Memaŋa 3
3
Pa Wɛ n chega
1Amo bu, yé swei wonnu telo
a na jege a bere‑m to.
Nam yɔɔre n pa a nia yam
taa tigi n boboŋa wone.
2Kokuri, n ná tɔge-ya,
n wó na momwɛ-dɛɛre,
ye wonnu da chwoŋa te pa‑m.
3Fɔge n ta‑n jege chega de swono,
se n yé yage-te.
Pa tento taa nye de zambili
n na kwei n de n ba ne to.
Pa te taa tigi n boboŋa ne wuu,
ne n na popone-te n tiŋi
kandwa-pelɛ yera ne tei to.
4Konto baŋa ne mo Wɛ de nabiina
wó taa lage n ni taane,
ye n na yere-ŋom.
5Kwei n chega maama
n daŋe Baŋa Wɛ baŋa ne.
Nam yé teege nmo tete boboŋa baŋa ne.#Jeremia 9:23-24
6Totoŋe delo maama n na wó ke to,
ta‑n yei Baŋa Wɛ ni ne.
Konto mo o wó pa wonnu maama kwei te chwoŋa te pa‑m.
7Yé fɔge n jeeli n yuu ne we
nmo mo yei n tia.
Nam ta‑n kɔre Baŋa Wɛ
ye n duri lwarem kikia.
8Konto mo wó pa n na yazura,
ye n dam dem wó jwoori n tete ne.
9Kwei n jejaano tem
n ma n zuli Baŋa Wɛ,
se n daare n kwei n da-yiga wodiiru pɛɛra n pa‑o.#Nia Gulim 26:2; Malaki 3:10
10Konto baŋa ne mo n tuli wó su
de wodiiru,
ye sa-doora de taa daga ba gaale,
pa n yeiri n na wó ke-te mɛ.
11Amo bu, ne Baŋa Wɛ ná jege‑m
o koresa, se n sɛ koresem.
O maa ná bwɛ‑m,
se n yé pa n yiga nyɔne.
12Kokuri, Baŋa Wɛ korese
balo o na swoi to mo,
ne kwo na ke tei de o bu-swono to.#Hiburu 12:5-6
Swa na lana tei to
13Wolo maama ná lɔre swa
ye o jege yi-poro,
kotu yuu ywomma.
14Swa tiini ya jege kuri
ya dwoi lu-nyenno.
Ya maa jege nyɔɔre
ya dwoi sabu-seŋa de.
15Ya ta maa jege lonne
ya dwoi kandwa-nyenno.
Nmo fera ná zo woŋo kolo maama,
ko bá yi swa na ye tei to.
16Swa zei momwɛ-dɛɛre mo o jazem ne.
Jejegero de yere-kamunu maa wo
pɛɛra yalo o na zei o jagwia ne to.
17Swa chwei sem jege ywoni mo.
Se tɔgem maa pae nɔɔna bochara zura.
18Swa nye de tio kolo bia
na pae ŋwea to mo,
balo na beeri-ya se ba jwoŋi to
tei ne.
Ya ma yeini ya ja yu-ywoŋo ya ba
ya pa balo na puuri-ya ba ja to.
19 Baŋa Wɛ dɛ o swa ŋwaane mo
o chwi tega baŋa kam kuri.
O ma tɔge o yi-poro baŋa ne
o pa se wɛyuu kom de wora.
20O mɛ o yeino mo o pɔɔre
naneero tem yera yera,
ye o daare o pa doa taa zege
kunkwonnu wone ka nena.
21Amo bu, ta‑n mae swa chekke
de boboŋ-laaro n toŋa.
Yé pa se te vere n jeŋa ne
te daare‑m.
22Tento mo wó pa n ŋwea
taa jege kuri lanyerane,
ye ka taa jege lam ka pa‑m,
ne zambili mo n de n ba ne to.
23Te ta wó pa n veiŋa tɔge chwoŋa,
se n yé seeri n to tega ne.
24N ma‑n ná tigi n sia,
foone bá taa jege‑m.
Nmo nam ná peini se n dɔ mo de,
n wó dɔ mo yɔlɔ-lɔ-lɔ.
25Foone bá ja‑m,
ne lɛɛro ná pɔpɔ te ba n baŋa,
naa chɔgem ná to puseŋ-nyena yuu ne.
26Kokuri, Baŋa Wɛ mo wó pa
n wo taa tiga.
Wonto wó taa cho‑m cham wone,
se kolokolo yé ja‑m pa n to.
27N dwoŋi ná maŋe se n woli‑o,
ye nmo ná jege kolo
na wó woli‑o to,
se n yé vane‑o.#Galatia 6:10
28Nmo ná wae n dwoŋi n wola leile,
nam yé ta ded‑o we,
“Vei se n jwa jwoori n ba
se a woli‑m.”
29Ko ná ye n faro wolo
na pɛ nmo o chega to,
yé boŋe lwarem se n ma n chɔge‑o.
30Yé mage kantɔgɔ de nɔɔno
yɔɔ yerane,
ne kotu ná wo chɔge n yiga
kolokolo baŋa ne.
31Yé pa se n boboŋa zo
nankɔ-nyena kikia wone.
Nam yé lwoni ba totoŋ-naga kam.
32Kokuri, Baŋa Wɛ chuli nɔn-ŋollo mo.
Ko nam ná ye nɔn-ŋona,
o lɔge o wo o bere banto mo.
33 Baŋa Wɛ sɔɔle lwarem mo o yage
puseŋ-nyem sɔŋɔ ne.
Ko daare nɔn-ŋom sɔŋɔ su
de o zaane mo.
34Ko ná ye nɔn-lwɛɛna,
Wɛ nii-ba kafɛ mo.
Ko daare ye o zaane wo balo na tu ba tete to yuu ne.#Jemsi 4:6
35Swa tu yere wó zaŋe mo.
Nɔn-jworo maa wó di o chaveera.
© 2020, Ghana Institute of Linguistics, Literacy and Bible Translation (GILLBT)