Esta 4
4
A Esta im'ahu a ti ipap'tir kav'ana sanar arm'ertuan
1Laha, naran a Mutekai irndu si udlani ittu sera hin, iapr klusan, katu selpak m'a tih nap' arna p'akn. Sarei, iv'el kadav'a arna p't nut na v'anu lil, kav'ara eia, katakal istudau, sena ti irn istu istudau. 2Laha, imima asn pn liuan a mlin, kap'tir atlera, sena ti atvtu sarei a ti m'ertu kinkin ikahv'a eim lera, ipavr ti iua klus iv'i selpak. 3Laha, arna pruvins udlani, arna nut udlani v'nen hua, la iv'i rupletan a mlin ha, iv'a, arm'ertu a Suta avtakal istudau. Inap'i lera, avln tim'ah, kavvalau, kavtakal eia istudau. Arm'ertu istudau avtu selpak m'a tih nap' arna p'akr kavm'atr arna nadep'.
4Laha, artav'et na m'akarienan a Esta, m'er tamav avlak asnn nakl, avrav'a kavvrp'ep'a si lera an a Esta. Laha, a hau lil irn istu istudau. Sarei, itep'a klus kinkin asn a Mutekai, a ti ipalev'la selpak aranan. Aau, itu klus lera ani, v'eti iam'ahu a ti ipalav'r. 5Sarei, a Esta iv'ara an a Hatak, iv'i tamavan a mlin iamk, kav'i dui, la a mlin ittu sarei a ti ipap'aur a Esta ha. Sarei, a Esta iv'ana hua m'ei, kavr ti ipav'ana m'ei a Mutekai, a ti iparndu sei iani, karndu ti iani sena v'ata. 6Laha, a Hatak iv'a asn a Mutekai arna nut av'aran lil na v'anu lil, la imima asn pn liuan a mlin ha.
7Sarei, a Mutekai ivrp'ep'ei ani si udlani ittu sera hin arna silv'ienan, kavrur nav'et lil, la a Haman itturan sarei a ti ipataui al nmah na nav'etan a mlin, a ti apavrpep'nr arm'ertu udlani a Suta. 8Sarei, itu ruplet ani, iv'i v'nen hua (la atvulul sarei ani ha, arna v'anu lil a Susan). Lita lera ivr ti arm'ertu na v'anu apavrpep'nr arm'ertu a Suta. Laha, a Mutekai ivr ti ipatau an a Esta, kavrp'ep'a v'nen iter aranan, kav'ana hua m'ei, a ti ipav'a asn a mlin, kamiman sei ani. Ipanap'i lera, ipav'a asn a mlin, kamiman sei sanar arm'ertuan. 9Sarei, a Hatak iv'a asn a Esta, kavrp'ep'a sei a Mutekai itvr sarei ani.
10Sarei, a Esta iv'ana m'ei a Hatak, kavrp'ep'a sei hin ipavr an a Mutekai. 11Laha, ivr ti a, “Arm'ertu na m'akarienan a mlin udlani, m'er arm'ertu na v'anuan a mlin avrndu si laha--ipavr ti m'ertu kinkin, ipavr ti iv'i dui v'aha tav'et, aau, ipavr ti ipav'a asn a mlin al nut eim al nmahan, v'eti adav'ara ani a ti ipav'a, v'nen huan a mlin iamk uaki ipap'tir--m'ertu nen ipam'a pr. V'eti ipavr ti a mlin ipauada napilakt na nut huan, la aani a kul ha, kah lm'an asnn, m'ertu nen ipasilv'. V'eti adavv'ara kana a ti p'ava eim asn a mlin arna napn ineltl (30) laha.” 12Laha, avvrp'ep'a si lera an a Mutekai.
13Sarei, a Mutekai ivr ti apavvrpren a Esta ipanap'i laha, kavvr ti a, “Mav'ahur ti nakm paruh a nv' si laha sena ti klak al nmahan a mlin kasiv'r arm'ertu a Suta udlani. 14Ipavr ti nakm palak uaki hilaha, aau, nsarei m'ertu uraur ipalev'lar arm'ertu a Suta arna der, kani ti apavlak arna tamat, v'eti nakm, m'a nl nam'elan a tetiam, kam'i pavram'a pr. ?Hin ak irndu ti nakm ktama sarei kav'i a hau lil arna naran laha sena parei laha, v'aha inap'i?”
15Sarei, a Esta ivr anr ti apavm'alet asn a Mutekai, kavvrprani ipanap'i laha, 16“Pav'a kani ti arm'ertu a Suta, la avlak a Susan ha, avp'lt, kavln tim'ah sanak. Mavhan tim'ah, mavm'nm'n napn ipatl, lihat m'a ren. Sarei, kana, m'er artav'et na m'akarienak, p'vani ipanap'i lera. Ipanap'i lera, kana p'ava eim asn a mlin. Aau, p'en sei v'nen hua itukari, v'eti ipavr ti kana p'am'a sanan, ipap'as uaki.” 17Sarei, a Mutekai iv'el, sarei kan si udlani a Esta itvr sarei ani ti ipani.
© 2023 Presbyterian Reformed Church of Australia