Parei 27
27
A Pul iv'a arna nauak a ti ipav'a a Rum
1Naran atvtu sarei a ti p'vrav'a arna nauak kavrav'a a Itali, avtau a Pul m'er ardu uraur avp'resin al lm'a dui iamk, nahan iv'i a Sulias. Hin iv'i mlin na m'rnur udlani avr ti avv'i nkan a Ukastas. 2Nvrav'a arna nauak iamk idan Atramitiam, kavv'el kavrn ti p'vrav'a arna v'anu lilil iter arna nut a Esia. Dui iamk a Masetunia idan a Tesalunaika, nahan iv'i Aristakas, isapa kam'em'. 3M'ih nen, nvier a Saitun. Hin a Sulias imhmah an a Pul kam'ahu a ti ipav'a asnr tv'aln a ti apavp'auri. 4Dav'a, kam'em' nvruh atlera kavv'el kav'siau asn tv'eliel na v'anu a Saipras, sena ti nalen itukar kam'em'. 5Kavv'el kavv'siau asn nut a Silisia m'a nut a Pamvilia al p't nata, kavrama kavier a Maira, iter arna nut a Lisia. 6Arna nut lera, mlin na m'rnur ipasla nauak iamk idan Aleksadria a ti ipav'a a Itali, kalev' kam'em' nvrav'a aranan.
7Kavv'el papa dav'a dav'a napn inelnal, kavier a Nitas, v'eti ihua istudau. Nalen itukar kam'em' ml, kani ti nvv'el kavsapa tv'eliel na v'anu a Krit, asn nut a Salmuni. 8Kavsiv'i, v'eti ihua ihuadau, dav'a dav'a kavier arna nut iamk, avr ti iv'i Pasis P'as, iter mima asn v'anu lil a Lasia.
A Pul ivrp'ep'a ti der ipaiarr arna nauak
9V'eti napn istudau itv'siau sarei, hilaha, ihua a ti apunanut arna nauak, sena ti itsiv' sera napnar m'ertu a Isrel na ti aln tim'ah sena si stu. Sena si lera, a Pul iv'ana m'er, 10kavr anr kavr ti a, “Ardu, kana nla ti der lil ipaier nakd arna navanelad. Sei istudau arna nauak ipasel, nauak nen ipamrmaur. Iav'i si lera uaki, v'eti silv'iena nakd kinkin ipamln.” 11V'eti mlin na m'rnur iv'rn a v'nena dui iua pt nauak m'a dui nauak iv'i nkan, iav'ah v'nen a Pul ivri. 12V'eti nut p'as ihei a ti p'vlak a nln arna naran na m'la. Sena si lera, nelnal avvr ti p'vruh atlera kavv'el a ti p'vier a Viniks, kavlak atlera arna naran na m'la. Nut lera iv'i pasis uraur arna nut a Krit, itapar arna Sautues (SW) m'a Nutues (NW).
Nalen irp
13Naran nalen itvtv isusupa uaki kandan arna Saut, avv'ah ti aviak a navanelar, kavrv' aka kavvrvr al nata kavsapa p'ak nut a Krit. 14V'eti iap'arei, nalen irp, ilaph dan arna Nutis (NE) Naha nalen lera iv'i Iuruklaitun. 15Kadama kaier nauak kani ti nkavvavdr pt nauak ikv'ev'ah nalen. Dav'a, nvlni uaki, iv'el. 16Laha, nvv'el kavv'siau arna tv'eliel na v'anu pa iamk, nahan iv'i Klauta, la itukar nalen ha, kavm'akar istudau a ti p'vhuda put. 17Naran atvhuda sera put, avlev' nahau kinkin kavhutalu a nauak dan a nv'n ima eia, a ti ipauadei ipahua. Nelnal avdedrn a ti nalen ipasran nauak arna nun iter a Sirtis. Sena si lera, avululla sel ima a nadep', kavm'ahu a nauak ti iv'el. 18Nalen lil lera irp kam'em' istudau. Dav'a m'ih nen avlev' sei iter al nauak kavsrani al nata. 19Arna nitla napn, nvlev' su nauak al lm'am'em' kavsrani al nata. 20Arna napn inelnal, ren m'a lihat, navla neiel m'a msi. Nalen lera irp kam'em' istudau, kani ti nvv'ah ti nkavsilv' ml.
21Naran avlak napn inelnal ahavhatat, a Pul ip'tir a p't nut nar kavr ti a, “Tv'alk udlani, ipavr ti mvv'rn a v'nenak itauamu, naran nvr ti m'avln nut a Krit, imahei der laha imdaier nakd, si udlani lera imdamln. 22V'eti hilaha nmiman a kam'i ihua a ti pavrn ipap'as, sena ti kam'i kinkin ikahm'a, nauak uaki ipastu. 23Sena ti nanv' lihat, enselan Atua ima kap'tir asnk. Kana nv'i m'ertuan Atua lera, kan parian nakl. 24Ivr a kana kavr ti a, ‘Pul, madedrn. Mkp'tir pr arna nahn a mlin lil a Rum. Parni, Atua ittu sarei anh a ti pavsilv' m'er nelnal kvlak m'er arna nauak.’ 25Sena si lera, tv'alk, kam'i udlani pavrn ipap'as. Sena ti kana nv'ah Atua. Nrndu ti si udlani ipatu hin ipanep'a nut itvr sarei a kana inap'ei. 26V'eti nalen iksran nakd pr arna v'anu pa ipamk.”
27Naran nalen itrp sera kam'em' napn itnal lman itav'a (14) arna nata lil, nahan iv'i Metiterenian, ier p't lihat, puskru avv'ah ti ntvier asn v'anu kinkin. 28Laha, avlev' nahau alida aian dv kinkin aranan, kavsrani al nata kavla ti nata ip'arei a nadep' iv'i mita inelv'a (40) Naran avv'el ml isusupa avsrani ml, kavla ti ier mita ineltl (30) 29V'eti avdedrn a ti nalen ipasran nauak arna nav'et. Sena si lera avlev' aka iv'a kavsrani dan arna nap' nauak, kavtrah ti nut iparen. 30V'eti puskru avrn ti apavruh kavln nauak, kavkasr put al nata, kavtutuah kavani inep'a ti apavsran aka dan arna pt nauak. 31V'eti a Pul ivr an a mlin m'er m'rnuran kavr ti a, “Ardu lera akvlak pr arna nauak, imahei kam'i pavram'a.” 32Laha, arm'rnur avtrus nahau na put kavlnp'lei iv'el.
33Ihih ti nut iparen, a Pul iv'ana m'er udlani, kavr ti apavhatat, kavr ti a, “Kvln tim'ah napn itnal lman itav'a itv'siau, kaavhan si ipamk ier dika. 34Sena si lera nvr a kam'i ihua a ti pavhan tim'ah kinkin a ti pavsilv', sena ti nil ptm'i kinkin ikahamk ikars.” 35Naran itvr sera si lera, ilev' p'ret kavr ip'as an Atua sanan arna nah nelnal, kakausi kahandinei. 36Arna naran lera hir udlani avrn ip'as, kavlev' tim'ah kavhani m'ei. 37Kam'em' udlani nvlak arna nauak lera nvv'i 276. 38Naran nelnal atvrapd sarei, avlev' uit aan p'ret aranan kavsrani al nata a ti nauak ipatetev'.
Nauak ispa nav'et arna nut a Multa
39Naran nut iren, puskru ahavledu nut lera. V'eti avpasla pasis iamk nun iak. Avv'ah ti nauak ipav'a aut atlera, ipavr ti alan ipaiak. 40Laha, avtrus udlen iel aka kavulni al nata, kavululla nahu na stia, kavrv' sel na pt nauak iv'a eia, sena ti nalen ipatvi, kavv'el asn nun. 41V'eti nauak ier nut nata iap'arei a nadep' kadav'a kaspa nun. Laha, ptn ihlda nun, iav'el ml. Sarei, nahu na nata ima kahua istudau kakapr nap' nauak.
42Laha, arm'rnur avrn ti apavrpep'n dui na p'resin udlani, imahei ti hir kinkin apavsihavs al nata kavsuim kavruh. 43V'eti mlin na m'rnur irn ti ipamhmah an a Pul, kavrkarr a ti amavani, katu v'nen a ti dui avsuimdau apavsihavs al nata kavier aut. 44Kavr ti duanar udlani apavsapar, nki avua p'lan, nki avua svs nauak. Inap'i lera dav'a hir udlani avier aut, m'ertu kinkin iamln.
© 2023 Presbyterian Reformed Church of Australia