प्रेरितां चे काम 25
25
पौलुस कैसर कनु आपणा न्यां चाहता
1काम सम्भालणे चे तीन ङिहां चे बाद पुरकियुस फेस्तुस कैसरिया शहर कनु यरुशलेम गेला। 2बल्ति प्रधान याजका ने, ते यहूदिया चे अग़ुवा ने, ओचे सामणे पौलुस उपर दोष लावणे शुरु करती ङिले। 3वांची योजना हा हुती कि अम्चा पक्ष गेहती कर पौलुस नु यरुशलेम सनु भेज़ती ङे, कांकि वे मार्ग़ मां ही पौलुस नु मारणे ची घात मां हुते। 4पुरकियुस फेस्तुस ने वानु केहले कि, “पौलुस तां कैसरिया शहरा मां कैदखाने मां छै, मैं खौद्द ओठे जल्दी ही जाये पला।” 5बल्ति ओणे केहले कि, “ऐवास्ते तम्चे महु कोच्छ अग़ुवे माये लारे चालो, अगर पौलुस वास्तव मां ही दोषी छै तां ओचे उपर मुकदमा चलाला जई।”
6आठ-ङस ङिहें रुकणे चे बाद फेस्तुस कैसरिया शहर सनु गेला ते ङुजे ङिओ पौलुस नु अदालती मां हकरवाणे ची आज्ञा ङिली। 7जिसे बेले पौलुस ओठे आला ते जको यरुशलेम कनु आले भिलते, वाणे पौलुस नु घेरती कर ओचे उपर कई तरह चे अरोप लावणे शुरु करती ङिले, ते जानु वे खौद्द साबित ना कर सग़ले। 8पर पौलुस आपणे बचाव वास्ते किहुं लाग़ला कि, “ना तां मैं यहूदिया ची व्यवस्था चा विरोध करला, ते ना ही मैं मन्दरा चा, ते ना ही मैं कैसर चे विरोध कुई वी अपराध करला।”
9बल्ति फेस्तुस पुरकियुस ने यहूदिया नु खौश करने चे वास्ते पौलुस नु केहले कि, “का तु यरुशलेम जाणे चाहवी, ताकि मैं ओठे चालती कर दुधे उपर लाग़ले दोषा चा मुकदमा लड़ सग़े।”
10ऐचे उपर पौलुस ने केहले कि, “हमा मैं कैसर ची अदालती चे सामणे भिला ला, माये मुकदमे चा फैंसला इठी करला जाणा चाही छै। मैं यहूदिया चे कहीं वी बुरे कोनी करले, ये बाते नु तु आच्छी तरावें खौद्द वी जाणी। 11अगर मैं दोषी छै, ते इसड़े कुई काम करले जाई सजा मौत छै, तां मैं मरणे चे वास्ते तियार छै। पर जिसा बाता चा ये यहूदी माये उपर दोष लावी पले, अगर यां बाता महु कुई वी बात सच्च ना साबित हो, ते मनु कुई वी यांचे हाथा मां ना सोंप सग़ी। माई सुणवाई ची अपील कैसर राजे चे न्यालय मां भेज़ली जाओ।”
12बल्ति फेस्तुस परकियुस ने महासभा लारे सोच-विचार करती कर हा घोषणा करली कि, ठीक छै, “ते कैसर कनु सुणवाई ची अपील करली, तां तनु कैसर राजे कनु ही भेज़ले जई।”
अग्रिप्पा चे सामणे पौलुस
13कोच्छ ङिहां चे बाद अग्रिप्पा राजा ते बिरनीके कैसरिया शहरा मां आती कर फेस्तुस पुरकियुस नु मिड़ले। 14ते वे ओठे घणी ङिहें रेहले ते हेक ङिओ फेस्तुस ने पौलुस चे बारे मां अग्रिप्पा राजे नु बावड़ले, “हेक कैदी छै, जानु फेलिक्स इठे छोड़ली गेला। 15जिसे बेले मैं यरुशलेम मां हुता, तां प्रधान याजका ने ते यहूदिया बङका ने ओचे उपर दोष लाले ते मौत ची सजा ङेणे ची मांग करली। 16पर मैं वानु केहले, ‘रोमियां मां इसड़ी रिति-रिवाज कोनी कि कुई बन्दे नु सजा ङेणे चे वास्ते सोंपती ङियो, जब तक आरोपीया नु दोष लावणे आले चे आमणे-सामणे भिले रेहती कर, ओ दोष जको ओचे उपर लाग़ला गेला ओचा उत्तर ङेणे चा मौका ना मिलो।’
17“जिसे बेले वे इठे भेले हुले, ते मैं कुई देर कोनी करली, पर ङुजे ही ङिओ अदालती मां ब़ेसती कर, ऐवास्ते बन्दे नु पेश करने ची आज्ञा ङिली। 18जिसे बेले ओचे उपर दोष लावणे आले दोष लाऊं लाग़ती गेले, ते वाणे इसड़ी कुई बुरी बाते चा दोष कोनी लाला, जिसड़ी मैं उम्मीद करे ला पलता। 19पर वांचे आपणे ही व्यवस्था, ते ईशु नांवा चे कुई बन्दे चे बारे मां जको मरती गेला तां, पौलुस ओनु जीते बावड़ता, ऐह बाते चा आपस मां बहस-बाजी हुती। 20ते मैं थोड़ा परेशानी मां पड़ती गेला कि यां बाता चा किवें पता काढ़े, ऐवास्ते मैं ओकनु पूछले, ‘का तु यरुशलेम सनु जाणे चाहवी, कि यां बाता चा ओठे फैंसला हो?’ 21पर जिसे बेले पौलुस ने माये कनु विनती करली कि, माया फैंसला सम्राट राजे चे सामणे हो, ते मैं बल्ति आज्ञा ङिली कि, जब तक ओनु कैसर राजे चे सामणे ना भेज़े, तब तक ओची रखवाली करली जाओ।”
22बल्ति अग्रिप्पा राजे ने फेस्तुस नु केहले कि, “मैं वी खौद्द ऐ बन्दे ची बाता सुणने चाहवे।”
फेस्तुस ने ओनु केहले कि, “ठीक छै, तु काल सुणती गिहो।”
23ऐवास्ते आग़ले ङिओ अग्रिप्पा राजा ते बिरनीके बङी धूम-धाम लारे ते सजले संवरले आले। ते सैनापति चे सरदार ते शहरा ची नांमी बन्दा लारे सभा घरा मां पुज़ले। बल्ति फेस्तुस ने हा आज्ञा ङिली कि पौलुस नु इठे पेश करले जाओ।
24बल्ति फेस्तुस ने केहले कि, “हे महाराजा अग्रिप्पा, ते हे सारी बन्दी जको इठे अम्चे लारे मौजुद छिवा, तम्ही ऐ बन्दे नु ङेखा पले, जाये बारे मां सारे यहूदी बन्दा ने ते यरुशलेम मां वी ते इठे वी आती कर रौल मचाती कर ईं केहले कि ऐ बन्दे चे हमा जीते रेहणे ठीक कोनी। 25पर मैं जाणती गेला कि ऐणे इसड़े कुई काम कोनी करले जाई सजा मौत हो। ते बल्ति ऐणे आप खौद्द ही हा अपील करली कि माया सम्राट राजे चे सामणे मुकदमा हो, ते मैं ऐनू रोम भेज़णे चा फैंसला करला। 26पर मैं तां ऐचे बारे मां कुई वी कसूर कोनी सोहला कि सम्राट राजे नु कहीं लिखे, ऐवास्ते मैं तम्चे सामणे, ते हे राजा अग्रिप्पा खास करती कर दुधे सामणे गेहती आला कि, कहीं जांच-पड़ताल चे बाद मनु लिखणे वास्ते कहीं मिली। 27कांकि माये वास्ते हा गलत छै कि कुई वी बन्दे नु ओचे उपर लाग़ले गेले दोष चे बारे मां बिना पता काढ़ले चिठ्ठी लिखती कर आग़ु भेज़ती ङेणे।”
Nke Ahọpụtara Ugbu A:
प्रेरितां चे काम 25: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0