Matiu 11
11
A Sun Paptais itep'a v'nen asn a Iesu
(Luk 7:18-35)
1Naran a Iesu ittu sera v'nen anr m'ertuan arnal lman iru, iln nut lera a ti ipav'iv'en sei kavrp'ep'a v'nen p'as arna v'anu lilar.
2Laha, a Sun Paptais, naran ilak al p'resin, irn v'nen ivrur parian a Kristu, katep'a m'ertuan arru. 3Hir arvr ani karvr ti a, “?Nakm kv'i Dui la avr ti ipama ha, v'aha p'vtala a dui uraur ml?”
4A Iesu ivrpranr kavr ti a, “Parv'a karvrp'ep'ei an a Sun si udlani ktrrn sarei katrla sarei. 5#Aisaia 35:5,6; Aisaia 61:1.M'etapis avla sei ml, m'ertu ahavv'eldau avv'el ml, m'ertu lep'ersi iuar, p'akr ima kap'as ml, m'ertu drlnar iprs avrn sei ml, m'ertu atvram'a sarei avthal ml, m'ertu siar ihei, atvrp'ep'a sera v'nen p'as anr. 6M'ertu la ikatitihap'el sena Kana ha, hin iparn ipap'as.”
7Naran arhum'alet ml, a Iesu ivrurdinei a Sun anr nelnal, kavr ti a, “?Tituei kam'i kvrav'a arna nut kaka a ti pavla v'ata? ?Kvv'ah ti hin ipanep'a sera v'iep' nalen itv'i? 8?V'eti kvrav'a a ti pavla v'ata? ?Kvv'ah ti pavla dui klusan ip'as istudau? Pavrni, m'ertu klusar ip'as avlak al nmahar mlin lil. 9?V'eti kam'i kvrav'a a ti pavla v'ata? ?Pruvet iamk, v'aha? Aau, nvr a kam'i, aulera ilil kasiv' pruvet. 10#Mal 3:1.Sena ti hin iv'i dui Paivul ivruri kavr ti a, ‘Pavrni, kana p'etep'a dui ipamk ipav'i v'nenak, katauamu anh. Hin ipandedp' alam ipatauamu.’
11Nvrdaui, nvr a kam'i, asnr m'ertu tav'et ilav'r, nki iahamk ilil kasiv' a Sun Paptais, v'eti m'ertu isusupadau arna v'anu eia ilil kasiv'i. 12#Luk 16:16.Itudina hin arna naranan a Sun Paptais ier dika, v'anu eia ima kalil kahua, m'ertu hua avuadei ihua. 13Sena ti pruvet udlani avvrp'ep'a v'nenan, m'a v'nen huan a Musis ivrp'ep'ei aranan ml, dav'a ier a Sun. 14#Mal 4:5; Mat 17:10-13; Mak 9:11-13.Ipavr ti kvrn ti pavv'ah v'nen laha, aulera iv'i a Ilaitsa, la avr ti ikama pr ha. 15!M'ertu drlnan iak a ti iparn sei, ipav'rn ani!
16?P'evr v'ata kav'iv'en p'klr m'ertu avsilv' hilaha? Hir avnep'a mardel avlak arna nut aulul a sei, kavv'ara a tv'alr, 17kavvr ti a,
‘Kam'em' nviv ner, v'eti kam'i kaavsilu.
Kam'em' nvtakal, v'eti kam'i kaavrn istu.’
18Sena ti a Sun ima kaln tim'ah ma naui m'iel, laha avr ti m'im'iln stu iamk ilak a nln. 19V'eti Kana, nv'i Net M'ertu, nma kahan tim'ah, kam'n naui m'iel, laha avr ti a, ‘Pavlei. Aulera iv'i dui ihatat iel kam'nm'n kav'i tv'alr dui na takis m'er m'ertu stu.’ V'eti pariar m'ertu avsapa v'ahien p'as iv'iv'en ti v'ahien lera iviviln.”
Der ipama arna v'anu la ahavvav nlr kavrn istu sena si stuar ha
(Luk 10:13-15)
20Sarei, iv'ana hua dinei kavrur v'anu lilil iten sera pari lililan istudau atlera, sena ti ahavvav v'ahienar, kavr ti a, 21#Aisaia 23:1-18; Esikiel 26:1—28:26; Suil 3:4-8; Emus 1:9,10; Sek 9:2-4.“Usa, kam'i a Kurasin, usa, kam'i a P'etsaita, imvr ti m'den pari lilak nani asnm'i arna nut a Taia m'ei a Saitun, amtvvav sera v'ahienar tituei kavua selpak kavtu tih nap' arna p'akr. 22V'eti Kana nvr a kam'i, arna napn Atua ipav'ana hua m'a m'ertu udlani, iputakm a kam'i ipasiv' nut a Taia m'ei a Saitun. 23#Aisaia 14:13-15; Ap'u 19:24-28.?Kam'i ml a Kapaniam, kvv'ah ti naham'i ilil kaier nut eia? Ihei, apasran kam'i pavrav'a auei a m'lnar m'ertu avram'a, sena ti imvr ti m'den pari lilak nani asnm'i arna nut a Satam, imater uam kaier dika. 24#Mat 10:15; Luk 10:12.V'eti Kana nvr a kam'i, arna napn Atua ipav'ana hua ma m'ertu udlani, iputakm a kam'i ipasiv' nut a Satam.”
A Iesu iv'ara anr nelnal a ti apavrama asnn kavrnrn hir
(Luk 10:21,22)
25Arna naran lera, a Iesu ivr ti a, “Tatei, Kana npatah, kv'i Mlin Lil na nut eia m'a nut a nadep', sena ti ktutuan udlen si lera asnr m'ertu avrndu sei m'er m'ertu ptr ivrvr, v'eti kv'iv'en anr mardel papa. 26Aau, Tatei, sena ti si lera iviviln m'a v'ahienam. 27#Sun 3:35; Sun 1:18; 10:15.A Tetiak ittu sera si udlani arna lm'ak. M'ertu kinkin ihei irndau a Natn, v'eti a Tatei uaki irndaui. M'ertu kinkin ml ihei irndau a Tatei, v'eti a Natn uaki irndaui, m'er m'ertu udlani a Natn ipav'iv'en anr. 28Kam'i udlani kvm'akar istudau kavua si dv, pavrama asnk, laha Kana p'ani pavrnrn kam'i. 29#Seremaia 6:16.Pavua triuauahak kavsapa sei p'ev'iv'en a kam'i, sena ti kana nv'len, v'ahienak iter a nadep'. Laha, pavla ti pavrnrn kam'i arna nlm'i. 30Sena ti triuauahak iahua, si dvak pavuei itetev'.”
© 2023 Presbyterian Reformed Church of Australia