Matiu 10
10
A Iesu itap'er m'ertuan inal lman iru (12)
(Mak 3:13-19; Luk 6:12-16)
1Laha, a Iesu iv'ara anr m'ertuan arnal lman iru apavrama asnn, katu nut hua anr a ti apavsran m'im'iln stu, kavmhmah a m'ertu arna m'etienar udlani m'a si udlani ianr. 2Nahar apusel arnal lman iru (12) hilaha. Nki itauamu iv'i a Saimun, avr ti iv'i a P'ita, m'ei Adru, iv'i tv'aln, a Sim'is, iv'i a natn a Sep'eti, m'ei a Sun, iv'i tv'aln, 3A P'iliv', a Patulumiu, a Tumas, a Matiu, iv'i dui na takis, a Sim'is, iv'i a natn Alvias, m'ei a Lep'ias, tv'el nahan iv'i a Tatias, 4A Saimun, iv'i dui na pati, m'ei a Sutas Iskariut, la itau a Iesu al lm'ar m'ertu avlep'lei ha.
5Hir arnal lman iru a Iesu itap'er, katu v'nen anr, kavr ti a, “Mavrav'a arna navanel iv'a asnr v'anudl, v'aha arna v'anu lil kinkin iter a Sameria. 6V'eti pavrav'a uaki asnr sivsiv avmln avv'i nl nam'el a Isrel. 7Naran pavrav'a, pavvrp'ep'a v'nen p'as kavvr ti a, ‘V'anu eia itmima.’ 8Pavmhmah a m'ertu im'at, kavmhmah a m'ertu lep'ersi iuei kavani ti m'ertu itam'a sarei, ipathal ml, kavsran m'im'iln stu. Kam'i ktvlev' vn sarei a nut hua lera, sena si lera, pavtuvn a m'ertu uraur. 9Mavua nav'et kinkin iv'i kul, v'aha silva v'aha nav'et v'il al pahusam'i. 10#1 Kurin 9:14; 1 Tim 5:18.Mavua natenam'i arna navanel, v'aha tv'el klusam'i, v'aha sus, v'aha napilakt, sena ti iviviln a ti apamsnen dui na m'akarien.
11Naran pavrav'a arna v'anu lil kinkin v'aha v'anu pa kinkin, pavtala a m'ertu kinkin iviviln a ti pavlak asnn, kavlak atlera ipaier naran pavln nut lera. 12Naran pavrav'a al nmah kinkin, pavvr ip'as anr.
13Ipavr ti m'ertu avlak al nmah nen avviviln, pam'ahu a ti tamatam'i ipama kadater aranar. V'eti ipavr ti ihei, pavlev'm'alet a tamatam'i ipama ml asnm'i. 14#Parei 13:51.Ipavr ti m'ertu kinkin akavlev' kam'i v'aha akavv'rn a v'nenam'i, pavruh al nmah m'a v'anu lera, kavninuan neiev' na tlm'i. 15#Mat 11:24; Ap'u 19:24-28.#Luk 10:4-12.Nvrdaui, nvr a kam'i, arna napn lil Atua ipav'ana hua m'er m'ertu udlani, hin iputakm a m'ertu na v'anu lera ipalil mau kasiv' a Satam m'ei a Kamara.
Apavtp'ev' m'ertuan a Iesu
(Mak 13:9-13; Luk 21:12-17)
16 #
Luk 10:3. Pavrni, kana ntep'a kam'i kvnep'a sivsiv avrav'a a p't nut nar lip'ah didi. Sena si lera, kam'i pavrndu sei ipanep'a nmat, kavlak ms ipanep'a navimar ikautakm a si kinkin. 17#Mak 13:9-11; Luk 12:11,12; 21:12-15.V'eti kam'i pavv'ah kam'i sena m'ertu, sena ti apavtu kam'i arna Kaunsel, kavrp kam'i a nahau al nmah tamatar. 18Apavlev' kam'i pavp'tir arna nah kavman m'er mlin lilil sena Kana, a ti pavvrp'ep'a v'nenak arna nahr m'a nahr v'anudl. 19V'eti naran apavtu kam'i al lm'ar, mavv'ahur ti pavv'ana ipanap'i kavvr v'ata. Sena ti arna naran nen Atua ipavr kam'i sei pavvri. 20Sena ti ikav'i kam'i pavv'ana, v'eti M'im'iln a Tetiam'i, hin ipav'ana, kani ti kam'i pavv'i drln.
21 #
Mak 13:12; Luk 21:16. Laha, tv'aln ipatu tv'aln al lm'a m'ertu a ti apavrpep'ni, tatei kinkin ipatau a natn, mardel apavp'tir kavmlen a tetiar m'ei a uniar, kavani ti aparpep'nr. 22#Mat 24:9; Mak 13:13; Luk 21:17; Mat 24:13; Mak 13:13.Laha, m'ertu udlani apavlep'la kam'i sena nahak, v'eti m'ertu ipap'tir dav'a ipaier naran ipahiris, Atua ipalev'lei. 23V'eti naran apavtp'ev' kam'i arna v'anu iamk, pavruh kavrav'a arna v'anu uraur, sena ti nvrdaui nvr a kam'i, mkdavhiris a v'anu udlani a Isrel ipaier naran Kana, nv'i Net M'ertu, p'ama ml.
24 #
Luk 6:40;
Sun 13:16; 15:20. M'ertu ialil kasiv' tisan, v'aha m'ertu na m'akarien ialil kasiv' mlinan. 25#Mat 9:34; 12:24; Mak 3:22; Luk 11:15.Iviviln a ti m'ertu ipanep'a tisan uaki, v'aha a ti m'ertu na m'akarien ipanep'a mlinan uaki. Ipavr ti atsip'len sera mlin na nmah, kavr ti iv'i Pielsipap, iv'i mlinar m'im'iln stu, apasip'len m'ertuan ipalil mau.
A Iesu iv'iv'en ti p'vdedrn an Atua
(Luk 12:2-7)
26 #
Mak 4:22; Luk 8:17. Sena si lera, mavdedrn anr, sena ti si udlani atnpakar sarei apav'iv'ani, v'aha si udlani attutuan sarei, nelnal apavrndaui.
27Sei nvr a kam'i lihat, pavvri ren, v'aha sei ananau ani asn drlnam'i, pavvrp'ep'ei arna drl nmah. 28Kam'i mavdedrn a m'ertu avrpep'n p'ak natei uaki, v'eti akavrpep'n m'im'il natei, v'eti ip'as a ti pavdedrn a Hin la irndu ti iputakm a m'im'il natei m'a p'ak natei al nep'v'en ha. 29Aulul a m'anh papa iru arna nav'et iamk uaki, v'eti nki ikahmk ikahrs a nadep', ipavr ti a Tetiam'i iam'ahu ani. 30V'eti Atua itspan sera nil ptm'i udlani. 31Kam'i mavdedrn, sena ti kvlil mau kavsiv' m'anh papa istudau.
Pavvrp'ep'a nahan a Kristu arna nah nelnal
(Luk 12:8,9)
32Sena si lera, ipavr ti m'ertu kinkin ipavrp'ep'a Kana arna nah m'ertu, Kana p'evrp'ep'a nahan arna nahn a Tetiak ilak eia. 33#2 Tim 2:12.V'eti ipavr ti m'ertu kinkin ipap'ep'n nahak arna nah m'ertu, Kana p'ep'ep'n nahan arna nahn a Tetiak ilak eia.
A Kristu itupr m'ertu
(Luk 12:51-53)
34Mavv'ah ti nma a ti p'euirma tamat arna nadep'. Kana nahma a ti p'euirma tamat, v'eti tali lil. 35#Maika 7:6.Sena ti Kana nma a ti dui ipamlen a tetian, a natn tav'et ipamlen a unian, tav'et ipamlen a rinan. 36M'ertu apavlak al nmah ipamk apavmlmlen hir. 37M'ertu ilap'as an a tetian v'aha a unian isiv' Kana, iaviviln a ti ipav'i m'ertuak. M'ertu ilap'as an a natn dui v'aha a natn tav'et isiv' Kana, iaviviln a ti ipav'i m'ertuak. 38#Mat 16:24; Mak 8:34; Luk 9:23.M'ertu ialev' su lamu nen kasapa Kana, iaviviln a ti ipav'i m'ertuak. 39#Mat 16:25; Mak 8:35; Luk 9:24; 17:33; Sun 12:25.M'ertu ipasla silv'ienan, silv'ienan ipamln, v'eti m'ertu silv'ienan imln sena Kana, hin ipapaslei.
Panikin na naui haha
(Mak 9:41)
40 #
Luk 10:16; Sun 13:20;
Mak 9:37; Luk 9:48. M'ertu ilev' kam'i kvrama al nmahan, ilev' Kana. M'ertu ilev' Kana, ilev' Hin la itep'a Kana ha. 41M'ertu ilev' pruvet ima al nmahan sena ti iv'i pruvet, hin ipalev' uliena pruvet, v'aha m'ertu ipalev' m'ertu p'as sena ti iv'i m'ertu p'as, hin ipalev' uliena m'ertu p'as. 42Ipavr ti m'ertu kinkin ipatu panikin na naui haha uaki a m'ertu pa lera ipamk, sena ti iv'i m'ertuak, nvrdaui, nvr a kam'i, Atua ipatu ulienan ani.”
© 2023 Presbyterian Reformed Church of Australia