प्रेरितां चे काम 26
26
पौलुस ते अग्रिप्पा राजे ची बातचीत
1अग्रिप्पा ने पौलुस नु केहले कि, “तनु आपणे बारे मां केहणे ची अनुमति छै।”
तब पौलुस ने हाथ ऊंचा करती कर आपणे बचाव चे बारे मां किहुं लाग़ला, 2“हे राजा अग्रिप्पा, जितनीया बाता चा यहूदी माये उपर दोष लावी पले, आज़ दुधे सामणे वांचा उत्तर ङेणे मां, मैं आपणे आप नु धन्न समझे। 3खास करती कर ऐवास्ते कि तु यहूदिया चे सारे रिति-रिवाज ते विवाद चे बारे मां आच्छी तरावें जाणी। ऐवास्ते मैं दुधे कनु विनती करे पला कि माई बाते नु तसल्ली लारे सुणती गे।
4“जिसड़ा माया चाल-चलन शुरु कनु आपणे देश ते यरुशलेम चे लौका मां वी हुता, ये सारे यहूदी आच्छी तरावें जाणी। 5#प्रेरि 23:6; फिलि 3:5अगर वे ग़वाही ङेणा चाहवी, तां शुरु कनु मनु पेहचाणी कि मैं फरीसी हुती कर आपणे धर्म चे सबकनु खरे पंथ चे अनुसार टुरला। 6ते हमा ओ वायदे मां आस ची वजह जको नरीकारा ने अम्चे ङाङा-ब़ा लारे करला हुता, माये उपर मुकदमा चले पला। 7ओही वायदे चे पुरे हुवणे ची आस लाले हुले, अम्चे ब़ारहा गोत्र आपणे सारे मना लारे रात-ङिओ नरीकारा ची सेवा करते आले। हे राजा, येही आस चे बारे मां यहूदी माये उपर दोष लावी पले। 8जबकि नरीकार मरला आला नु जीते करती ङिये, तां तम्चे इठे हा बात कां विश्वास लायक ना समझली जाये।
9 #
प्रेरि 8:3; 22:4,5 “मैं वी समझले हुते कि ईशु नासरी चे नांवा चे विरोध मां मनु ब़ोहत कोच्छ करने चाही छै। 10ते बल्ति मैं यरुशलेम मां इसड़े ही करले, ते प्रधान याजका कनु अधिकार गेहती कर घणे सारे नरीकारा चे विश्वासी लौका नु कैदखाने मां नाखले, जिसे बेले वानु मारती नाखते ते ये कामा मां माया वी हाथ रेहता। 11ते हर हेक प्राथनाघरा मां जती कर मैं वानु ङण्ड ङिता, ते मसीह ईशु चे नांवा ची निन्दा करवाता, इठे तक कि गुस्से मां मैं पाग़ल हुती गेलता ते ब़ाहरु नेरा शहरा मां जती कर वानु वी सताऊं लाग़ला।
पौलुस चे जरिये ईशु चे दर्शन चे बारे मां बावड़ने
(प्रेरितां चे काम 9:1–19; 22:6–16)
12“येही धुन्नी मां जब मैं प्रधान याजका कनु अधिकार ते आज्ञा ची चिठ्ठी चती कर दमिश्क शहरा नु जाये पलता, 13तां हे राजा, मार्ग़ मां ङुपाहरा चे समय मैं आसमाना कनु सूरजा चे तेज कनु वी बधती कर हेक सोज़ले, आपणे ते आपणे लारे चलणे आला चे चारो तरफ चमकते हुले ङेखले। 14ते जिसे बेले अम्ही सारे भोंये उपर ढेती पले, तां मैं इब्रानी भाषा मां, मनु केहते हुले हेक अवाज सुणली, ‘हे शाऊल, हे शाऊल, तु मनु कां सतावी पला? धारी उपर लत्त मारनी मुश्किल छै।’
15“मैं केहले, ‘हे प्रभु, तु कूण छी?’
“प्रभु ने केहले, ‘मैं ईशु छै, जानु तु सतावी पला। 16पर तु ऊठती कर, आपणे पग़्ग़ा उपर खड़ा हो, कांकि मैं तनु ऐवास्ते दर्शन ङिला कि तनु वां बाता चा वी सेवक ते ग़वाह ठहरावी, जको तु कोनी ङेखलीया, ते वांचा वी जाये वास्ते मैं तनु दर्शन ङी। 17मैं तनु दुधे लौका कनु ते नेरीया जातिया कनु बचाता रिही, जाये गोढु मैं हमा तनु ऐवास्ते भेज़े पला, 18कि तु वांचीया आँख खोल, कि वे अन्धकार महु काढ़ती कर ज्योति मां, ते शैताना चे अधिकार महु नरीकारा चे राज़ मां गेहती आवे। वे पापा कनु माफ पाओ, ते वांचे बीच मां आती जाओ, जको माये मां विश्वास चे जरिये नरीकारा वास्ते पवित्र करले गेले।’
पौलुस चे काम
19“ऐवास्ते हे राजा अग्रिप्पा, मैं ओ स्वर्ग़ीय दर्शन ची बात कोनी टाड़ली, 20#प्रेरि 9:20,28,29बल्ति मैं सबकनु पेहले दमिश्क शहरा मां, ते ऐचे बाद यरुशलेम मां रेहणे आला नु, ते सारे यहूदिया प्रदेस मां, ते नेरीया जातिया नु समझाता रेहला, कि मन फिरावा ते नरीकारा सनु फिरती कर मन फिराव चे लायक काम करा।
21“यां बाता ची वजह यहूदी मनु मन्दरा मां पकड़ती कर मारती नाखणे चा यतन करु लाग़ले। 22पर हमा तक माई सहायता नरीकार करता रेहला, ते का छोटे, ते का बङे मैं तम्चे सारा चे सामणे ग़वाही ङिये पला, ते वा बाता नु छोड़ती कर कहीं वी ना किही, जको भविष्यवक्ता ने ते मूसा ने वी केहले कि हुवणे आलीया छी। 23#1 कुरि 15:20कि मसीह नु ङोख भोग़णे पड़ी, ते ओही सबकनु पेहले मरला आला महु जीता हुती कर, अम्चे लौका मां ते नेरीया जातिया मां ज्योति चा प्रचार करी।”
पौलुस चे जरिये अग्रिप्पा चा भ्रम दूर करने ची कोशिस
24जिसे बेले पौलुस आपणे बचाव वास्ते ये बाता किहे पलता, फेस्तुस ने ऊंची अवाजी लारे केहले कि, “हे पौलुस, तु पाग़ल छी। दुधी घणी पढ़ाई ने तनु पाग़ल बणाती नाखले।”
25बल्ति पौलुस ने केहले, “हे महोदय फेस्तुस, मैं पाग़ल कोनी, पर मैं सच्चाई चा ते ज्ञान चा बाता किहे पला। 26जाये सामणे मैं बेधड़क हुती कर ब़ोले पला, यां बाता नु राजा अग्रिप्पा वी जाणे, ते मनु विश्वास छै, कि यां बाता महु कुई वी बात ओकनु लुकली कोनी पली, कांकि वा घटना तां कुई कूणे मां कोनी हुली। 27हे राजा अग्रिप्पा, का तु भविष्यवक्ता चा विश्वास करी वी? हां, मैं जाणे, कि तु विश्वास करी वी।”
28ये बाते उपर अग्रिप्पा ने केहले कि, “का तु थोड़ी जा शिक्षा ङिती कर मनु मसीह बणावणे चाहवी?” 29बल्ति पौलुस ने केहले कि, “नरीकारा कनु माई हा प्राथना छै कि का थोड़े मां, का घणे मां, सेर्फ तु ही कोनी, पर जितने लौक आज़ माई बाते नु सुणी पली, सिवाय यां हथकड़ीया नु छोड़ती कर, वे माई आलीकर हुती जाओ।”
30बल्ति राजा, ते राज्यपाल फेस्तुस, बिरनीके, ते वांचे लारे जको लौक ब़ेहले हुते, वे खड़ी हुती गेली, 31ते अलग़ जती कर आपस मां किहुं लाग़ती गेली कि, “ऐ बन्दे तां इसड़ा कुई गुनाह कोनी करला, जको ऐनू मौत चा ङण्ड जा ते बल्ति कैदखाने मां नाखणे ची सजा मिलो।”
32बल्ति राजा अग्रिप्पा ने राज्यपाल फेस्तुस नु केहले कि, “अगर ईं बन्दे कैसर ची अपील ना करीया, तां ऐनू छोड़ती ङिले जईया।”
Nke Ahọpụtara Ugbu A:
प्रेरितां चे काम 26: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0