ugbu A:
यूहन्ना 13: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0