Esta 3
3
A Haman iak a v'ahien iamk a ti iparpep'nr arm'ertu a Suta udlani
1Laha, itauatah a si udlani lera, a mlin Ahasueras ilev' a Haman, iv'i a natn a Hametata, iv'i m'ertu Akak, kani ti hin nut huan ima eia arna v'anu. Laha, iani ti ilak arna napl p'as kasiv'r arkavman udlani, la avlak m'ei kavan parei ha. 2Laha, arm'ertu na m'akarienan a mlin udlani, la avlak asn pn liuan a mlin ha, avsisihpu asn a Haman, kavani ti nahan iv'a eia, sena ti a mlin itvr sarei a ti apavani ipanap'i lera. V'eti a Mutekai iam'ahu a ti ipasisihpu asnn, a ti nahan ipav'a eia.
3Laha, arm'ertu na m'akarienan a mlin, la avlak asn pn liuan a mlin ha, avvr an a Mutekai, kavvr ti a, “?Nakm kaasapa v'nen huan a mlin sena v'ata?” 4Laha, itu hin, avv'ana m'ei arna napn udlani, v'eti iav'rn anr. Sarei, avvrp'ep'a si lera an a Haman, a ti apavla ti v'nenan a Mutekai ipap'tir, v'aha ikahei, sena ti a Mutekai itvr sarei anr a ti hin iv'i m'ertu a Suta. 5Laha, naran a Haman ila ti a Mutekai iasisihpu asnn, kala ti iapatei, nln irer istudau. 6Laha, iv'ah ti iv'i si pa uaki a ti iparp a Mutekai, sena ti arm'ertu kinkin atvvrp'ep'a sarei a ti arm'ertuan a Mutekai avv'i hir ak. Sena si lera, a Haman iv'ah ti iparpep'nr arm'ertu a Suta udlani, la avlak arna nut udlani arna v'anuan Ahasueras ha, sena ti avv'i arm'ertuan a Mutekai.
7Arna pai inal lman iru na ti Ahasueras iv'i mlin, arna nal itauamu, la nahan iv'i Nisan ha, avsran tais nahan iv'i P'ur (inep'a ti avan hlhal). Laha, avani arna nahn a Haman. Sarei, tais lera avv'iv'en napn sei ipatu hin, m'a nal ipatu hin. Sarei, avv'iv'en a ti ipav'i nal lman iru na nal, la nahan iv'i Atar ha.
8Inap'i lera, a Haman ivr an Ahasueras, kavr ti a, “Arm'ertu kinkin aviak arna v'anu, avamkma kavlak au au a m'ertu, v'eti avlak arna pruvins udlani arna v'anuam. V'nen huar avuraur nakl, ahavnep'a sarar nkar arm'ertu uraur. Laha, ahavan sei v'nen huan a mlin ivr ti apavani. Sena si lera, iaviviln a ti a mlin ipam'ahu ti apavlak uam. 9Ipavr ti a mlin iparn ipap'as ani, apatu v'nen hua ipamk, a ti apavrpep'nr udlani. Kana p'etu talen ipav'i silva ipav'i tausen inal (60,000,000,000 vatu) al lm'ar arm'ertu, la apavan parei lera ha, nav'et lera p'elav'i katau al nmah na nav'etan a mlin.”
10Sarei, a mlin ilev'la rinan arna nirh lm'an, katau an a Haman, a natn a Hametata, iv'i dui Akak, iv'i m'ertu imlanr arm'ertu a Suta nakl. 11Sarei, a mlin ivr an a Haman, kavr ti a, “Kana p'etu nav'et lera, m'er arm'ertu lera, anh, a ti nakm pan sei anr arm'ertu lera, ipanep'a nut nakm kv'ah ti ipaviviln a ti pani ipanap'ei.”
12Sarei, avv'ara anr arm'ertuan a mlin la avulul a sei nakl ha, arna nal lman itl na napn arna nal itauamu. Laha, avulul a v'nen hua iamk, inep'a nut a Haman itvr sarei anr a ti apavani ipanap'ei. Sarei, v'nen hua lera iv'a asnr armlin lililan a mlin, m'er kavman, la avp'aurr pruvins udlani ha, m'er arm'ertu lililar arm'ertu udlani arna pruvins udlani. Avulul ani arna v'nenar pruvins nakl, inep'a ti iv'i v'nenar arm'ertu udlani p'sev'. Avtaui arna nahan a mlin Ahasueras, kavtu mak iamk aranan, iv'i makan a mlin. 13Laha, avtap'er lita lera avrav'a arna pruvinsan a mlin udlani. Inap'i lera, avtaui ti, arna napn ipamk, ipav'i nal lman itl na napn arna nal lman iru na nal (nahan iv'i Atar), arm'ertu apavrpep'nr arm'ertu a Suta udlani, arki avv'i m'ertarep', m'er armalakal, m'er armardel papa, m'er artav'et. Inap'i lera, apavutakm anr, kavlev' siar, kavrpr dav'a ti hir udlani apavram'a.
14Laha, avtaui ti apavvrp'ep'a v'nen hua lera, la atvtap'ei arna pruvins udlani ha, asnr arm'ertu udlani, a ti apavandedp' hir sena napn lera. 15Laha, ruplet lera iv'a asnr arm'ertu udlani, sena ti v'nen huan a mlin iani ti si lera itu hin ilahml sarei. Sarei, v'nen hua lera iv'a asnr arm'ertu avlak arna v'anu hua lil nahan iv'i Susan. Laha, a mlin m'ei a Haman arlak a ti aparm'nm'n, v'eti v'ahienar arm'ertu arna v'anu lil a Susan idedhar, ahavrndu sei apavani.
© 2023 Presbyterian Reformed Church of Australia