1 कुरिन्थियां 7
7
बीहा
1वां बाता चे बारे मां जको तम्ही मनु लिखती कर पूछले हुते, माये केहणे ईं छै अगर कुई बीहा ना कराओ तांवी आच्छे छै। 2पर व्यभिचार कनु बचणे वास्ते हर-हेक मर्दा ची आपणी घराआली ते हर हेक असतरी चा आपणा मोणस हो। 3मोणस आपणी घराआली चा फर्ज पूरा करो ते यूंही घराआली वी आपणे मुणसा चा। 4सेर्फ घराआली नु ही आपणे शरीरा उपर अधिकार कोनी पर विचे मुणसा चा अधिकार छै यूंही सेर्फ मुणसा नु वी आपणे शरीरा उपर अधिकार कोनी पर ओची घराआली चा वी छै। 5तम्ही हेके ङुजे कनु अलग़ ना रिहा, पर सेर्फ कोच्छ समय तक आपणी सेहमती लारे कि प्राथना वास्ते समय मिलो ते दोबारा हेक ङुजे लारे रिहा इसड़े ना हो कि तम्चे बेकाबु ची वजह कनु शैतान तम्हानु परखो। 6पर मैं जको ईं किहे पला हा अनुमति छै, हा आज्ञा कोनी। 7मैं ईं चाहवें कि जिसड़ा मैं छै उसड़े ही सारी इन्साने हो पर हर-हेक नु नरीकारा चे तरफु खास वरदान मिड़ले आले छी कानु कुई तरह चा ते कानु कुई तरह चा।
अणपरनीला वास्ते सलाह
8पर मैं कुंवारा ते बांढीया चे बारे मां किहे पला कि वांचे वास्ते इसड़े ही रेहणे आच्छे छै जिसड़ा मैं छै। 9पर अगर वे काबु ना रेह सग़ी तां बीहा करवाती गिहो कामातुर हुती कर ब़लते रेहणे ची बजाय बीहा करवाती गेहणा ही भले छै।
परनीला आला वास्ते सलाह
10 #
मत्ती 5:32; 19:9; मरकु 10:11,12; लूक 16:18 जाया बीहा हुती गेला वानु मैं ना बल्कि प्रभु आज्ञा ङिये कि घराआली आपणे मुणसा कनु अलग़ ना हो। 11पर अगर अलग़ वी हुती जाओ तां बिना ङुजा बीहा करले रिहो, जा आपणे मुणसा लारे दुबारा मेल करती गिहो ते ना मोणस आपणी घराआली नु छोड़ो।
12ङुजा नु प्रभु ना पर मैं ही किहे पला अगर कुई विश्वासी भावां ची घराआली विश्वास ना करती हो ते ओचे लारे रेहणे वास्ते खौश हो तां ओ विनु ना छोड़ो। 13ते जिसी असतरी चा मोणस विश्वास ना करता हो ते विचे लारे रेहणे वास्ते खौश हो वा मुणसा नु ना छोड़ो। 14कांकि इसड़ा मोणस जको विश्वास ना करता हो ओ घराआली ची वजह कनु पवित्र ठहराला जाये ते इसड़ी घराआली जको विश्वास ना करती हो वा मुणसा ची वजह कनु पवित्र ठहराली जाये। अगर इसड़े ना हो तां तम्ची ब़ाले-ब़च्ची अशुद्ध रेहती जाये पर इसड़े करने लारे वे नरीकारा वास्ते पवित्र छी।
15पर जको मर्द विश्वास ना करी, अगर ओ अलग़ हो तां अलग़ हुं ङिया। इसड़ी दशा मां कुई भऊ जा ब़ेहण ब़झले आले कोनी पर नरीकारा ने तां अम्हानु मेल-मिलाप वास्ते हकारले छै। 16कांकि हे असतरी, तु का जाणी कि तु आपणे मुणसा चा उद्धार करवाती गिहे? ते हे मर्द, तु का जाणी कि तु आपणी घराआली चा उद्धार करवाती गिहे?
जिसड़े छिवा उसड़े जीवा
17नरीकारा ने जानु जिसी स्थिति मां राखले ते जिसे रूपा मां ओनु हकारले ऊं ओचे मां बणले रिहो। सारीया कलीसिया चे वास्ते माये ईं केहणे छै। 18जको खतना करले आले हकारले गेले हो ऊं खतनारहित ना बणो। जको खतनारहित हकारले गेले ऊं खतना ना कराओ। 19ना खतना कोच्छ छै ते ना खतनारहित। पर नरीकारा चीया आज्ञा नु मनणे ही सब कोच्छ छै। 20हर हेक जणे जिसी दशा मां हकारले गेले हो ऊं विचे मां रिहो।
21अगर तु दास ची दशा मां हकारला गेला छी तां चिन्ता ना कर। पर अगर तु आजाद हो सग़ी तां इसड़े ही काम कर। 22कांकि जको दास ची दशा मां प्रभु मां हकारला गेला ओ प्रभु चा आजाद करला गेला छै। यूंही जको आजाद ची दशा मां हकारला गेला ओ मसीह चा दास छै। 23तम्ही कीमत ङिती कर मोल गेहले आले छिवा, इन्साना चे दास ना बणा। 24हे माये भऊ, जको कुई जिसी दशा मां हकारले गेला हो ऊं विचे मां नरीकारा लारे रिहो।
कुंवारे ते बांढा चे बारे मां
25कुंवारीया चे बारे मां प्रभु ची कुई आज्ञा मनु कोनी मिड़ली पर विश्वासयोग हुवणे वास्ते जिसड़ी दया प्रभु ने माये उपर करली छै ओचे अनुसार आपणे तरफु केहणा चाहवे। 26ऐवास्ते माई समझी मां ईं आच्छे छै कि आज़कल क्लेश चे वजह इन्सान जिसड़े छै उसड़े ही रिहो। 27अगर तु परनीला आला छी तां घराआली नु छोड़ने चा यतन ना कर। अगर तु अणपरनीला छी तां घराआली नु सोधणे ची कोशिस ना कर। 28पर अगर तु बीहा वी करे तां पाप कोनी ते अगर कुई कुंवारी कन्या बीहा करवावे तां कुई पाप कोनी। पर इसड़ा नु शरीरिक ङोख हुवी ते मैं तम्हानु ऐचे कनु बचावणे चाहवे।
29हे माये भऊ, मैं ईं किहे पला कि समय कम छै। ऐवास्ते हमा कनु वे जको परनीले आले छी इसड़े रिहो मनती गिहो अणपरनीले छी। 30ते रोवणे आले इसड़े हो मनती गिहा रोवी ना, ते खौश रेहणे आले मनती गिहा खौश ना रिही, ते मोल गेहणे इसड़े हो कि मनती गिहो वांचे कनु कोच्छ छै कोनी। 31जाया लेन-देन संसारिक चीजा लारे छै, वे वांचे मां मगन ना हुती जाओ कांकि ऐ संसारा ची रीत ते बर्ताव बदलते जई।
32मैं ईं चाहवे कि तम्हानु चिन्ता ना हो। अणपरनीले मर्द प्रभु चा बाता ची चिन्ता मां रिहे, कि प्रभु नु किवें खौश राखे। 33पर परनीले आले इन्सान संसारा ची बाता चीया चिन्ता मां रिहे, कि आपणी घराआली नु किसे तरीके लारे खौश राखो। 34परनीली ते अणपरनीली मां फर्क छै। अणपरनीली प्रभु ची चिन्ता मां रिहे कि वा शरीर ते आत्मा ङुंहु मां पवित्र हो। पर परनीली आली संसारा ची चिन्ता मां रिहे, कि आपणे मुणसा नु खौश राखो। 35मैं ईं सब तम्ची भलाई वास्ते ही किहे पला ना कि तम्हानु फसाणे वास्ते बल्कि ऐवास्ते कि जिंवे वाजिब छै कि तम्ही हेक चेत्त हुती कर प्रभु ची सेवा मां लाग़ली रिहा।
36अगर कुई ईं समझे कि ओ आपणी धूवे चा बीहा करने मां देर हुवे पली तां विचे लारे अन्याय करे पला कांकि विची उम्र ढले पली ओ विनु अनुमति ङियो ते परनीजु ङियो। हा कुई पाप कोनी। 37पर अगर ओ मना मां फैंसला करती गिहे ते जेह्णे आपणी धूवे चा बीहा ना करने ची धारती गिहे, ओचा निर्णय सही छै। 38ऐवास्ते जको आपणी धूवे चा बीहा करे ओचा निर्णय वी सही छै। अगर जको विचा बीहा ना करने ची धारती गिहे ऊं होर वी सही छै।
39जब तक कुई असतरी चा मोणस जीता रिहे तब तक वा ब़झली आली छै। पर जिसे बेले विचा मोणस मरती जाये तां जाये लारे चाहो बीहा कर सग़े, पर जरुरी छै कि ओ मर्द वी प्रभु मां विश्वासी ही हो। 40माये केहणे ईं छै वा असतरी जिसड़ी छै वा अगर इसड़ी ही रिहो तां वा होर वी धन्न छै। मैं ऐ विश्वासा लारे किहे पला कि माये मां वी नरीकारा ची आत्मा वास करे पली।
Nke Ahọpụtara Ugbu A:
1 कुरिन्थियां 7: ODR
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
CC BY-NC-ND 4.0