Izaya 3
3
Lɛɛro wó ba Judah tiina baŋa
1Nii-na ywo!
Yuu-tu Baŋa Wɛ wom na ye Paŋwa to ti o yiga mo
se o le Jerusalem tiina bam de Judah tiina bam
ya na teege wonnu telo maama baŋa ne to.
Ko maa ye ba wodiiru de ba na bam mo konto.
2O ta wó le ba bembɛ sem, de ba jar-keira bam,
de ba dedɛɛra bam, de ba sampwori sem de.
O maa wó le vora bam, de nakwa bam ba wone.
3O daa ta wó le ba jar-keira yiga tiina, de ba nɔn-yerro tem,
de ba swa tiina bam, de ba gwaro tem, de ba liri-mwa tiina bam de.
Baŋa Wɛ maa we:
4“A lage a kuri busɔ-nyena mo se ba taa ye teo kom dedɛɛra,
se ba kwei boboŋ-yɔɔro ba taa maa nii teo kom.
5Nɔɔna wó da ko ŋwaane se ba taa bɛɛse daane mo.
Baaro wó nwoŋi o dwoŋi kwaga ne,
ye fara de nwoŋi da-kwaga ne.
Bia daa bá taa nege nɔn-kwe.
Nɔn-yɔɔro de maa wó dwoni de nɔn-yum.
6Kanto maŋa ne nɔɔno wó vo o kwo sɔŋɔ
o kuri o dwi nɔɔno dedoa ye o ta ded‑o o we,
‘Nmo na jege gɔrɔ n zoore to ŋwaane,
ta‑n ye dé yiga tu se n le debam lɛɛro tento wone.’
7Konto tu de maa wó leiri o ta jaja we,
‘Amo bá wane abam a jwoŋi a yage.
A ba jege wodiu, naa gwaaro a sɔŋɔ ne.
Konto ŋwaane, yé le-ne-na se a ji nɔɔna bam yiga tu.’ ”
8Nii-na! Jerusalem teo kom yɔɔre ko titirigi mo se ko to!
Judah kateiri dem maama wora de toe mo!
Ba ni taane de ba kikia maama ba tɔge Baŋa Wɛ boboŋa.
Ba maa mae ba kwaga ba ya wonto de o paare dem.
9Ba yibia maama bere we ba ba lage Baŋa Wɛ ni taane.
Ba maa yɔɔre ba ke wɛleera jaja,
ne Sodom tiina déem na ke tei to.
Lɛɛro mo wó yi-ba!
Ko maa wó zege ba tete yera ne.
10Ko nam ná ye balo na zege de chega to,
ta de-ba we, wonnu wó tɔge chwoŋa te pa-ba.
Ba wó na ba totoŋa yam nyɔɔre.
11Lɛɛro taa wo puseŋ-nyena bam baŋa ne!
Cham mo lage de yi-ba!
Ba lage ba na ba totoŋ-balwaaro tem ŋweero mo.
12Busɔ-nyena mo jege a nɔɔna bam ba bɛɛsa.
Kaana de maa jege-ba ba nia.
Amo nɔɔna bam, á yiga tiina bam mo jaane abam ba ywori.
Ba maa pae se á tusi chwoŋa kam.
13 Baŋa Wɛ tete nam mo tu se o saŋe nɔɔna bam.
O jege taane mo de-ba.
14 Baŋa Wɛ lage o di o nɔɔna nakwa bam,
de ba dedɛɛra bam taane, ye o ta de-ba we:
“Abam mo jaane amo Vini teeni kara kam á chɔge.
Á ta daare á vere wonnu nabwona tei ne
á ja á zo á tete sam wone á tiŋi da.
15Wɔ mo pɛ abam chwoŋa
se á ta‑á yɔɔre á peene a nɔɔna bam?
Á ta maa jege yiniga tiina jana á nyɔa.”
Paŋwa Tu Baŋa Wɛ mo tage konto.
16 Baŋa Wɛ ta ma ta o we:
“Jerusalem#3:16 Jerusalem: Hiburu = Zion teo kaana bam tiini ba bere ba tete mo.
Ba maa kare ba via,
ye ba ba nii ba nae nɔɔn-nɔɔno.
Ba maa jege ba yia ba soge baara se ba da ba kwaga.
Ba maa na vei to, ba jege ba kura mo ba dole ba bere nɔɔna.
Ba maa kare ba vei ye ba na-jullu tem dɔne de sɔɔ.
17Konto ŋwaane, a nam wó pa se ŋɔn-daala jeini ba yuni tem ne,
ye a daare-ba a zege de kuri-nɔrɔ yerane.”
18Maŋa kam konto ná yia, Baŋa Wɛ wó le Jerusalem kaana bam yera zela yalo na pae-ba lam to, se o daare-ba o zege kafɛ. Ko maa ye ba na-jullu tem, de ba zambila yam, de ba yum lu-nyenno tem, 19de ba zwa-kwana yam, de ba je bɛ sem, de ba gare-fefale selo na kwoli ba yibia to. 20O ta wó le ba yu-kwale sem, de ba ban-jullu tem, de ba vovwe sem, de ba talwoŋ-ywei sem, de ba swa-gungwollu tem, 21de ba jafola yam, de ba momwa kwana yam. 22Ko nam ta ná ye ba gare-nyenno, de ba gare-dedwaaro, de ba gare-danno tem, de ba tampɔro tem, 23de ba niiru tem, de ba gare-fefale sem, de ba yuu gare-yia yam, de ba gare-woru tem, Wɛ wó le wonnu tento maama mo kaana bam tei ne.
24Ba wó taa teene se lwom na ywona to mo zaŋe,
ye ba yera lwom nam mo wó chɛ nɔɔna momwa ne.
Ba ya ná teene teiŋa vovwe,
ba wó na ŋone yerane mo.
Ba ya ná teene se ba yu-ywei taa lana,
ba yuni tem wó fe te daare yu-kapwooru mo.
Ba ya ná boŋe se ba zo gare-nyenno,
ba wó zo gare-nyenyaaro mo.
Ba lam dem wó leiri de ji wo-yɔɔro tento dwoŋi mo.
25Á teo kom baara bam wó te jara-keim baŋa ne mo.
Á bembɛ sem de wó tɔge jara baŋa ne mo ba te.
26Jerusalem teo manchwo-peo kom tete wó taa keeri mo ga ŋɔɔ,
teo kom na yɔɔre ko chɔge ye nɔɔna daa tera ko wone to ŋwaane.
Ko maa wó taa nye de kaane na jei tega ne bwori
ye o wo yɔɔre ko chɔge to.
© 2020, Ghana Institute of Linguistics, Literacy and Bible Translation (GILLBT)