Memaŋa 4
4
Bera yadwonna
1A bia bam, cheigi-na á kwo bera. Ke-na á zwa keo se á wane á lɔre lɔra. 2A kwea yam jege kuri mo. Konto to, yé ve-na a bera yam. 3Amo biini maŋa ne ye a ta ye bu-pwola to mo a nu déem swoi-ne, ne a na ye o bu-doa to. A kwo de ma jeini-ne tega ne 4o bere-ne o we:
“Ta‑n jege a botare sem n boboŋa ne,
ye n daare n ta‑n ke n tɔge a nia yam,
se n wó na momwɛ-dɛɛre.
5Beeri swa dedaane yi-poro.
Yé swei a bera yam ni ne, nam yé ve-ya.
6Yé ma n kwaga n ya yi-poro,
se o wó taa kwoli‑m.
Nam yɔɔre n ta‑n swoi‑o
se o taa nii n baŋa ne.
7Yi-poro mo jege kuri
ko dwoi wonnu maama.
Konto to, kwaane n beeri swa jei.
N ná maŋe n beeri kolo maama
se n ta‑n tei,
ta chɛ se n lɔre lɔra.
8Pa yi-poro taa jege lonne o pa‑m,
se o wó pa n na yere-zɔŋɔ.
N ma‑n ná kukwori‑o,
o wó pa n na zula.
9O wó ke zaane o ke n yuu ne,
ne o milimi ga-punnu daane mo
o sɔ-te o ke da to.
O ta wó pa n na nenɔŋa,
ne o kwei paare yipuga mo
o pu n yuu ne to.”
10Amo bu, sɛ se n ke n tɔge
amo bera yam,
se ko pa‑m momwɛ-dɛɛre.
11Amo kwei nmo mo a de
swa chwoŋa kam ne,
se n ta‑n tɔge chega chwei sem.
12Nmo ma‑n ná via,
kolokolo bá che n yiga.
N nam ná duri lela,
n bá‑n tiri n to tega ne.
13Zamese bera n ke n boboŋa ne,
se n yé yage-ya.
Fɔge n nii ya baŋa ne,
kokuri yanto mo wó pa
n ni ŋwea ywoni.
14Yé lwoni puseŋ-nyena kikia yam,
naa n tɔge nɔn-balwaaro nɛ-bwora.
15Nam lɔŋe banto dwi chwei sem,
se n ja n tete de ba totoŋ-naga kam.
Pipiri se n daare n ta‑n vei
n veiŋa.
16Kokuri, ba ná wo toŋe lwarem,
ba bá peini ba dɔ.
Dɔɔne ba tui ba yia,
ne ba ná wo pɛ se nɔɔno to tega ne.
17Puseŋa kikia de vuvuga totoŋa mo ye ba ni-wodiu.
18Nɔn-ŋona na jege ŋwea kalo to
nye de te-pora ni pwooni dem mo.
Pwooni dem konto lɔɔre de ke da mo
se ko vo ko yi wea tetare maŋa.#Danyeli 12:3
19Ko nam ná ye puseŋ-nyena bam,
ba ŋwea maama yɔɔre
ka ye ligi-ligi mo.
Ba maa yeiri wonnu telo na pae ba tiri ba toe tega ne to.#Jɔn 12:35
20Amo bu, ke n zwa keo se n cheigi
kolo a na jege se a ta de nmo to.
21Yé swei a bera yam swia,
de fenfee de.
Nam yɔɔre n pa ya taa tigi
n boboŋa ne.
22Kokuri, balo na lɔre-ya to
wó na ŋwea ya baŋa ne.
Ya ta maa pae nɔɔna jege yazura chekke.
23Kolo na dwoi maama to,
fɔge n ta‑n yei n boboŋa yam ni ne.
Kokuri to, n ŋwea totoŋe maama puli dáane mo.
24Yé ta‑n jege ni-zɛ ni-zɛ.
Nam yé ta‑n kare n ŋɔɔne ta-yɔɔro.
25Kwaare n yuu n yiga ne,
se n yé bare n nii jei jei.
26Ta‑n yei n tete na-veili ni ne,
se n tɔge chwoŋa kalo
na ye chekke to.
27Yé lɔ chwoŋa n vo jazem seeni,
naa jagwia seeni.
Nam yɔɔre n ta‑n cho n tete
de lwarem kikia.
© 2020, Ghana Institute of Linguistics, Literacy and Bible Translation (GILLBT)