Parei 28
28
A Pul iv'iv'en nut huan a Mlin Eia arna nut a Multa
1Naran atvrama sarei aut, avrn ti naha nut lera iv'i Multa. 2M'ertu avlak atlera avan si p'as a kam'em' istudau. Nu iu, m'la iak naran lera, v'eti aviviv nap' kavmhmah a kam'em'. 3Hin a Pul itupien rana nap' kinkin kataui arna nap', v'eti nmat iamk irula hin sena ti irn ti nap' ivuv, kahada lm'an. 4Naran nelnal arna nut lera avla ti nmat lera ilal arna lm'an, avvrvr a hir, kavvr ti a, “Nvvrdaui, aulera iv'i dui irp m'ertu. Hin nata iutakm ani, v'eti atuad la iutakm a m'ertu stu ha ikam'ahu a ti iksilv'.” 5V'eti ivividen lm'an, nmat irs al nap', iutakm ani. 6Nelnal avlak kavtrah ti lm'an iparen, v'aha ti ipars ipalahml karhap'ni. V'eti naran avtrahi dav'a kavla ti si kinkin iutakm ani, avvav v'ahienar kavvr ti iv'i atua kinkin iamk.
7Imima asn nut lera, dui iamk ilak, nahan iv'i a Puplias. Hin iv'i dui lil arna v'anu lera, nadep'an iak. Ien mamh kam'em' istudau kalev' kam'em' nvlak al nmahan kap'aur kam'em' napn itl. 8Dav'a, a tetian a Puplias im'at katap'h a nadei kam'atr arna pasan uaki. Laha, a Pul iv'a eim katu tamat katu lm'an aranan kani ti ip'as ml. 9Itauatah a si lera, m'ertu uraur arna nut lera la si ianr ha, avrama asn a Pul, laha ianr avp'as ml. 10Laha, avtuvn a sei istudau a kam'em'. Naran nvln nut lera avtu si udlani iviviln a kam'em' al nauak, a ti p'viak ani arna navanel.
A Pul ier nut a Rum
11Kam'em' nvlak dav'a nal itl arna v'anu lera, kavruh arna nauak iamk iaan Aleksadria, kadama katutuah atlera sena naran na m'la. Naha nauak lera iv'i Kasta m'ei a Puluks. 12Nvrama kavier nut iamk, nahan iv'i a Sairakus, kavlak napn itl atlera. 13Kavv'el ml kavmlden nut lera kavier a Resiam. M'ih nen nalen iendan arna Saut katvtv, paua nen nvier a Putiuli. 14Arna nut lera nvpasla tv'ald kinkin, laha avmiman a kam'em' a ti p'vlak m'er uik ipamk, sarei nvrav'a asn nut a Rum. 15Naran tv'ald avlak a Rum avrn v'nen ivrur kam'em' avrama ti apavsapa alam'em'. Hir kinkin avv'el kavrama arna nut iamk avulul a sei nakl, avr ti iv'i nkan Apias, hir kinkin avrama asn nut iamk avr ti iv'i Nmah Itl Na V'anudl. Naran a Pul ilar ivr ip'as an Atua kadama kahua mau arna nln.
16Naran nvier a Rum, mlin na m'rnur itu dui na p'resin udlani al lm'an a mlin lil na m'rnur, v'eti avm'ahu a ti a Pul ipalak mamk m'a m'rnur iamk ipap'auri.
A Pul ivrp'ep'a v'nen p'as asnr ardu lilil a Isrel arna nut a Rum
17Napn itl iv'siau, a Pul iv'ara anr ardu lilil a Isrel a ti apavrama kavp'lt. Naran avrama kavp'lt, a Pul ivr anr kavr ti a, “Tv'alk udlani, kana naan si kinkin kamlen m'ertu a Isrel v'aha p'klr a tetiad, v'eti hir a Serusalem avuada kana kavtu kana al lm'ar ardu a Rum. 18Hir avmiman sei istudau a kana, dav'a kavrn ti apavuln kana, sena ti ahavpasla si stu kinkin nani iviviln a ti p'am'a sanan. 19#Parei 25:11.V'eti ardu a Isrel ahavrn ti apavuln kana, laha, iani ti nv'ara an a mlin lil a Rum, iav'i sena ti nrn p'emlanr arm'ertuak a Isrel. 20Sena si lera, nv'ara a kam'i a ti p'ela kam'i kav'ana m'a kam'i. Sena ti atvtu sera sen arna lm'ak, sena sei m'ertu a Isrel avv'ahi kavtrahi.”
21Hir avvr ani kavvr ti a, “Ruplet kinkin iahadan a Serusalem kaier kam'em' kavrurh. Tv'elm'em' kinkin avandan atlera kavrama ahavvrp'ep'a v'nen kinkin kavvrurh istu. 22V'eti kam'em' nvrn ti p'vrn sei nakm kv'ahi, sena ti nvrndu ti nelnal arna nut udlani avmlen sas lera.”
23Hir avtu napn kinkin iamk sanan, laha, nelnal avstudau avrama arna nut a Pul ilak. M'etav'aran ier lihat ivrur v'anuan Atua kavrp'ep'ei anr kav'ana arna v'nen huan a Musis m'a v'nenar pruvet karv'dinar a ti apavv'ah a Iesu. 24Hir kinkin avv'ah sei ivri, v'eti hir kinkin ahavv'ahi. 25Hir ahavp'lt arna v'ahienar, kavruruh, v'eti itauamu a Pul ivr v'nen laha anr kavr ti a, “M'im'iln P'as ivrdaui naran ivr anr a tetiad arna v'nenan Aisaia, iv'i pruvet, 26#Aisaia 6:9,10.kavr ti a, ‘Pav'a asnr m'ertu lera kavr ti a, “Kam'i pavrn sei ipastudau dav'a, v'eti mkavrndaui, pavla sei ipastudau dav'a, v'eti mkavledaui. 27Sena ti m'ertu lera avrama kavhua arna nlr, drlnar avrla iprpar, atvp'leskar sera m'atar, imahei ti apavla sei a m'atar, kavrn sei a drlnar, kavrndu sei arna v'ahienar, kavvav nlr kavrama asnk a ti p'emhmah anr.” ’
28Sena si lera, nrn ti kam'i pavrndu ti v'nen p'as na ti Atua ipalev'la m'ertu, itav'a sarei asnr v'anudl, laha hir apavv'rn ani.” 29Naran itvr sera v'nen lera, ardu a Isrel avruh kavv'lv'al m'a hir istudau.
30A Pul ilak atlera kahiris a pai iru, al nmahan hin prki iuli, kalav'r m'ertu udlani la avrama asnn ha. 31Kavrp'ep'a v'anuan Atua, kav'iv'en v'nen ivrur a Mlin Lilad a Iesu Kristu, iadedrn a sei, m'ertu kinkin iatukari.
© 2023 Presbyterian Reformed Church of Australia